Yeshaya
51 Nteemesheyi anue bakuete kukimba kululama,
Anue bakuete kukimba Yehowa.
Talayi ku lubuebue kubanudi batuukile
Na ku buina bubaabadi benubundule.
2 Talayi kui Abalahama nshenu
Na kui Sara baadi muinutande.*
Muanda baadi nka penda bupenka panaadi mumuitanyine,
Naadi mumuelele miabi na nafuimisha lutandua luaye.
3 Muanda Yehowa akasamba Siyona.
Akafuisha kusamba kui bikulu biaye bioso,
Na akekasha kabaaka kaye bu Edene
Na kipia kiaye kia kabaaka bu efuba dia Yehowa.
Kusanka na muloo,
Lutumbu na ngono abikekala muadi.
4 Ô bantu bande nteemesheyi,
Na teeyi matui kuandi muilo wande.
Muanda muiya aukatuuku kuandi,
Na nakatuulu kululama kuande bu etaata dia bantu.
5 Kululama kuande kukuete kuifubuila pepi.
Kipandilo kiande akikatuuku,
Na maboko ande aakasambisha bantu.
Bisangi abikakulupila muandi,
Na abikatengiela mboko* yande.
6 Ebuesheyi meso muiyilu,
Na nutale nsenga paashi.
Muanda eyilu adikapalakana mu tupese tupese nka bu miishi;
Nsenga ayikaluila nka bu kilamba,
Na bantu be mushale abakafu nka bu tuishi.
Anka kipandilo kiande akikekala ikalayika,
Na kululama kuande takukafudila.*
7 Nteemesheyi, anue abauku kululama,
Bantu be na muiya* wande mu mashimba aabo.
Tanutshinanga kolomona kua bantu abafuiyaa,
Na tanuikalanga na moo bua biabenukaa.
8 Muanda tuishi atukebadi nka bu kilamba;
Tuishi* atudiyaa bilamba atukebadi nka bu buanda.
Anka kululama kuande akukashala bua loso,
Na kipandilo kiande akikashala mu bipungo bioso.
9 Pasuka! Pasuka! Fuala bukome,
Ô mboko ya Yehowa!
Pasuka nka bu mu mafuku a kala, nka bu mu bipungo bia kala.
Ta nobe baadi mutshokole Rahabe* mu bipindi bipindi,
Baadi mutubule nyema mukata a mu kalunga ka mema?
10 Ta nobe baadi mumishe kalunga ka mema, mema ala ngofu su?
Yawa baadi muikashe muushi mua kalunga ka mema bu eshinda bua’shi bakuudibue basabukie su?
11 Bakuudibue ba Yehowa abakalukiila.
Abakafiki mu Siyona na misaase ya muloo,
Na muloo ushi mpuilo aukekala ku mitue yabo bu kifulu.
Abakasanka na abakekala na muloo,
Kinyongua na kuidila abikasuuku.
12 “Ami nabene ne Yawa kuete kukusamba.
Buakinyi we kutshina muntu afuiyaa akafu
Na muana a muntu akafuumbu bu lubishi?
13 Buakinyi oyiluankana Yehowa Mupangi oobe,
Yawa baadi molole eyilu na mushimikie bitako bia nsenga?
Na efuku dishima bodi nka otshinyi nsungu ibukopo ya muntu akiengieshenaa,
Nka bu’shi baadi na mushindo wa kukubutula.
Binobino, nsungu ibukopo ya muntu akiengieshenaa i kunyi?
14 Muntu muiname mu nkano akaposooshibua binobino;
T’akafu nya na t’akende mu buina,
Sunga bia kudia biaye tabikakutshikua.
15 Anka ami ne Yehowa Efile Mukulu oobe,
Yawa afunduulaa kalunga ka mema na akitaa bia’shi mbundambunda yako itunkietunkie,
Eshina diande nyi Yehowa a biluilo.
16 Nakeele mayi ande mukanua mobe,
Na nakakubuikila muesheshi wa eyasa diande,
Bua kukuna eyilu na bua kushimika bitako bia nsenga
Na bua kulungula Siyona’shi: ‘We muilo wande.’
17 Pasuka! Pasuka! Ebuee, Ô Yelusalema
Obe mutome kipulu kia nsungu ibukopo mu eyasa dia Yehowa.
We mutome ekopo;
We mupudishe kipulu akilundushenaa.
18 Takui muana su ngumune ku bana baye boso baadi mutande e kuanka bua kumukunkusha,
Na takui muana su ngumune ku bana baye boso baadi mukushe mumukuate ku mboko.
19 Ino mianda ibidi ngikukuate.
Nnanyi aketuulu pa mbalo yobe?
Kabutu na kuluishibua, nsala na lupete lua ngoshi!
Nnanyi akakusamba?
20 Bana bobe mbapone kipuuka.
Mbalale paashi mu mansanka* a miseese yoso
Nka bu mukooko wa kisuku wi mu bukondia.
Mbaule na nsungu ibukopo ya Yehowa, kusaashila kua Efile Mukulu oobe.”
21 Teemesha namu uno muanda,
Ô muana mukashi mukiengieshibue na mukolue, kushi na nfinyo.
22 Muanana Yehowa, Efile Mukulu oobe akaluilaa bantu baye, bakula bino’shi:
“Tala! Nakaata kipulu akilundushenaa mu eyasa diobe,
Ekopo, kipulu kiande kia nsungu ibukopo;
T’okekitomo dingi nya.
23 Nakekituulu mu eyasa dia bantu bobe abakukiengieshaa,
Baba babaadi bakulungule’shi:* ‘Inama bua’shi tutambukile pa mbidi p’obe!’
Biabia bodi muikashe mongo oobe bu nsenga,
Nka bu museese wa badia kutambukila.”