MUKANDA KUI BENA NGALATEYA

1 Ami Mpoolo, muikale mutumibua kushi mu kukumiina kua bantu, sunga ku bukuashi bua muntu, kadi ku bukuashi bua Yesu Nkidishitu, n’Efile Mukulu Yaya baadi mubuushe Yesu ku lufu, 2 na bakuetu boso be nami, kui tukongie tua mu Ngalateya:

3 Kalolo na butaale bi’Efile Mukulu Nshetu na Nfumuetu Yesu Nkidishitu bikale nenu. 4 Baadi muipane aye nabene bua miluisho yetu, buadia kuitupasha ku uno ndumbuluilo e bubi muyile kikiebe ki’eshimba di’Efile Mukulu Nshetu, 5 ntumbo ikale kui Efile Mukulu bua looso. Amene.

6 Nkuete kukaanya bibanukatuka bukidibukidi kui Yawa baadi muinuitanyine ku kalolo ka Nkidishitu, bua kuenda ku mukandu wibuwa wa ungi mushindo. 7 Ta kuamba’shi kui ungi mukandu wibuwa; anka kui bangi bantu bakuete kuinukalakasha na abakimbi kuluisha mukandu wibuwa pabitale Nkidishitu. 8 Biabia, su ungi muntu a kuatudi sunga muikeyilu enulungula ungi mukandu wibuwa wilekene na ubaatudi benulungule, edibue mulua. 9 Nka bu bibaatupu kuibiakula, nebiakula dingi binobino’shi, muntu oso enulungula mukandu wibuwa wilekene na ubaanudi bakumiine, edibue mulua.

10 Binobino, nakiebe kukuminyibua na bantu su n’Efile Mukulu? Su natompo kusankisha bantu? Su natungunuka na kusankisha bantu, ntshinadia kuikala mpika a Nkidishitu nya. 11 Muanda bakuetu, nakumiina nuukie’shi mukandu wibuwa unaadi muinulungule t’aufiki kui bantu; 12 muanda ntshi muiwupete kui muntu, na ta mbeundongieshe kui muntu, anka babaadi beunfumbuile kui Yesu Nkidishitu.

13 Eyendo, nubapushishe pabitale muikeelo unaadi nao kala mu buina Yunda’shi,* naadi natungunuka na kukiengiesha kakongie k’Efile Mukulu ngofu na kuikaluisha; 14 na naadi nende kumpala ngofu mu buina Yunda kukila bantu be bungi ba bipua biande ba mu muilo wetu, na naadi na kisumi kikata bua bipikua bia bamashetu. 15 Kadi pabaadi Efile Mukulu baadi muntuushe muifu dia nyinami, mungitanyine kuadi kukiila ku kalolo kaaye mumone’shi bibuwa 16 bua kufumbula Muan’aye kukiila kuandi bua’shi mmone bia kulungula mukandu wibuwa pabimutale kui miilo, musango umune ntshinaadi mutekie binangu kui muntu; 17 Ntshinaadi sunga muende ku Yelusalema kui baaba babafikile batumibua kumpala kuande, anka nayile ku Arabi, akupu ami nkualukiila ku Damase.

18 Akupu, kunyima kua bipua bisatu, nayile ku Yelusalema bua kukemonena na Kefase,* n’atue nkukisha naye mafuku 15. 19 Anka ntshimuimonene na ungi mutumibua kukaasha penda Yakobo mukuabo na Muanana. 20 Binobino, pabitale mianda yankuete kuinufundila, nenushinkamiisha kumpala ku’Efile Mukulu’shi, ntshikuete kudimba.

21 Akupu nayile mu bipindi bia nsenga bia Siri na bia Silisi. 22 Anka ntshinaadi muukibue kui tukongie tua mu Yudeya tubaadi mu buumune na Nkidishitu nya. 23 Babaadi penda abapusha’shi: “Yawa muntu baadi etunkiengiesha kala, taadi alungula binobino mukandu wibuwa pabitale lukumiino lubaadi akimbi kuluisha.” 24 Biabia, ababangile kutumbisha Efile Mukulu pa muanda wande.

