Yobo
31 “Ne mukite kilombeno na meso ande.
Biabia mbikunyi biandi mulombene kutuma binangu kui mukashi kamame mu mushindo wi bubi?
2 Paapa, nkinyi kia nkapete kui Efile Mukulu muiyilu,
Bupianyi kinyi bua nkapete kui Sha Bukome Boso muiyilu?
3 Masaku taatengielaa nkitshishi a bubi
Na dikienga taditengielaa baba bakuete kukita mianda ibubi su?
4 Takuete kumona mashinda ande
Na kubadika matabula ande oso su?
5 Tandi mutambukie mu madimi su?*
Luao luande nduende lubilo mu kudimba su?
6 Efile Mukulu ampime na kipimo kilulame;
Paapa akatundula lulamato luande.
7 Su matabula ande ngekumbe muishinda
Sunga eshimba diande ndilonde meso ande
Sunga’shi maasa ande ngekashue butete,
8 Biabia nkune mbio na ungi muntu adie,
Na biabia biandi mukune bishudibue.*
9 Su eshimba diande ndikakibue kui muana mukashi
Na nemubelame ku kibelo kia nkungishanyi nami,
10 Biabia mukashi ande apele ntete bua ungi mulume,
Na bangi balume balale naye.*
11 Muanda biabia abikala muikelo wi buufu,
Kilubilo kilombene kunyokibua kui ba nsushi.
13 Su naadi mupelele bafubi bande balume sunga bafubi bande bakashi kululama
Pabaabadi nami kilumbu,
14 Nkinyi kiandi mulombene kukita apansambisha* Efile Mukulu?
Ne mulombene kumualula kinyi pa ngiele nkonko?
15 Yawa baadi munkite muifu nta naye baadi muibakite namu su?
Ta nka Aye nyi baadi muitukite kumpala kuashi tutandibue?*
16 Su naadi mupele kupa balanda bibaabadi nabio lukalo
Sunga kukutshisha mukashi kilele lukulupilo;*
17 Su naadi nadi bia kudia biande bupenka
Kushi kupa bana ba nshiye;
18 (Muanda kubanga ku bu nsongua buande muana a nshiye baadi akudila kuandi nka bu’shi naadi nshaye,
Na naadi nakunkusha mukashi kilele kubanga ku bukinga* buande.)
19 Su namuene muntu afu muanda wa kukutua bilamba
Sunga mulanda shi na kia kuibuikila;
20 Su tabaadi mu ngielele miabi
Panaadi mumupe kilamba kikitshibue na buaa bua mikooko yande buashi apushe kibobo;
21 Su naadi nafungila muana a nshiye ekofi
Pabaadi na lukalo lua bukuashi ku kibelo kia kibundi;*
22 Biabia mboko* yande itukukie kuipampa diande ipone,
Na mboko yande itshokokie pa lukongongo.*
23 Muanda naadi natshinyi masaku aafiki kui Efile Mukulu,
Na ntshinaadi bia kuimana kumpala kua kinemo kiaye.
24 Su naadi mutuule lukulupilo luande mu ôlo
Na kulungula ôlo e buwa’shi: ‘We mulami ande!’
25 Su naadi mupete muloo mu bupeta buande bui bungi
Pa muanda wa bintu bibungi binaadi mupete;
26 Su namuene nguba* amunyika
Sunga mueshi autambuka mu ntumbo yao.
27 Na eshimba diande diakakibua mu bufiefie
Na kukanua kuande kuafifia eyasa diande bua kuibilanguila;
28 Paapa bibaadia kuikala kilubilo kilombene kunyokibua kui ba nsushi,
Na nadia kuikala mupele Efile Mukulu a binyibinyi e muiyilu.
29 Tandi musankie bua kubutuka kua muishikuanyi ande
Sunga kupusha muloo bua mianda ibubi ibaadi imufikile?
30 Kashaa tambandile kutadiila kukanua kuande buashi kukite muluisho
Pa kumuela mulua na kumuabikiisha lufu.*
31 Bantu ba mu kashibo kande k’epema tababaadi bakule’shi:
‘Nanyi mulombene kupeta muntu shi muikute biakudia* biaye?’
32 Muenyi* su ngumune tabaadi mulale paasha;
Naadi nafungula bibelo biande bua muina luendo.
33 Kashaa tanatompele kubuikila bilubilo biande bu bangi bantu,
Pa kufuamisha kilubilo kiande mu mpaya a kilamba kiande su?
34 Tanapushishe moo bua bilombene kukita bantu bebungi,
Sunga kutshina kubepulua na bingi bifuko,
Biakitanga bia’shi nshale muumine na kutshina bua kutuuka paasha su?
35 Ayi baboo, su muntu su ngumune badia nkuteemesha!
Nadia kuela kiala ki’eshina diande ku binangakula.
Sha Bukome Boso angalule!
Su yawa munfunde badia kufunda sunga mianda yanfundu nayo mu mukanda!
36 Nadia kuiutuala ku mapampa ande,
Na kuiwanya ku mutue wande bu kifulu kia bufumu.
37 Nadia kumulubuila pabitale etabula dioso dinaadi muele
Nadia kuifubuila kuadi kushi kutshina nka bu mukunkushi.
38 Su nsenga yande ibadia kuidila pabintale
Na mbunda yayo ibadia kudila pamune;
39 Su naadi mudie biubuluanga biayo kushi kufuta,
Sunga kukita bia’shi basha nayo* bakutue lukulupilo,
40 Paapa milobo immenene pa mbalo ya blé
Na bisosua abituushaa eshiko di bubi mbimenene pa mbalo ya orje.”
Mayi a Yobo abemeena pano.