MUKANDA WA KABIDI KUI BENA KODINDA

1 Ami Mpoolo mutumibua a Nkidishitu Yesu, ku bukuashi bua kikiebe ki’eshimba di’Efile Mukulu, na mukuetu Timote, kui kakongie k’Efile Mukulu ke mu Kodinda, mpa na kui basantu boso be mu Akayi mushima:

2 Kalolo na butaale abifiki kui Efile Mukulu Nshetu, na Muanana Yesu Nkidishitu bikale nenu.

3 Efile Mukulu, Nshaye na Nfumuetu Yesu Nkidishitu atumbishibue, Yaya sha lusa n’Efile Mukulu a busambi boso, 4 etusambaa* mu mpombo* yetu yoso, bua’shi tumone bia kusamba bangi mu mpombo ya mishindo yoso, na kusambibua kuatupete kui Efile Mukulu. 5 Muanda nka bu bi’atukiengie ngofu pa muanda wa Nkidishitu, atupete namu kusambibua kui bungi kukatukila kui Nkidishitu. 6 Binobino su atufumankana na mpombo, mbua kusambibua na kupaashibua kuenu; na su atue atusambibua, mbua kuinusamba, muanda abinukuasha bua kunyingiila makienga e mumune na atukuete kunyingiila. 7 Na tui na lukulupilo luibukopo pa muanda wenu, muanda atuuku’shi bu bianukuete kukienga pamune netu, anukasambibua namu pamune netu.

8 Muanda bakuetu, t’atukumiina nukutue kuuka makienga atubaadi bakapete mu provinse a Azi. Tubaadi bapete lukalakashi luibukopo luitukile bukome, mu mushindo wa’shi tatubaadi bakulupile dingi’shi atushala na muwa. 9 Mu binyibinyi, tubaadi bapushe nka bu’shi tubaadi bapete kibawe kia lufu. Bino bibaadi bikitshikie bua’shi tatuikulupilanga atue banabene, anka tukulupile Efile Mukulu abushaa bafue. 10 Baadi muitupaashe ku aa masaku akata a lufu, na aketupaasha dingi, na tuibakulupile’shi atungunuka na kuitupaasha. 11 Na’nue namu nui kuitukuasha pakutekanga bua muanda wetu, bua’shi bantu be bungi batumbule Efile Mukulu bua muanda wetu, bua muabi watudi bapete p’aye kualula nteko ya bebungi.

12 Muanda w’atuitumbisha nao wi bino: Kondo ketu k’eshimba akashinkamisha’shi, tui bakite mianda pa nsenga, bikishekishe kuanudi, na kululama na binyibinyi bi’Efile Mukulu, kushi na binangu bia ku mbidi, anka na kalolo k’Efile Mukulu. 13 Muanda tatui benufundile ingi mianda, kukaasha yaaya yanudia kubadika* na kupusha, na nakulupila’shi anutungunuka na kupusha ino mianda kalolo, 14 nka bu bianudi bapushe’shi mu mushindo kampanda nui na kabingilo ka kuitumbisha pa muanda wetu, n’atue namu atuketumbisha pa muanda wenu muifuku dia Nfumuetu Yesu.

15 Na kuno kushinkamisha, naadi nakumiina kufika kuanudi kumpala, bua’shi nupete mushindo wa kuikala na muloo bua musango wa kabidi;* 16 muanda nakumiina kuinumona pankekala mu luendo lua ku Maseduane, na kufika dingi kuanudi ami t’aaluka ku Maseduane na bua’shi kunyima nunshindikile panyende ku Yudeya. 17 Pangikalanga na kino kinangu, naadi muate uno muanda na muulo upeela su? Su naadi mupuandikishe bua kukita uno muanda na binangu bia ku mbidi pa’mi kuamba’shi, “Oolo, oolo,” akupu kapindi’shi “Nya, nya”? 18 Muanda Efile Mukulu nga kukulupila mu mushindo watushi balombene kuamba’shi “oolo” akupu’shi “nya.” 19 Muanda Muan’Efile Mukulu Yesu Nkidishitu, abaatudi benulambukishe, kuamba’shi ami na Silvanuse* na Timote, nta muikale “oolo” akupu kunyima afika “nya,” anka mu muanda waye, “oolo” mufikie nka “oolo.” 20 Muanda sunga milayilo y’Efile Mukulu yekala i bungi, yoso ngifikie nka “oolo” ku bukuashi bua Yesu. Biabia, ku bukuashi buaye nyi kuabele “Amene” kui Efile Mukulu, na bino abitumbisha Efile Mukulu ku bukuashi buetu. 21 Kadi yawa ashinkamisha’shi anue n’atue tui bantu ba Nkidishitu, na yawa muituele muimu, nyi Efile Mukulu. 22 Baadi dingi muituele kitampi na muitupe kitunduilo kia mianda ayikafiki mu mashimba etu, kuamba’shi kikudi.

23 Binobino n’etshipi na naata Efile Mukulu bu kamonyi’shi, mbua kuinukaluila bua nshi mubande kufika ku Kodinda. 24 Ta nkuamba’shi tui na matalua ku lukumiino luenu, kadi tukuete kufuba nenu pamune bua muloo wenu, muanda nuibemane ku bukuashi bua lukumiino luenu.

2 Muanda ne muate kitshibilo kia kupela kufika dingi kuanudi na kinyongua. 2 Muanda su nenuinyongosha, nnanyi mulombene kunkasha kinyongua, kukaasha nka yawa anaadi muinyongoshe? 3 Ne mufunde ino mianda bua’shi nsaa yanfiki, tabampanga kinyongua kui baaba balombene kumpa muloo, muanda ne mushinkamishe’shi kiakia akinsankisha, akinusankisha namu na’nue boso. 4 Muanda mu dikienga dikata na kenyongoshi muishimba, nyi muandi muinufundile na mpolo ibungi ku meso, ta mbua’shi nuinyongole nya, kadi mbua’shi nuiukie bukata bua kifulo kiandi nakio buenu.

5 Binobino, su muntu afuisha kinyongua, ta nka penda’mi enyongosha nya, kadi enuinyongosha anue boso mu mushindo kampanda—nakula biabia bua kupela kuikala na mianda i bukopo. 6 Dinyoka diabadi batuushe kui bantu bebungi, ndilombane bua yawa muntu; 7 binobino abitungu numufuile lusa na kalolo koso na kumunyingisha bua’shi tekalanga na kenyongoshi kakile bukata. 8 Biabia, nenutekie bua kumushinkamiisha’shi nuibamufule. 9 Nyi buakinyi naadi muinufundile dingi bua kumona’shi anukookiela mu mianda yoso. 10 Su nubafuila muntu lusa bua muanda kampanda, ami namu namufuila lusa. Kutala, yawa ankumiina kufuila lusa (su nafuila muntu lusa bua muanda kampanda) mbua buwa buenu kumpala kua Nkidishitu, 11 bua’shi Satana tamonanga bia kuitudimba,* muanda tatui balube mayele* aye.

