Mukanda wa kumpala wa Kuilondena kua Mianda
29 Biabia Nfumu Davide balunguile kakongie koso kashima’shi: “Muana ande Salomone abadi basangule kui Efile Mukulu ki mukinga, na takambile kuuka mianda ibungi, aku namu mudimo autungu kukita ngukata, muanda ta ntempelo a muntu, kadi nyi ntempelo a Yehowa Efile Mukulu. 2 Ne muikitshishe ngofu bua kutuusha bua nshibo ya Efile Mukulu ande, ôlo bua mudimo autungu kukita na ôlo, kiamo kia arja, bua mudimo autungu kukita na kiamo kia arja, kiamo kia munyinga bua mudimo autungu kukita na kiamo kia munyinga, kiamo, bua mudimo autungu kukita na kiamo, mabaya, bua mudimo autungu kukita na mabaya, mabue a onixe, mabue a kulamika na potopoto, nsakabue ya kulengiesha nayo, mabue a muulo a mishindo yoso, na mabue a albastre akile bungi. 3 Dingi, bu biandi mukumiine nshibo ya Efile Mukulu ande ngofu, ne mulumbuule dingi pa bupenka bupeta buande bua ôlo, kiamo kia arja, biantuusha bua nshibo ya Efile Mukulu ande, kukumbasha ku biabia bioso biandi mulumbuule bua nshibo ya kishila, 4 mpa na ntalanta 3 000 ya ôlo a ku Ofire, na ntalanta 7 000 ya kiamo kia arja kiabadi balumbuule kalolo, bua kuibilamika ku bimano bia mashibo, 5 ôlo bua mudimo autungu kukita na ôlo, kiamo kia arja bua mudimo autungu kukita na kiamo kia arja, na bua midimo yoso yabakakitshi kui ba nsendue. Biabia, nnanyi akumiina kufika na kia buntu bua kuikipa Yehowa?”
6 Paapa, bakunkushi ba bifuko bia bamashabo, bakunkushi ba bisamba bia Isalele, ba nfumu ba bantu kinunu, ba nfumu ba bantu lukama na ba nfumu ba midimo ya nfumu, babafikile mu kukumiina kuabo. 7 Na babatuushile bua mudimo wa nshibo ya Efile Mukulu a binyibinyi: Ntalanta ya ôlo 5 000, darike 10 000, ntalanta ya kiamo kia arja 10 000, ntalanta ya kiamo kia munyinga 18 000, na ntalanta ya kiamo 100 000. 8 Muntu oso baadi na mabue a muulo, bakeatuudile mu kadimbo ka kulamina bupeta ka mu nshibo ya Yehowa kabaadi ku bukunkushi bua Yekiele muina Gershone. 9 Bantu babaadi na muloo wa kutuusha bia buntu bia mu kukumiina kuabo, muanda babaadi batuushe bino bia buntu bia mu kukumiina kuabo na eshimba dimune bua Yehowa, na nfumu Davide namu basankile ngofu.
10 Akupu, Davide baadi mutumbishe Yehowa kumpala kua kakongie koso. Aye nkuakula’shi: “Yehowa, Efile Mukulu a nshetu Isalele, atumbishibue bua ikalayika.* 11 Ô Yehowa! Bukata, bukome, buwa na kinemo na ntumbo mbiobe, muanda bintu bioso bi muiyilu na pa nsenga mbiobe. Ô Yehowa! Bufumu mbobe. Obe nabene nyi etumbisha kunundu kua bioso. 12 Bupeta na ntumbo abituukila kodi, na okunkusha bintu bioso, mu eyasa diobe mui bukome. Dingi eyasa diobe di na ngobesha ya kukita mianda ikata na kupa bantu boso bukome. 13 Binobino, Ô Efile Mukulu eetu, atukutumbula na atutumbisha eshina diobe dikile buwa.
