Ufundibue kui Yowano
18 Kunyima kua’ye kuakula ino mianda, Yesu batuukile na balongi baye, benda lungi lupese lua ebanda dia Kidrone, kuakua kubaadi efuba, na aye na balongi baye nkutuela muanka. 2 Binobino Yundase, baadi na kia kumupaana, baadi auku naye yaaya mbalo muanda Yesu baadi kebungi ebungu na balongi baye kuakua. 3 Biabia Yundase nkutuala kisaka kia basalayi na balami ba bakata ba ba tshite muakuidi na ba Bafadisee, na abo nkufika kuakua na miengie ya kaalo na bimunyi na bi na ngoshi. 4 Akupu Yesu, bu bibaukanga mianda yoso ibaadi na kia kumufikila, befubuile kuabadi, na ebepusha’shi: “Nnanyi anukuete kukimba?” 5 Abo nkumualula’shi: “Yesu muina Nazarete”. Aye nkuibalungula’shi: “Nnami uno.” Binobino Yundase baadi na kia kumupaana baadi namu muimane nabo.
6 Kadi pabaadi Yesu muibalungule’shi: “Nnami uno,” abalukiile ku mongo na bapona paashi. 7 Biabia, bebepuishe dingi’shi: “Nnanyi anukuete kukimba?” Abo nkuamba’shi: “Yesu muina Nazarete.” 8 Yesu nkuibalula’shi: “Nenulungula’shi, nami uno. Biabia su nnami anukuete kukimba, tadilayi bano bantu bende.” 9 Bino bibaadi bua kulombasha bibaadi muakule’shi: “Ku baaba bodi mumpe, ntshi mushimishe su ngumune.”
10 Akupu Simone Mpiele, baadi na lupete nkuilutuusha na nkukupila mufubi a tshite muakuidi mukata, amutshiba etui dibalume. Eshina dia yawa mufubi dibaadi Malkuse 11 Anka, Yesu nkulungula Mpiele’shi: “Alusha lupete mu kipusu kialo. T’abitungu’shi ntome kipulu* kimpe Yaya su?”
12 Akupu basalayi na mukata a basalayi na balami ba bena Yunda, nkukuata Yesu na nkumuanya. 13 Abo nkubanda kuenda naye kui Ane muanda baadi muko a Kayifase, baadi tshite muakuidi mukata kiakia kipua. 14 Kayifase, nyi baadi mulungule bena Yunda’shi, bibaadi bua buwa buabo bua muntu umune kufua bua bantu.
15 Binobino, Simone Mpiele na ungi mulongi abaadi abalondo Yesu. Yawa ungi mulongi baadi aukibua kui tshite muakuidi mukata, na aye nkutuela na Yesu mu lupango lua tshite muakuidi mukata, 16 kadi Mpiele baadi muimane paasha ku kiibi.* Biabia yawa ungi mulongi baadi aukibua kui tshite muakuidi mukata, batuukile paasha esamba na mulami a ku kiibi na atuesha Mpiele. 17 Akupu mufubi mukashi baadi mulami a ku kiibi nkulungula Mpiele’shi: “Noobe namu tue umune a ku balongi ba uno muntu su?” Aye nkualula’shi: “Nya ntshi umune a kuabadi.” 18 Binobino bafubi na balami abaadi bemane befunyishe kaalo ka makala kabaabadi batembeshe muanda kubaadi mashika na abaadi abooto kaalo. Mpiele namu baadi muimane nabo aoto.
