Yeshaya
53 Nnanyi mutuule lukumiino mu mianda yadi mupushe kuatudi?*
Na mboko ya Yehowa ngifumbulue kui nanyi?
2 Akatuuku bu lutonga kumpala kuaye,* bu mushi utuukie mu nsenga yume.
Te na mmuenekielo akaanyisha sunga ntumbo;
Na patumumono, mmuenekielo aaye tetukaka kuadi nya.*
3 Babaadi bamubepuule na bana balume babaadi abamusuuku,
Muntu mukitshibue bua* mitanyo na baadi muubiile mikumbo.
Bibaadi nka bu’shi mpala yaye ibaadi itufuamishue.*
Babaadi bamubepuule na atue tatubaadi bamuate na muulo.
4 Mbinyibinyi aye nabene baadi mutuale mikumbo yetu,
Na baadi mutuale mitanyo yetu.
Anka atue tubaadi bamumone bu muntu munyokiibue* na mukupilue kui Efile Mukulu na mukiengieshibue.
5 Anka babaadi bamutubule bua miluisho yetu;
Babaadi bamusoose bua bilubilo bietu.
Baadi mutuale dinyoka buashi tuikale mu butaale,
Na pa muanda wa malonda aaye tubaadi bapaashibue.
6 Nka bu mikooko, atue boso tubaadi atuumbakana,
Muntu oso diaye eshinda,
Na Yehowa bakitshine biashi kilubilo kietu boso kimukuate aye.
7 Babaadi bamukiengieshe na aye nkutadiila buashi bamukiengieshe,
Anka tabaadi mubuule mukanua muaye.
Baadi mutuadibue nka bu mukooko awende mu kuipayibua,
Nka bu mukooko ukashi umiine kumpala kua bantu bao abeukuula buaa,
Na tabaadi mubuule mukanua muaye.
8 Pa muanda wa kukiengieshibua na kiimu baadi mukatushibue;
Nanyi akekalakasha bua mianda ya kipungo kiaye?*
Muanda baadi mukatushibue mu nsenga ya bantu be na muwa;
Pa muanda wa muluisho wa bantu bande, baadi mukupilue.*
9 Sunga biashibaadi mukite bubi,*
Na biakushibaadi madimi mukanua muaye,
Babaadi bamupe mashama* na bantu bebubi;
Pabaadi mufue babaadi bamushiikie na ba mpeta.*
10 Anka kikiebe ki’eshimba dia Yehowa kibaadi kia* kumusoosa, na baadi mumutadiile buashi akumbe.
Su okatuusha muwa* waye bu mulambu wa kushimisha nao miluisho,
Akamono lutandua* luaye, akafuimisha mafuku aaye,
Na kukiila kuadi akisankisha* Yehowa akikakumbana.
11 Pa muanda wa kinyongua kiaye, akamono na akasanka.
Ku bukuashi bua kiukilo kiaye muntu mululame, mufubi ande,
Akekasha bantu be bungi bu bantu balulame,
Na akatuala bilubilo biabo.
12 Nyi buakinyi nakamupa kipindi munkatshi mua bantu bebungi,
Na akeabishena bintu bipaulue na bantu be bukome,
Muanda baadi mupongoole muwa waye* mpa na ku lufu
Na baadi mubadikibue munkatshi mua ba nkitshishi ba miluisho;
Baadi musemune miluisho ya bantu bebungi,
Na baadi muakuile ba nkitshishi ba miluisho.