14 A ami namu na muilo wande tui banyi, buatudia kutuusha bino bia buntu bia mu kukumiina kuetu? Muanda bintu bioso abifiki kodi, na tubakupa biabia abifiki ku eyasa diobe. 15 Dingi, tui benyi kumpala kobe na bu bantu bafilukie, nka bu bibaadi ba nkambua betu boso. Muanda mafuku eetu pa nsenga e nka bu muesheshe, kushi lukulupilo. 16 Ô Yehowa Efile Mukulu eetu! Buno bupeta boso buatudi balumbuule bua kukuibakila nshibo bua eshina diobe diselele, abukatukila ku eyasa diobe, na boso mbobe. 17 Ô Efile Mukulu ande! Nauku kalolo’shi obe otaluulaa eshimba dia muntu, n’ashi osankaa na kululama. Mu kululama kua eshimba diande ne mutuushe bino bintu mu kukumiina kuande ami nabene, na ne na muloo wibungi wa kumona muilo oobe wi pano aukupa bia buntu bia mu kukumiina kuao. 18 Ô Yehowa Efile Mukulu a ba nkambua betu, Abalahama, Isaake na Isalele, kuasha namu muilo oobe buaudia kulama bino binangu mu mashimba aabo bua loso, na otadiishe namu mashimba aabo kodi. 19 Dingi, ope namu muana ande Salomone eshimba dimune bua’shi amone bia kutumikila miiya yobe, mitentekiesho yobe na mayi oobe, na akite ino mianda yoso na kuibaka ntempelo andi mulumbuluile bintu.”
20 Akupu Davide balunguile kakongie koso kashima’shi: “Binobino ntumbishayi Yehowa Efile Mukulu eenu.” Paapa kakongie koso kashima nkutumbisha Yehowa Efile Mukulu a ba nkambua babo, na abo nkuinama, na nkukupila mapala paashi kumpala kua Yehowa na kua nfumu. 21 Na abo nkutungunuka na kulambula milambu kui Yehowa na kulambula milambu ya kushiika kaalo kui Yehowa mu efuku dibalondele. Babalambuile ngombe yana ilume 1 000, mikooko ilume 1 000, mikooko ilume yana 1 000 na milambu yabo ya bitomuanga. Babalambuile milambu ikile bungi bua Isalele oso mushima. 22 Babatungunukile na kudia na kutoma kumpala kua Yehowa mu diadia efuku na muloo wibungi, babatuudile bua musango wa kabidi Salomone muana a Davide bu nfumu, abo nkumuela muimu kumpala kua Yehowa bu mukunkushi, na babatuudile Zadoke bu tshite muakuidi. 23 Biabia Salomone bashalele bu nfumu mu nkuasa a bufumu a Yehowa, pa mbalo ya nshaye Davide, dingi bufumu buaye bubaadi abuende kumpala, na bena Isalele boso babaadi abamukookiela. 24 Bakunkushi boso, bilobo bia ngoshi, mpa na bana ba Nfumu Davide boso, babaadi abakookiela nfumu Salomone. 25 Na Yehowa bakitshine bia’shi banyishe kunemeka Salomone mu Isalele mushima, na kumupa kinemo kikata kukila bangi ba nfumu boso babaadi mu Isalele kumpala.
26 Biabia Davide muana a Yesee, baadi mukunkushe mu Isalele mushima, 27 mafuku abaadi mukunkushe mu Isalele abaadi bipua 40. Mu Ebrone baadi mukunkushe munda mua bipua 7, na mu Yelusalema baadi mukunkushe munda mua 33. 28 Bafuile kunyima kua’ye kukita bipua bibungi bia muloo mu muwa waye, na baadi na bupeta bui bungi na ntumbo. Akupu muana aaye Salomone bafikile nfumu pa mbalo yaye. 29 Pabitale mianda ya Nfumu Davide, kubanga ku mbangilo mpa na ku nfudiilo, ngifundibue mu mayi abafundile Samuele muntu amonaa mianda, a mutemuki Natane na a Gade muntu amonaa bimonua. 30 Babafundile dingi mianda ya mu bufumu buaye boso bushima, bukome buaye, mpa na mianda ibakitshikile kiakia kipungo pabimutale na pabitale Isalele, na pabitale mafumu oso abaadi amuifunyishe.