2 Akupu, kunyima kua bipua 14, nayile dingi ku Yelusalema na Barnabase, ami nkutuala dingi Tite. 2 Naadi muikuende, muanda napetele kifumbulue, na naadi mulungule bakuetu mukandu wibuwa, wa nkuete kulungula kui miilo. Naadi muibikite pa bupenka kumpala kua bantu be na kinemo kikata, bua kuuka su ntshinaadi nasuuku, sunga’shi ntshinaadi musuukie mu bisumanga. 3 Anka sunga biekala’shi Tite baadi anshindikila, tabaadi mu kitungo kia kusadiibua, sunga mbibaadi muina Greke. 4 Kadi wawa muanda ubaadi ubuukie pa muanda wa bakuetu ba madimi babaadi batuele mu bulamalama, babaadi befiinyikie munkatshi muetu, bua kupuupa bulungantu buatudi nabo mui Nkidishitu Yesu, bua’shi banyishe kuitutuula mu bupika; 5 tatubaadi bakumiine kui bakookiela su nkapeela,* bua’shi bia binyibinyi bia mukandu wibuwa bitungunukie na kuikala munkatshi muenu.

6 Kadi pabitale baaba abamueka bu be na muulo, buande’mi biabia bibaabadi ta bi na muulo, muanda Efile Mukulu t’atshibilaa muntu kiimu muyile abimueneka ku meso, baaba babaata na muulo ukata, t’ababaadi bandungule muanda upia su ngumune. 7 Anka pababamuene’shi naadi mupebue mukandu wibuwa bua kuiulungula baaba bashi basadiibue, nka bu bibaudi upebue Mpiele bua baaba basadiibue, 8 muanda yawa baadi mupe Mpiele bukome bua kuikala bu mutumibua kui bantu basadiibue, baadi mumpe namu bukome bua kuikala bu mutumibua kui bantu ba ingi miilo. 9 Na pabaabadi bamone kalolo kabaabadi bandeshe, Yakobo, Kefase, na Yowano, babaadi abamueka bu bibayi bia kakongie, babaadi betunyukie nami na Barnabase ku mboko ibalume, bu kitunduilo kia’shi tukuete kufuba pamune,* bua’shi atue tuende kui bantu ba ingi miilo, kadi abo namu bende kui bantu basadiibue. 10 Babaadi betutekie penda bua kutentekieshanga balanda, bino nyi binaadi netatshisha bua kukita.

11 Binobino, pabaadi Kefase mufikie ku Antiyoshe, naadi mumutopekie* patooka muanda baadi mu kilubilo. 12 Muanda kumpala kua’shi bantu abaadi abakatuka kui Yakobo bafikie, baadi na kiubishi kia kudia na bantu ba ingi miilo; kadi pababafikile, balekiele kudia nabo, na aye nkuilamuuna kuabadi, muanda baadi atshinyi baaba babaadi basadiibue. 13 Bangi bena Yunda namu babaadi batuelakane naye mu buno bu nsesa,* mu kipaso kibaadi mpa na Barnabase muibakuatshishene mu buno bu nsesa. 14 Nyi buakinyi, panamuene’shi ta bakuete kukita mianda mu kuipushena na bia binyibinyi bia mukandu wibuwa, nalunguile Kefase kumpala kuabo boso’shi: “Sunga biekala’shi, obe muina Yunda, okitshi mianda bu muntu a ingi miilo kushi bu muina Yunda, mbikunyi biodi mulombene kukitshisha bantu ba ingi miilo buabadia kuikala na nshalelo muipushene na bipikua bia bena Yunda?”