12 Biabia panandi mufikie ku Trowase bua kulungula mukandu wibuwa pabitale Nkidishitu, kiibi kibaadi kinkanguilue mu Muanana, 13 ntshinaadi mupete kuikisha mu binangu biande bu bia’nshi mupete mukuetu Tite. Biabia ami nkuibalaa, na nkuenda ku Maseduane.

14 Anka atutumbula Efile Mukulu, aye kuete kuitukunkusha nsaa yoso mu luendo luetu lua kutshimuna pamune na Nkidishitu, na kukiila kuatudi, apalakasha mapembue a kiukilo kiaye mu ma mbalo oso! 15 Muanda bu’Efile Mukulu, tui malashi a Nkidishitu aatusha mapembue ebuwa munkatshi mua baaba abakapaashibua, na munkatshi mua baaba abakabutulua; 16 kui baaba abakabutulua, tui mapembue a lufu aatuala ku lufu, kui baaba abakapaashibua, tui mapembue a muwa aatuala ku muwa. Nnanyi mukumbene ino mianda binyibinyi? 17 Atue tuibeyikumbene, muanda tatukuete kukita busunga n’eyi di’Efile Mukulu bu abikitshi bantu bebungi, anka tukuete kuakula na kululama koso bu bantu batumibue n’Efile Mukulu, oolo, ku meso ku’Efile Mukulu na pamune na Nkidishitu.

3 Tubabanga dingi kuilubula atue banabene su? Su nka bu bangi bantu tukuete kukimba mikanda ya kuilubula nayo kuanudi, sunga ayifiki kuanudi? 2 Anue banabene nuibekale mukanda wetu, ufundue mu mashimba etu, aukibua na wababadika kui bantu boso. 3 Muanda abimueka patooka’shi nui mukanda wa Nkidishitu watudi bafunde atue bafubi baye, wabashi bafunde na mema a mukanda, kadi na kikudi ki’Efile Mukulu e na muwa, ushi ufundibue pa mabue, anka ngufundibue mu mashimba.

4 Tui na kuno kushinkamisha kui Efile Mukulu ku bukuashi bua Nkidishitu. 5 T’atuamba’shi tui na ngobesha ya kukita uno mufubo* muutue banabene, kadi ngobesha yetu ayifiki kui Efile Mukulu, 6 aye muituikashe binyibinyi balombane bu bafubi ba kilombeno kipia, kishi kia miiya ifundibue, anka kia kikudi; muanda miiya ifundibue ayitshibila bantu kibawe kia lufu, kadi kikudi akipa bantu muwa.

7 Binobino su muiya autuala ku lufu na ubaabadi bafunde pa mabue, ubafikile na ntumbo ikata i biabia mu kipaso kishibaadi bena Isalele bia kutala mpala ya Moyise, muanda wa ntumbo ya mpala yaye, inyi ntumbo ibaadi na kia kushimina, 8 buakinyi mufubo wa kikudi ta wa kuikala na ntumbo ikile bukata? 9 Muanda su muiya aupiisha bantu ubaadi na ntumbo i biabia, mufubo aufuisha bululame awikala na ntumbo ikile bukata! 10 Eyendo, kiakia kibaadi na ntumbo kala, babaadi bekikatushe yanka muanda wa ntumbo ikikile. 11 Muanda su kiakia kibaadi na kia kushimina kibaadi kifikie na ntumbo, kiakia akishala akikala na ntumbo ikile bukata!

12 Bu biatudi na luno lukulupilo, atuakula n’eshimba dinyingie, 13 na tatukitshi bibaadi abikitshi Moyise pabaadi abuikila kilamba ku mpala yaye, bua’shi bena Isalele tabashimikanga meso aabo mpa na ku nfudiilo kua kiakia kibaadi na kia kushimina. 14 Anka binangu biabo bibaadi bibuikilue. Muanda mpa na binobino, pababadika kilombeno kia kala, kiakia kilamba nkishale kushi kukatushua, muanda abekikatusha nka ku bukuashi bua Nkidishitu. 15 Mu binyibinyi, nsaa yoso y’ababadika bifundue bia Moyise mpa na binobino, kiakia kilamba nkibuikile mashimba aabo. 16 Anka nsaa i muntu afiki kui Yehowa, kilamba akikatuka. 17 Biabia Yehowa Nkikudi, na mbalo i kikudi kia Yehowa, i bulungantu. 18 Na’tue boso patushi na mpala ibuikile, atulesha ntumbo ya Yehowa nka bu mmueno, na abetushintuula mu kifuanyi kimune akilesha binyibinyi yaaya ntumbo, nka bu abikitshi Yehowa aye muikale Kikudi.*

4 Nyi buakinyi, bu biatudi na uno mufubo* ku bukuashi bua lusa luabadi betuleshe, t’atukooko nya. 2 Anka tui balekie mianda ya buufu y’abakitaa mu bufiefie, na tatukuete kutambuka na bulamalama sunga kuluisha eyi di’Efile Mukulu; anka pa kulesha bia binyibinyi patooka, atufiki kileshesho ki buwa kui muntu* oso kumpala ku’Efile Mukulu. 3 Mu binyibinyi, su mukandu wibuwa wa tukuete kulungula ngubuikilue kilamba, ngubuikilue munkatshi mua bantu bakuete kushimina, 4 mui efile a uno ndumbuluilo, mmubuikile binangu bia bantu bashi bena kukumiina, bua’shi etaata dia mukandu wibuwa wa ntumbo pabitale Nkidishitu, muikale kifuanyi ki’Efile Mukulu, tadimunyikanga munkatshi muabo. 5 Muanda ta tukuete kulungula pabitale mianda itutale atue banabene, kadi mpabitale Yesu Nkidishitu bu Nfumu, n’atue banabene bu ba mpika benu bua muanda wa Yesu. 6 Muanda Efile Mukulu nyi baadi muakule’shi: “Etaata dimunyikie mu mufito,” na mmumunyikie mu mashimba etu bua kuiatoosha na kiukilo kia ntumbo yaye, ku bukuashi bua mpala ya Nkidishitu.

