Yeshaya
54 “Ela misaase ya muloo, obe mukashi nkunga shi mutande!
Sanka na wele misaase ya muloo, obe sha pushishe kasha mitanyo ya pa kutanda,
Muanda bana balume* ba mukashi abadi basumbushene be bungi bukile
Kukila bana balume ba mukashi e na mulume,”* Nyi abiakula Yehowa.
2 “Tamisha ngofu mbalo ya kashibo k’obe k’epema.
Oola bilamba bia kashibo k’epema ka tabernakele oobe mukata.
Tuekandanga, elesha mioshi ya kashibo k’obe k’epema bula,
Na onyingishe biluu bia kashibo kobe k’epema.
3 Muanda okapalakana ku lupese lua mboko i balume na ku lupese lua mboko i bakashi.
Lutandua lobe alukamunu miilo,
Na abakashala mu bibundi bishale bisumanga.
4 Totshinanga, muanda tokakuatshishibua buufu;
Na tuepushanga muishibue milongo, muanda tokakuatshishibua buufu.
Muanda okayiluankana buufu bua ku bu nsongua bobe,
Na tokatentekiesha dingi buufu bua bu mukashi kilele.”
5 “Muanda Mupangi oobe Mukata e bu mulume* oobe,
Eshina diaye nyi Yehowa a biluilo,
Na Eselele a Isalele nyi Mukuudi oobe.
Akayitaminyibua bu Efile Mukulu a nsenga ishima.
6 Muanda Yehowa baadi mukuitanyine nka bu shi bodi mukashi musumbushenue na e mu kinyongua,
Nka bu mukashi muibakilue ku bu nsongua na akupu bamupela,” nyi abiakula Efile Mukulu oobe.
7 “Muanda naadi mukusumbushene bua kapindi kapeela,
Anka nakakualusha bua lusa lukata.
8 Mu nsungu i bukopo naadi mukufuamishe mpala yande bua kapindi kapeela,
Anka pa muanda wa kifulo kia lulamato kia loso, nakakupushisha lusa,” nyi abiakula Mukuudi oobe Yehowa.
9 “Bino bi nka bu mu mafuku a Nowa.
Nka bu binaadi muitshipe’shi mema a Nowa taakabuikila dingi nsenga,
Biabia nnetshipi’shi tankakufiitshila dingi munda sunga kukusaashila.
10 Muanda miengie i kukatushua
Na tu miengie tuikutshinkishibua,
Anka kifulo kiande kia lulamato takikatushua kodi,
Sunga kilombeno kiande kia butaale takikatshinkishibua,” nyi abiakula Yehowa, Yawa akupushisha lusa.
11 “O muana mukashi mukiengieshibue, abadi bakupile kui kipapi, shi musambibue,
Nkuete kuibaka mabue oobe na potopoto e bukopo
Na kitako kiobe na mabue a safire.
12 Nakakitshi miasa i ku mudimba oobe wa kibundi na mabue a ribi,
Nakakitshi biibi biobe na mabue aapenyapenya,*
Na mikalo yobe yoso na mabue a muulo.
13 Na bana bobe balume* boso abakalongieshibua na Yehowa,
Na butaale bua bana bobe balume abukafuimi.
14 Okanyingishibua ngofu mu kululama.
Okekala kula na kukiengieshibua,
Tokatshinyi kintu su nkimune na takukekala kintu akikutshinyisha,
Muanda takikafiki pepi nobe.
15 Su muntu akuluisha ngoshi,
Tabikekala ku eyi diande nya.
Muntu oso afiki mu kukuluisha ngoshi akapono pa muanda oobe.”
16 “Tala! Nnami mupangie nsendue,
Apuilaa makala e kaalo,
Na mufubo waye autuushaa kina ngoshi.
Nnami dingi mupangie muntu abutulaa bua’shi afuishe kabutu.
17 Kina ngoshi kioso kikitshibue bua kukuluisha takikakutshimuna,
Na okapisha ludimi loso alukeboo bua kukupisha pa nusamba.
Buno nyi bupianyi bua bafubi ba Yehowa,
Na kululama kuabo akukatukila kuandi,” nyi abiakula Yehowa.