Yeshaya
48 Pushayi bino, anue bantu ba mu nshibo ya Yakobo,
Anue abeyitanyina muishina dia Isalele
Na anue abakatukila mu mema a* Yunda,
Anue abetshipaa muishina dia Yehowa
Na anue abetanyina Efile Mukulu a Isalele,
Sunga biabidi’shi ta mu binyibinyi na mu kululama.
2 Muanda abeyitanyina muishina dia kibundi kiselele
Na abakimbi bukuashi kui Efile Mukulu a Isalele,
E na eshina’shi Yehowa a biluilo.
3 “Mianda ya kala* inaadi mukulungule kubanga kala,
Ibaadi ituukie mukanua muande,
Na naadi muukishe yanka.
Mususa umune nakitshine bi naadi muakule na abio nkukumbana.
4 Muanda nauku’shi we na mutue wi bukopo
Na’shi, nshingo yobe mmushila wa kiamo na mpala yobe nkiamo kia munyinga,
5 Naadi mukulungule kubanga kala.
Kumpala kua’shi bikitshikie, naadi mukite bia’shi opushe bianka,
Bua’shi tuakulanga’shi: ‘Nkishi ande nyi mukite bino;
Nkishi ande na nkishi ande a kilonda* nyi itume eyi bua’shi bino bikitshikie.’
6 We mupushe na kumona bino bioso.
Tuebiukisha su?
Kubanga binobino nkuete kukuukisha mianda ipia,
Mianda ifuame yoshouku.
7 Ikuete kupangibua nka binobino kadi kushi kubanga kala,
Mianda yoshopushishe kashaa na ku dino efuku,
Buashi tala wakula’shi: ‘Talayi! Nekeele mupue kuibiuka.’
8 Nya tobodi muibipushe na tobodi muibiukie,
Na mu mafuku a kala matui oobe abaadi ashikie.
Muanda nauku’shi we na bu nsesa bukile,
Na wemuitaminyibue bu nkitshishi a miluisho kubanga ku butandua.
9 Anka pa muanda w’eshina diande nakakanda sungu yande;
Pa muanda wa ntumbo yande nakekanda kodi,
Na ntankakuipaa.
10 Tala! Nemukulumbuule, kadi kushi bu kiamo kia arja.
Nemukutompe* mu nfuulo a dikienga asungulaa biamo.
11 Mbinyibinyi, pa muanda w’eshina diande nakakitshi bino,
Muanda mbikunyi biandi mulombene kutadiila eshina diande adisabuulua?
Ntampeyaa ungi muntu* ntumbo yande.
12 Nteemeshe, Ô Yakobo, na Isalele andi muitanyine.
Ne nka mumune. Ne akumpala; na ne a nfudiilo.
13 Eyasa diande nyi dishimikie kitako kia nsenga,
Na eyasa diande dibalume nyi diolole eyilu.
Panebitanyina, abimanaa pamune.
14 Ebungieyi pamune anue boso na nuteemeshe.
Nnanyi a kuabadi muukishe ino mianda?
Yehowa mmumufule.
Akalombasha kiakumiina pabitale Babilone,
Na mboko yaye ayikafiki bua kuluisha bena Kaldeya.
15 Ami nabene nyi muakule na nemumuitanyine.
Ne mumufuishe na mianda yaye ayikende kumpala.
16 Efubuileyi kuandi nupushe bino.
Kubanga ku mbangilo ntshi naadi muakule mu bufiefie
Naadi kuanka kubanga mafuku ababidi bikitshikie.”
Na binobino Muanana Mukile Bukata Yehowa mmumpe kikudi kiaye na antuma kuanudi.
17 Yehowa, mukuudi oobe, Eselele a Isalele bakula bino’shi:
“Ami Yehowa, ne Efile Mukulu oobe,
Yawa kuete akulongiesha bua buwa bobe,
Yawa kuete akukunkusha muishinda diodia kutambukila.
18 Su bodia kutee matui ku miiya yande!
Paapa butaale bobe bubadia kuikala nka bu muela
Na kululama kobe nka bu mbundambunda ya kalunga ka mema.
19 Lutandua* lobe na bana bobe babaadia kuikala bungi nka bu lusenga.
Eshina diabo tadibadia kushimina sunga kukatushua kumpala kuande.”
20 Tuukayi mu Babilone!
Sukayi bena Kaldeya!
Ebiukisheyi na misaase ya muloo! Ebiakuleyi!
Ebiukisheyi mpa na ku nfudiilo kua nsenga.
Akulayi’shi: “Yehowa bakuula mufubi aaye Yakobo.
21 Tababaadi bapushe nyota pabaadi ebakunkusha mu ma mbalo aume.
Baadi muibatuushishe mema mu lubuebue;
Baadi mutanye lubuebue na akita biashi mema atuukie e bungi.”
22 Yehowa akula’shi: “Takui butaale bua bantu bebubi.”