Neemiya

9 Muifuku dia 24 dia mueshi wa musambobidi bena Isalele babebungile; babaadi abeshidika bafuale ma mpaya na abepongo lufuinkinyi. 2 Akupu baba babaadi bena Isalele nkuiabuula kui bantu benyi boso, abo nkuimana na nkutonda miluisho yabo na bilubilo bia bamashabo. 3 Abo nkuimana nka yaaya mbalo ibaabadi na nkubadika na eyi dibukopo mukanda wa Miiya ya Yehowa Efile Mukulu aabo munda mua nsaa isatu;* na munda mua ingi nsaa isatu babaadi abatondo miluisho na kuinama kumpala kua Yehowa Efile Mukulu aabo.

4 Yeshua, Bani, Kadimiyele, Shebanya, Buni, Sherebiya, Bani, na Kenani nkuimana pa estrade* a bena Levi, na abo nkuteka Yehowa Efile Mukulu aabo na eyi dibukopo. 5 Na Yeshua, Kadimiyele, Bani, Ashabeneya, Sherebiya, Odiya, Shebanya, na Petaya boso bekale bena Levi nkuakula’shi: “Ebueyi na nutumbishe Yehowa Efile Mukulu eenu bua ikalayika. Na batumbishe eshina diobe dia ntumbo, dikale dikata kukila miabi yoso na ntumbo yoso ilombene bantu kutuusha.

6 “We bupenka obe Yehowa; we mukite eyilu, oolo, eyilu dioso na kiluilo kiadio, nsenga na bioso bi panka, tulunga tua mema na bioso bi muanka. Na we muibilame bioso na muwa, na kiluilo kia muiyilu kikuete kuinama kumpala kobe. 7 We Yehowa Efile Mukulu a binyibinyi, baadi musangule Abalama na omutuusha mu Ure a bena Kaldeya, na omuudika eshina bu Abalahama. 8 B’opetele’shi eshimba diaye dibaadi dilamate kodi, biabia obe nkukita naye kilombeno bua kumupa nsenga ya bena Kanaana, bena Ite, bena Amore, bena Perizi, bena Yebuse, na bena Girgashi, bua kuiyipa lutandua* luaye; na obe nkukumbasha milayilo yobe, muanda we mululame.

9 “Biabia bomuene dikienga dia bamashetu kulu mu Ejipitu, na obe nkupusha kuidila kuabo ku Kalunga Kamonga. 10 Nyi obe nkukita bitunduilo na bilengieleshi bua kunyoka Faraone, bafubi baye boso, na bantu boso ba muiumbo diaye, muanda bodi ouku’shi babaadi bakiengieshe muilo oobe. Obe nkuikitshina eshina di kuanka mpa na lelo. 11 Na obe nkutshibuula kalunga ka mema kumpala ku’abo, abo nkusabuka kalunga ka mema pa nsenga yume, na obe nkusumbula bantu babaadi abebalondo muushi mua kalunga ka mema nka bu ebue di’abasumbula mu mema aatunkatunka. 12 Bodi muibaludikie mu kanya na musungo w’ekumbi, bufuku na musungo wa kaalo, bua kuibamunyikila muishinda dibaabadi na kia kuenda. 13 Na bodi muikie ku muengie wa Sinayi, w’esamba nabo kukatukila muiyilu na w’ebapa biimu bilulame, miiya ya binyibinyi,* na mayi ebuwa. 14 Bodi muibaukishe Sabato oobe a kishila, na webapa mayi na miiya kukiila kui mufubi oobe Moyise. 15 Pabaabadi na nsala, bodi muibape mikate kukatukila muiyilu, na bodi muibatushishe mema mu lubuebue pabaabadi na nyota, na bodi muibalungule bua kutuela na bua kuata nsenga ibodi muitshipe* bua kuibapa.

16 “Anka abo, bamashetu kulu, babaadi na kuitatula, abo nkuikala na mutue wi bukopo, na tababaadi abateemesha miiya yobe. 17 Babaadi bapele kuteemesha, na tababaadi batentekieshe bikitshino biobe bia kukaanya bibodi mukite munkatshi muabo, anka abo nkuikala na mutue wibukopo* na abo nkusangula nfumu bua kualukila mu bupika buabo mu Ejipitu. Anka obe w’Efile Mukulu afuidishenaa lusa,* sha kalolo na lusa, sh’akuataa nsungu bukidi na muule ndaa na kifulo kia lulamato, na tobodi muibasumbushene nya. 18 Sunga bibaabadi bekitshine nkishi a kilonda* a kana ka ngombe na bakulanga’shi: ‘Uno nyi Efile Mukulu oobe baadi mukutuushe mu Ejipitu,’ na bakita mianda ibungi ya kukutua kanemo, 19 sunga mbiabia, mu lusa lobe lukata, tobodi muibasumbushene mu kabaaka. Mu kanya musungo w’ekumbi taubaadi ukatukie kuabadi bua kuibaludika muishinda, na bufuku musungo wa kaalo taubaadi ulekie kuibamunyika muishinda dibaabadi na kia kuenda. 20 Na bodi muibape kikudi kiobe kibuwa buashi bekale na binangu, tobodi muibasumine mane oobe, na bodi muibape mema pabaabadi na nyota. 21 Bodi muibape bia kudia mu kabaaka munda mua bipua 40. Tababaadi bakutue kintu su nkimune. Bilamba biabo tabibaadi bisanukie, na mikoolo yabo tayibaadi iule.

