Ufundibue kui Luka
2 Mu aa mafuku, Kezare Ogiste belele muiya wa’shi bantu boso bashale pa nsenga befundishe ku mukanda. 2 (Kuno kuifundisha kua kumpala kubaadi kukitshikie pabaadi Kiriniuse bu guvernere a mu Siri.) 3 Na bantu boso abayile mu kuifundisha, muntu oso mu kibundi kiabo. 4 Biabia, Yosefe bakatukile mu Ngalileya mu kibundi kia Nazarete, enda mu Yudeya mu kibundi kia Davide kibabadi abetanyina bu Beteleme, muanda baadi a mu nshibo na mu kifuko kia Davide. 5 Bayile mu kuifundisha na Mariya baadi mu aa mafuku mupue kuikala mukashi aaye na tabaadi pepi na kutanda. 6 Pababadi kuakua, nsaa ya Mariya kutanda ibalombene. 7 Na aye nkutanda muana mulume, muana mbedi, nkumupombela bilamba na nkumuladisha mu mbalo ayidiila nyema, muanda takubaadi mbalo buabo mu nshibo ya benyi.
8 Mu kiakia kibundi kimune, mubaadi dingi balami ba mikooko babaadi bashale paasha bufuku abalama mikooko yabo. 9 Mususa umune, muikeyilu a Yehowa nkuimana kumpala kuabo na etaata adilesha ntumbo ya Yehowa nkuibamunyika, na abo nkupusha moo ngofu. 10 Kadi muikeyilu nkuibalungula’shi: “Lekayi kutshina muanda, talayi! nenulungula mukandu wibuwa wa muloo ukata aukekala nao bantu boso. 11 Muanda lelo uno, abenutandila mupaashi mu kibundi kia Davide, Nkidishitu Nfumu. 12 Anukamuukila ku bino: Anukapete muana abadi bapombele bilamba, na mulale mu mbalo ayidiilaa nyema.” 13 Mususa umune, kiluilo kikata kia muiyilu kibaadi na yawa muikeyilu, akitumbisha Efile Mukulu na kuamba’shi: 14 “Ntumbo kui Efile Mukulu amua muiyilu mula, na butaale pa nsenga kui bantu baadi mukumiine.”
15 Biabia, pabakatukile mikeyilu kuabadi bua kuenda muiyilu, balami ba mikooko ababangile kuilungushena’shi: “Binobino abitungu tuende ku Beteleme, tukamone kibakitshika, kibetuukisha Yehowa.” 16 Na abo nkuenda bukidibukidi na nkupeta Mariya na Yosefe, na muana mmulale mu mbalo ayidiila nyema. 17 Pababamuene biabia, abaukiishe mukandu ubaabadi bebalungule pabitale muana. 18 Na boso babapushishe bibaadi balami ba mikooko bakule, abakaanyine, 19 kadi Mariya babangile kulama ino mianda yoso, na kunangushena muishimba diaye pa ki’ayipatuula. 20 Akupu balami ba mikooko babalukiile bafu’abatumbishanga na kusamuna Efile Mukulu bua mianda yoso ibaabadi bapushe na bamone, nka bu bibaabadi bebalungule.
21 Kunyima kua mafuku muanda, pabakumbene mafuku a ku musala, abamudikile bu Yesu, eshina dibaadi muikeyilu mutuushe kumpala kua’shi bamuimite.
22 Dingi, pabakumbene mafuku bua kutoshibua kuabo muyile Muiya wa Moyise, abayile naye ku Yelusalema bua kumutuala kumpala kua Yehowa, 23 nka bu biabidi bifundibue mu Muiya wa Yehowa’shi: “Muana mulume mbedi oso* ayitaminyibue bu eselele bua Yehowa.” 24 Na abo nkulambula mulambu muyile biabadi bakule mu Muiya wa Yehowa: “Tukutshi tubidi sunga tuana tua nkudimba tubidi.”
