Mukanda wa kumpala wa Samuele
17 Biabia, bena Filistine bababungile biluilo biabo bua kulua ngoshi. Babaadi bebungile ku Soko a mu Yunda, na abo nkutuula kishalelo kiabo pankatshi pa Soko na Azeka mu Efese-damime. 2 Saule na bantu ba mu Isalele babaadi bebungie, abo nkutuula kishalelo kiabo muibanda dia Ela, na abo nkuilonga bua kulua ngoshi na bena Filistine. 3 Bena Filistine babaadi ku lupese lumune lua muengie, na bena Isalele babaadi ku lungi lupese lua muengie, na ebanda dibaadi pankatshi paabo.
4 Akupu, kingi kilobo kibatuukile mu kishalelo kia bena Filistine, eshina diaye nyi Goliate a ku Gate, bula buaye bubaadi bua kude isamombo n’eyasa* dibaale. 5 Baadi na kifulu kia munyinga ku mutue waye, na baadi mufuale ekotshi dia tu biamo tui bu mambamamba, bushito bua diadia ekotshi dia tu biamo tua munyinga bubaadi bua shekele* 5 000. 6 Baadi na bintu bia kushikiila mikoolo yaye bia kiamo kia munyinga na baadi na mulumbu wa kiamo kia munyinga mu mongo muaye. 7 Mutuela wa mulumbu waye ubaadi bukata nka bu mutshi w’abanyinaa buanda ku kiamo kia kuluka nakio bilamba, na nsongo ya kiamo kia mulumbu waye ibaadi bushito bua shekele* 600, na muntu baadi amusemuina ngabo baadi atambuka kumpala kuaye. 8 Akupu bayimene, aye nkuela musaase kui basalayi ba bena Isalele na nkuibalungula’shi: “Buakinyi nubatuuku na nubelongo bua kulua ngoshi, ami ne muina Filistine, anue tanui bafubi ba Saule su? Sangulayi muntu a kuanudi, afikie mu kulua nami. 9 Su yawa muntu balu nami na bangipaa, paapa atue atufiki bafubi benu. Kadi su’mi namukabila na namuipaa, anue anufiki bafubi betu na anuitufubila.” 10 Akupu yawa muina Filistine bakuile’shi: “Lelo uno nkuete koolomona basalayi ba bena Isalele. Mpeyi muntu, bua’shi tulue naye!”
11 Pabaadi Saule na bena Isalele boso bapushe ano mayi a muina Filistine, babatshinyine, moo wibukopo nkuibakuata.
12 Binyibiabia Davide baadi muana a Yesee muina Efrata a mu Beteleme a Yunda. Yesee baadi na bana balume muanda, mu mafuku a Saule, Yesee baadi mupue kununupa. 13 Bana ba Yesee balume basatu bakulu, babalondele Saule ku ngoshi. Ku baba bana basatu babayile ku ngoshi, kubaadi Eliabe muana mbedi, Abinadabe muana a kabidi, na Shama muana a kasatu. 14 Davide nyi baadi ka mukala, na baba bana balume basatu bakulu babalondele Saule.
15 Pabaadi afubila Saule, Davide baadi nka ende alukiila ku Beteleme bua kutala mikooko ya nshaye. 16 Mu yaaya nsaa Goliate* baadi nka afiki emana ku namashika na ku kiolua munda mua mafuku 40 bua kuibolomona.
17 Akupu Yesee nkulungula muana aaye Davide’shi: “Ata namu kino kipimo kia efa* kia ntete ikangie na ino mikate ekumi, otuadile bukidibukidi ba tutu bobe ku kishalelo. 18 Ata bino bipese bia fromage* ekumi okebipe mukata a bantu kinunu; dingi, oyipushe bua kuuka su ba tutu bobe be biya, akupu walukiile ondungule biabadi.” 19 Bana ba Yesee babaadi na Saule, na bangi basalayi boso ba mu Isalele muibanda dia Ela bua kulua na bena Filistine.
20 Biabia Davide nkubuuka ku namashika aye nkulekiela ungi muntu bua kulama mikooko. Banyine bintu biaye aye nkuenda nka bu bimulunguile Yesee, pabafikile ku kishalelo, basangene basalayi abende ku mbalo ya kuluila ngoshi, abeele misaase ya ngoshi. 21 Basalayi ba bena Isalele babemene abetalena na basalayi ba bena Filistine bua kulua ngoshi. 22 Davide balekiele musango umune mabofo aaye kui muntu alamaa mabofo, nkuenda lubilo ku mbalo ya kuluila ngoshi, pabafikile, babangile kuipusha bi bakuabo.
