Yeshaya
6 Mu kipua kibaadi Nfumu Oziase mufue, namuene Yehowa mmushale mu nkuasa a bufumu e kunundu na mukaamishibue, na luembe lua musapi waye lubaadi luule ntempelo oso. 2 Ba Serafe babaadi bemane kunundu kuaye; oso a kuabadi baadi na mbaba isamombo. Oso a kuabadi baadi mubuikile mpala yaye na mbaba ibidi na mubuikile mikoolo yaye na mbaba ibidi, na oso a kuabadi baadi apapama na mbaba ibidi.
3 Na abaadi abelungushena’shi:
“Eselele, Eselele, Eselele nyi Yehowa.
Nsenga yoso ngiule na ntumbo yaye.”
4 Ntempa ya biibi ibaabangile kutshinkatshinka pa muanda wa tuleo tua misaase,* na nshibo ibaadi iule na miishi.
5 Akupu nakuile’shi: “Malua kuandi!
Nepusha nka bu bapu kufua,
Muanda ne muntu e na milomo i butete,
Na nemushale munkatshi mua bantu be na milomo i butete;
Muanda meso ande abamono Nfumu, Yehowa a biluilo aye nabene!”
6 Biabia umune a ku ba Serafe bapapamine afika kuandi, na muiyasa diaye mubaadi ekala di kaalo dibaadi muate ku kilambuilo na tumano. 7 Bakumine kukanua kuande na akula’shi:
“Tala! Kino kibakumu ku milomo yobe.
Kupiila kobe kubakatushibua,
Na muluisho obe ubabuikilua.”
8 Akupu napushishe eyi dia Yehowa adiakula’shi: “Nnanyi andia kutuma, na nnanyi ende buetu?” Nakuile’shi: “Nami uno! Ntume!”
9 Na baluluile’shi: “Enda, na okalungule bano bantu’shi:
‘Anukapusha misusa na misusa,
Anka tanukashinguula kintu;
Anukamono misusa na misusa,
Anka tanukapete kiukilo.’
10 Papisha mashimba a bano bantu,
Opapishe matui aabo,
Na opuute meso aabo,
Bua’shi tabamonanga na meso aabo
Na tabapushanga na matui aabo,
Bua’shi mashimba aabo taashinguulanga kintu
Na tabalukilanga kuandi na kupashiibua.”
11 Biabia nakuile’shi: “Mpa na ku nsaa kinyi, Ô Yehowa?” Akupu bakuile’shi:
“Mpa na apakabutulua bibundi, mushale mushi bantu
Na apakekala mu mashibo tamuki bantu
Na nsenga iluishibue na ishale bisumanga;
12 Mpa na apakakatusha Yehowa bantu ebatume kula
Na apakekala ma mbalo e bungi a nsenga ashale bisumanga.
13 Anka ki’ekumi akikashala nka muanka, na abakekishiiki dingi kaalo, nka bu mutshi ukata aulekaa kishishi kunyima kuabo kuiutshiba; emiino* diselele adikekala kishishi kiayo.”