Wa kabidi wa Samuele
23 Mayi a nfudiilo a Davide ngano:
“Eyi dia Davide muana a Yesee,
Eyi dia muntu abaabadi bakaamishe kunundu,
Muedibue muimu a Efile Mukulu a Yakobo,
Kayimba kakile buwa ka misambo ya Isalele.
2 Kikudi kia Yehowa kibakuile ku bukuashi buande,
Eyi diaye dibaadi ku ludimi luande.
3 Efile Mukulu a Isalele bakuile,
Ebue dia Isalele dibandunguile’shi:
‘Su muntu akunkusha bantu mmululame,
Akunkusha mu kutshina ku’Efile Mukulu,
4 Bi nka bu etata dia kunamashika, nsaa i nguba amunyika,
Nsaa ya kunamashika i kuiyilu kushi makumbi,
Bi nka bu etata aditukaa kunyima kua mpeshi kunoka,
Adimenesha kisuku mu nsenga.
5 Nshibo yande tayi namu biabia kumpala ku’Efile Mukulu su?
Muanda mmukite nami kilombeno kia loso,
Kilumbulue mu mianda yoso na kilamibue kalolo.
Muanda kino kilombeno akilesha kupaashibua kuande koso na muloo wande ukile bukata,
Nyi buakinyi ekitamisha,
6 Kadi bantu ba bisumanga abebasumbula nka bu mabuula a mitshi e na meba ,
Muanda ta mbalombene kuiakuata na maasa.
7 Su muntu akiebe kuiakuma,
Abitungu ekale muishikiile na kiamo na mutuela wa mulumbu,
Na abitungu kuiashiika oso kaalo nka yaaya mbalo yaadi.”
8 Mashina a bilobo bia ngoshi bia Davide ngano: Yosheba-basebete muina Takemoni baadi kunundu kua bilobo bia ngoshi bisatu. Ungi musango bayipayile bantu 800 na mulumbu waye. 9 Babaadi bamulondele kui Eleazare muana a Dodo, muana a Ahone, Eleazare baadi munkatshi mua bilobo bia ngoshi bisatu bibaadi na Davide nsaa ibabaadi bolomone bena Filistine. Bena Filistine babaadi bebungie bua kulua ngoshi, kadi pabaadi bena Isalele basuukie, 10 Eleazare bashadile muimane, na aye nkutungunuka na kuipaa bena Filistine mpa na pababofuele mboko yaye, na eyasa diaye diakooka kukuata lupete. Biabia Yehowa bafuishile kutshokola kukata mu diadia efuku, akupu bantu babamulondele bua kuata bintu bia baba babaadi bayipayibue.
11 Babaadi bamulondele kui Shama muana a Ageye muina Arare, bena Filistine babaadi bebungile ku Lehi mbalo ibaadi efuba diule na tukunde tumonga. Paapa bantu babasuukile bena Filistine. 12 Kadi aye bayimene munkatshi mu’efuba aye nkuidikaluila, na nkutungunuka na kuipaa bena Filistine, biabia Yehowa bafuishishe kutshimuna* kukata.
13 Mu kipungo kia kuumbula bintu, bantu basatu ba ku bakata 30 babayile kui Davide mu lubuebue lua Adulame, kisaka kia basalayi ba bena Filistine kibaadi kituule kishalelo kiabo Muibanda dia bena Refa. 14 Mu aa mafuku Davide baadi mu kifuamino, kadi basalayi ba bena Filistine babaadi mu Beteleme. 15 Paapa Davide nkulesha lukalo luaye amba’shi: “Su nadia kutoma mema e mu buina bua kulamina mema bui pepi na kiibi kia Beteleme baboo!” 16 Paapa biabia bilobo bisatu bia ngoshi nkutuela mu kishalelo kia bena Filistine pa bukopo, na nkutapa mema mu buina bua kulamina mema bubaadi ku kibelo kia Beteleme abo nkuiatuadila Davide, kadi bapelele kuiatoma aye kuiapongoola mu nsenga kumpala kua Yehowa. 17 Bambile’shi: “Ô Yehowa, ntshi mulombene kukita su nkapeela muanda wi bino! Ne kutoma mase a bantu batuule muwa wabo mu masaku su?” Paapa bapelele kutoma aa mema. Ino nyi mianda ibaadi bilobo biaye bisatu bia ngoshi bikite.
18 Abishai mukuabo na Yoabe muana a Seruya baadi namu kunundu kua kingi kisaka kia bilobo bisatu, dingi efuku bayipayile bantu 300 na mulumbu waye, na baadi na nkumo nka bu ya biabia bilobo bisatu. 19 Sunga biekala’shi baadi mukile kuukibua a ku baba basatu, na’shi baadi mukata aabo, tabaadi mufikie mu mulongo wa biabia bilobo bisatu bia kumpala.
20 Benaya muana a Yehoyada baadi muntu sh’eshimba dinyingie bakitshine mianda ikata i bungi ku Kabeseele, bayipayile bana babidi ba Ariyele muina Moabe. Bayikile’nyi mu buina bua mema ayipaa ntambue efuku dibaadi adinoko neje. 21 Nnaye dingi baadi muipee ungi muana mulume muina Ejipitu baadi bula bua kukaanya. Sunga biekala’shi yawa muina Ejipitu baadi na mulumbu muiyasa, aye bayile mu kulua naye na mukombo, amunyenga mulumbu muiyasa, aye nkumuipaa nka na wawa mulumbu waye. 22 Ino nyi mianda ibaadi Benaya muana a Yehoyada mukite, na baadi na nkumo nka bu ya biabia bilobo bisatu bia ngoshi. 23 Sunga biekala’shi baadi muukibue ngofu kukila mpa na biabia bilobo 30, tabaadi mufikie mu mulongo wa biabia bilobo bia ngoshi bisatu. Anka Davide bamutudile kunundu kua bantu babaadi abamulama.
24 Asahele mukuabo na Yoabe baadi munkatshi mua bilobo 30, mashina a biabia bilobo ngano: Elanane muana a Dodo a ku Beteleme, 25 Shama muina Arode, Elika muina Arode, 26 Elese muina Palete, Ira muana a Ikeshe muina Tekoa, 27 Abiezere muina Anatote, Mebunayi muina Usha, 28 Zalmone muina Ahohi, Marayi muina Netofa, 29 Elebe muana a Baana muina Netofa, Itayi muana a Ribayi a ku Gibeya a Benyamine, 30 Benaya muina Piratone, Idayi a ku bibandabanda* bia Gashe, 31 Abi-alebone muina Raba, Azemawete muina Bakurime, 32 Eliaba muina Shalabone, bana ba Yashene, Yonatane, 33 Shama muina Arare, Akiame muana a Sharare muina Arare, 34 Elifelete muana a Akasebayi muana a Maakate, Eliame muana a Ahitofele muina Gilo, 35 Eselo muina Karmele, Parayi muina Arabe, 36 Igale muana a Natane a ku Soba, Bani muina Gade, 37 Zeleke muina Amone, Nakrayi muina Berote, yawa baadi atuadila Yoabe muana a Seruya bina ngoshi, 38 Ira muina Yitre, Garebe muina Yitre, 39 na Uriya muina Ite, boso babaadi 37.