22 “Bodi muibape mafumu na miilo, weyitshibuula bipindi bipindi, biabia babaatshile nsenga ya Sihone bu yabo, kuamba’shi, nsenga ya nfumu Eshebone, mpa na nsenga ya Oge nfumu a Bashane. 23 Na bodi muikashe bana babo bungi nka bu nyenyenyi ya muiyilu. Akupu obe nkuibatuesha mu nsenga ibodi mulee bamashabo kulu’shi abemutuele na beyate bu yabo. 24 Biabia bana babo babemutuelele na baata nsenga bu yabo, na bodi mutshokole bena Kanaana babaadi bashale mu yaaya nsenga kumpala kuabo na bodi muibatuule mu maasa muabo, na ba nfumu babo na miilo ya mu yaaya nsenga, buashi bebakite kioso kiab’akumiina. 25 Babakuatshile bibundi binyingishibue na nsenga i na bufukie,* abo nkuata mashibo aule na bintu bi buwa bia mishindo yoso, mishima ipue kubundula, mafuba a mitshi ya nfinyo, mafuba a mitshi ya olive na mitshi i bungi ayipeyaa bikuba. Babaadi badie, bekuta na batama, na abaadi basankie mu kalolo kobe kakata.

26 “Anka babaadi bapele kukookiela, bakutombokiela na bapela kukookiela Miiya yobe.* Babayipayile batemuki babaadi abebadimusha buashi balukiile kodi, na abo nkukita mianda ibungi ya kukutua kanemo. 27 Pa muanda wa biabia, bodi muibatuule mu maasa mua beshikuanyi babo, babaadi nka abebakiengiesha. Anka pabaabadi mu dikienga babaadi abedidi kodi, na bodi webateemesha kukatukila muiyilu; na pa muanda wa lusa lobe lukata bodi webapa bapaashi bua kuibapaasha ku maasa a beshikuanyi babo.

28 “Nka obe ki’ebapaasha, babaadi abakitshi dingi mianda ibubi ku meso kobe, na bodi webatadiila mu maasa mua beshikuanyi babo babaadi abebamunu.* Akupu babaadi abalukiila kodi bua nkuteka bukuashi, bodi webateemesha kukatukila muiyilu na bodi webapaasha misusa i bungi pa muanda wa lusa lobe lukata. 29 Sunga bibodi mutungunukie na kuibadimusha bua kualukiila ku Miiya yobe, babaadi bakite mianda na kuitatula bapela kuteemesha mayi oobe; na babaadi bakite miluisho muanda tababaadi bakookiele miiya yobe ayipeyaa muntu eyikookiela muwa. Anka babaadi bakutape mongo na bekala na mutue wi bukopo na bapela kuteemesha. 30 Bodi muibaleshe luishinko munda mua bipua bi bungi, na bodi mutungunukie na kuibadimusha ku bukuashi bua kikudi kiobe kukidila kui batemuki bobe, anka tababaadi bateemeshe. Nfudiilo a bioso bodi muibatuule mu maasa mua bantu ba mu maumbo ebefunyishe. 31 Mu lusa lobe lukata tobodi muibashimishe sunga kuibasumbushena, muanda we Efile Mukulu sha kalolo na lusa.

32 “Binobino Ô Efile Mukulu eetu, Efile Mukulu mukata, sha Bukome na akutshina, mukumbashe kilombeno kiaye na muleshe kifulo kia lulamato, tobepulanga namu makienga oso atudi bapete, atue, ba nfumu betu, bakunkushi betu, ba tshite muakuidi betu, batemuki betu, bamashetu kulu na muilo oobe oso kubanga mafuku a ba nfumu ba Asiri mpa na lelo. 33 Mu mianda yoso itufikile wemuleshe kululama, muanda wemukite mianda na lulamato; anka atue ngibakite mianda i bubi. 34 Anka ba nfumu betu, bakunkushi betu, ba tshite muakuidi betu, na bamashetu kulu, tababaadi bakookiele Miiya yobe na tababaadi bateemeshe mayi oobe sunga mitentekiesho* yobe ibodi muibadimushe nayo. 35 Sunga pabaabadi mu bufumu buabo na abasanka na bintu bibungi bibuwa bibodi webapa, sunga bibaabadi mu nsenga ikata na i bufukie ibodi muibape, tababaadi bakufubile na tababaadi balekie bikitshino biabo bibubi. 36 Anka lelo uno tui ba mpika, olo ba mpika mu nsenga ibodi mupe bamashetu kulu bua kudia bikuba biayo na bintu biayo bibuwa. 37 Bintu bia mu yaaya nsenga bibungi mbia ba nfumu bobodi mutuule kunundu kuetu pa muanda wa miluisho yetu. Atue na bimunuanga bietu bakuete kuitukunkusha nka bi’abakumiina na tui mu dikienga dikata.

38 “Pa muanda wa bino bioso, atukitshi kilombeno tuikifunde mu mukanda, na bakunkushi betu, bena Levi betu na ba tshite muakuidi betu abekishinkamisha pa kuikiela kitampi.”