Mukanda wa Kabidi wa Ba nfumu

17 Mu kipua kia 12 kia kumunana kua nfumu Akaze a Yunda, Oshea muana a Ela bafikile nfumu a Isalele mu Samadiya; aye nkumunana munda mua bipua kitema. 2 Batungunukile na kukita mianda ibubi ku meso kua Yehowa, anka kushi bu ba nfumu ba Isalele babaadi kumpala kuaye. 3 Nfumu Salamanasa a Asiri nkumutuuka ngoshi, Oshea nkufika mufubi aaye na nkubanga kumufuta kitadi. 4 Anka nfumu a Asiri bapushishe’shi Oshea kuete kumudiila lukuku muanda baadi mutume mikiendi kui nfumu So a Ejipitu, na tabaadi mutuale kitadi kui nfumu a Asiri bu mu bipua bishale. Biabia nfumu a Asiri nkumuela mu lukano na nkumuanya.

5 Nfumu a Asiri nkutuela na ngoshi muiumbo dioso, aye nkufika ku Samadiya na nkumuifunyisha munda mua bipua bisatu. 6 Mu kipua kia kitema kia kumanana kua Oshea, nfumu a Asiri bakuatshile Samadiya. Akupu aye nkukuata muilo wa Isalele nkuenda nao mu Asiri na nkuiutuula buaudia kushala mu Ala na mu Abore dia ku muela wa Gozane na mu bibundi bia bena Mede.

7 Bino bibaadi bikitshikie muanda bena Isalele babaadi bakitshine Yehowa Efile Mukulu aabo muluisho, aye baadi muibatuushe mu nsenga ya Ejipitu, ku matalua a Faraone nfumu a Ejipitu. Babaadi balanguile* bangi b’efile, 8 abo nkulonda bipikua bia miilo ibaadi Yehowa mubingie kumpala kua bena Isalele, na abo nkulonda bipikua bibaadi ba nfumu ba Isalele batuule.

9 Bena Isalele babaadi abalondo mianda ishibaadi buwa kumpala kua Yehowa Efile Mukulu aabo. Babatungunukile na kuibaka ma mbalo e kunundu mu bibundi biabo bioso, kubanga ku kitenta kia mulami mpa na ku kibundi* kinyingishibue. 10 Babatungunukile na kushimika misungo ya kishila na mitshi ya kishila* mu tu miengie toso tui kunundu na muushi mua mitshi yoso itshimpukie, 11 na ku ma mbalo oso e kunundu, babaadi abafitshisha miishi ya milambu nka bu bibaadi abikitshi miilo ibaadi Yehowa mubingie kumpala kuabo. Babatungunukile na kukita mianda ibubi bua kufiitshisha Yehowa munda.

12 Babatungunukile na kulanguila ma nkishi e butete,* abaadi Yehowa muibalungule pa muanda wao’shi: “T’abitungu nukite biabia nya.” 13 Yehowa baadi nka adimusha Isalele na Yunda kukiila kui batemuki baye boso na bantu boso abamonaa bimonua ambanga’shi: “Lekayi mashinda eenu e bubi, kokielayi miiya yande na mayi ande muyile miiya yoso inaadi mutumine ba mashenu kulu eyi, yaaya yandi muinutumine kukiila kui bafubi bande batemuki.” 14 Anka tababaadi bateemeshe, babaadi batungunukie na kuikala na mitue ibukopo* nka bu bamashabo kulu bashibaadi baleshe lukumiino mui Yehowa Efile Mukulu aabo. 15 Babatungunukile na kusumbushena miiya yaye na kilombeno kiaye kibaadi mukite na bamashabo kulu, na mitentekiesho yaye ibaadi muibape bua kuibadimusha na abo nkutungunuka na kulonda ma nkishi ashi na muulo, na abo nkufika bantu bashi na muulo, bambulanga miilo yoso ibefunyishe ibaadi Yehowa muibatumine eyi’shi tanuiyambulanga.

16 Babatungunukile na kusumbushena miiya yoso ya Yehowa Efile Mukulu aabo, abo nkukita ma nkishi a kilonda* a tuana tubidi tua ngombe, na mutshi wa kishila,* abo nkuinamina kiluilo kioso kia muiyilu na nkufubila Baale. 17 Dingi abo nkulambula bana babo balume na bana babo bakashi mu kaalo, abo nkukita lubuko, na nkukimba kuuka mianda ayifiki kumpala na abo nkutungunuka na kuipaana* mu kukita mianda ibubi ku meso kua Yehowa bua kumufiitshisha munda.

18 Biabia Yehowa nkufiitshila Isalele munda ngofu, nyi aye nkuibakatusha kumpala kuaye. Tabaadi mulekie muntu su ngumune, nka penda kisamba kia Yunda.

