Kui Bena Loma
15 Anka atue banyingie, tusemune kubofula kua baaba babofule, na tatuikalanga atuisankisha nka’tue banabene. 2 Oso a kuatudi asankishe muntu naye na kumukitshina bibuwa bua kumunyingisha. 3 Muanda sunga Nkidishitu tabadi muisankishe penda aye nabene nya, kadi nka bu biabidi bifundibue’shi: “Kukayibua kua baaba abakukaa kubapoona pandi’mi.” 4 Muanda mianda yoso ibaadi ifundibue kala, ibaadi ifundibue bua kuitulongiesha, bua’shi ku bukuashi bua kunyingiila kuetu na ku bukuashi bua kusambibua akutukila mu Bifundue, tupete lukulupilo. 5 Biabia, Efile Mukulu apeyaa bantu bukome bua kunyingiila na ebasambaa, enukuashe buanudia kuikala munkatshi muenu na binangu bi mumune bu bibaadi nabio Nkidishitu Yesu, 6 mu uno mushindo anuikala mu buumune na muiyi dimune panutumbisha Efile Mukulu, aye muikale Nshaye na Nfumuetu Yesu Nkidishitu.
7 Biabia ekuukisheneyi, nka bu bibaadi Nkidishitu muinukukile namu bua ntumbo y’Efile Mukulu. 8 Muanda nenulungula’shi, Nkidishitu bafikile mufubi a baaba basadiibue bua kuleesha’shi, Efile Mukulu akulaa bia binyibinyi na kushinkamisha milayilo ibaadi Efile Mukulu mulee ba nkambua babo, 9 bua’shi miilo itumbishe Efile Mukulu bua lusa luaye. Nka bu biabidi bifundibue’shi: “Nyi buakinyi nankaleesha patooka munkatshi mua miilo’shi nankuuku, na nakayimbi bua kutumbisha eshina diobe.” 10 Na akula dingi’shi: “Sankayi anue miilo pamune na bantu baye.” 11 Na dingi’shi: “Tumbishayi Yehowa anue miilo yoso, na bantu boso bamutumbishe.” 12 Na dingi Yeshaya akula’shi: “Akuikala mushi wa Yesee, yawa akemana bua kukunkusha miilo, na miilo ayikakulupila muadi.” 13 Efile Mukulu apanaa lukulupilo enuushe na muloo oso na butaale, muanda nuibamukulupile, bua’shi nuikale na lukulupilo lui bungi ku bukuashi bua bukome bua kikudi kiselele.
14 Binobino bakuetu, ne mushinkamishe’shi nuibaule na mianda ibuwa, na’shi nui na kiukilo na ngobesha ya kulongiesha bangi.* 15 Biabia nenufundila ingi mianda patooka bua kuinutentekiesha dingi pa muanda wa kalolo kabadi bandeeshe kui Efile Mukulu 16 bua kuikala mufubi a Nkidishitu bua miilo. Ne muipaane mu mufubo* wiselele wa kulungula mukandu wibuwa w’Efile Mukulu, bua’shi yaaya miilo ikale bu mulambu wabadi bakumiine kui Efile Mukulu, mulambu wabadi bekashe bu wiselele buaye ku bukuashi bua kikudi kiselele.
17 Ne na muloo wa kuikala bu mulongi a Nkidishitu Yesu na kukita mufubo w’Efile Mukulu. 18 Ta nesamba pabitale kintu su nkimune kiandi mukite ami nabene, kadi nka penda pabitale kiakia kikite Nkidishitu, bua kukuasha bantu ba ingi miilo buabadia kukookiela kukiila ku ngakuilo na ku bikitshino biande. 19 Babaadi bakookiele ku bukuashi bua bukome bua bitunduilo na bilengieleshi bikitshibue ku bukuashi bua kikudi ki’Efile Mukulu, mu uno mushindo, naadi mulungule mukandu wibuwa pabitale Nkidishitu na kishima kubanga ku Yelusalema, nkuifunya mpa na ku Ilirikume. 20 Mu uno mushindo ne muitatshishe bua kupela kulungula mukandu wibuwa, mu ma mbalo abaabadi bapue kuukisha eshina dia Nkidishitu, bua kupela kuibaka pa mbalo* ipue kuibaka ungi muntu; 21 anka bu biabidi bifundibue’shi: “Baaba bashi balungulue pabimutale, abakamumono, na baaba bashi bapushe, abakashinguula.”
22 Nyi buakinyi ntshi mupete bia kufika kuanudi, sunga bianyikalanga misango i bungi na lukalo lua kuikufika. 23 Kadi binobino, ntshi na mbalo yanshi mulungule mu kino kipindi kia nsenga, na munda mua bipua bi bungi,* nekalanga na lukalo lua kufika kuanudi. 24 Nyi buakinyi nakulupila’shi, panyende ku Espanye, nakenumono. Kunyima kuami kuikala na muloo wa kukisha nenu kapindi, nakulupila’shi anukanshindikila muishinda. 25 Bua binobino, nakiebe kuenda ku Yelusalema bua nkafubila beselele. 26 Muanda bakuetu be ku Maseduane na ku Akayi, bekeele na muloo wa kutuusha bintu biabo bua kukuasha balanda be munkatshi mua beselele mu Yelusalema. 27 Eyendo, bekeele na muloo wa kuibikita, muanda bekele na kishiyo kiabo, muanda su bantu ba ingi miilo bekeele bapete bukuashi buabo bua mu kikudi, abo namu bekele mu kitungo kia kuibakuasha na bintu biabo bia ku mbidi. 28 Su napudisha kuibapa kino kia buntu,* nakatuka bua kuenda ku Espanye, na nakidila kuanudi. 29 Dingi, nauku’shi panfiki kuanudi, nenutuadila miabi i bungi ayifiki kui Nkidishitu.
30 Bakuetu, nenunyingisha kukiila kui Nfumuetu Yesu Nkidishitu, na kukiila ku kifulo akifiki ku kikudi kiselele, bua kulua ngoshi pamune nami mu nteko yenu kui Efile Mukulu pa muanda wande, 31 bua’shi mpande ku maasa kua bantu bashi bena kukumiina be mu Yudeya, na bua’shi beselele bakumiine bukuashi buande buantuadila bena Yelusalema, 32 bua’shi mu kukumiina ku’Efile Mukulu, nfikie kuakua kuanudi na muloo na tunyingishibue nenu pamune. 33 Efile Mukulu apanaa butaale ekale nenu boso. Amene.