7 Anka tui na dino ebue dia muulo* mu bipulu bia nsenga,* bua’shi bukome bukile bua mafuku oso* buikale bu’Efile Mukulu, tabuikalanga abukatukila kuatudi. 8 Tui bafinuakashe mu mpese yoso, kadi kushi mu mushindo wa kukutua kusanasana; tui bakalakashue mu mashimba, kadi tatui bakutue lukulupilo; 9 bakuete kuitukiengiesha, anka tambetusumbushene; mbetuponeshe mu nsenga, anka ta mbetuipee nya. 10 Misango yoso tukuete kunyingiila mu mbidi yetu dikienga dia lufu, dibabadi bakiengieshe nadio Yesu, bua’shi muwa wa Yesu uleshibue namu mu mbidi yetu. 11 Muanda atue be na muwa, tukuete kufumankana misango yoso na lufu mpala na mpala pa muanda wa Yesu, bua’shi muwa wa Yesu uleshibue namu dingi mu mbidi yetu. 12 Biabia lufu alukitshi mufubo muatudi, muwa namu muanudi anue.

13 Binobino, bu biatudi na kikudi ki mumune kia lukumiino bu luno luabadi bafunde’shi: “Naadi muleshe lukumiino, nyi buakinyi naadi muakule”; atue namu tukuete kulesha lukumiino, nyi buakinyi tukuete kuakula, 14 Pa kuuka’shi Yawa baadi mubuushe Yesu ku lufu, aketubuusha namu pamune na Yesu na aketulubula pamune nenu. 15 Muanda ino mianda yoso i kuanka buenu, bua’shi kalolo k’Efile Mukulu* kanyishe kufuima, muanda bebungi bakuete kutumbula bua ntumbo y’Efile Mukulu.

16 Nyi buakinyi, t’atukooko, kadi sunga bumuntu buetu bua paasha bualuila, bumuntu buetu bua munda abulumbuulua kuifuku n’efuku. 17 Muanda sunga biekala’shi makienga nga kapindi kapeela na ngapelepele, aetufuishila ntumbo ikata ya kukaanya na ya loso; 18 na atushimika meso etu, kushi ku bintu abimueneka, anka ku bintu bish’abimueneka. Muanda bintu abimueneka mbia kapindi kapeela, anka biabia bish’abimueneka mbia loso.

5 Muanda atuuku’shi su nshibo yetu ya pa nsenga, ino nshibo y’epema yapona,* tui na kia kupeta nshibo ya ikalayika kui Efile Mukulu muiyilu, nshibo yabashi bakite na maasa. 2 Muanda mu ino nshibo ya pa nsenga, tukuete kukienga na tui na lukalo lukata lua kufuala yaaya nshibo yetu ayifiki muiyilu, 3 bua’shi patuiyifuala, tatuikalanga dingi musua. 4 Mu binyibinyi, atue boso be mu ino nshibo y’epema tukuete kukienga na kufuambuka, muanda t’atukumiina kufuula ino yatudi nayo, kadi atukumiina kufuala ingi, bua’shi kiakia akifuiyaa bekipiane kui muwa. 5 Anka baadi muitulumbuule bua uno muanda nyi Efile Mukulu, baadi muitupe kikudi bu kitunduilo kia mianda ayikafiki.

6 Biabia misango yoso tui n’eshimba dinyingie na atuuku’shi, patuki nka mu ino mbidi, tui kula na Muanana, 7 muanda tukuete kutambuka ku bukuashi bua lukumiino, kushi ku bi’atumono na meso. 8 Anka tui n’eshimba dinyingie na atukumiina kuikala kula na mbidi bua kukashala pamune na Muanana. 9 Biabia sunga tuashala naye, sunga tuekala naye kula, atuitatshisha bua’shi etukumiine. 10 Muanda abitungu’shi atue boso tuimane* kumpala kua kiimu kia Nkidishitu, bua’shi muntu oso apete efuto muyile mianda ibaadi akitshi pabaadi mu mbidi, biayikala’shi ibaadi buwa sunga bubi.

11 Nyi buakinyi bu bi’atuuku’shi abitungu kutshina Muanana, atutungunuka na kukuminyisha bantu, kadi atuukibua kalolo kui Efile Mukulu. Biabia ne mushinkamishe dingi’shi atuukibua kalolo na kondo kenu k’eshimba. 12 T’atuilubula dingi kuanudi nya, kadi atuinupa mushindo wanudia kuitumbisha pa muanda wetu, bua’shi numone bia kualula baaba abetumbisha bua abimueneka ku meso, kushi bua bi muishimba. 13 Muanda su tubaadi bashimishe binangu, mbu’Efile Mukulu, su tui na binangu bilombane, mbuenu’nue. 14 Muanda kifulo kia Nkidishitu akitutakula*, muanda tuibafikie mu kushinkamisha’shi, muntu umune baadi mufue bua bantu boso; muanda bantu boso babaadi bafue. 15 Na baadi mufue bua bantu boso, bua’shi baaba be na muwa tabekalanga nao dingi buabo’bo banabene, anka bekale nao buaye’ye baadi muibafuile, na baadi mubuushibue ku lufu.

16 Biabia kubanga binobino, t’atuuku muntu su ngumune muyile mueneno a ku mbidi. Anka sunga biekalashi tubaadi baukie Nkidishitu muyile ku mbidi, binobino t’atumuuku’nyi mu wawa mushindo. 17 Nyi buakinyi su muntu kampanda e mu kipuano na Nkidishitu, yawa muntu nkipangua kipia. Bintu bia kala bibapu kukila; talayi! bintu bipia tabidi kuanka. 18 Anka bintu bioso abifiki kui Efile Mukulu, muitukuashe bua kualuka naye mu kipuano ku bukuashi bua Nkidishitu na muitupe mufubo wa kukuasha bantu bua’shi baalukie naye mu kipuano, 19 nkuamba’shi, ku bukuashi bua Nkidishitu, Efile Mukulu baadi eyalusha na ba pa nsenga mu kipuano, kushi kuibabadikila miluisho yabo, na baadi muitupe mukandu aukuasha bantu bua kualukiila naye mu kipuano.

20 Biabia, tui bantu abalesha mpala ya Nkidishitu, nka bu’shi Efile Mukulu ayitanyinanga bantu ku bukuashi bu’etu. Bu biatudi pa mbalo ya Nkidishitu atuinusendeela’shi: “Alukayi mu kipuano n’Efile Mukulu.” 21 Muntu shibaadi muukie muluisho, Efile Mukulu mmumuikashe muluisho* pa muanda wetu, bua’shi tufikie kululama ku’Efile Mukulu ku bukuashi buaye.

6 Bu bi’atufubu pamune naye, atuinusendeela bua kupela kukumiina kalolo k’Efile Mukulu,* na kukutua kepatshila kaako. 2 Muanda amba’shi: “Mu kipungo kilombane naadi mukupushishe, na muifuku dia kipandilo naadi mukukuashe.” Talayi! Kino nyi kipungo kilombane. Talayi! Dino nyi efuku dia kipandilo.

