Yobo
38 Akupu Yehowa baluluile Yobo mu kipapi ki bukopo’shi:
2 “Nnanyi kuete ku’elesha elango diande mufito
Na kuete kuakula kushi kiukilo?
3 Elumbuule namu, bu muana mulume;
Nakuele nkonko, na ongalule.
4 Bodi kunyi panaadi mukite nsenga?
Ndungule, su opuandikisha’shi we na lushinguluilo.
5 Su ouku, nanyi baadi mutshibe bukata buayo,
Sunga mufubishe moshi bua kuiyipima?
6 Bitako biayo mbishimikie mu kinyi,
Sunga’shi nanyi baadi mutuule ebue diayo dia muipaka,
7 Pabaadi nyenyenyi ya ku namashika ayele misaase pamune,
Na pabaadi bana boso b’Efile Mukulu* babangie kuela misaase ya muloo?
8 Nnayi baadi mushitshile kalunga ka mema biibi
Pakabaadi katuukie muifu,
9 Panaadi muikapuute makumbi
Na panaadi muikafungile mu mufito wi bukopo,
10 Panaadi mutuule mikalo yako
Na panaadi mutuule bibao na biibi mu mbalo yabio,
11 Na nakuile’shi: ‘We kufika mpa na pano, anka tokilanga;
Pano nyi apemeena kuitatula kua mbundambunda yobe’?
12 Tobodi* mutumine namashika eyi
Sunga kuukisha nguba kuadia kutundukila,
13 Bua kukuata ku nsongo ya nsenga
Na bua kunyuka bantu bebubi bua kuibakatusha panka?
14 Ayishintuluka nka bu ema muushi mua kitampi,
Na bitunduilo biayo abimueneka nka bu bia kilamba.
15 Anka mbasumine bantu bebubi etaata,
Na mboko yabo yele muiyilu ngitshokokie.
16 We muikie mpa na ku nsulo ya kalunga ka mema
Sunga kuenda na kukimbuula mu mema e bula su?
17 Mbapue nkulesha biibi bia lufu,
Sunga’shi tobomuene biibi bia mufito wi bukopo?*
18 Toboshinguluile bi bukata bua nsenga?
Ndungule, su ouku bino bioso.
19 Etaata adishalaa lupese kinyi?
Na mufito awikala kunyi,
20 Buashi wende nabio ku mbalo yabio
Na oshinguule mashinda aende ku nshibo yabio?
21 Ouku bino muanda bodi mupue kutandikua
Na bipua* biobe bi bungi su?
22 Tobotuelele mu mashibo a kulamina neje,
Sunga’shi tobomuene mashibo a kulamina mabue a kasangu,
23 Biandi mulame bua kipungo kia dikienga,
Bua efuku dia ngoshi su?
24 Etaata* adipalakanaa lupese kinyi,
Na lupapi lua kutunduka nguba alupukilaa kunyi pa nsenga?
25 Nanyi mutanyine mpeshi ebungi eshinda
Na mukitshine ekumbi dia mpeshi ebukopo a tupandapanda eshinda,
26 Bua kunokiesha mpeshi mbalo ishi muntu,
Mu kabaaka mushi bantu,
27 Bua kuikutshisha ma mbalo aluishibue
Na kumenesha lubishi?
28 Mpeshi ekalaa na nshaye su,
Sunga’shi nanyi mutande makopola a lume?
29 Mabue a mashika aatukaa muifu dia nanyi,
Na nanyi mutande milemba i mashika ayifikaa muiyilu
30 Pababuikilaa mema nka bu abadi babuikile kui ebue,
Na panundu pa mema e bula apekuatena bu ebue?
31 We mulombene kuanya mioshi ya kisaka kia nyenyenyi kia Kima*
Sunga kuangula mioshi ya kisaka kia nyenyenyi kia Kesila?*
32 We mulombene kutuusha kisaka kia nyenyenyi* mu kipungo kiakio
Sunga kukunkusha kisaka kia nyenyenyi kia Asha* na bana bakio su?
33 Ouku miiya ikuete kukunkusha eyilu,
Sunga’shi we kukitshisha nsenga buashi ikale ku matalua aayo?*
34 We kukaamisha eyi diobe mpa na ku makumbi
Bua kukita bia’shi mema ebungi a kubuikile?
35 We mulombene kutuma mipenyo?
Ifikie na ikulungule’shi: ‘Nnatue bano!’
36 Nanyi muele binangu mu makumbi*
Sunga’shi nanyi mupe bintu bia kukaanya bi muiyilu* lushinguluilo?
37 Nanyi e na binangu bikumbane bua kubadika makumbi,
Sunga’shi nanyi mulombene kupongoola malondo a mema a muiyilu
38 Apafiki lufufi bu matekie
Na apelamatshishena mabuwa a nsenga?
39 We mulombene kukuatshila ntambue kia kudia
Sunga kupudisha nsala ya bana ba ntambue?
40 Payidi ibutame mu ma mbalo aayo a kufuamina
Sunga payidi ibelame mu meena aayo?
41 Nnanyi alumbuluila manganga bia kudia
Pekale bana bao abadidila Efile Mukulu bua kuteka bukuashi
Na pabaumbakana muanda wa kukutua kia kudia?