15 Atue bekale bena Yunda ba ku butandua, kushi bu ba nkitshishi ba miluisho ba mu ingi miilo, 16 atuuku’shi muntu abadikibuaa bu mululame, kushi ku mifubo ya muiya, kadi nka penda mu kuikala na lukumiino mui Yesu Nkidishitu. Nyi buakinyi tui batuule lukumiino luetu mui Nkidishitu Yesu, buatudia kubadikiibua bu balulame ku lukumiino mui Nkidishitu, kushi ku mifubo ya muiya, muanda ta kui muntu su ngumune akabadikibua bu mululame pa kukita mianda i mu miiya. 17 Binobino su betupeta dingi bu ba nkitshishi ba miluisho patukuete kukimba kubadikibua bu balulame ku bukuashi bua Nkidishitu, bino abilesha’shi Nkidishitu etunyingisha bua kukita miluisho su? Nya, ta mbiabia! 18 Su nalukila ku bintu biandi mupue kuleka,* nalesha’shi ne nkitshishi a miluisho. 19 Muanda ku bukuashi bua muiya ne mufue pabitale muiya, bua’shi ngikale na muwa bu’Efile Mukulu. 20 Ne mukookolue ku mutshi pamune na Nkidishitu, ta nami dingi e na muwa, anka Nkidishitu nyi e na muwa mu buumune nami. Binobino, muwa wandi nao ku mbidi, ne nao ku bukuashi bua lukumiino mui Muana a Efile Mukulu, baadi munfule na muipane aye nabene pa muanda wande. 21 Tansumbushena kalolo k’Efile Mukulu, muanda su kululama akufiki ku bukuashi bua muiya, Nkidishitu baadi mufue bua bisumanga.

3 Anue bena Ngalateya bashi na binangu, nnanyi muinutueshe mu kino kilubilo, anue babaabadi baleshe Yesu Nkidishitu patooka bu mukookodibue ku mutshi? 2 Nakiebe kuinuipusha luno lukonko:* Nubapetele kikudi kiselele ku bukuashi bua mifubo ya muiya, su mpa muanda wa lukumiino ku mianda ibaanudi bapushe? 3 Nyi bianudi bakutue binangu biabia? Anue bapue kubanga kukunkushibua na mianda ya mu kikudi, tanukafudiisha na mianda ya ku mbidi su? 4 Nubaadi bapete aa makienga oso nka penda bua bisumanga? Anka su bibaadi binyibinyi bua bisumanga. 5 Biabia, yawa enupa kikudi na akitshi mifubo ya kukaanya munkatshi muenu, eyikitshi ku bukuashi bua mifubo ya miiya, su nku bukuashi bua lukumiino mu mianda ibaanudi bapushe? 6 Anka bu bibaadi Abalahama “na lukumiino mui Yehowa, na aye nkubadikibua bu muntu mululame.”

7 Binyibinyi anuuku’shi baaba balamate ku lukumiino, nyi bekale bana ba Abalahama. 8 Binobino bifundue, pabio kumona kumpala’shi Efile Mukulu akabadika bantu ba ingi miilo bu balulame ku bukuashi bua lukumiino, bibaadi bibadiile kulungula Abalahama mukandu wibuwa’shi: “Miilo yoso ya pa nsenga ayikapete miabi ku bukuashi bobe.” 9 Biabia, baaba balamate ku lukumiino, abakapete miabi pamune na Abalahama baadi na lukumiino.

10 Baaba boso bakulupile mu bikitshino bia muiya, mbedibue mulua, muanda mbifundibue’shi: “Muntu oso sh’ashala mulamate mu mianda yoso ifundibue mu mufungofungo wa Miiya na kuiyikookiela, edibue mulua.” 11 Dingi, abimueneka patooka’shi, Efile Mukulu t’abadika muntu su ngumune bu mululame ku bukuashi bua muiya, muanda “muntu mululame akekala na muwa ku bukuashi bua lukumiino.” 12 Binobino, Muiya ta nguimene mu lukumiino. Anka “muntu oso akitshi ino mianda, akekala na muwa ku bukuashi buayo.” 13 Nkidishitu betukuudile na kuitupososha ku mulua wa Muiya, p’aye kukumiina mulua pa mbalo yetu, muanda bifundibue’shi: “Muntu oso abadi bapudikie ku mutshi, mmuedibue mulua.” 14 Bino bibaadi bua’shi muabi wa Abalahama ufikie kui ingi miilo, ku bukuashi bua Nkidishitu Yesu, bua’shi tupete kikudi kiselele, kibaabadi balee ku bukuashi bua lukumiino luetu.