3 Mu mushindo su ngumune, tatukokosha muntu, bua’shi tala baakula bibubi pabitale mufubo* wetu; 4 anka mu mianda yoso, atuilesha bu bafubi b’Efile Mukulu, mu kunyingiila mianda ibungi, mu dikienga, mu kipungo kia kukutua bintu, mu nkalakashi, 5 mu kukupilua, mu kuedibua mu nkano, mu kafutakanyi, mu kukitshishua mifubo ibukopo, mu kukutua tulo bufuku, mu bipungo bia kukutua bidibua; 6 mu buiselele, mu kiukilo, mu luishinko, mu kalolo, mu kikudi kiselele, mu kifulo kishi na bu nsesa, 7 mu mayi a kukulupila, mu bukome bu’Efile Mukulu, ku bukuashi bua bina ngoshi bia kululama bi muiyasa dibalume na bi muiyasa dibakashi, 8 mu kutumbishibua, na mu kusabuulua, mu kuitupalakeesha nkumo ibubi na nkumo ibuwa. Abetuata bu basha madimi aku namu atuakulaa bia binyibinyi, 9 bu bantu bashi baukibue, aku atuukibua kalolo, bu batabadi pa kufua* aku namu tui na muwa, bu banyokibue, aku namu ta mbetulambule ku lufu, 10 bu be na kinyongua aku tui na muloo nsaa yoso, bu balanda aku namu atuikasha bantu bebungi ba mpeta, bu bashi na kintu, aku tui na bioso.

11 Tui babuule mukanua muetu bua kuisamba* nenu, anue bena Kodinda, na tuibafungule mashimba etu ngofu. 12 Tatui bapeeleshe* kifulo kietu kuanudi, anka anue nyi bapeeleshe kifulo kienu kuatudi. 13 Biabia, nakula bu alungula bana bande’shi, anue namu fungulayi mashimba enu bikata.

14 Lekayi kuikala mu kipuano ki bukopo na bantu bashi bena kukumiina. Muanda, nkuipushena kinyi kui pankatshi pa kululama na kuipaa kua miiya? Na nkuipushena kinyi kui pankatshi p’etaata na mufito? 15 Dingi, nkipuano kinyi ki pankatshi pa Nkidishitu na Beliale?* Muina kukumiina* ekuikala mu kipuano kinyi na shi muina kukumiina? 16 Na nkuipushena kinyi kui pankatshi pa ntempelo a Efile Mukulu, na ma nkishi? Muanda atue, tui ntempelo a Efile Mukulu e na muwa; nka bu bibaadi Efile Mukulu muambe’shi: “Nakashala munkatshi muabo, na nakatambuka munkatshi muabo, nakekala Efile Mukulu abo, n’abo namu abakekala bantu bande.” 17 “Nyi buakinyi Yehowa amba’shi, ‘tukayi munkatshi muabo, elamuneyi kuabadi, tanukumanga kintu ki butete, na nakenukuukila.’” 18 “‘Na nakekala nshenu, anue anukekala bana bande balume na bana bande bakashi.’ Bino nyi abiamba Yehowa Sha bukome boso.”

7 Biabia bakuetu, bu biatudi na ino milayilo, tuitoosheyi ku mianda yoso ayiluisha mbidi na kikudi, bua’shi tunyishe kuikala ba kishila mu kutshina ku’Efile Mukulu.

2 Kitayi bia’shi tuikale na mbalo mu mashimba enu. Tatui bakitshine muntu kilubilo, tatui baluishishe muntu su ngumune, tatui badie kintu kia muntu su ngumune. 3 Tangakula bino bua kuinutopeka nya. Muanda nemupue kuamba’shi nui mu mashimba etu bua kufua pamune na bua kuikala na muwa pamune. 4 Nakula nenu na kushinkamisha kukata. Netumbisha ngofu pa muanda wenu. Ne musambibue bikata; na, ne na muloo wibungi mu makienga etu oso.

5 Mu binyibinyi, pabatufikile ku Maseduane, mbidi yetu tayibaadi iikishe su nkapeela, kadi tubatungunukile na kukiengieshibua mu mishindo yoso—kubaadi ngoshi paasha, kutshina munda. 6 Anka Efile Mukulu asambaa babofule, mmuitusambe pa kuikala kua Tite netu; 7 na t’anka pa kuikala kuaye netu nya, mpa na dingi ku bukuashi bua kusambibua kubaadi mupete pa muanda wenu, pabaadi muitulondele bibaanudi na lukalo lukata lua kummona dingi, kenyongoshi kenu ke bukopo, na bibaanudi anuikalakasha bikata buande; biabia naadi musankie ngofu

8 Muanda sunga binaadi muinuinyongoshe mu mukanda wande unaadi muinufundile, biabia tabimpa kinyongua nya. Sunga binaadi muinyongole kumpala (muanda wawa mukanda ubaadi winuinyongoshe, anka bibaadi nka bua kapindi kapeela), 9 Binobino ne na muloo, kushi pa muanda wa’shi nubaadi benyongole, anka pa muanda wa’shi kuinyongola kuenu kubaadi kuinukuashe bua kuilanga. Muanda nubaadi benyongole mu mushindo ubaadi usankishe Efile Mukulu, bua’shi muanda wibubi su ngumune tawinufikilanga pa muanda wetu. 10 Muanda kuinyongola mu mushindo ausankisha Efile Mukulu, akutuala mu kuilanga, kuakua kuilanga akutuala ku kipandilo, na muntu t’ashala kuete kuitopeka; anka kuinyongola kua pa nsenga akutuala ku lufu. 11 Biabia talayi bi kuinyongola mu mushindo ausankisha Efile Mukulu biakudi kutuushe kisumi ki bukopo muanudi, oolo, kulesha bianushi na muanda, oolo, kenyongoshi, oolo, kutshina, oolo, lukalo luibukopo, oolo, kisumi, oolo, kulumbuula kilubilo! Mu mishindo yoso nubelesha’shi nuibatooshibue* ku uno muanda. 12 Su naadi muinufundile, ta bibaadi bua yawa baadi mukite bubi, sunga bua yawa ababaadi baluishishe, kadi mbua’shi kisumi kienu kimone bia kuilesha patooka munkatshi muenu pa muanda wetu kumpala ku’Efile Mukulu. 13 Nyi buakinyi tubaadi banyingishibue.

