Yeshaya
33 Malua kodi, obe abutulaa bantu abashabandile kubutula;
Obe adimbanaa abashabandile kudimba!
P’opudisha kubutula, okabutudibua.
P’opudisha kudimbana, okadimbibua.
2 Ô Yehowa, etuleshe namu kalolo.
Lukulupilo luetu lui modi.
Ikala mboko yetu* namashika oso,
Oolo, kipandilo kietu mu nsaa ya dikienga.
3 Bantu abasuuku p’abapusha tuleo tui bungi.
Pu’ebo miilo ayipalakana.
4 Nka bu abibuungaa mpasu ayiluishaa bikunuanga, biabia nyi biabakabungu bintu biobe bipaulue;
Bantu abakabutshikila bianka nka bu abibutshikilaa mituuto ya mpasu.
5 Yehowa akatumbishibua,
Muanda mmushale mu mbalo i kuiyilu ngofu.
Akausha Siyona na kululama.
6 Nnaye akitaa biashi wekale mu kukaluilua;
Kipandilo kibungi, binangu, kiukilo na kutshina kua Yehowa,
Bino nyi bikale bupeta buaye.
7 Talayi! Bilobo biabo bikuete kuela misaase mu kilayi;
Bantu abatualaa mukandu wa butaale bakuete kudila bi bukopo.
8 Mu mashinda akata mui bisumanga;
Takui muntu kuete kukila mu bilayi.
9 Nsenga i na kinyongua ki bukopo na ngiume.
Lebanone mmukuatshikie bufu, mmunyangie.
Sharone bafiki bu kabaaka,
Bashane na Karmele abakukula mapupua aabo.
10 Yehowa akula’shi: “Binobino neboo,”
“Binobino netumbisha;
Binobino nesamuna.
11 Nuibayimite lubishi lume na nuibatande nsonyi.
Kikudi kienu anue banabene akinutaatshisha nka bu kaalo.
12 Na miilo ayikekala nka bu ntoshi ishiikie kaalo.
Abakeyishiiki kaalo nka bu tu mitshi tua meba tuabadi batshibe.
13 Anue be kula, teemeshayi biankakitshi!
Na anue be pepi, kumiinayi bukome buande!
14 Mu Siyona ba nkitshishi ba miluisho be na moo;
Kusuusa kubakuata bantu bapambukie:
‘Nanyi a kuatudi e kushala mbalo i kaalo akabutulaa?
Nanyi a kuatudi e kushala pepi na ndimi ya kaalo kasha kashimi?’
15 Ngiawa atungunukaa na kutambuka na kululama,
Yawa akulaa mianda ilulame,
Yawa apelaa kupeta bintu mu bulamalama na mu madimi,
Sha maasa aapelaa kutshibibua kua milomo,
Yawa ashikaa matui aaye bua kupela kupusha mianda ya kusumbula mase,
Na apuutaa meso aaye bua kupela kumona mianda i bubi
16 Akashala mu ma mbalo e kuiyilu;
Kifuamino kiaye akikekala mu mbalo inyingishibue i mabue,
Abakamupa mukate waye,
Na tanakutue mema.”
17 Meso oobe aakabandila nfumu mu ntumbo yaye;
Aakamono eumbo di kula.
18 Muishimba diobe okatentekiesha* moo wi bukopo na okeyipusha’shi:
“Mufundi e kunyi?
Yawa baadi apimi bitadi e kunyi?
Yawa baadi abadika bitenta e kunyi?”
19 T’okamono dingi uno muilo wi na kapesha,
Muilo wi na ngakuilo e bukopo kupusha,
Wi na ludimi lui na euuta loshi mulombene kupusha.
20 Bandila Siyona, kibundi kia misangelo yetu!
Meso oobe aakamono Yelusalema bu mbalo ya kushala mu kuiyikela,
Kashibo k’epema ka bashi balombene kukaasha.
Tabanaa bakatushe biluu biako nya,
Na moshi wako su ngumune taukatshibibua.
21 Anka kuakua Mukile Bukata, Yehowa
Akekala kuatudi nka bu nsenga ya miela, ya mikola ikata,
Kush’akuende mashuwa a ngoshi
Na kush’akukidi mashuwa akata.
22 Muanda Yehowa nyi Nsushi eetu,
Yehowa nyi etuelelaa miiya,
Yehowa nyi Nfumu eetu;
Nnaye aketupaasha.
23 Mioshi yobe ayikafunguka;
Tangilombene kukuata mutshi wa kuludika nao buato kupudikue kilamba sunga kuikifungula.
Mu aa mafuku abakeabishena bintu bibungi bipaulue;
Mpa na balemane abakaata bintu bibungi bipaulue.
24 Muntu su ngumune mushale muiumbo takakula’shi: “Ne na maladi.”
Bantu bashale muiumbo abakafuidibua lusa bua kilubilo kiabo.