Yeshaya
63 Nnanyi kuete kufika kukatukila ku Edome,
Kukatukila ku Bosora e na bilamba bi na malangi* e bukopo,
Yawa mufuale bilamba bi buwa,
Kuete kutambuka mu bukome buaye bui bungi?
“Nnami, Yawa kuete kuakula mu kululama,
Yawa e na bukome bui bungi bua kupaasha.”
2 Buakinyi bilamba biobe mbimongie,
Na buakinyi bilamba biobe bi bu bia muntu kuete kunfuta tukuba tua nfinyo ku kiengielo kia nfinyo?
3 “Naadi muashine kiengielo* kia nfinyo ami nabene.
Muntu su ngumune tabaadi nami.
Naadi mutungunukie na kufunta beshikuanyi bande mu nsungu yande,
Na naadi mutungunukie na kuibashina mu nsungu yande ibukopo.
Bilamba biande bibaadi bitope na mase aabo,
Na naadi muluishe bilamba biande bioso.
4 Muanda efuku dia koobola di muishimba diande,
Na kipua kia bantu bande bandi mukuule kibalombana.
5 Naadi mutale, anka takubaadi muntu baadi munkuashe;
Naadi mukaanye biakushibaadi muntu baadi munkuatshishene.
Biabia mboko yande ibaadi intuadile kipandilo,*
Na nsungu yande ibukopo ibaadi inkuatshishene.
6 Naadi muashine bantu mu nsungu yande,
Naadi mukite bia’shi bakolue nsungu yande ibukopo
Na naadi mupongoole mase aabo paashi.”
7 Nakakula bua bikitshino bia kifulo kia lulamato bia Yehowa,
Bikitshino bia kutumbisha bia Yehowa,
Pa muanda wa bioso bitukitshine Yehowa,
Mianda ibungi ibuwa yadi mukitshine nshibo ya Isalele,
Muyile lusa luaye na kifulo kiaye kikata kia lulamato.
8 Muanda bakuile’shi: “Binyibinyi mbantu bande, bana bash’abakakutua lulamato.”*
Biabia aye nkufika mupaashi aabo.
9 Mu makienga aabo oso, naye namu baadi akiengie.
Na muntu aaye atualaa mukandu baadi muipaashe.
Mu kifulo kiaye na lusa luaye, baadi muibakuule,
Na baadi muibebueshe na ebasemuna mafuku oso a kala.
10 Anka babaadi bamutombokiele na benyongosha kikudi kiaye kiselele.
Biabia aye nkufika muishikuanyi aabo,
Na aye nkuibaluisha ngoshi.
11 Na babaadi batentekieshe mafuku a kala,
Mafuku a mufubi aaye Moyise:
“Yawa baadi muibatuushe mu kalunga ka mema na balami ba lombe luaye lua mikooko e kunyi?
Yawa baadi mutuule muadi kikudi kiaye kiselele e kunyi,
12 Yawa baadi mukite bia’shi mboko yaye ya ntumbo yende na mboko ibalume ya Moyise,
Yawa baadi muabuule mema kumpala kuabo
Bua kuikitshina eshina dia loso,
13 Yawa baadi mukite bia’shi bakidile mu mema aatunkatunka,*
Biabia babaadi batambukie kushi kukokola,
Nka bu nfualasa e mu kipia?*
14 Nka bu nyema nsaa yayalala mu ebanda,
Kikudi kia Yehowa kibaadi kibape kuikisha.”
Bino mbibodi mukunkushe bantu bobe,
Bua kuikitshina eshina dia ntumbo.*
15 Tala paashi kukatukila muiyilu na omone
Kukatukila ku mbalo yobe i kula ya kishila na ya ntumbo.
Kisumi kiobe na bukome,
Kuibua kua kifulo kiobe kikata* na lusa lobe bikunyi?
Bembisumine.
16 Muanda obe we Nshetu;
Sunga’shi Abalahama tetuuku nya
Na Isalele tetutundula nya,
O Yehowa, obe we Nshetu.
Eshina diobe mbu Mukuudi eetu a kala.
17 O Yehowa, buakinyi wetulekiela atukatuka mu mashinda oobe?
Buakinyi otadiila* mashimba eetu aapapa, bua’shi tatukutshinanga?
Alukiila, pa muanda wa bafubi bobe,
Bisamba bia bupianyi bobe.
18 Bantu bobe ba kishila babaadi baate nsenga ibodi muibape bua kapindi kapeela.
Beshikuanyi betu babaadi bashine mbalo yobe ya kishila.
19 Takudi mafuku ebungi, tuibafikie nka bu bantu boshokunkuishe kasha,
Bu bantu bashayitaminyibue muishina diobe.