23 Pabaadi kiesamba nabo, kilobo kiabetamina bu Goliate muina Filistine a mu Gate kibafikile. Baadi akatukila ku mbalo ya kuluila ngoshi ya bena Filistine, aye nkuakula dingi aa mayi amune nka bu kumpala na Davide nkuiapusha. 24 Pabamuene basalayi ba bena Isalele yawa muntu, moo wibukopo ubebakuatshile, abo nkusuuka. 25 Bena Isalele babaadi abakula’shi: “Nubamono yawa muntu kuete kufika kuno? Kuete kufika bua koolomona basalayi ba Isalele. Nfumu akapa muntu amuipaa bupeta bui bungi, akamupa mpa na muana aaye mukashi, akakitshi bia’shi nshibo ya nshaye tayifutanga bitadi na bingi bitungo mu Isalele.”
26 Biabia Davide babangile kuipusha bantu babaadi bemane pepi naye’shi: “Nkinyi ki’abakakitshina muntu ayipaa awa muina Filistine na kukatusha buufu kui bena Isalele? Muanda awa muina Filistine namu nnanyi bua koolomona basalayi b’Efile Mukulu e na muwa?” 27 Paapa bantu babamulunguile nka aa mayi amune bu kumpala, abo nkuamba’shi: “Tala bi’abakakitshina muntu amuipaa.” 28 Pabaadi tutu aaye Eliabe mupushe Davide ku’esamba na bantu, bamukuatshiile nsungu ibukopo na nkuamba’shi: “Buakinyi bofiki kuno? Na we mulekie yaaya mikooko ipeela na nnanyi mu kabaaka? Nauku kalolo nkomanga yobe na binangu bibubi bi muishimba diobe, bofiki penda bua kumona ngoshi.” 29 Nyi Davide nkualuula’shi: “A mmuanda kinyi wibubi unakitshi? Nele penda lukonko!” 30 Biabia aye nkuialuula kui ungi muntu, na nkumuela nka lualua lukonko lumune, na aye namu nkumualuula nka bu biabamualuluile kumpala.
31 Bantu babapushile mayi abaadi Davide muakule, abo nkukealungula Saule. Biabia Saule nkumuitanyina. 32 Davide nkulungula Saule’shi: “Muntu su ngumune tabofulanga kuishimba pamuanda waye. Ami mufubi oobe nende bua kulua ngoshi na uno muina Filistine.” 33 Kadi Saule nkulungula Davide’shi: “Obe tue mulombene kuenda mu kulua na yawa muina Filistine, muanda okii muana mukinga na aye mmusalayi kubanga ku bukinga buaye.” 34 Akupu Davide nkulungula Saule’shi: “Ami mufubi oobe, naadi mulami a mikooko ya nshami, na ntambue bafikile akuata mukooko mu kikutu, ungi musango’nyi nyema a Urse bafikile aye nkukita nka biabia. 35 Neyilondele ami nkuiyipaa na ami nkupaasha mikooko mukanua muayo, payibafikile bua kulua nami, neyikuatshile ku buaa* ami nkuiyikupila, nkuiyipaa.” 36 Ami mufubi oobe nayipayile ntambue na nyema a Urse, uno muina Filistine shii musadiibue afiki nka bu umune a ku yaaya nyema, muanda boolomona basalayi b’Efile Mukulu e na muwa. 37 Akupu Davide nkukumbasha’shi: “Yehowa baadi mumpaashe ku ngala ya ntambue na ya nyema a Urse, nnaye akampaasha’nyi ku maasa kua uno muina Filistine.” Biabia Saule nkulungula Davide’shi: “Enda, Yehowa ekale nobe.”
38 Paapa Saule nkufuadika Davide bina ngoshi biaye. Bamufuadikile kifulu kia kiamo kia munyinga ku mutue, aye nkumufuadika ekotshi dia tu biamo. 39 Akupu Davide basomekiele lupete lua ngoshi lua Saule ku mukaba waye, aye nkutompa kutambuka, anka tabaadi obesha nya, muanda tabaadi muibiubiile, nyi Davide nkulungula Saule’shi: “Ntangobesha kutambuka na bino bintu muanda ntshi muibiubiile.” Paapa Davide bebifuudile. 40 Akupu bakuatshile mukombo muiyasa diaye, aye nkusangula mabue atano a minono mu ka muela, nkuiela mu ka mpaya kaaye ka bu mulami a mikooko, baadi na ndundo* aaye a tonyi mu maasa, aye nkubanga kuifubuila kui muina Filistine.