15 Bakuetu, nakula pa kufubisha kileshesho kia mu nshalelo a kuifuku n’efuku: Su babapu kushinkamisha kilombeno, sunga bi’ekala’shi mbekishinkamishe kui muntu umune, takui muntu mulombene kuikipaa sunga kuikukumbasha ingi mianda. 16 Binobino, milayilo babaadi beyilee Abalahama na kekulu* kaye. T’abamba’shi, “na kui tuikulu* t’obe,” bu’shi tui bungi. Kadi abamba’shi, “na kui kekulu k’obe,” mu mushindo wa’shi nkamune, kekale Nkidishitu. 17 Dingi, namba’shi: Muiya ubafikile kunyima kua bipua 430, taubaadi wipee kilombeno kibaadi Efile Mukulu mupue kukita bua kuipaa mulayilo nya. 18 Muanda su bupianyi mbuimene pa muiya, tabuki dingi buimene pa mulayilo; anka Efile Mukulu baadi muibupe Abalahama na kalolo koso ku bukuashi bua mulayilo.

19 Biabia, buakinyi kui Miiya? Babaadi beyikumbashe bua kulesha miluisho patooka, mpa na pabaadi na kia kufika kekulu, ako kababapele mulayilo; na babaadi beyituushe ku bukuashi bua mikeyilu kuiyasa dia mupuanyishi.* 20 Binobino, takui lukalo lua mupuanyinshi pakudi penda muntu umune, kadi Efile Mukulu e penda umune. 21 Biabia, Miiya ayitukena na milayilo y’Efile Mukulu su? Nya, ta bi biabia! Muanda su babaadi batushe muiya ubaadi ulombene kupa bantu muwa, kululama kubaadia kutukila ku bukuashi bua muiya. 22 Anka Bifundue bibatudile bintu bioso muushi mua matalua a muluisho, bua’shi mulayilo autukila ku lukumiino mui Yesu Nkidishitu, upebue bantu abalesha lukumiino.

23 Anka, kumpala kua lukumiino kufika, tubaadi balamibue muushi mua muiya, na tubaadi ku bukunkushi buao, atutengiela lukumiino lubaadi na kia kufumbulua. 24 Biabia, Muiya ubafikile bu ndami* etu etukunkusha kui Nkidishitu, bua’shi tubadikibue bu balulame ku bukuashi bua lukumiino. 25 Kadi binobino bu bibapu kufika lukumiino, ta tui dingi ku matalua a ndami.

26 Biabia, anue boso nui bana b’Efile Mukulu, ku bukuashi bua lukumiino luenu mui Nkidishitu Yesu. 27 Muanda anue boso babaadi babatshishibue mui Nkidishitu, nui bafuale Nkidishitu. 28 Takui muina Yunda sunga muina Greke, takui mpika sunga muntu e bulungantu, takui mulume sunga mukashi, muanda anue boso nui kintu kimune mu buumune na Nkidishitu Yesu. 29 Dingi, su nui bantu ba Nkidishitu, nui binyibinyi lutandua* lua Abalahama, ba mpianyi ku bukuashi bua mulayilo.

4 Binobino nakula’shi, su mpianyi ki’nka muana mukinga, ta muilekene na mpika, sunga biekala’shi nnaye sha bintu bioso. 2 Anka e ku matalua a bakunkushi na balami ba bintu mpa na kuifuku dibaabapuile kutshiba kui nshaye. 3 Mpa n’atue namu, patukibaadi bana bakinga, tubaadi ba mpika ba mianda ya pa nsenga. 4 Kadi pabalombene kipungo kitshibibue, Efile Mukulu batumine Muan’aye, baadi mutandiibue kui mukashi, na baadi muushi mua muiya, 5 bua’shi aule baaba be muushi mua muiya, bua kumona bia kuibakuula, bua’shi atue namu tupete mushindo wa kuatshibua bu bana.

