Yeshaya
61 Kikudi kia Muanana Mukile Bukata Yehowa ki pandi,
Muanda Yehowa mungiele muimu bua kulungula bantu beyishe mukandu wibuwa.
Muntume bua kuanya malonda a ba sha mashimba asaasukie,
Bua kulungula mukandu wa kupososhibua kui babadi bakuate
Na kufunguka kukata kua meso kui bena lukano,
2 Bua kuukisha kipua kia lusa kia Yehowa
Na efuku dia koobola dia Efile Mukulu eetu,
Bua kusamba baba boso abadidi,
3 Bua kupasukila baba abadidi bua Siyona,
Bua kuibapa kintu kia kufuala ku mutue kilengieshe kalolo pamutue pa buto,
Muimu wa muloo pamutue pa kudila,
Kilamba kia ntumbo pamutue pa binangu bifudiile.
Na abakayitaminyibua bu mitshi ikata ya kululama,
Bikunuanga bia Yehowa, bua kumutumbisha.*
4 Abakebakuula bikulu bia kala;
Abakebuesha ma mbalo a kala abaadi ashale bisumanga,
Na abakalushuula bibundi bibaadi bibutudibue,
Ma mbalo abaadi ashale bisumanga ku kipungo na ku kipungo.
5 “Bantu benyi abakebo na balame bisaka bienu bia mikooko,
Na bantu benyi abakekala ba kidime benu na bafubi benu ba mu mafuba a nfinyo.
6 Anka anue anukayitaminyibua bu ba tshite muakuidi ba Yehowa;
Abakenuitanyina bu bafubi ba Efile Mukulu eetu.
Anukadi bupeta bua miilo,
Na anuketumbisha pabitale ntumbo* yabo.
7 Pamutue pa buufu anukapete bipindi bibidi bia nsenga,
Na pamutue pa kuishibua milongo abakeele misaase ya muloo bua kipindi kiabo.
Oolo, abakapete bipindi bibidi mu nsenga yabo.
Muloo wa loso aukekala wabo.
8 Muanda ami Yehowa nemufule kutshiba kiimu na kululama;
Ne mushikue kuiba na kukutua kululama.
Nakebapa efuto diabo na lulamato loso,
Na nakakitshi nabo kilombeno kia loso.
9 Lutandua* luabo alukaukibua munkatshi mua miilo
Na bana babo abakaukibua munkatshi mua bantu.
Boso abakebamono abakebatundula’shi,
Mbekale lutandua luabadi belele miabi kui Yehowa.”
10 Nakasankila ngofu mui Yehowa.
Ami oso* nakasankila mui Efile Mukulu ande.
Muanda mmunfuadikie bilamba bia kipandilo;
Mmumpombeele nkandio* a kululama,
Nka bu muana mulume ayibakila mufuale lubango bu lua tshite muakuidi,
Na bu muana mukashi abayibakila muilengieshe na bintu biaye bia kuilengiesha nabio.
11 Muanda nka bu abituushaa nsenga ntonga yayo
Na abimeneshaa efuba bintu biabadi bemukune,
Biabia nyi abikamenesha Muanana Mukile Bukata Yehowa
Kululama na ntumbo kumpala kua miilo yoso.