Yeshaya
60 “Ebuee, Ô muana mukashi, palakasha etaata, muanda etaata diobe dibafiki.
Ntumbo ya Yehowa ikuete nkumunyika.
2 Muanda tala! Mufito aukabuikila nsenga
Na mufito wi bukopo aukabuikila miilo;
Anka Yehowa akamunyika etaata podi,
Na ntumbo yaye ayikamueneka podi.
3 Miilo ayikende ku etaata diobe
Na ba nfumu abakende ku ntumbo yobe ayipenyapenya.*
4 Buusha meso oobe na otale mpese yobe yoso!
Mbebabungie boso; bakuete kufika kodi.
Bana bobe balume abatungunuka na kufika kukatukila kula,
Na bana bobe bakashi abafiki basemunue mu kifuka.
5 Mu kiakia kipungo okamono na okekala na muloo wi bungi,
Na eshimba diobe adikakupila na adikauulu na muloo wi bungi,
Muanda abakatumu bupeta bua kalunga ka mema kodi;
Na bupeta bua miilo abukafiki kodi.
6 Bisaka bia tumelo abikabuikila nsenga yobe,
Tumelo tulume tuana tua ku Madiane na ku Efa.
Bantu boso ba ku Sheba abakafiki;
Abakafiki na ôlo na oliba.
Abakaukisha ntumbo ya Yehowa.
7 Bisaka bioso bia mikooko bia ku Kedare abikabungibua kodi.
Mikooko ilume ya ku Nebayote ayikakufubila.
Ayikakuminyibua bu milambu pa kilambuilo kiande,
Na nakekasha nshibo yande ya ntumbo* buwa.
8 Bano bakuete kupapama bu makumbi ba nanyi,
Nka bu makutshi aende ku tushibo tuao?*
9 Muanda bisangi abikakulupila muandi;
Mashuwa a ku Tarsise nyi e kumpala,
Bua kufika na bana bobe kukatukila kui bula,
Pamune na kiamo kiabo kia arja na ôlo aabo,
Bua kutumbisha eshina dia Yehowa Efile Mukulu oobe na Eselele a Isalele,
Muanda akakutumbisha.*
10 Bantu benyi abakebaka midimba yobe,
Na ba nfumu babo abakakufubila,
Muanda mu nsungu yande ne mukukupile,
Anka mu kalolo kande nakakupushisha lusa.
11 Bibelo biobe abikekala muasa nsaa yoso;
Tabakebifungu kanya sunga bufuku,
Bua kufika na bupeta bua miilo kodi,
Na ba nfumu babo nyi abakekala ba kumpala mu uno muanda.
12 Muanda muilo oso sunga bunfumu boso bishabikakufubila abikashimina,
Na miilo ayikabutudibua binyibinyi.
13 Ntumbo ya Lebanone ayikafiki kodi,
Pamune na mutshi wa jenevriye, mutshi wa frene na mutshi wa sipre,
Bua kuikasha mbalo yande ya kishila buwa;
Nakatumbisha mbalo ya ngua yande.
14 Bana ba bantu babaadi bakukiengieshe abakafiki na bename kumpala kobe;
Baba boso abakukitshina mianda kushi kanemo abitungu bename ku ngua yobe,
Na abakakuitanyina bu kibundi kia Yehowa
Siyona a Eselele a Isalele.
15 Pamutue pa kuikala muntu abadi basumbushene na abadi bashikue, kushi muntu akidila modi,
Nakakuikasha nsulo ya kuitumbisha kua loso,
Muanda wa kusankila mu bipungo bioso.
16 Na okatomo binyibinyi mabeele a miilo,
Okaomo mabeele a ba nfumu;
Na okauuku binyibinyi’shi ami Yehowa, ne mupaashi oobe,
Na Sha Bukome a Yakobo nyi mukuudi oobe.
17 Pa mbalo ya kiamo kia munyinga nakafiki na ôlo,
Na pa mbalo ya kiamo nakafiki na kiamo kia arja,
Pa mbalo ya ebaya nakafiki na kiamo kia munyinga,
Na pa mbalo ya mabue nakafiki na kiamo;
Nakatuulu butaale bu bakunkushi bobe
Na kululama bu bantu bobe abakupeyaa mifubo.
18 T’abakapusha dingi mianda ya etombo mu nsenga yobe
Sunga kabutu na kuluisha kua bintu mu mikalo yobe.
Na okayitanyina midimba yobe bu Kipandilo na bibelo biobe bu Ntumbo.
19 Bobe nguba takekala dingi etaata mu kanya,
Sunga kutooka kua mueshi takukakupa etaata,
Muanda Yehowa akekala etaata dia loso kodi,
Na Efile Mukulu oobe akekala buwa bobe.
20 Nguba oobe takapono dingi,
Sunga mueshi oobe taukashimina,
Muanda Yehowa akekala etaata dia loso bobe,
Na mafuku a kudila kobe aakapu.
21 Bantu bobe boso abakekala balulame;
Abakaata nsenga bu yabo bua loso.
Mbekale mutombo unaadi mukune,
Mufubo wa maasa ande, bua’shi nekashibue buwa.
22 Muntu mupeela akafiki kinunu
Na muntu mubofule akafiki muilo wi bukome.
Ami Yehowa, nakakitshi biashi ino mianda ikitshikie bukidibukidi mu nsaa yayo.”