Yeshaya
46 Bele mmuiname, Nebo mmubandame.
Ma nkishi aabo mbeasemune kui nyema, nyema ayisemuna bushito,
Nka bu mabofu atentekie pa nyema ikookie.
2 Ababandama na abayinama pamune;
Nta mbalombene kupaasha mashito* aabo,
Na abo banabene abende bakuatshibue.
3 “Nteemesheyi, Ô nshibo ya Yakobo, na anue boso bashale ba mu nshibo ya Isalele,
Anue bandi mukuatshishene kubanga pa kutandikua na bandi musemune kubanga muifu.
4 Mpa na ku bununu buenu nakekala nka mumune;
Mpa na panumene nfuidi nakatungunuka na kuinukuatshishena.
Nka bu binaadi muibikite, n’akenusemuna, n’akenukuatshishena na n’akenupaasha.
5 Nui kumpuandikisha na nanyi sunga kungikasha mumune na nanyi,
Buashi tuifuanene naye?
6 Kui bantu abapongolaa ôlo e mu tubuta tuabo;
Abapimi kiamo kia arja pa kipimino.
Abafutu nsendue a bilonda, na ekikitshi efile.
Akupu abamuinamina, oolo abamulanguila.
7 Abamutuulu ku mapampa aabo;
Abamusemuna, na abamutuulu mu mbalo yaye, ashala muimane nka paapa.
Takatuka mu mbalo yaye.
Abamuele misaase, anka talula;
Ta mulombene kupaasha muntu su ngumune e mu dikienga.
8 Tentekieshayi bino na nunyingie mashimba.
Nuibituule kuishimba dienu anue ba nkitshishi ba miluisho.
9 Tentekieshayi mianda ya kumpala ya kala,
Yashi ne Efile Mukulu, na takui ungi.
Ne Efile Mukulu na takui mungi e bu ami.
10 Kubanga ku mbangilo nabadiila kuukisha abikafudiila muanda,
Na kubanga kala nabadiila kuukisha mianda ishabandile kukitshika,
Nakula’shi: ‘Kitshibilo* kiande akikakumbana,
Na nakakitshi kioso kiankumiina.’
11 Nkuete kuitanyina konyi akadia muita kukatukila kutunduka nguba,
Nkuete kuitanyina muntu kukatukila ku nsenga i kula bua kukumbasha kitshibilo kiande.
Ne muakule, na nakebikumbasha.
Ne muibiatshile mpango, na nakebikitshi.
12 Nteemesheyi anue be na mashimba apape,
Anue be kula na kululama.
13 Ne mufuishe kululama kuande pepi;
Takui kula nya,
Na kipandilo kiande takiyisha.
Nakapa Siyona kipandilo, na nakapa Isalele ntumbo yande.”