Yeshaya
55 Fikayi, anue boso be na nyota, fikayi ku mema!
Anue bashi na makuta, fikayi, nuule na nudie!
Oolo, fikayi, nuule nfinyo na mabele kushi makuta, buuntu.
2 Buakinyi anutungunuka na kufuta makuta bua kintu kishi mukate,
Na buakinyi anutuusha mono* yenu bua bintu bish’abikutshisha?
3 Teeyi matui na nufikie kuandi.
Teemeshayi na anukashala na muwa,
Na nakakitshi nenu kilombeno kia ikalayika
Mu kuipushena na mulayilo wa kukulupila* wa kifulo kia lulamato, unaadi mulee Davide.
4 Talayi! Nemumuikashe bu kamonyi kui miilo,
Mukunkushi na mukata a miilo.
5 Tala! Okayitanyina muilo osh’ouku,
Na bantu ba mu muilo bash’abakuukanga abakasuukila kodi
Pa muanda wa Yehowa Efile Mukulu oobe, Eselele a Isalele,
Muanda akakutumbisha.
6 Kimbayi Yehowa pakukii mushindo wa kumupeta.
Muitanyineyi pakii pepi.
7 Muntu ebubi alekie eshinda diaye
Na muntu akitshi mianda ibubi alekie binangu biaye;
Alukiile kui Yehowa, akamufuila lusa,
Kui Efile Mukulu eetu, muanda akamufuila lusa na kalolo koso.
8 “Muanda binangu biande ta binangu bienu,
Na mashinda eenu ta mashinda ande,” nyi abiakula Yehowa.
9 “Muanda nka bu bi eyilu di kunundu kua nsenga,
Biabia mashinda ande e kunundu kua mashinda eenu
Na binangu biande bi kunundu kua binangu bienu.
10 Muanda nka bu abinokaa mpeshi na neje kukatukila muiyilu
Na tabialukiila muanka mpa na pabitopesha nsenga, na kukita bia’shi ituushe na imeneshe bintu,
Yapanga muntu akunaa, mbio na muntu adiyaa, bia kudia,
11 Biabia nyi abikekala eyi adituuku mukanua muande.
T’adikalukiila kuandi kushi bipeta,
Anka adikakumbasha binyibinyi kiakia kiankumiina,*
Na adikalombasha binyibinyi kiakia ki neditumu bua kukita.
12 Muanda anukatuuku na muloo,
Na abakenualusha mu butaale.
Miengie na tu miengie abikasanka kumpala kuenu na misaase ya muloo,
Na mitshi ya mu mafuba ayikakupila yoso bikasa.
13 Mutshi wa jenevriye aukamene pa mbalo ya tu mitshi tua meba,
Mutshi wa mirte aukamene pa mbalo ya tu mitshi tua orti atushikanaa.
Na bino abikatumbisha* Yehowa,
Kitunduilo kia ikalayika kishanashimine.”