Yeshaya
35 Kabaaka na nsenga yume abikasanka,
Na kipia kia kabaaka akikekala na muloo na kutuusha bilongo bu kilongo kia safrone.
2 Kushi mpaka akikeele bilongo;
Akikekala na muloo na kuela misaase ya muloo.
Abakekipa ntumbo ya Lebanone,
Buwa bua Karmele na bua Sharone.
Abakamono ntumbo ya Yehowa, buwa bu’Efile Mukulu eetu.
3 Nyingishayi maasa abofule,
Na nyingishayi makunungu akuete kusuusa.
4 Lungulayi baba be na tuinyongoshi’shi:
“Kankamanayi. Tanutshinanga.
Talayi! Efile Mukulu eenu akafiki na kuiobuela,
Efile Mukulu akafiki na dinyoka.
Akafiki, enupaashe.”
5 Mu kiakia kipungo meso a ba mpofu aakafunguka,
Na matui a ba nshikue aakashikuka.
6 Mu kiakia kipungo mulemane akatupika nka bu ntengu,
Na ludimi lua kamaama alukeele misaase ya muloo.
Muanda mema aakatuuku mu kabaaka,
Na miela ayikatuuku mu kipia kia kabaaka.
7 Nsenga yume ayikekala eshiba dia malengie,
Na nsenga ishi na mema ayikekala nsulo ya mema.
Mu ma mbalo abaadi miseu ayikisha,
Amukekala lubishi, malengie na papirise.*
8 Akukekala eshinda dikata,
Oolo, eshinda di’abetanyina bu Eshinda dia Kishila.
Muntu e butete takakidila muanka.
Ndilamibue bua baba babadi bape matalua akuimutambukila;
Muntu mupatakane takemutambukila.
9 Ntambue su ngumune t’akekala muanka,
Na nyema a kisuku su ngumune e bukielo t’akafiki muanka.
T’ayikasanganyibua muanka;
Anka penda bantu bakuudibue nyi abakatambukila muanka.
10 Baba bakuudibue kui Yehowa abakalukiila na abakafiki mu Siyona na misaase ya muloo.
Muloo ushi mpuilo aukukekala ku mitue yabo bu kifulu.
Abakasanka na abakekala na muloo,
Kinyongua na kuidila abikasuuku.