Yobo
33 “Anka binobino, Yobo pusha namu mayi ande;
Teemesha bioso biangakula.
2 Tala, bua lusa! Abitungu mbuule mukanua muande;
Abitungu ludimi* luande luakule.
3 Mayi ande aalesha kululama ku’eshimba diande,
Na milomo yande ayakula bianguuku n’eshimba dimune.
4 Kikudi ki’Efile Mukulu nyi kimpangie,
Na muwa wa Sha Bukome Boso nyi ubaadi ungikashe na muwa.
5 Ngalule su wemulombene kuibikita;
Akula binangu biobe kumpala kuande; elumbuule bua kuibingisha.
6 Tala! Nenka bu obe kumpala ku’Efile Mukulu a binyibinyi;
Nami namu naadi mubumbibue n’ema.
7 Biabia topushanga moo pa muanda wande,
Na mianda yankulungula tayikalanga bushito kodi.
8 Anka puekeele wakula ngikeele napusha,
Oolo, natungunukanga na kupusha ano mayi,
9 Ne selele, ntshimusoole;
Nemutooshiibue, ntshi na kilubilo.
10 Anka Efile Mukulu bapete tubingilo tua kunduiisha;
Ammono bu muishikuanyi aaye.
11 Mmuele mikoolo yande mu momba;
Ataluula mashinda ande oso.’
12 Anka tuemubingie p’obe kuakula bino, nyi buakinyi nakualula:
Efile Mukulu mmukile bukata kukila muntu afuiyaa.
13 Buakinyi wedidi pa muanda waye?
Mpa muanda tammualule mayi oobe oso?
14 Muanda Efile Mukulu akulaa mususa wa kumpala na wa kabidi,
Anka takui muntu su ngumune amuteemesha,
15 Mu kilotua, mu kimonua kia bufuku,
Apekala bantu balale mu tulo tui bukopo
Pabekala balale ku nsala yabo.
16 Paapa ashikula matui aabo
Na ebashinkamiisha mayi adi muibape,
17 Bua kukatusha muntu mu kukita mianda ibubi
Na kukaluila muntu buashi tetatulanga.
19 Dingi muntu asashilua na busungu pa lusala luaye
Na ku dikienga dia mifufua yaye dishadipu,
20 Biabia abimufikisha aye nabene* mu kushikua mukate,
Na apele mpa na biakudia bibuwa.
21 Muita waye ukuete kunyana ubashimina,
Na mifufua yaye ikeele ifuame ibatuuku patooka.
22 Anyima* aaye kuete kuifubuila pepi na buina;*
Muwa waye ukuete kuifubuila pepi na baba abatuushaa lufu.
23 Su kui muntu amutuadilaa mukandu,*
Umune a ku bantu kinunu abakuilaa bantu,
Bua’dia kulungula muntu kiakia kilulame,
24 Paapa Efile Mukulu amulesha lusa na akula’shi:
‘Mupaashe buashi tayikanga mu buina!
Napete nkuulo!
25 Mbidi yaye ifikie ipia* kukila ya ku bu nsongua;
Alukiile ku mafuku a bukome bua bu nsongua buaye.’
26 Akasendeela Efile Mukulu, na Efile Mukulu akamukumiina,
Na akamono mpala Yaye na misaase ya muulo,
Na Efile Mukulu akalusha kululama kuaye kui muntu afuiyaa.
27 Yawa muntu akalungula* bantu’shi:
‘Ne mukite muluisho na ne muluishe kiakia kilulame,
Anka ntshi mupete kiakia kinkumbene.*
28 Mmukuule anyima* ande buashi tayikanga mu buina,
Na muwa wande aumono etaata.’
29 Mbinyibinyi, Efile Mukulu mmukite ino mianda yoso
Misusa ibidi, misusa isatu, bua muntu,
30 Bua kumutuusha mu buina,
Buashi amunyikibue na etaata dia muwa.
31 Tee matui, Yobo! Nteemeshe!
Shala muumine, na natungunuka na kuakula.
32 Su we na muanda wa kuakula, ngalule.
Akula, muanda nakiebe kulesha’shi we mubingie.
33 Su tue na muanda wa kuakula, abitungu onteemeshe;
Shala muumine, na nakulongiesha binangu.”