Yobo
18 Bildade muina Shuwa baluluile’shi:
2 “Anukalekie kuakula mayi e bino mpa na ku mafuku kinyi?
Leshayi binangu buashi tuisambe.
3 Buakinyi abitungu betumone bu nyema
Na ku’atshibua bu bantu bashi na binangu* ku meso kuenu?
4 Sunga wetshiba mu bipindi mu nsungu yobe,
Nsenga ayikasumbushenua pa muanda oobe,
Nsunga’shi lubuebue alukatuka pa mbalo yalo?
5 Oolo, etaata dia muntu ebubi adikashimi,
Na ludimi lua kaalo kaye talukamunyika.
6 Etaata di mu kashibo kaye k’epema adikafiki binyibinyi mufito,
Na kimunyi ki panundu paye akikashimi.
7 Bashimisha bukome buaye bua kutambuka,
Na binangu biaye abikamuponesha.
8 Muanda ngua yaye ayimutuala mu bukondia,
Na eumbu mu mioshi yabo.
9 Muteo aukamukuata ku kisuulu;
Muteo aukamukuata.
10 Mbamufuamishe moshi muushi mua nsenga,
Na muishinda diaye mui muteo.
11 Bintu abitshinyisha abimukuatshisha moo mu mpese yoso
Na abimulondo lubilo ku ngua yaye.
12 Bukome buaye bubapu,
Na masaku aakitshi biashi asumpikite.
13 Kikoba kiaye nkidibue;
Mukumbo wi bukopo awipayishena* ubadi mikoolo yaye na maboko aaye.
14 Babamukasha mu bulami bua kashibo kaye k’epema
Na babamutuala ku lufu lui bukopo.*
15 Bantu benyi* abakashala mu kashibo kaye k’epema;
Sufule akapalakana mu nshibo yaye.
16 Mishi yaye ayikaumu muushi muaye,
Na ntabi yaye ayikafumbu kunundu kuaye.
17 Tabakamutentekiesha dingi pa nsenga,
Na eshina diaye tadikaukibua muishinda.*
18 Abakamukasha kuitaata bende naye mu mufito
Na abakamubingi mu nsenga ayitushaa bintu.
19 T’akekala na bana na bekulu munkatshi mua muilo waye,
Na t’akekala na muntu su ngumune mushaale na muwa mu mbalo yadi mushale.*
20 Apakafiki efuku dia kubutuka kuaye, bantu ba dia kupona nguba abakapusha moo
Na bantu ba dia kutunduka nguba abakatshinyi ngofu.
21 Bino nyi abikafikila tushibo tua mapema tua muntu akitaa bubi
Na mbalo ya muntu shauku Efile Mukulu.”