25 Na talayi! mu Yelusalema mubaadi muntu abaabadi abetanyina bu Simeone, na uno muntu baadi mululame na muipaane, baadi atengiela kusambibua kua Isalele, na kikudi kiselele kibaadi paadi. 26 Dingi, Efile Mukulu baadi mumufumbuile ku bukuashi bua kikudi kiselele’shi, tabadia kufua kumpala kua’shi amone Nkidishitu a Yehowa. 27 Ku bukome bua kikudi, batuelele mu ntempelo, na pabaadi nshaye na Yesu na nyinaye batuele naye bua’shi bamukitshine mianda muyile kipikua kia Muiya, 28 aye nkuata muana mu maboko aaye na nkutumbisha Efile Mukulu na kuamba’shi: 29 “Binobino, Muanana mukile bukata, otadiila mufubi oobe ende mu butaale muyile bibodi muakule, 30 muanda meso ande abamono yawa atuala kipandilo 31 yawa odi mulumbuule ku meso a bantu boso, 32 etaata bua kukatusha kilamba kibuikile miilo na ntumbo ya muilo oobe wa Isalele.” 33 Na nshaye na nyinaye na muana, abaadi abatungunuka na kukaanya bua mianda ibaabadi abakula pabimutale. 34 Dingi, Simeone baadi muibelele miabi na alungula Mariya nyinaye na muana’shi: “Uno muana mmutudibue bua kuponesha na kuibuesha dingi bebungi mu Isalele na kuikala bu kitunduilo ki’abakakula bibubi. 35 (oolo, lupete lula alukakutubula*), bua’shi binangu bia mu mashimba a bebungi bileshibue patooka.”
36 Kubaadi dingi mutemuki mukashi, Ana muana mukashi a Fanuwele a mu kisamba kia Ashere. Uno muana mukashi baadi mupue kununupa na baadi mushale na mulume aaye munda mua bipua musambo kunyima kuabo kuiyibakishena,* 37 na baadi mukashi kilele a bipua 84. Baadi afiki ku ntempelo misusa yoso, akitshi mufubo wa kishila bufuku na kanya na kuishidika na kuiyaya. 38 Mu yaaya nsaa baadi muifubuile pepi na abanga kutumbula Efile Mukulu na kuakula pabitale muana kui boso abaadi bakuete kutengiela kukuudibua kua Yelusalema.
39 Biabia, pababapuile mianda yoso muyile Muiya wa Yehowa, abalukiile ku Ngalileya mu kibundi kiabo kia Nazarete. 40 Na muana baadi atungunuka na kukula na kunyinga, kuushibua na binangu, na Efile Mukulu baadi atungunuka na kumukumiina.
41 Nshaye na nyinaye abaadi na kiubishi kia kuenda kipua kioso ku Yelusalema bua musangelo wa Pasaka. 42 Na pabakumbeshe bipua 12, abakamiine ku Yelusalema muyile kiubishi kia musangelo. 43 Pabapuile mafuku a musangelo, na pababadi bakuete kualukiila, Yesu baadi mushale kunyima mu Yelusalema na nshaye na nyinaye t’ababaadi baukie bianka. 44 Bu bibaabadi abapuandikisha’shi e mu kisaka kia bantu babaabadi abende nabo, abatambukile efuku dishima, akupu abo nkubanga kumukimba munkatshi mua bena kifuko na mua bantu bababaadi abeukena nabo. 45 Bu biabashibadi bamupete, abalukiile ku Yelusalema na bamukimba ngofu. 46 Kunyima kua mafuku asatu, abamusangene mu ntempelo, mmushale munkatshi mua balongieshi, ebateemesha na kuibelanga nkonko. 47 Kadi baaba boso abaadi abamuteemesha abaadi abakaanya ngofu bua binangu biaye na bua ngaluulo yaye. 48 Pabaadi nshaye na nyinaye bamumone, abaadi bakaanye ngofu, na nyinaye nkumulungula’shi: “Muana ande, buakinyi buetukitshi bino? Ami na nshobe tubekalakasha ngofu na nkukimba.” 49 Kadi bebalunguile’shi: “Buakinyi anunkimbanga? T’anuuku’shi abitungu ngikale mu nshibo ya Nshami?” 50 Anka, t’ababaadi bapushe kibaadi ebalungula nya.
51 Akupu, balukiile nabo ku Nazarete, na batungunukile na kuibakookiela. Dingi, nyinaye baadi mulame kalolo ino mianda yoso muishimba diaye. 52 Yesu batungunukile na kukula mu binangu na ku mbidi, na baadi mukuminyibue kui Efile Mukulu na kui bantu.