Mukanda kui Bena Ebelu
9 Kilombeno kia kala kibaadi na mianda itekiibue muyile miiya bua mufubo* wa kishila na mbalo yakio ya kishila pa nsenga. 2 Muanda mu kadimbo ka kumpala ka nshibo y’epema ibaabadi bebakie, mubaadi kituudilo kia bimunyi na mesa a kutuudila mikate ya mulambu* na babaadi abeketanyina’shi Mbalo ya Kishila. 3 Anka, kunyima kua kilamba kia lushiko kia kabidi kubaadi kangi kadimbo kabaabadi abetanyina bu mbalo Ikile Kishila. 4 Mubaadi kintu kia kushiikila kabanda* kia ôlo na mushete wa kilombeno ubaabadi balamikie ôlo awo oso ushima, mu wawa mushete mubaadi kalondo ka mana ka ôlo, na mukombo wa Alona ubatuushishe bilongo na mabue a kilombeno; 5 na kunundu kua wawa mushete kubaadi bakeluba ba ntumbo babaadi bapuute ku mpuuto* a mushete na muesheshi wabo. Anka ino ta nsaa ya kuakula bua ino mianda kantu pa kantu.
6 Kunyima kua’bo kuibaka bino bintu mu uno mushindo, ba tshite muakuidi babaadi abatuele misango ibungi mu kadimbo ka kumpala ka nshibo y’epema bua kukita mifubo* ya kishila; 7 kadi tshite muakuidi mukata baadi atuele bupenka mu kadimbo ka kabidi musango umune ku kipua, atuele na mase abaadi alambula buaye’ye nabene na bua miluisho ibaadi bantu bakite kushi kuuka. 8 Kadi kikudi kiselele nkileshe patooka’shi eshinda dia ku mbalo ya kishila tadibaadi dibande kuleshibua bu bibaadi nshibo ya kumpala y’epema ikii imane. 9 Yaaya nshibo y’epema nkifuanyi kia kino kipungo kiatudi, na muyile ino mpango abatuusha bia buntu na milambu. Anka bino bintu ta mbilombene kuikasha kondo k’eshimba ka muntu akitshi mufubo wa kishila katookane. 10 Ino mianda ngitale nka penda bia kudia na bia kutoma na mishindo ilekenelekene ya kuitumpa mema* muyile miiya. Ino nyi mianda ibaadi miiya ayitekie pabitale mbidi, na babaadi abeyikitshisha bantu mpa na ku kipungo kibaabadi basangule bua kulumbuula mianda.
11 Anka, pabaadi Nkidishitu mufikie bu tshite muakuidi mukata a mianda ibuwa ibaadi ipue kukitshika, batuelele mu nshibo y’epema ikile bukata na ipuidikie ishibaadi ikitshibue na maasa, kuamba’shi ishi ya mu bintu bipangibue pano pa nsenga. 12 Baadi mutuele mu mbalo ya kishila kushi na mase a bipembue, na a bana ba ngombe ilume, anka baadi muimutuele na mase aaye’ye nabene, musango umune bua loso, na baadi muitupaashe* bua loso. 13 Muanda su mase a bipembue na a ngombe ilume na buto bua ngombe yana ikashi, bubaabadi abamiamina bantu babaadi butete abuibekasha selele bua kutooshibua ku mbidi, 14 tui kuamba naminyi bua mase a Nkidishitu, baadi muilambule aye nabene kui Efile Mukulu kushi kalema ku bukuashi bua kikudi kiselele kia loso, ta ngalombene kutoosha kondo ketu k’eshimba ku mifubo ifue bua’shi tumone bia kukitshina Efile Mukulu e na muwa mufubo wa kishila su?
15 Nyi buakinyi e pankatshi pa kilombeno kipia bua’shi bantu babadi basangule, bamone bia kupeta mulayilo wa bu mpianyi bua loso, muanda baadi mufue bua’shi ebakuule ku miluisho ibabaadi bakite mu kilombeno kia kala. 16 Muanda pakudi kilombeno abitungu’shi yawa bekikitshine afue, 17 muanda kilombeno akibanga kufuba pa lufu, muanda ta nkilombene kufuba su muntu bekikitshine kii na muwa. 18 Muanda, sunga kilombeno kia kala takibaadi kibangie kufuba kushi mase. 19 Muanda pabapuile Moyise kulungula muilo ushima mayi oso a mu Muiya, batshile mase a bana ba ngombe ilume na a bipembue, na mema, na buaa bumonga, na ka mutshi ka izope aye nkuibimiamina ku mukanda,* na kui bantu boso, 20 amba’shi: “Ano nyi mmase a kilombeno kiabenutekie kui Efile Mukulu bua kulama.” 21 Mu mushindo umune, baadi mumiamine aa mase ku nshibo y’epema na ku bintu bioso bia mufubo wa kishila. 22 Eyendo, muyile Muiya, bintu nka bu bioso abitooshibuaa na mase, na su ta mbapongoole mase pa nsenga, takui kufuidibua lusa.
23 Nyi buakinyi bibaadi na muulo bua’shi, bifuanyi bia bintu bia muiyilu, bitooshibue mu uno mushindo, anka bintu bi muiyilu, abitungu milambu ikile buwa. 24 Muanda Nkidishitu tabaadi mutuele mu mbalo ya kishila ikitshibue na maasa ayo ikale kipuandikisho kia mbalo ya binyibinyi, anka baadi mutuele muiyilu munabene bua’shi amuekie kumpala ku’Efile Mukulu bua muanda wetu. 25 Bino tabibaadi bikitshikie bua’shi ekale elambula misango na misango, bu pabaadi tshite muakuidi atuele mu mbalo ya kishila ku kipua kioso na mase ashii aaye. 26 Bisumanga badia kuikala akiengie misango na misango kubanga ku kipangilo kia bantu. Kadi binobino mmuileshe musango umune bua loso ku nfudiilo kua uno ndumbuluilo,* bua kukatusha muluisho ku bukuashi bua mulambu waaye. 27 Nka bu biabidi bilumbuulue bua’shi bantu bafue musango umune bua loso, na kunyima batshibilue kiimu, 28 nyi bibaadi namu Nkidishitu muilambule musango umune bua loso bua kushimisha miluisho ya bantu bebungi; na musango wa kabidi w’akamueka, t’abikekala dingi bua miluisho, na abakamumono nka kui baaba abamukimbi n’eshimba dioso bua kupanda.