19 Mpa na bena Yunda, tababaadi bakokiele miiya ya Yehowa Efile Mukulu aabo, n’abo namu babaadi balonde bipikua bibaadi bilonde Isalele. 20 Yehowa nkusumbushena lutandua loso lua Isalele, nkuibakuatshisha buufu na nkuibatuula mu maasa mua bantu abapaulaa mpa na pabaadi muibakatushe kumpala kuaye. 21 Aye nkukatusha Isalele mu nshibo ya Davide na abo nkutuula Yeroboame muana a Nebate bu nfumu. Anka Yeroboame nkutakula Isalele mu kukutua kulonda Yehowa na nkuibafikisha mu kukita muluisho ukata. 22 Na bena Isalele nkutungunuka na kukita miluisho yoso ibaadi Yeroboame mukite. Tababaadi beyilekie nya, 23 mpa na pabaadi Yehowa mukatushe Isalele kumpala kuaye nka bu bibaadi muakule kukidila kui bafubi baye boso batemuki. Biabia abo nkukuata bena Isalele nkuenda nabo mu nsenga ya Asiri, nyi muabadi mpa na lelo.

24 Akupu, nfumu a Asiri bayile na bantu ba mu Babilone, ba mu Kute, ba mu Awa, ba mu Amate na ba mu Sefarwayime na ebatuula mu bibundi bia Samadiya pa mbalo ya bena Isalele; abo nkuata Samadiya na nkushala mu bibundi biaye. 25 Pabababangile kushala kuakua tababaadi abatshinyi* Yehowa, nyi Yehowa nkutuma ntambue munkatshi muabo na ayo nkuipaa bangi ba kuabadi. 26 Abo nkulungula nfumu a Asiri’shi: “Miilo i bodi mukuate wenda nayo na weyituula mu bibundi bia Samadiya tayiuku lulanguilo* lua Efile Mukulu a mu yaaya nsenga. Biabia kuete nka kutuma ntambue munkatshi muabo ikuete kuibayipaa muanda muntu su ngumune a kuabadi tauku lulanguilo lua Efile Mukulu a mu yaaya nsenga.”

27 Nyi nfumu a Asiri nkutuma eyi’shi: “Alushayi umune a ku ba tshite muakuidi babanudi bakuate nuenda nabo, akashale kuakua bua kuibalongiesha lulanguilo lua Efile Mukulu a mu yaaya nsenga.” 28 Nyi umune a ku ba tshite muakuidi babaabadi bakuate mu Samadiya benda nabo nkualukiila bua kushala mu Betele, na aye nkubanga kuibalongiesha bia kutshina* Yehowa.

29 Anka muilo oso ubaadi ukite efile* ao abaabadi batuule mu mashibo a lulanguilo ku ma mbalo e kunundu abaadi bena Samadiya bakite; muilo oso ubaadi ukite biabia mu bibundi biao bibaabadi bashale. 30 Biabia bantu ba ku Babilone nkukita Sukote-benote, bantu ba ku Kute nkukita Nergale, bantu ba ku Amate nkukita Ashima, 31 na bena Awa nkukita Nibaze na Tartake. Bena Sefarwayime babaadi abashiiki bana babo balume mu kaalo bua Adalameleke na Anamaleke b’efile ba Sefarwayime. 32 Sunga mbibaabadi abatshinyi Yehowa, babaadi batuule bantu ba munkatshi muabo bu ba tshite muakuidi ku ma mbalo e kunundu na bano babaadi abebafubila ku mashibo a lulanguilo ku ma mbalo e kunundu. 33 Biabia babaadi abatshinyi Yehowa, anka babaadi abalanguila b’efile babo muyile lulanguilo* lua miilo ya kuabadi bakatukile.

34 Mpa na lelo bakuete kulonda mushindo wabo wa kala wa kulanguila.* Muntu su ngumune a kuabadi t’alanguila* Yehowa na muntu su ngumune t’alondo mayi aaye, biimu biaye, na Miiya yaye ibaadi Yehowa mupe bana ba Yakobo, sha eshina dibaadi mushintule bu Isalele. 35 Pabaadi Yehowa mukite nabo kilombeno, baadi muibatumine eyi’shi: “T’abitungu nutshine bangi b’efile na t’abitungu nuibenamine sunga kuibafubila sunga kuibalambula milambu. 36 Anka Yehowa baadi muinutuushe muiumbo dia Ejipitu na bukome bui bungi na mboko ibukome, Aye nyi anudia kutshina, aye nyi anudia kuinamina na aye nyi anudia kulambula milambu. 37 Na abitungu nutungunukie na kulonda kalolo mayi, biimu, na Miiya yadi muinufundile na t’abitungu nutshine bangi b’efile. 38 T’abitungu nulube kilombeno kiandi mukite nenu na t’abitungu nutshine bangi b’efile. 39 Anka, abitungu nutshine Yehowa Efile Mukulu eenu, muanda aye nyi akenupaasha ku maasa a beshikuanyi benu boso.”

40 Anka tababaadi bakokiele nya, na babaadi balonde lulanguilo* luabo lua kala. 41 Biabia ino miilo ngifikie mu kutshina Yehowa, anka ibaadi dingi ayifubila ma nkishi aabo. Bana babo na bekulu babo abakitshi nka bu bibaadi bikite bamashabo kulu mpa na lelo.