19 Biabia mukata a ba tshite muakuidi nkuipusha Yesu pabitale balongi baye na pabitale malongiesha aaye. 20 Yesu nkumualula’shi: “Ne muakule kui ba pa nsenga patooka. Misusa yoso naadi nalongiesha mu kitumbuilo na mu ntempelo, muamua amuibungilaa bena Yunda boso, na ntshi muakule muanda su ngumune mu bufiefie. 21 Buakinyi onyipusha? Ipusha baaba abaadi bapushe binaadi muibalungule. Tala! Baaba abauku biandi muakule.” 22 Kunyima kua’ye kuakula ino mianda, umune a ku balami baadi muimane paapa, nkukupila Yesu lupi mu mpala na nkuamba’shi: “Wawa nyi mushindo waluula mukata a ba tshite muakuidi?” 23 Yesu nkumualula’shi: “Su nakula muanda wibubi, ndungule muanda wibubi unakula; kadi su kiakia kinakula kibuwa, buakinyi onkupila?” 24 Akupu, Ane nkumutuma muanyibue kui Kayifase tshite muakuidi mukata.
25 Binobino, Simone Mpiele baadi muimane paapa aoto kaalo. Akupu abo nkumulungula’shi: “Noobe namu tue umune a ku balongi baye su?” Aye nkuibituna na nkuamba’shi: “Ntshi umune a kuabadi.” 26 Umune a ku bafubi ba tshite muakuidi mukata, baadi muina kifuko a yawa muntu abaabadi batshibe etui kui Mpiele, nkuamba’shi: “Nkumuene naye muifuba, ta nabio su?” 27 Kadi, Mpiele nkuibituna dingi, nka paapa etombole nkusama.
28 Akupu abakatukile na Yesu kua Kayifase benda naye ku nshibo ya guvernere. Bibaadi ku namashika ngofu. Anka bena Yunda abo banabene tababaadi batuele ku nshibo kua guvernere, bua’shi tala beyikasha bu be butete muanda abaadi abakumiina kudia kidibua kia Pasaka. 29 Biabia Pilato nkutuuka kuabadi na nkuamba’shi: “Mmuanda kinyi wanufundu nao uno muntu?” 30 Abo nkumualula’shi: “Su uno muntu tabadia kuikala nkitshishi a bubi,* tatubadia kumutuula mu maasa oobe.” 31 Biabia Pilato nkuibalungula’shi: “Muateyi anue banabene na numusambishe muyile miiya yenu.” Bena Yunda nkumulungula’shi: “Tatui na matalua a kuipaa muntu.” 32 Bino bibaadi bua kulombasha eyi dibaadi Yesu muakule bua kulesha lufu lutabaadi pepi na kia kufua.
33 Biabia Pilato nkutuela dingi mu nshibo nkuitanyina Yesu na nkumuipusha’shi: “We nfumu a bena Yunda su?” 34 Yesu nkualula’shi: “Okuete kuipusha bino mu’be nabene, su mbangi abakulungula pa bintale?” 35 Pilato nkualula’shi: “Ami ne muina Yunda su? Mmuilo oobe na bakata ba ba tshite muakuidi abakutuulu mu maasa ande. Nkinyi kiodi mukite?” 36 Yesu nkualula’shi: “Bufumu buande ta mbua pano pa nsenga. Su Bufumu buande bubadia kuikala bua pa nsenga, bafubi bande babadia kulua ngoshi bua’shi tabantulanga mu maasa a bena Yunda. Kadi nka bu biabidi, Bufumu buande, ta mbua pano pa nsenga.” 37 Biabia, Pilato nkumuipusha’shi: “Biabia we nfumu?” Yesu nkualula’shi: “Buakula obe nabene’shi ne nfumu. Mbua bino buandi mutandikue, na mbua bino buandi mufikie pa nsenga bua’shi ntuushe bukamonyi pabitale bia binyibinyi. Muntu oso e ku lupese lua bia binyibinyi, ateemeshaa eyi diande.” 38 Pilato nkumulungula’shi: “Bia binyibinyi nkinyi?”
Kunyima kua kuakula biabia batukile dingi kui bena Yunda na ebalungula’shi: “Ntshi mupete muanda wibubi muadi. 39 Dingi, anuikalaa na kiubishi kia’shi nenuposuele muntu muifuku dia Pasaka. Biabia anukumiina’shi nenuposuele Nfumu a bena Yunda su?” 40 Abo nkuela dingi musaase’shi: “Uno muntu nya, anka Balabase!” Aku namu Balabase baadi ngifi.