Yobo
37 “Pa muanda wa bino eshimba diande adikupila lubilolubilo
Nka bu adikiebe kukatuka pa mbalo yadio.
2 Teemesha kalolo mukungulo wa eyi diaye
Na kapandapanda akafiki mukanua muaye.
3 Ekalekieelaa muushi mua eyilu dioso
Na atumaa mipenyo yaye mpa na ku nfudiilo kua nsenga.
4 Kunyima kua biabia akupushika mukungulo;
Eyi dibukopo di’Efile Mukulu adipushika nka bu kapandapanda,
Na t’ekatosha apapushika eyi diaye.
5 Efile Mukulu akungulaa na eyi diaye mu mushindo wa kukaanya;
Akitaa mianda ikata ya tushi bia kushinguula.
6 Muanda alungulaa neje’shi: ‘Pona pa nsenga,’
Na mpeshi e bukopo’shi: ‘Pongoloka ngofu.’
7 Efile Mukulu ayimikaa mufubo* wa muntu oso
Bua’shi muntu afuiyaa aukie mufubo waye.
8 Nyema ya kisuku ayende mu meena aayo
Na ayishala mu ma mbalo aayo akufuamina.
9 Lupapi lui bukopo aluele kukatukila ku kadimbo kalo,
Na mashika aafiki kukatukila ku mpapi ya dia kunundu.
10 Ku muwa w’Efile Mukulu, mabue a mashika aakitshibua,
Na mema akata aekuatena aafiki bu mabue.
11 Oolo, eleshaa makumbi bushito na kitalesha;
Apalakashaa mipenyo yaye mu makumbi;
12 Aefunyafunya kuakua ku’ealudika;
Aakumbasha kioso ki’eatumina eyi pa nsenga ishadiibue.*
13 Biabikala bua dinyoka* sunga pa muanda wa nsenga
Sunga bua kifulo kia lulamato, akitaa bia’shi bikitshikie.
14 Yobo, teemesha uno muanda;
Imana na onangushene kalolo ku mifubo ya kukaanya ya Efile Mukulu.
15 Ouku abikunkushaa* Efile Mukulu makumbi
Na bi’akitaa bia’shi mupenyo wele kukatukila muikumbi diaye?
16 Ouku abiembelaa makumbi?
Ino nyi mifubo ya kukaanya ya Yawa mupuidikie mu kiukilo.
17 Buakinyi bilamba biobe bibele kibobo
Pekale nsenga ngiumiine pa muanda wa lupapi lua dia kuushi?
18 We mulombene, kuadisha* naye eyilu
Na kuidikasha bukopo bu lumueno lua kiamo?
19 Etulungule kiatudia kumulungula;
Tatui balombene kualula pa muanda tui mu mufito.
20 Abitungu bamulungule’shi nakiebe kuakula?
Sunga’shi muntu bakula muanda autungu kumulungula su?
21 Ta mbalombene sunga kumona etaata,*
Sunga bitookie eyilu,
Mpa na apakidi lupapi na alukatusha makumbi.
22 Kupenyapenya kui bu kua ôlo akufiki dia kunundu;
Kinemo kia Efile Mukulu nkia kutshina.
23 Tatui bia kushinguula mianda yoso ya Sha Bukome Boso;
E na bukome buibungi,
Na tatshibaa kiimu mu mushindo wikutuene na kululama kuaye kukata.
24 Biabia, bantu be na kia kumutshina.
Muanda t’akumiinaa bantu abapuandikisha’shi be na binangu.”