Yeshaya
30 “Malua kui bana be na mutue wi bukopo,” nyi abiakula Yehowa,
“Abakumbasha mpango ishi yande,
Abakitshi bilombeno,* kadi kushi ku bukunkushi bua kikudi kiande,
Bua kulombasha muluisho ku ungi muluisho.
2 Abende ku Ejipitu kushi kungipusha,
Bua kukafuama bua’shi Faraone ebakaluile*
Na bua kusuukila mu mutaala wa Ejipitu!
3 Anka kukaluilua kua Faraone akukela kuanudi bu muanda wi buufu,
Na kusuukila mu mutaala wa Ejipitu bu muanda wa kuinuisha milongo.
4 Muanda bakunkushi baye be mu Soane,
Na mikiendi yaye ibafiki ku Anese.
5 Abakakuatshishibua boso buufu
Kui muilo ushi ulombene kuibapa kintu su nkimune ki buwa
Usha ukuashaa muntu sunga kupa muntu kintu su nkimune ki buwa
Nka penda buufu na kukuatshishua buufu.”
6 Mukandu pabitale nyema ya kuushi:
Mu nsenga ya dikienga na nkalakashi,
Ya ntambue, ntambue akukungula,
Ya nyoka a lulengo na nyoka e na lulengo lui kaalo,
Abasemuna bupeta buabo mu miongo ya mpunda
Na bintu biabo pa tutumba tua tumelo.
Anka bino bintu t’abikuasha muilo nya.
7 Muanda bukuashi bua Ejipitu tabui na muulo su nkapeela.
Biabia ne mumuitanyine bu: “Rahabe, shakitaa kintu.”
8 “Binobino enda, webifunde ku ebaya mu meso muabo,
Na webifunde mu mukanda,
Bua’shi bikuashe mu mafuku aafiki
Bu kamonyi bua loso.
9 Muanda mmuilo utomboshi, bana basha madimi,
Bana abapele kuteemesha miiya* ya Yehowa.
10 Abalungula bantu abamonaa mianda’shi: ‘T’anumonanga,’
Na bantu abamonaa bimonua’shi: ‘Tanuitulungulanga bimonua bia binyibinyi.
Etulunguleyi mianda ya lubombo; monayi bimonua bia madimi.
11 Katukayi muishinda; pambukayi nukatukie muishinda.
Lekayi kuitulungula pabitale Eselele a Isalele.’”
12 Biabia Eselele a Isalele bakula bino’shi:
“Bu bibanusumbushena dino eyi
Na nubakulupila mu bulamalama na madimi
Na nubebitudila eshimba,
13 Biabia kino kilubilo akikekala kuanudi nka bu mudimba wi na mitanta
Nka bu mudimba ula upengame aukiebe kupona.
Aukapono mususa umune mu kabasamushi.
14 Aukatanyika nka bu elondo dikata dia mbuufi,
Disosekie dioso mu mushindo ushi ushale sunga kapese kadio
Bua kuata kaalo ku mafuwa
Sunga bua kutapula mema mu eshiba.”*
15 Muanda Muanana Mukile Bukata Yehowa, Eselele a Isalele bamba’shi:
“Panualukiila kuandi na panuntengiela, anukapaashibua;
Bukome buenu abukekala mu kushala baumiine na mu kuikala na lukulupilo.”
Anka tanuikeele bakumiine.
16 Anka nubakula’shi: “Nya atusuuku lubilo pa nfualasa !”
Eyendo, anusuuku lubilo.
Nubakula dingi’shi: “Atukaamina pa nfualasa ayendaa lubilo!”
Biabia abebingena nenu abekala lubilo lukile.
17 Bantu kinunu abakasuusu pa muanda wa kufuna kua muntu umune;
Anukasuuku pa muanda wa kufuna kua bantu batano
Mpa na apakekala baba abashala ba kuanudi bu mutshi wabaludikaa nao masuwa wabapudikaa kilamba ku nsongo ya muengie,
Nka bu mutshi wa kitunduilo pa ka muengie.
