Yeshaya
32 Talayi! Nfumu akamunana bua kululama
Na bakunkushi abakakunkusha bua kutshiba kiimu na kululama.
2 Na muntu oso akekala bu mbalo ya kufuamina kipapi,
Mbalo ya kufuamina* mpeshi a kipapi,
Bu miela ya mema mu nsenga ishi mema,
Bu mutaala wa lubuebue lukata mu nsenga yume.
3 Biabia meso a baba bakuete kumona taakafungibua dingi,
Na matui a baba bakuete kupusha aakateemesha kalolo.
4 Eshimba dia baba abakitaa mianda bukidibukidi adikatuulu binangu ku kiukilo,
Na ludimi lua basha euuta alukakula kalolo na abipushika.
5 T’abaketanyina dingi muntu shi na binangu bu muntu sha kalolo,
Na muntu shi na bukalanga t’abakamuitanyina bu muntu sha kinemo;
6 Muanda muntu shi na binangu akakula mianda ya butesha,
Na eshimba diaye adikeele binangu bia kukita mianda i bubi,
Bua kunyingisha kupambuka* na kuakula mianda ya madimi pabitale Yehowa,
Bua’shi muntu e na nsala* afue na nsala
Na bua kusumina muntu e na nyota kia kutoma.
7 Mpango ya muntu shi na bukalanga i bubi;
Anyingishaa muikelo wi buufu
Bua kukiengiesha muntu e na dikienga na madimi
Sunga apakula mulanda mianda ilulame.
8 Anka muntu sha kalolo ekalaa na binangu bia kalolo,
Na atungunuka na mifubo yaye ya kalolo.*
9 “Anue bana bakashi bashale talala, ebueyi nupushe eyi diande!
Anue ba nsonguakashi basha bekalakasha, teemeshayi bia ngakula!
10 Mu kipua kimune na mafuku apeela, anue basha bekalakasha anukasuusu,
Muanda t’abakakongola kakuba su nkamune apapu kipungo kia kuumbula tukuba tua nfinyo.
11 Anue bana bakashi bashale talala suusayi!
Anue bashabekalakasha suusayi!
Fuulayi bilamba
Na nufuale ma mpaya mu bifuka bienu.
12 Ekupileyi mu kiadi na kudila pa muanda wa mafuba e buwa
Na pa muanda wa mutshi wa nfinyo aupeyaa tukuba.
13 Muanda nsenga ya muilo wande ayikauulu na tu mitshi tua meba na milobo;
Abikauulu mu mashibo oso a miloo,
Oolo, kibundi kia muloo.
14 Muanda babasumbushena kitenta kinyingishibue;
Kibundi kia tuleo babekisumbushena.
Ofele na kitenta kia mulami bibafiki bu nsenga ishale bisumanga bua loso,
Bibafiki bu mbalo ayisankisha mpunda ya mu kisuku,
Mapia a kudiila nyema,
15 Mpa na pabetupongoluela kikudi kukatukila muiyilu,
Na apafiki kabaaka bu efuba dia mitshi ya bikuba,
Na pabamono efuba dia mitshi ya bikuba bu mutamba.
16 Paapa kululama akukashala mu kabaaka
Na mu efuba dia mitshi ya bikuba.
17 Kululama kua binyibinyi akukatuusha butaale,
Na bikuba bia kululama kua binyibinyi abikekala kufukama na kuiyikela bua looso.
18 Muilo wande aukashala mu mbalo i butaale,
Mu ma mbalo e kuiyikela na mu ma mbalo akuikisha mui kufukama.
19 Anka mpeshi a kasangu akaluisha mutamba,
Na kibundi akikaluishibua kioso.
20 Muloo kuanudi anue bakuete kukuna mbio mbalo yoso i mema,
Abafungula ngombe na mpunda.”