41 Yawa muina Filistine baadi anyisha kuifubuila kui Davide, na muntu baadi amusemuina ngabo yaye, baadi kumpala. 42 Pabaadi yawa muina Filistine mumone Davide, babangile kumusepa na kapeesha kooso muanda Davide baadi amueneka muana mukinga na baadi buwa bukile. 43 Biabia muina Filistine nkuipusha Davide’shi: “Ami ne mbua su, bua’shi ofikie kuandi na mitshi?” Paapa aye nkuela Davide milua muishina dia b’efile baye. 44 Biabia muina Filistine nkulungula Davide’shi: “Fika kuandi, nankapa tonyi tua muiyilu na nyema ya mu kisuku muita oobe.”
45 Davide namu nkualuula muina Filistine’shi: “Ofiki kuandi na muele wa ngoshi na mulumbu ukata na upeela, kadi ami nafiki kodi muishina dia Yehowa a biluilo, Efile Mukulu a basalayi ba Isalele, yawa oboolomona. 46 Lelo uno, Yehowa akakutuulu mu maasa muande, nakuipaa nkutshibe mutue, dingi’nyi lelo uno nakapa tonyi tua muiyilu na nyema ya mu kisuku bitanda bia basalayi ba bena Filistine, na miilo yoso ya pa nsenga ayikauku’shi kui Efile Mukulu mu Isalele. 47 Na bantu boso bebungie pano abakauku’shi Yehowa t’apashaa na lupete lua ngoshi sunga na mulumbu, muanda ngoshi ngia Yehowa na akenupaana anue boso mu maasa muetu.”
48 Paapa Goliate babangile’nyi kuiseesela bua kufumankana na Davide, kadi Davide nkuenda lubilo ku mbalo ya kuluila ngoshi, mu kufumankana na Goliate.* 49 Davide belele eyasa mu ka mpaya kaaye nkuata ebue na nkuidiasa, bedikupiile muina Filistine mu mpala adio nkumutuela, aye nkupona mukupile mpala paashi. 50 Biabia Davide nkutshokola muina Filistine na ndundo a tonyi n’ebue, bamuashile aye nkumuipaa sunga biekala’shi Davide tabaadi na lupete lua ngoshi mu maasa muaye. 51 Davide batungunukile na kuenda lubilo kuadi, aye nkuimana mu lupese muaye, na nkuata lupete lua ngoshi lua muina Filistine aye nkuilusomona mu kipusu, bua kushinkamisha’shi bafu binyibinyi, bamutshibile nalo mutue. Pabamuene bena Filistine’shi kilobo kiabo kibaafu, babasuukile.
52 Paapa basalayi ba bena Isalele na ba mu Yunda babaabangile kuela biila, abo nkuilondena na bena Filistine kukatukila muibanda mpa na ku biibi bia Ekrone, na bitanda bia bena Filistine bibaadi abiende na kupona muishinda kubanga ku Sharaime mpa na ku Gate na ku Ekrone. 53 Kunyima kua bena Isalele kualukiila kubaabadi abelondena na bena Filistine, babapawile bintu mu kishalelo kiabo.
54 Akupu Davide batuadile mutue wa Goliate* ku Yelusalema, kadi batuudile bina ngoshi bia Goliate mu kashibo kaye k’epema.
55 Pabaadi Saule mumone Davide ende mu kufumankana na Goliate,* bayipuishe Abnere mukata a kiluilo kia ngoshi’shi: “Abnere, awa muana nga nnanyi?” Abnere nkumualuula’shi: “Bu biodi binyibinyi na muwa nfumuami, ntanguku!” 56 Na nfumu nkumulungula’shi: “Nkimbile bua kuuka su yawa nsongualume mmuana a’nyi.” 57 Musango umune na Davide kualukiila ku ngoshi ibaluile na muina Filistine, Abnere bamuatshile aye nkuenda naye kui Saule, Davide baadi na mutue wa Goliate* mu maasa muaye. 58 Paapa Saule nkuipusha Davide’shi: “A we muana a’nyi?” Davide nkumualuula’shi: “Ne muana a mufubi oobe Yesee muina Beteleme.”