18 Anka Yehowa kuete kutengiela na luishinko loso bua kuinulesha kalolo,
Na akebo bua kuinulesha lusa.
Muanda Yehowa nyi Efile Mukulu a kululama.
Basha muloo mbaba abatungunuka na kumutengiela.*
19 Apashala bantu mu Siyona, mu Yelusalema, t’okadidi su nkapeela. Akakulesha binyibinyi kalolo p’okadidi bua kuteka bukuashi; akakualula nka’ye ki’akupusha. 20 Sunga biekala’shi Yehowa akenupa dikienga bu mikate na kukiengieshibua bu mema, Mulongieshi oobe Mukata t’akakufuama dingi, na okamono Mulongieshi oobe Mukata na meso oobe. 21 Matui oobe aakapusha eyi kunyima kobe adiamba’shi: “Eshinda biadidi’bi. Tambukilayi muanka,” bianuikala’shi anuende ku mboko ibalume sunga ku mboko ibakashi.
22 Na okekasha butete kiamo kia arja kilamikie ku ma nkishi oobe na ôlo mulamikie ku ma nkishi oobe a kilonda.* Okebisumbula nka bu kilamba kifubishe muana mukashi muende ku mueshi, na okebilungula’shi: “Katukayi!”* 23 Na akanokiesha mpeshi bua mbio yobe yodi mukune mu nsenga, na bia kudia abituuku mu nsenga abikekala bi bungi na bi buwa.* Mu diadia efuku bimunuanga biobe abikadi lubishi mu mapia akata akudishila nyema. 24 Ngombe na mpunda ayidimi nsenga, ayikadi bia kudia bia nyema biabadi basangie na bisosua, biabadi bapepule na kipao na nkanya. 25 Ku muengie oso ula na ku ka muengie koso kapeela akukekala tu miela na mema aalala, mu efuku dia kuipayibua kukata apapono bitenta. 26 Na etaata dia mueshi ushima adikekala bu etaata dia nguba; na etaata dia nguba adikekala bukopo misusa musambobidi, nka bu etaata dia mafuku musambobidi, mu efuku adianya Yehowa kutshokoka kua muilo waye na kubuka elonda dikata adifiki mu kuibakupila kuadi muibakupile.
27 Talayi! Eshina dia Yehowa dikuete kufika adikatukila kula,
Aditembe na sungu yaye na makumbi ebushito.
Milomo yaye ngiule na nsungu,
Na ludimi luaye lui nka bu kaalo akabutulaa.
28 Kikudi kiaye ki nka bu kuula kua mema a mpeshi akafikie mpa na mu nshingo,
Bua kuunga miilo mu kayingo ka kabutu;*
Na miilo ayikekala na lukano mu mbanga yayo aluibapambusha.
29 Anka loono luenu alukekala bu loono luabayimba bufuku
Panuilumbuula* bua musangelo,
Na mashimba eenu aakekala na muloo
Nka bu muntu kuete kutambuka na kuyimba mulengie*
Ende ku muengie wa Yehowa, Lubuebue lua Isalele.
30 Yehowa akakitshi bia’shi eyi diaye dikata dipushikie
Na kulesha mboko yaye payiki bua kunyoka beshikuanyi,
Na ludimi lua kaalo akabutulaa,
Mpeshi e bukopo, mpeshi a tupandapanda na mabue a kasangu.
31 Pa muanda wa eyi dia Yehowa, Asiri akakuatshika moo wi bukopo;
Akamukupila na mutshi.
32 Nsaa yoso ayikupila Yehowa Asiri
Na mutshi waye wa kunyoka nao
Abikekala na matumba na nseese
P’ebuesha mboko yaye bua kulua nabo ngoshi.
33 Muanda Tofete* aaye mmupue kulumbuulua;
Mmulumbulue dingi bua nfumu.
Mmuushe mututo wa nteete mu mbalo i bula na ikata,
Na kaalo kebungi na nteete.
Muwa wa Yehowa, nka bu muela wa sufule,
Aumutembesha kaalo.