Yeshaya
9 Anka mufito wibukopo t’aukekala bu pabaadi nsenga mu dikienga, bu mu mafuku a kala pabaabadi bakitshine nsenga ya Zabulone na nsenga ya Neftali mianda na kasaabu. Anka kunyima akakitshi biashi batumbishe eshinda di pepi na kalunga ka mema, mu nsenga ya Yordane, Ngalileya a miilo.
2 Bantu babaadi abatambukila mu mufito
Babamono etaata dikata.
Bua baba bashale mu nsenga ya mufito wibukopo,
Etaata dibebamunyikila.
3 We mufuimishe muilo;
W’ewikasha na muloo ukata.
Abasanka kumpala kobe
Nka bu bantu abasanka mu kipungo kia kuumbula,
Nka bu baba abeabishena na muloo bintu bipaulue.
4 Muanda wemutshibe mu bipindi kikumbo kiabo ki bushito kibaabadi batuale,
Mutshi ubaabadi abafubisha bua kuibakupila ku mapampa, mukombo wa bantu abakunkushaa mifubo,
Nka bu muifuku dibaabadi batshokole Madiane.
5 Bilato bioso abitshinkisha nsenga pabatambuka
Na bilamba bioso biambikibue mu mase
Abikekala bintu bia kukuatshisha nabio kaalo.
Abakamuitanyina bu Muntu Auku Kutuusha Malango Kalolo, Efile Mukulu sha Bukome, Yaya a Loso, Nfumu a Butaale.
7 Kutama kua bukunkushi buaye
Na butaale, tabikekala na mpuilo,
Mu nkuasa a bufumu a Davide na mu bufumu buaye.
Bua kuibunyingisha bi bukopo na kuibukuatshishena
Kukiila mu kutshiba kiimu na kululama na mu kululama,
Kubanga binobino na bua loso.
Kisumi kia Yehowa a biluilo akikakitshi bino.
8 Yehowa mmutume eyi bua kudimusha Yakobo,
Na ndifikile Isalele.
9 Na bantu boso abakediuku
Efraime na bantu bashale mu Samadiya
Abakula na kuitatula na kapesha muishimba diabo’shi:
10 “Matafuadi ngapone,
Anka atukebaka na mabue asee.
Mitshi ya sikomore ngitshibibue,
Anka pa mbalo yayo apakekala mitshi ya sedre.”
11 Yehowa akatadiila beshikuanyi ba Resine buashi bamutombokiele
Na akatakula beshikuanyi baye bua kulua naye,
12 Siri akafiki lupese lua kutundunka nguba na bena Filistine abakafiki lupese lua kupona nguba,
Abakabuula mukanua muabo na badie Isalele.
Pa muanda wa bino bioso, nsungu yaye nta ngipue,
Ki’nka muibueshe eyasa diaye bua kunyoka.
13 Muanda bantu ntambalukiile kui Yawa kuete kuibanyoka;
Ntambakimbe Yehowa a biluilo.
14 Yehowa akatshibi mu Isalele
Mutue na mukila, mutombo na ndawe,* muifuku dimune.
15 Mukulu na muntu abanemekaa ngofu ndio mutue,
Na mutemuki alongiesha mianda ya madimi ndio mukila.
16 Baba bakuete kukunkusha bano bantu bakuete kuibatakula mu kuumbakana,
Na baba babakunkusha be mu kabulakanyi.
17 Nyi buakinyi Yehowa t’akasanka bua ba nsongualume babo,
Na t’akapusha bana babo ba nshiye* na bakashi kilele babo lusa
Muanda boso buabo mbasumbule lukumiino na ba nkitshishi ba bubi
Na boso buabo bakuete kuakula mianda kushi binangu.
Pa muanda wa bino bioso, nsungu yaye nta ngipue,
Ki’nka muibueshe eyasa diaye bua kunyoka.
18 Muanda bubi abutembe bu kaalo,
Bubataatshisha milobo na lubishi.
Abutembesha kaalo ku tu mitshi tua mu mutamba,
Na atukaamina mu makumbi a miishi.
19 Mu nsungu ya Yehowa a biluilo
Nsenga ibatembe kaalo,
Na bantu abakekala bu bintu bia kutembesha nabio kaalo.
Muntu su ngumune t’akapaasha su mmukuabo.
20 Muntu akatshibi kia kudia ku mboko ibalume
Anka akekala nka na nsala;
Na muntu akadi ku mboko ibakashi
Anka t’akekuta.
Muntu oso akadi muita wa mboko yaye aye nabene,
21 Manasee akadi Efraime,
Na Efraime akadi Manasee.
Boso buabo abakaluisha Yunda ngoshi.
Pa muanda wa bino bioso, nsungu yaye nta ngipue,
Ki’nka muibueshe eyasa diaye bua kunyoka.