Anka tatubaadi penda banyingishibue nya, tubaadi dingi basankie pa kumona muloo wa Tite, muanda anue boso nubadi bamunyingishe. 14 Muanda su naadi muitumbishe kuadi pa muanda wenu, ntshi mukuatshibue na buufu; kadi nka bu bikale’shi mianda yoso ibatudi benulungule ngi’eyendo, biabia kuitumbisha kuetu kui Tite kubaadi ku’eyendo. 15 Dingi kifulo kiadi nakio buenu nkikata pa kuete kutentekiesha kukookiela kuenu boso, mushindo ubanudi bamukuukile na kutshina na kusuusa. 16 Ne na muloo muanda mu mianda yoso ne mulombene kuinukulupila.

8 Binobino bakuetu, atukumiina nuukie bua kalolo k’Efile Mukulu kabaadi muleshe tukongie tua mu Maseduane. 2 Mu kipungo kibaabadi mu kutompibua na mu dikienga dikata, babaadi batuushe bintu na muloo oso sunga mbibaabadi balanda, na bino bibaadi bileshe’shi be na kalolo kakata. 3 Muanda babaadi batushe muyile mushindo ubaabadi nao, eyendo nashinkamisha’shi kukila mpa na bibaabadi nabio, 4 muyile mpango ibaabadi baate abo banabene, babaadi abatungunuka na kuitusendeela bua kupeta kinemo kia kutuusha bintu biabo na kalolo koso, bua kukuatshishena mufubo* wa kukuasha beselele. 5 Tababaadi batushe penda biabia bibaatudi atukulupila, anka kia kumpala abaadi bepaane abo banabene kui Muanana na kuatudi ku bukuashi bua kikiebe ki’eshimba di’Efile Mukulu. 6 Nyi buakinyi tubaadi batume Tite bua kuenda mu kukongola bia buntu bienu bibaanudi batushe na kalolo koso, muanda nnaye baadi mubangie wawa mufubo munkatshi muenu. 7 Anka, bu bibaanudi ba mpeta mu mianda yoso, mu lukumiino, mu ngakuilo, mu kiukilo, mu kisumi kioso na mu kifulo kietu kuanudi, nuikale dingi ba mpeta mu uno mufubo wa kutuusha bintu w’anukitshi na kalolo koso.

8 Tangakula bino bua kuinukitshisha mianda, anka bua kuinulesha bi kisumi kia bangi na bua kumona bi bukata bua kifulo kienu. 9 Muanda anuuku kalolo ka Nfumuetu Yesu Nkidishitu’shi, sunga mbibaadi mpeta, bafikile mulanda bua muanda wenu, bua’shi nufikie ba mpeta ku bulanda buaye.

10 Mu uno muanda ami napuandikisha’shi: Mbua buwa buenu, muanda kasha nuabanga uno mufubo takudi kipua kishima, na dingi nuibaleshe lukalo luenu lua kuiulombasha. 11 Biabia, pudishayi kibanubangile, bua’shi lukalo luenu lulombane muyile bintu bianudi nabio. 12 Muanda su kia kumpala muntu e na lukalo lua kutuusha, bi buwa bua’shi atuushe muyile biadi nabio, kushi muyile biashi nabio. 13 Muanda tankumiina’shi bikale bibofule kui bangi bantu, kadi bikale bukopo kuanudi; 14 bua’shi kuikale nkatshinkatshi, biabia bisubukie kuanudi bilombashe nkalo yabo, bua’shi biabia bisubukie kuabadi namu bilombashe nkalo yenu, biabia akuikala nkatshinkatshi. 15 Nka bu biabidi bifundibue’shi: “Muntu baadi na bi bungi tabaadi na bikile bungi, na muntu baadi na bipeela, tabaadi na bikile bupeela.”

16 Binobino atutumbula Efile Mukulu p’aye kuela muishimba dia Tite kisumi bu kiakia kiatudi nakio pa muanda wenu, 17 muanda mmukumiine binyibinyi kunyingishibua, na bu biadi na kisumi ki bungi, kuete kufika kuakua kuanudi mu’ye nabene. 18 Anka atumutumu na ungi mukuetu e na nkumo ibuwa ipalakane mu tukongie toso pa muanda wa mukandu wibuwa. 19 Kushi penda biabia nya, kadi babamusanguile dingi kui tukongie buadia kuikala etushindikila mu nyendo, p’atuende na kutuusha kino kia buntu kia kalolo bua ntumbo ya Muanana na bua kushinkamisha lukalo luetu lukata lua kukuasha. 20 Biabia tukuete kukita bia’shi muntu su ngumune t’etutopekanga pabitale bino bia buntu bia kalolo biatukuete kukunkusha. 21 Muanda ‘tukuete kukita mianda yoso na kululama, kushi penda ku meso kua Yehowa kadi mpa na ku meso kua bantu.’

22 Dingi, tukuete kuibatuma na ungi mukuetu atudi batompe misango i bungi na tuasangana’shi e na katshintshi mu mianda i bungi, anka binobino banyisha kuikala na kishima, muanda mmuinukulupile bikata. 23 Su kuekala lukonko pabitale Tite, nyi mmuina mufubo nami atumika bua buwa buenu; na su kuekala nkonko pabitale bakuetu, nyi mbatumibua ba tukongie na abatumbisha Nkidishitu. 24 Biabia, ebashinkamiisheyi’shi nui bebafule, na kulesha tukongie buakinyi tukuete kuitumbisha pa muanda wenu.

9 Binobino, pabitale mufubo* wa kukuasha beselele, ta mbikambe kuikala nka na muulo buandia kuinufundila nya, 2 muanda nauku’shi nui na mashimba e buwa, na nkuete kuitumbisha kui bena Maseduane’shi, bena Akayi mbapue kuilumbuula takudi kipua kishima, na kisumi kienu nkinyingishe be bungi ba kuabadi. 3 Kadi natumu bakuetu bua’shi kuitumbisha kuetu pa muanda wenu takuikalanga kua bisumanga mu uno muanda, bua’shi nuikale binyibinyi belumbuule anka bu biandi mupue kuakula’shi anuilumbuula. 4 Bisumanga, su bena Maseduane bafika nami, na basangana’shi tanui belumbuule, atue—mpa na anue namu—atuikala na buufu muanda tui benukulupile. 5 Biabia nanangushena’shi bi na muulo bua kunyingisha bakuetu buabadia kufika kuanudi kumpala kua nsaa, bua’shi babadiile kulumbuula bia buntu bienu bibanudi balee, bua’shi bino bintu bikale bilumbulue bu bia buntu bia kalolo, kushi bu bintu biabadi banyengie.

6 Anka mu uno muanda, yawa akunu bipeela akaumbula namu bipeela, na yawa akunu bi bungi akaumbula namu bi bungi. 7 Biabia muntu oso akite nka bu biadi mulumbuule muishimba diaye, kushi na kuiyalashena sunga bu abakitshisha pa bukopo, muanda Efile Mukulu mmufule muntu atuusha na muloo.

