Yeshaya
52 Ô Siyona! Pasuka! Pasuka! Nyinga,*
Fuala bilamba biobe bi buwa, Ô Yelusalema, kibundi kiselele!
Muanda muntu su ngumune shi musadibue na muntu e butete takatuele dingi modi.
2 Ô Yelusalema kukula lufufi, ebue na oshale.
Angula mioshi i mu nshingo mobe, Ô muana mukashi a Siyona abadi bakuate.
3 Muanda Yehowa bakula bino’shi:
“Nubaadi baudishibue buntu,
Na anukakuudibua kushi makuta.”
4 Muanda Muanana Mukile Bukata Yehowa bakula bino’shi:
“Kumpala muilo wande ubayile mu Ejipitu bua kushala bu benyi;
Akupu Asiri baadi muibakiengieshe kushi muanda.”
5 Yehowa akula’shi: “Biabia ne kukita kinyi binobino?”
“Muanda bantu bande mbakuatshibue benda nabo kushi kintu.
Baba abebakunkusha bakuete kutungunuka na kuela misaase ya kutshimuna,” nyi abiakula Yehowa,
“Na nsaa yoso, muifuku dishima, tabanemeka eshina diande.
6 Bua uno muanda bantu bande abakauku eshina diande;
Bua uno muanda abakauku mu diadia efuku’shi nnami kuete kuakula.
Talayi, nnami!”
7 Tala bi ngua ya muntu atuala mukandu wibuwa ku miengie buwa,
Yawa aukisha butaale,
Yawa atuala mukandu wibuwa wa muanda wibuwa,
Yawa aukisha kipandilo,
Yawa alungula Siyona’shi: “Efile Mukulu oobe bafiki Nfumu!”
8 Pusha! Balami bobe babakaamisha mayi aabo.
Abeele misaase pamune,
Muanda abakebimono patooka apakalushuula Yehowa Siyona.
9 Sankayi, nuele misaase ya muloo pamune, anue bikulu bia Yelusalema,
Muanda Yehowa basamba bantu baye; bakuulu Yelusalema.
10 Yehowa balesha mboko yaye ya kishila ku meso kua miilo yoso;
Nfudiilo yoso ya nsenga ayikamono bikitshino bia kipandilo* bia Efile Mukulu eetu.
11 Katukayi, katukayi, tuukayi muanka, tanukumanga kintu ki butete!
Tuukayi mukantshi muaye, elameyi betooshe,
Anue basemune bintu bia mufubo bia Yehowa.
12 Muanda tanukende na kusuusakana,
Sunga kusuuka,
Muanda Yehowa akende kumpala kuenu,
Na Efile Mukulu a Isalele akekala mulami eenu kumongo kuenu.
13 Talayi! Mufubi ande akakitshi mianda na kapatupatu.
Akakaamishibua kuiyilu,
Akakaamishibua na kutumbishibua ngofu.
14 Nka bu bibaadi bantu bebungi bamutale na kukaanya,
Muanda mpala yaye ibaadi iluile kukila ya bangi bantu boso
Na mmuenekielo aaye a kukaanya baadi muluile kukila a bantu.
15 Biabia nyi biakabasamusha miilo.
Ba nfumu abakafungu kukanua kuabo* kumpala kuaye,
Muanda abakamono mianda yabashibaadi bebalungule
Na abakatuulu binangu ku mianda yabashapushishe.