Yeshaya
66 Yehowa akula bino’shi:
“Eyilu nyi ndupuna nsulu luande, na nsenga nyi nkitudilo kia ngua yande.”
Biabia, nshibo yanudia kungibakila i kunyi,
Na mbalo yande yandia kuikiisha i kunyi?”
2 “Eyasa diande nyi dikite bino bintu bioso,
Na bino nyi biabidi bifikie mu kuikala kuanka,” nyi abiakula Yehowa.
“Biabia kui uno muntu, nyi kuankatala,
Kui muntu sha kuiyisha na sha binangu bifudiile kuete kusuusa ku eyi diande.
3 Muntu kuete kulambula ngombe e nka bu muntu kuete kuipaa muntu.
Muntu kuete kulambula mukooko e nka bu muntu kuete kutshokola nshingo ya mbua.
Muntu kuete kulambula kia buntu e nka bu muntu kuete kulambula mase a ngulube!
Muntu kuete kulambula mulambu wa oliba wa kitentekiesho e nka bu muntu elela muntu miabi na bishima bia malenganyi.*
Mbasangule mashinda aabo,
Na abasanka* na bintu bi butete.
4 Biabia nakasangula mishindo ya kuibanyoka,
Na nakebafuishila yaya mianda yabakuete kutshina ngofu.
Muanda panaadi muitanyine, muntu su ngumune tabaadi mualule;
Panaadi muakule, muntu su ngumune tabaadi muteemeshe.
Babaadi batungunukie na kukita mianda ibubi ku meso kuande,
Na babaadi basangule bua kukita mianda isha insankisha.”
5 Pushayi eyi dia Yehowa, anue bakuete kusuusa ku* eyi diaye:
“Bakuenu balume benushikue na abenubingi pa muanda wa eshina diande abakula’shi: ‘Yehowa atumbishibue!’
Anka akamueneka na kuinutuadila muloo,
Na abo nyi abakakuatshika buufu.”
6 Kui tuleo tua kafutakanyi atukatukila mu kibundi, tuleo atukatukila ku ntempelo!
Nyi ntuleo tua Yehowa kuete kufuta beshikuanyi baye kiakia kibalombene.
7 Kumpala kuashi apushe mitanyo ya pa kutanda, batandile.
Kumpala kuashi mitanyo ya pa kutanda imufikile, batandile muana mulume.
8 Nanyi taadi mupushe muanda wi bino?
Nanyi taadi mumone mianda i bino?
Nsenga ikutandikua muifuku dimune?
Sunga’shi muilo wikutandikua mususa umune?
Anka, nka Siyona ki’apusha mitanyo ya pa kutanda, batandile bana baye balume.
9 “Nakafikisha muana mu mafuku a kutandikua akupu mukutshishue kutandikua su?” Nyi abiakula Yehowa.
“Sunga’shi ne kukutshisha muana mukashi akiebe kutanda bua’shi tatandanga?” nyi abiakula Efile Mukulu oobe.
10 Sankayi na Yelusalema na nuikale na muloo naye, anue boso bamufule.
Sankayi ngofu naye, anue boso bakuete kudila buaye,
11 Muanda anukaomo mabeele aaye, anukekuta na anukasambibua,
Na anukatomo ngofu na kusanka mu ntumbo yaye ibungi.
12 Muanda Yehowa bakula bino’shi:
“Nkuete kumupa butaale abuikala nka bu muela
Na ntumbo ya miilo ayikala nka bu mema aalaala.
Anukaomo na abakenusemuna mu kifuka,
Na abakenunyunyu pa makunungu.
13 Nka bu nyina bana asamba muana aaye,
Biabia nyi biankatungunuka na kuinusamba;
Na anukasambibua bua Yelusalema.
14 Anukamono bino na eshimba dienu adikasanka,
Mifufua yenu ayikekala na bukome nka bu lubishi luana.
Na eyasa dia* Yehowa adikaukibua kui bafubi baye,
Anka akatuusha beshikuanyi baye patooka.”
15 “Muanda Yehowa akafiki nka bu kaalo,
Na matempu aaye e nka bu kipapi kibukopo,
Bua kufuta mu nsungu yaye ibukopo,
Bua kusaashila na ndimi ya kaalo.
16 Muanda Yehowa akatshibi kiimu na kaalo,
Oolo, na lupete luaye lua ngoshi, kui bantu boso;
Na bantu babakayipaa kui Yehowa abakekala bebungi.
17 “Baba bakuete kuiyikasha ba kishila na bakuete kuitoosha bua kutuela mu mafuba* balondanga yawa e munkatshi, baba bakuete kudia muita wa ngulube, na bintu bi butete na mpuku, boso abakafudiila pamune,” nyi abiakula Yehowa. 18 “Bu bianguku mifubo yabo na binangu biabo, nkuete kufika mu kubunga bantu ba miilo yoso na ndimi yoso, na abakafiki na bamone ntumbo yande.”
19 “Nakatuulu kitunduilo mukantshi muabo, na nakatumu bangi ba ku baba babaadi bapande ku ino miilo: ku Tarsise, ku Pule, na ku Lude, baba abelaa buta, ku Tubale na ku Yawane na ku bisangi bi kula, yaya ishibaadi ipushe muanda wande sunga kumona ntumbo yande; na abakaukisha ntumbo yande munkatshi mua miilo. 20 Abakatuusha mu miilo yoso bakuenu boso bu kia buntu kui Yehowa pa nfualasa, mu matempu, mu matempu abuikile, pa mpunda na pa tumelo atuyiya bukidi ku muengie wande wa kishila, ku Yelusalema,” nyi abiakula Yehowa, “nka bu apatualaa muilo wa Isalele kia buntu kiabo mu kintu kitooshibue mu nshibo ya Yehowa.”
21 Yehowa akula’shi: “Nakaata dingi bangi bua’shi bekale ba tshite muakuidi na bangi bekale bena Levi.”
22 “Nka bi eyilu dipia na nsenga ipia biankuete kukita abikashala bimane kumpala kuande, biabia nyi abikashala namu lutandua* lobe na eshina diobe,” nyi abiakula Yehowa.
23 “Na mueshi oso upia na sabato oso,
Bantu boso abakatuele bua kuinama kumpala kuande,”* nyi abiakula Yehowa.
24 “Na abakatuuku na batale bitanda bia bantu babaadi bantombokiele;
Muanda misanda ipabadi tayikafu,
Na kaalo kabo takakashimibua,
Na abakafiki kintu ki butete kui bantu boso.”