Yeshaya
65 “Ne mukite bia’shi bankimbe kui baba bashibaadi bangipushe;
Ne mukite bia’shi bampete kui baba bashibaadi bankimbe.
Naadi mulungule muilo ushibaadi awitanyina eshina diande’shi: ‘Biandi’bi, biandi’bi!’
2 Nemoluele muilo wi na mutue wi bukopo maasa ande efuku dishima,
Baba bakuete kutambukila muishinda dishi buwa,
Bakuete kulonda binangu biabo;
3 Bantu bakuete kunkaa patooka misango yoso,
Bakuete kulambula milambu mu mafuba na bakuete kufitshisha miishi ya milambu ku matafuadi.
4 Abashala munkatshi mua mashama,
Na abakisha bufuku mu ma mbalo afuame,*
Badianga muita wa ngulube,
Na mushi wa bintu bibutete wi mu malonga aabo.
5 Bakulanga’shi: ‘Shala nka kuakua kodi; tuefubuila kuandi,
Muanda ne eselele nkukila.’*
Bano bantu, mmiishi i mu mpembe muande, kaalo kakuete kutemba efuku dishima.
6 Talayi! Mbifundibue kumpala kuande;
Ta nkashala nka mumiine,
Nakebafutu,
Nakebafutu efuto diabo dioso*
7 Bua bilubilo biabo na bua bilubilo bia ba mashabo kulu,” nyi abiakula Yehowa.
“Muanda mbafitshishe miishi ya milambu ku miengie
Na mbansabuule ku tu miengie,
Nakabadila kuibapimina efuto diabo dioso.”
8 Yehowa bakula bino’shi:
“Nka bu abikala nfinyo ipia mu kisaasa kia tukuba tua nfinyo
Na muntu akula’shi: ‘Tuekiluishanga, muanda muanka mui kintu kibuwa,’*
Biabia nyi biankakitshi pa muanda wa bafubi bande;
Ta nkebabutula boso nya.
9 Nakatuusha lutandua* mui Yakobo
Na nakatuusha mui Yunda muntu bua kupiana miengie yande;
Bantu bande bandi musangule abakeyipiana,
Na bafubi bande abakashala muanka.
10 Sharone akekala mapia a kudishila mikooko
Na Ebanda dia Akore adikekala mbalo ya kuikishila ngombe,
Bua bantu bande abankimbi.
11 Anka anue nui munkatshi mua baba bakuete kuleka Yehowa,
Baba bakuete kuiluankana muengie wande wa kishila,
Baba bakuete kutuudila efile a Muabi bia kudia pa mesa,
Na baba bakuete kuusha makopo na nfinyo isangie bua efile a Mianda Ipue Kufundibua.
12 Nyi buakinyi nakatadila benuipe ku lupete lua ngoshi,
Na boso buenu anukayinama bua kuipayibua,
Muanda naadi muitanyine, anka tanubaadi balule,
Naadi muakule, anka tanubaadi bateemeshe,
Nui batungunukie na kukita mianda ibubi ku meso kuande,
Na nui basangule mianda ish’ayisankisha.”
13 Biabia Muanana Mukile Bukata Yehowa bakula bino’shi:
“Talayi! Bafubi bande abakadi, anka anue anukekala na nsala.
Talayi! Bafubi bande abakatomo, anka anue anukekala na nyota.
Talayi! Bafubi bande abakekala na muloo, anka anue anukekala na buufu.
14 Talayi! Bafubi bande abakele misaase ya muloo pa muanda wa muloo wi muishimba,
Anka anue anukele misaase pa muanda wa busungu bua eshimba
Na anukadidi pa muanda wa binangu bifudiile.
15 Anukalekie eshina adikafubisha bantu bande bandi musangule bu mulua,
Na Muanana Mukile Bukata Yehowa akayipaa oso a kuanudi,
Anka bafubi baye akebetanyina mu dingi eshina;
16 Biabia muntu oso ekimbila muabi pa nsenga
Akedibua miabi kui Efile Mukulu a binyibinyi,*
Na muntu oso etshipi pa nsenga
Aketshipi muishina di’Efile Mukulu a binyibinyi.
Muanda abakayiluankana makienga* a kala;
Aakafuama ku meso kuande.
17 Muanda talayi! Nkuete kupanga eyilu dipia na nsenga ipia;
Na mianda ya kala tayikatentekieshua dingi,
Sunga kufika dingi kuishimba.
18 Biabia sankayi na nuikale na muloo mu kiankuete kupanga.
Muanda tala! Nkuete kupanga Yelusalema bua’shi ekale kintu akifuisha muloo
Na bantu baye bua’shi bekale kintu akisankisha ngofu.
19 Na nakekala na muloo bua Yelusalema na nakasanka bua bantu bande;
Tuleo tua kudila na misaase ya dikienga tabikapushika dingi muadi.”
20 “Mu yaaya mbalo, tamukekala muana kiaomo akekala na muwa penda bua mafuku apeela,
Sunga muntu mununu akafu mafuku aaye taalombene.
Muanda muntu oso afu na bipua 100 abakamumono bu ki’ekalanga nsongualume,
Na nkitshishi a miluisho akedibua mulua, sunga ekala na bipua 100.*
21 Abakebaka mashibo na abakashala muanka,
Abakadimi mafuba a tukuba tua nfinyo na abakadi tukuba tuayo.
22 Tabakebaka mashibo bua’shi ungi muntu emushale,
Sunga kukuna bua’shi bangi bantu badie.
Muanda mafuku a bantu bande aakekala nka bu mafuku a mutshi,
Na bantu bande bandi musangule abakasanka ngofu na mufubo wa maasa aabo.
23 Tabakafubu ngofu bua bisumanga,
Sunga kutanda bana bua dikienga,
Muanda mbekale lutandua* lukitshibue na bantu bedibue miabi kui Yehowa,
Na bana babo pamune nabo.
24 Sunga kumpala ku’abo kuitanyina, nakalula;
Pabaki’abakula, nakapusha.
25 Museu na muana a mukooko abakadi pamune,
Ntambue akadi bisosua nka bu ngombe,
Na kidibua kia nyoka akikekala lufufi.
Tayikakitshi muanda wi bubi sunga kuluisha kintu su nkimune mu muengie wande oso wa kishila,” nyi abiakula Yehowa.