8 Dingi, Efile Mukulu mmulombene kufuimisha kalolo kaye koso kuanudi, bua’shi misango yoso nuikale nka na bintu bioso bua kulombasha nkalo yenu, na bua’shi nuikale nka na bioso abitungu bua kulombasha mufubo oso wibuwa. 9 (Nka bu biabidi bifundibue’shi: “Mmuabile bintu na kalolo koso, na mmupe balanda bintu. Kululama kuaye akutungunuka bua loso.” 10 Binobino Yawa apeyaa kidime mbio i bungi, na Yawa apeyaa bantu bidiibua, akenupa na kufuimisha mbio yenu, na akenukuasha bua kutuusha bipeta bibuwa mu mifubo* yenu ya kululama.) 11 Benuikasha ba mpeta mu mianda yoso, bua’shi nuleshe kalolo mu mishindo yoso. Ku bukuashi buetu, kaaka kalolo akatakula bantu bua kutumbula Efile Mukulu; 12 muanda uno mufubo* t’aukuasha penda bua kulombasha nkalo ya beselele, kadi pa muanda wa uno mufubo, bantu be bungi abakatumbula Efile Mukulu bikata. 13 Ku bukuashi bua kishinkamisho akitusha uno mufubo wa kukuasha, abatumbisha Efile Mukulu muanda nukuete kukookiela ku mukandu wibuwa utale Nkidishitu, nka bu bibaanudi bakule patooka na pa muanda wa bia buntu bienu bia kalolo kuabadi na kui bantu boso. 14 Na bu biabeyayila Efile Mukulu pa muanda wenu, abenulesha kifulo muanda wa kalolo k’Efile Mukulu kakile bukata ke kuanudi.

15 Atutumbula Efile Mukulu muanda wa kia buntu kiaye kikile bukata.

10 Binobino ami Mpoolo nenusendeela muyile kupopeela na kalolo ka Nkidishitu, sunga mbiamueneka bu mubofule pandi nenu mpala na mpala, kadi panshi nenu ne munyingie. 2 Nenutekie’shi pangikala nenu, tanukitanga bia’shi neleeshe bu’mi e n’eshimba dinyingie na kuata bitshibilo bi bukopo bianangushena bua baaba abetumono’shi tui na nshalelo a ku mbidi. 3 Sunga biekala’shi tui bantu*, t’atuluiyaa ngoshi muyile biatudi ku mbidi nya. 4 Muanda bina ngoshi biatukuete kulua nabio ta mbia ku mbidi, anka mbinyingishibue n’Efile Mukulu bua kuponesha makome.* 5 Muanda tukuete kuponesha ngielelo a binangu na bikokoshi bioso bikutuene na kiukilo ki’Efile Mukulu, na atutonto binangu bioso buatudia kuibifikisha mu kukookiela Nkidishitu; 6 na tuibelumbuule bua kunyoka muntu oso apele kukookiela, mpa na panukalesha’shi nukuete kukookiela mu mianda yoso.

7 Nukuete kumona mianda muyile biayimueneka ku meso. Su muntu mmushinkamishe’ye nabene’shi nga Nkidishitu, anangushene dingi ku uno muanda: Nka bu biadi’ye nga Nkidishitu, atue namu tui bantu ba Nkidishitu. 8 Muanda sunga biandi na kia kuitumbisha kapeela pabitale matalua abadi betupe kui Muanana bua kuinunyingisha, kushi bua kuinubofusha, tankuatshika buufu nya. 9 Muanda tankumiina kumueneka bu’mi akimbi kuinutshinyisha na mikanda yande nya. 10 Muanda abamba’shi: “Mikanda yaye ayitakula mu kukookiela na i bukome, kadi aye nabene padi munkatshi muetu mmubofule, na ngakuilo aye te kintu.” 11 Muntu akula biabia aukie’shi, mianda y’atuakula mu mikanda patushi panka, nyi yatukakitshi patukekala panka. 12 Muanda t’atuituulu mu mulongo umune sunga kuipuandikisha na bangi bantu abetumbisha abo banabene. Kadi p’abepimi abo banabene na kuipuandikisha abo banabene, ta be na binangu nya.

13 Biabia, t’atuitumbisha kukila mu mikalo* yabadi betuelele, anka atuitumbisha penda munda mua mikalo yabadi betutshibile kui Efile Mukulu, yadi mufikishe mpa na kuanudi. 14 Mu binyibinyi, t’atutabuka mikalo yetu, bu’shi tatuabandile kufika kuanudi, muanda tubaadi ba kumpala kufika mpa na kuanudi na mukandu wibuwa pabitale Nkidishitu. 15 T’atuitumbisha kukila mu mikalo yetu pabitale mufubo wa ungi muntu, anka tuibakulupile’shi apatungunuka na kutama lukumiino luenu, mufubo* wibungi watudi bakite awende na kutama, munda mua mikalo yetu ya bulungudi. Yaaya nsaa atukakitshi mianda ikata kukila mpa na paapa, 16 p’atuende na kulungula mukandu wibuwa mpa na mu maumbo e kula nenu, bua’shi tatuitumbishanga mu biabadi bapue kukita mu kipindi kia ungi muntu. 17 “Kadi yawa etumbisha, etumbishe mui Yehowa.” 18 Muanda yawa mukuminyibue ta nguno etumbisha aye nabene, kadi ngiawa abatumbisha kui Yehowa.

11 Nakumiina’shi nundeshe luishinko kapeela mu kukita kuande kua mianda bu muntu shi na binangu. Mu binyibinyi, nukuete kuilundesha! 2 Muanda ne na mukao kuanudi, mukao aufiki kui Efile Mukulu,* muanda ami nabene ne mulee bua kuinuibakisha kui mulume umune, bua’shi nenulubule kui Nkidishitu bu mukashi kamame shi matope. 3 Kadi ne na moo wa’shi mu mushindo kampanda, nka bu bibaadi nyoka mudimbe Eva ku bulamalama buaye, tala binangu bienu bialuila na kuenda kula na binyibinyi na buiselele bikumbanyine Nkidishitu. 4 Muanda nka bu biabidi’shi, su ungi muntu afika na kuinulungula ungi Yesu kukatusha yawa atudi benulungule, sunga’shi nuapeta kingi kikudi kukatusha kiakia kibaanudi bapete, sunga mukandu wibuwa kukaasha wawa wanubaadi bakumiine, anulesha yawa muntu luishinko kushi lutato. 5 Muanda namono’shi ntshinaadi mushaadile kui batumibua benu banumono bu bakile buwa mu kantu su nkamune. 6 Kadi sunga biekala’shi ntshi na ngakuilo mupelepele, ntshi mukutue binyibinyi kiukilo nya; muanda tui benuleshe bianka mu mishindo yoso na mu mianda yoso.

