Yeshaya
59 Talayi! Eyasa dia Yehowa nta ndipi ngofu bua kukutua kupaasha,
Sunga etui diaye ntandishike* ngofu bua kukutua kupusha.
2 Nya bilubilo bienu nyibinuabuule na Efile Mukulu eenu.
Miluisho yenu nyi imufikishe mu kuinufuamisha mpala yaye,
Na kupela kuinuteemesha.
3 Muanda maasa eenu ngaluile na mase,
Na minue yenu ngiluile na bilubilo.
Milomo yenu ayakula madimi na ludimi luenu aluunauna mianda ya kukutua kululama.
4 Takui muntu su ngumune ayitanyina kululama,
Na takui muntu su ngumune ende ku tumiladi mu binyibinyi.
Mbakulupile mu kintu kishaakikalaa kuanka na abakula mianda ishi na muulo.
Abemitaa nkalakashi na abatandaa mianda i bubi.
5 Abatotola mayi a nyoka a lulengo,
Na abaluku bulambo bua natanda.
Muntu oso adi mayi a nyoka a lulengo afu,
Na eyi diabatotola adituusha nyoka a lulengo.
6 Bulambo buabo bua natanda tabukebakuasha bu kilamba,
Na tabakebuikila kintu kiabadi bakite.
Mifubo yabo i bubi,
Na bikitshino bia buntomboshi bi mu maasa aabo.
7 Ngua yabo ayendaa bukidi mu kukita bubi,
Na ayendaa lubilo mu kusumbula mase a muntu shi musoole muanda.
Binangu biabo, mbinangu bi bubi;
Kabutu na dikienga bi mu mashinda aabo.
8 T’abauku eshinda dia butaale,
Mu mashinda muabo tamui butaale.
Mbekashe mashinda aabo akonyakane;
Muntu oso atambukila muanka t’akapete butaale.
9 Nyi buakinyi kululama kui kula netu,
Na kululama t’akufiki kuatudi.
Atutungunuka na kukulupila etaata, anka tala! Kui mufito;
Atutungunuka na kukulupila etaata, anka atutungunuka na kutambukila mu mufito wi bukopo.
10 Atukunkakunka ku mudimba nka bu ba mpofu;
Nka bu bantu bashi na meso, atutungunuka na kukunkakunka.
Atukokola mu midi nka bu mu mufito wa ku kiolua;
Munkatshi mua bantu be bukome tuinka bu bantu bafue.
11 Atue boso tukuete kukungula nka bu nyema a urse
Na atudidi na kinyongua nka bu tonyi tua makutshi.
Atukulupila kutshiba kiimu na kululama, anka takui kuanka;
Atukulupila kipandilo, anka ki kula netu.
12 Kutomboka kuetu kui bungi kumpala kobe;
Miluisho yetu ayitufundu.
Muanda kutomboka kuetu kui netu;
Atuuku kalolo bilubilo bietu.
13 Tui bakite miluisho na tuapela Yehowa;
Tui beele Efile Mukulu eetu mongo.
Tui bakule bua kukiengieshena na kutomboka;
Tui bemite madimi na tui bauneune mianda ya madimi mu mashimba eetu.
14 Kutshiba kiimu na kululama kubaluka kunyima,
Na kululama nkuimane ku bula,
Muanda binyibinyi mbikokole mu mbalo ya bantu boso,
Na kiakia kilulame taki bia kutuela.
15 Binyibinyi mbishimine,
Na muntu oso akatuka ku mianda i bubi apaulua.
Yehowa baadi mumone bino na tabibaadi bimusankishe,*
Muanda takubaadi kutshiba kiimu na kululama.
16 Baadi mumone’shi, takubaadi muntu,
Na baadi mukaanye biakushibaadi muntu baadi muibakuiile,
Biabia mboko yaye ibaadi ituale kipandilo,
Na kululama kuaye kubaadi kumukuatshishene.
17 Akupu baadi mufuale kululama bu ekotshi dia tu biamo
Na kifulu kia kipandilo* ku mutue kuaye.
Baadi mufuale bilamba bia kuiobuela bu bilamba biaye
Na baadi muipombele kisumi bu ekotshi.*
18 Bino mbiakebafutu bua mianda yabadi bakite:
Nsungu kui baluishi baye, dinyoka kui beshikuanyi baye.
Na akafutu bisangi kiakia kibalombene.
19 Abakatshinyi eshina dia Yehowa kukatukila kupona nguba
Na abakatshinyi ntumbo yaye kukatukila kutunduka nguba,
Muanda akafiki bu muela awalala na mpumo,
Wabatakula kui kikudi kia Yehowa.
20 “Mukuudi akafiki ku Siyona,
Kui bana ba Yakobo balekie miluisho,” nyi abiakula Yehowa.
21 Yehowa akula’shi: “Buande’mi, kino nyi kilombeno kiande nabo.” “Kikudi kiande kipodi na mayi ande andi mutuule mukanua mobe, tabikakatuka mukanua mobe, mukanua mua bana* bobe, sunga mukanua mua bekulu* bobe, kubanga binobino na bua loso.” Nyi abiakula Yehowa.