Kui Bena Loma
1 Ami Mpoolo mpika a Yesu Nkidishitu na muitaminyibue bua kuikala mutumibua, musangulue* bua kulungula mukandu wibuwa w’Efile Mukulu, 2 ubaadi mupue kulaa ku bukuashi bua batemuki baye mu Bifundue biselele, 3 utale Muan’aye, baadi kekulu* ka Davide ku mbidi. 4 Mbimuenekie patooka’shi Mmuan’Efile Mukulu, muanda Efile Mukulu baadi mufubishe bukome bua kikudi kiaye kiselele bua kumubuusha ku lufu—eyendo, Yesu Nkidishitu Nfumuetu. 5 Ku bukuashi buaye, Efile Mukulu mmundeshe kalolo* kaye, Yesu mmunsangule bua kuikala mutumibua bua kukuasha bantu ba miilo yoso bua’shi baleeshe lukumiino, na kukookiela na kutumbisha eshina diaye, 6 nanue namu, nui munkatshi mua yaaya miilo itaminyibue bua kulonda Yesu Nkidishitu— 7 uno mukanda neunfudila boso be ku Loma babadi bafule kui Efile Mukulu, betaminyibue bua kuikala beselele:
Kalolo na butaale bi’Efile Mukulu Nshetu, na Muanana Yesu Nkidishitu bikale nenu.
8 Kumpala kua bioso, natumbula Efile Mukulu ande ku bukuashi bua Yesu Nkidishitu pa muanda wenu boso, muanda bakuete kuakula pabitale lukumiino luenu mu nsenga yoso ishima. 9 Anka Efile Mukulu ankuete kukitshina mufubo wa kishila n’eshimba diande dioso* pa kupalakasha mukandu wibuwa pabitale Muan’aye, auku’shi ntshi mukookie kuinuteemuna mu nteko yande, 10 natekie’shi su kui mushindo na su Efile Mukulu akumiina, nekale na mushindo wa kufika kuanudi. 11 Muanda ne na lukalo lukata lua kuinumona bua’shi nenupe kia buntu kia mu kikudi,* bua nudia kunyingishibua; 12 sunga’shi tuikale na mushindo wa kuinyingishena ku lukumiino lua muntu na muntu, luenu na luande.
13 Bakuetu, nakumiina nuukie’shi nakimbanga kufika kuanudi misango i bungi—anka mpa na binobino ntshi mupete mushindo—muanda nakuminanga kumona bipeta bibuwa munkatshi muenu nka bu biabikuete kukitshika munkatshi mua ingi miilo. 14 Ne n’ebaasa kui bena Greke na kui benyi,* kui ba sha binangu na kui ba shi na binangu. 15 Biabia ne na lukalo lukata lua kuinulungula mpa n’anue namu be ku Loma mukandu wibuwa. 16 Muanda ntshi na buufu bua kulungula mukandu wibuwa, mu binyibinyi awo ngi mushindo wabafubisha kui Efile Mukulu bua kupaasha muntu oso e na lukumiino, kia kumpala muina Yunda, na akupu muina Greke. 17 Muanda kululama ku’Efile Mukulu kukuete kuleeshibua patooka kui baaba abaleesha lukumiino, na bino abinyingisha lukumiino luabo, anka bu biabidi bifundibue’shi: “Kadi muntu mululame ekala na muwa muanda wa lukumiino.”
18 Muanda nsungu y’Efile Mukulu ayileshibua kukatukila muiyilu, bua mianda yoso ibubi na ya kukutua kululama ya bantu abakutshisha bia binyibinyi buabidia kuukibua, na abebikitshi mu mushindo ushi ululame, 19 muanda kiakia akitungu’shi baukie pabitale Efile Mukulu, nkileshibue patooka munkatshi muabo, muanda Efile Mukulu mmuibaleshe kianka patooka. 20 Muanda ngikashi yaye ishayimueneka, ikuete kumueneka patooka kubanga ku kipangilo kia nsenga, muanda bakuete kuiyimona ku bintu biadi mupangie, sunga bukome buaye bua ikalayika na bu’Efile buaye, biabia ta be na kabingilo ka kupela kukumiina mui Efile Mukulu. 21 Sunga biabaukanga Efile Mukulu, ta mbamutumbishe bu Efile Mukulu sunga kumutumbula, anka mbatueshe kabulakanyi mu ngielelo aabo a binangu na mashimba aabo apape nkukutua kulesha lushinguluilo. 22 Sunga biabamba’shi mba sha binangu, mbapatakane. 23 Pamutue pabadia kutumbisha Efile Mukulu sh’afuiyaa, bakuete kutumbisha bifuatulo bia bantu abafu na bia tonyi, na bifuatulo bia nyema ayitambuka na ayikaka.
24 Nyi buakinyi, Efile Mukulu mmuibatadile abakumbasha ngabiabi i butete ya mu mashimba aabo, na abakitshi mianda i buufu na mbidi yabo. 25 Mbashintuule bia binyibinyi bi’Efile Mukulu ku madimi na abalanguila na kufubila bintu bipangibue, pamutue pa kulanguila Mupangi, aye e na kia kutumbishibua bua loso. Amene. 26 Nyi buakinyi Efile Mukulu mmuibatadiile ku ngabiabi ya lusandi i buufu, muanda bakashi babo mbashintuule mushindo wa kuilaalena na bana balume kushi muyile biabibaadi ku kibangilo; 27 na dingi, bana balume mbalekie mushindo wa kuilaalena wa ku kibangilo na bana bakashi, na mbepaane mu ngabiabi yabo, abakitshi mianda ibutete; abelaalena balume na balume, na abapete efuto* diibakumbene muyile bilubilo biabo.
28 Bu bibaabadi bamone’shi ta bi na muulo bua kuuka Efile Mukulu,* Efile Mukulu mmuibatadiile abatungunuka na ngielelo abo a binangu shi na muulo na kukita mianda ishi ikumbanyine. 29 Na mbaule na mianda ya kukutua kululama ya bipaso bioso, etombo, luabi, na mianda i bubi. Mbaule ndaa na malaka, kuipayishena, kuikutuena, madimi, binangu bi bubi, na abaunauna,* 30 be na tuipu, bashikue Efile Mukulu, bashi na kanemo, be na kuitatula, abeleesha, abanangushena kukita mianda ibubi,* bash’abakookiela bebatande, 31 bashi na binangu, bash’abakumbasha biabadi balee, bashi na kifulo kia butandua, na bashi na lusa. 32 Aku namu, abauku kalolo abiamba Efile Mukulu’shi, bantu abakitshi yaaya mianda, mbalombene lufu. Anka t’abatungunuka penda na kuiyikita, kadi abakuatshishena na baaba abeyikitshi.