7 Naadi na muloo wa kuinulungula mukandu wibuwa w’Efile Mukulu kushi kuinuteka kintu, biabia nakitshine muluisho p’ami kuiyisha ami nabene bua’shi anue nutumbishibue su? 8 Naadi mulekie tungi tukongie bisumanga* p’ami kuata bintu* biabo bua kuinukuasha. 9 Aku namu panaadi nenu, na panaadi na lukalo lua bintu, ntshi nafikile bu bushito kui muntu su ngumune a kuanudi, muanda bakuetu babaafikile ku Maseduane, babaadi balombashe nkalo yande yoso. Oolo, mu mishindo yoso ne muitatshishe bua kupela kuikala bu bushito kuanudi na natungunuka na kukita biabia. 10 Eyendo, bu bikale bia binyibinyi bia Nkidishitu muandi, tandekie kuno kuitumbisha mu bipindi bia nsenga bia Akayi. 11 Bua kabingilo kinyi? Muanda’shi ntshi muinufule su? Efile Mukulu auku’shi ne muinufule.

12 Anka bino bia nkuete kukita, natungunuka na kuibikita bua kukutshishua baaba abakimbi kabingilo ka kuikala mumune netu, mu mianda ya bakuete kuitumbisha nayo. 13 Muanda baaba bantu mbatumibua ba madimi, bafubi basha madimi, bakuete kuialula abo banabene bu batumibua ba Nkidishitu. 14 Na wawa ta muanda wa kukaanya, muanda Satana nabene atungunukaa na kuialula bu muikeyilu a etaata. 15 Biabia ta muanda wa kukaanya su bafubi baye namu abatungunuka na kuialula abo banabene bu bafubi ba kululama. Kadi nfudiilo abo akekala muyile bikitshino biabo.

16 Nangakula dingi’shi: Muntu su ngumune tanangushenanga’shi ne mukutue binangu. Kadi sunga nuanangushena biabia, nkumineyi bu muntu shi na binangu, bua’shi mmone bia kuitumbisha namu sunga nkapeela. 17 Bino biangakula binobino, ta nebiakula bu alondo kileshesho kia Muanana, kadi bu bilombene kuakula muntu mukutue binangu, ekulupila aye nabene na kuitumbisha. 18 Muanda be bungi bakuete kuitumbisha ku mbidi,* ami namu n’etumbisha. 19 Biabia, bu bianudi na “binangu bi bungi,” nukuete kulesha baaba bashi na binangu luishinko na muloo oso. 20 Mu binyibinyi, nukuete kulesha luishinko kui baaba abenutulu mu bupika, baaba abenudiila sunga kuata bintu bienu, baaba abekaamisha kuanudi, na kui baaba abenukupila mu mpala.

21 Nakula bino muanda abitukuatshisha buufu, muanda bi kumueneka bu’shi tubakitshine mianda mu kubofula.

Kadi su bangi abakitshi mianda n’eshimba dinyingie—nakula bu muntu mulotakane’shi—nami namu neyikitshi n’eshimba dinyingie. 22 Abo mbena Ebelu su? Nami namu ne muina Ebelu. Abo mbena Isalele su? Nami namu ne muina Isalele, mbekale bekulu ba Abalahama su? Nami namu ne muikulu a Abalahama. 23 Abo mbafubi ba Nkidishitu su? Naluula nka bu muntu e na mombe’shi, nami namu ne mufubi a Nkidishitu mu kipaso kia kukaanya: Ne mufube ngofu kuibakila, ne muedibue mu lukano misango i bungi, mbankupile misango i bungi, na dingi ne mupande lufu misango i bungi. 24 Misango itano mbankupile nfimbo 40 kukatusha lumune kui bena Yunda, 25 babankupiile mitshi misango isatu, musango umune naadi muashibue mabue, misango isatu naadi mupone mu mema na buato, naadi mukishe efuku dishima na bufuku bushima mu mema a kalunga; 26 misango i bungi mu nyendo yande, naadi mupete masaku pa muanda wa miela, masaku pa muanda wa ba ntomboshi, masaku kui bantu ba muilo wande, masaku kui bantu ba ingi miilo, masaku mu kibundi, masaku mu kabaaka, masaku pa kalunga, masaku munkatshi mua bakuetu ba madimi, 27 mu mufubo wi bukopo na mu makienga, mu kukutua tulo bufuku misango i bungi, mu nsala na nyota, mu kukutua bidiibua misango i bungi, mu mashika na mu kukutua kua bilamba.*

28 Kukatusha ino mianda yoso, kui muanda ukuete kunkalakasha kuishimba efuku n’efuku: Kenyongoshi bua tukongie toso. 29 Nnanyi mubofule kushi’mi kuikala mubofule? Nnanyi mukokoshue, kushi’mi kufiita munda?

30 Su abitungu’shi netumbishe, netumbisha bua bintu abilesha kubofula kuande. 31 Efile Mukulu, Nshaye na Nfumuetu Yesu, aye e na kia kutumbishibua bua looso, auku’shi ntshi kuete kudimba. 32 Ku Damase, guvernere baadi afubu ku bukunkushi bua nfumu Aletase baadi mulamishe kibundi kia Damase buabadia kunkuata, 33 anka babaadi bangishe mu kiseele kuididishi dibaadi ku mudimba wa kibundi, na ami nkupanda ku maasa kuaye.

12 Ne na kia kuitumbisha. Kadi ta bi na bukuashi, anka binobino nesambila bimonua bia kukaanya na bifumbulue bia Muanana. 2 Nauku muntu mu kuipushena na Nkidishitu takudi bipua 14, baadi mutuadibue mpa na muiyilu dia kasatu, su uno muntu baadi ku mbidi su nta nku mbidi, tanguku, kadi Efile Mukulu auku. 3 Eyendo, nauku muntu e biabia—su uno muntu baadi ku mbidi su ta ku mbidi, tanguku; kadi Efile Mukulu auku— 4 baadi mutuadibue mpa na mu mpaladiso, aye nkupusha mayi abashi balombene kuakula kui muntu na abashi bape muntu matalua a kuakula. 5 Naketumbisha bua muntu e biabia, kadi kushi buande’mi nabene anka su n’etumbisha pabitale kubofula kuande. 6 Anka sunga nakieba kuitumbisha, tangikala mukutue binangu nya, muanda nakula bia binyibinyi. Anka nampele kuibikita kupela kua’shi muntu su ngumune tampanga ntumbo ikile kiakia kiamono nankitshi na ki’apusha naakula, 7 penda muanda wa’shi ne mupete bino bifumbulue bia kukaanya.

Bua kumpelesha kuitatula, babaadi bangiele mulobo mu mbidi, muikeyilu a Satana, bua kutungunuka na kunkupila, bua’shi ntshimonanga bia kuitumbisha bikishekishe. 8 Naadi musendeele Muanana misango isatu pabitale uno muanda, bua’shi ankatushe uno mulobo. 9 Anka bandunguile’shi: “Kalolo kande nkakukumbene, muanda bukome buande bukuete kufika bupuidikie mu kubofula kobe.” Biabia n’etumbisha na muloo oso mu kubofula kuande, bua’shi bukome bua Nkidishitu bushale kunundu* kuande. 10 Biabia ne na muloo mu kubofula, mu kukayibua, mu bipungo bia kukutua bintu, mu kubinguabingua na mu nkalakashi bua Nkidishitu. Muanda pandi mubofule, nyi pandi na bukome.

11 Ne mufikie bu shi na binangu. Anue nyi bakite bua’shi ngikale biabia, muanda nnanue babaadi na kia kungakuila. Muanda ntshi mushadile kui batumibua benu banumono bu bakile buwa ku kintu su nkimune, sunga bianshi bu kintu. 12 Mu binyibinyi, na kunyingiila kukata ne mukite munkatshi muenu mianda ayilesha’shi ne mutumibua, ku bukuashi bua bitunduilo, mianda ya kukaanya na bilengieleshi. 13 Muanda nku kinyi kubaanudi bashadile kui tungi tukongie, kukatusha penda’shi ami nabene ntshi nafikile bu bushito kuanudi? Nfuileyi namu lusa bua kino kilubilo.

14 Talayi! Uno mmusango wa kasatu wandi muilumbuule bua kufika kuanudi, na tankenunyenyekiela bushito nya. Muanda kiankimbi ta bintu bienu, anka nnanue bankimbi; muanda ta mbana abalaminaa baledi babo bintu, anka baledi nyi abalaminaa bana babo bintu. 15 Buande’mi, nakekala na muloo wa kupaana bintu biande bioso na kuipaana pa muanda wenu.* Su ne muinufule ngofu, anue nyi bakunfula bipeela su? 16 Kadi sunga biekala biabia, ntshi mufikie bu bushito kuanudi. Anka anuamba’shi: Naadi na “budimu” na nemuinukuate ku “mayele.” 17 Nemuinudiile kintu ku bukuashi bua bantu banaadi mutume kuanudi su? 18 Naadi musendeele Tite bua kufika kuanudi, ami nkumutuma na ungi mukuetu. Tite baadi muinudiile bintu bienu su? Tatubaadi baleshe’shi tui na binangu bimune? Na’shi atukitshi mianda mu mushindo umune su?

19 Anunangushenanga’shi tubaadi atuibingisha kuanudi su? Muanda tukuete kuakula kumpala ku’Efile Mukulu, mu kuipushena na Nkidishitu. Kadi bakuetu ba kifulo, mianda yoso y’atukitshi mbua kuinunyingisha. 20 Muanda ne na moo wa’shi, panfiki kuanudi, nkutue kuinusangana mu mushindo wankumiina, na nkutue kuikala bianukumina, anka nfikie nsangane’shi kui mukao, kui kuikakeena, kui sungu i bukopo, kui kuiabuula, tuipu, kuakula buakulakule, kuitatula na kafutakanyi. 21 Pangi panfiki dingi kuanudi, Efile Mukulu ande e kunkuatshisha buufu kumpala kuenu, na ne kudila bua bantu be bungi babaadi bakite miluisho kala, kadi kushi kuilanga bua mianda yabo i butete, bua lukiebanokiebano,* na bua muikelo wabo wi buufu ubaabadi nao.

13 Uno nyi musango wa kasatu wanfiki kuanudi. “Abitungu’shi ku bukuashi bua abiakula tumonyi tubidi sunga tusatu, muanda oso ushinkamishue.” 2 Sunga bianshi nenu binobino, binka bu’shi ne nenu bua musango wa kabidi, nabadiila kudimusha baaba babaadi bakite miluisho kala na bangi boso’shi, su nafiki dingi, ta nebalekiela nya, 3 bu bia nukuete kukimba kishinkamiisho kia’shi, Nkidishitu shi mubofule kuanudi, kadi e na bukome munkatshi muenu, kuete kuakula binyibinyi kukiila kuandi. 4 Muanda baadi mukookodibue ku mutshi bu muntu mubofule, kadi e na muwa ku bukuashi bua bukome bu’Efile Mukulu. Eyendo, atue namu tui babofule nka bu bibaadi, anka atukekala na muwa pamune naye ku bukuashi bua bukome bu’Efile Mukulu kuanudi.

5 Tungunukayi na kuitompa bua kumona su nui mu lukumiino; tungunukayi na kuitalula bua kuuka kianudi anue banabene. Su t’anuuku’shi Yesu Nkidishitu e nenu mu buumune? Anka su ta nui bakuminyibue. 6 Binyibinyi nakulupila’shi, anukauku’shi atue ta tui bakutue kukuminyibua.

7 Binobino tukuete kuteka Efile Mukulu’shi, tanukitanga kintu ki bubi su nkimune. Ta mbua’shi atukimbi kumueneka bu bakuminyibue, kadi mbua’shi nukite biabia bibuwa, sunga biamueneka bu’tue bashi bakuminyibue. 8 Muanda tatui balombene kukita kintu kikutuene na bia binyibinyi, kadi nka penda bua kukuatshishena bia binyibinyi. 9 Binyibinyi atuikala na muloo nsaa yoso yatudi babofule, kadi anue na bukome. Na tukuete kuteka bua’shi, nualukie muishinda di buwa. 10 Nyi buakinyi nafundu ino mianda sunga bianshi panka, bua’shi pankafiki kuanudi, ntshikalanga na mianda i bukopo mu kufubisha matalua abadi bampe kui Muanana, kadi neafubishe bua kunyingisha, kushi bua kubofusha.

11 Biabia bakuetu, tungunukayi na kuikala na muloo, na kualukiila muishinda di buwa, kunyingishibua, kuikala na binangu bimune, na kuikala mu butaale; na Efile Mukulu a kifulo na butaale akekala nenu. 12 Eyimusheneyi na muloo.* 13 Beselele boso abenutumina mioyo.

14 Kalolo ka Nfumuetu Yesu Nkidishitu na kifulo ki’Efile Mukulu, na miabi y’anupete ku bukuashi bua kikudi kiselele, bikale nenu.