6 Bu biatudi bana binobino, Efile Mukulu mmutume kikudi kia Muan’aye mu mashimba eetu, na akiele musase’shi: “Abba,* Yaya!” 7 Binobino, tanuki dingi ba mpika, anka nui bana; na su nui bana, nui bekale dingi ba mpianyi ku bukuashi bu’Efile Mukulu.

8 Pabaanudi tanuaukile Efile Mukulu, nubaadi ku bupika bua baaba bashi binyibinyi b’efile. 9 Kadi bu bibaanupu kuuka Efile Mukulu binobino, sunga’shi nubaukibua n’Efile Mukulu, buakinyi nukuete kualukiila dingi ku bintu bia bisumanga na bishi na muulo, na anukiebe kuituula dingi ku bupika buabio? 10 Nukuete kunemeka na kisumi kioso mafuku, mieshi, bipungo na bipua. 11 Nkuete kutshina’shi, tala mu mushindo kampanda, nakita mufubo* wa bisumanga pa muanda wenu.

12 Bakuetu, nenusendeela’shi, ikalayi nka bu’mi, muanda ami namu naadi nka biabia bianudi. Tanuibankitshine muanda wibubi su ngumune. 13 Anka anuuku’shi maladi ande, nyi abampeele mushindo wa kuinulungula mukandu wibuwa bua musango wa kumpala. 14 Na sunga bibaadi maladi ande bu kitompuanga kuanudi, tanubaadi bangate na muulo upeela sunga kummona bu e butete, anka nubaadi bankukile bu muikeyilu a Efile Mukulu, nka bu Nkidishitu Yesu. 15 A wawa muloo ubaanudi nao wi kunyi? Muanda nenushinkamiisha’shi su kubadia kuikala mushindo, nubadia kutukula meso enu, nueampa. 16 Biabia, nafiki muishikuanyi nenu muanda nkuete kuinulungula bia binyibinyi su? 17 Abakitshi muabo moso* bua kuinukaka kuabadi, anka ta mbua kabingilo ke buwa; kadi abakiebe kuinulamuuna kuandi, bua’shi nuikale na lukalo lukata lua kuibalonda. 18 Anka, ta bi bubi su muntu akitshi muaye moso bua kuinukaka kuadi su mbua kabingilo ke buwa, na kushi penda pandi panka, 19 anue bana bande bakinga, bankuete kupushiisha dingi mitanyo bu ya pa kutanda mpa nka na apakekala Nkidishitu mukumbane muanudi. 20 Nakumina kuikala nenu binobino, na kuisamba nenu mu ungi mushindo, muanda binangu mbimpalakane pa muanda wenu.

21 Ndunguleyi anue abakumiina kuikala muushi mua muiya, tanupusha akiamba Muiya su? 22 Bu kileshesho, mbifudibue’shi, Abalahama baadi na bana babidi, umune a mufubi mukashi na umune a mukashi mulungantu; 23 anka yawa a mufubi mukashi, baadi mutandikue abitandikuaa bana boso, na yawa a mukashi mulungantu, baadi mutandikue ku bukuashi bua mulayilo. 24 Ino mianda i na mpushisho a mu kifuanyi; muanda bano bakashi abalesha bilombeno bibidi, kimune kia ku muengie wa Sinayi, akitanda bana ba bupika na akilesha Agare. 25 Agare alesha Sinayi, muengie wi mu Arabi, na e mu kuipushena na Yelusalema lelo uno, muanda e mu bupika na bana baye. 26 Kadi Yelusalema a muiyilu mmulungantu, na aye nyi muikale nyinetu.

27 Muanda mbifundibue’shi: “Ikala na muloo obe mukashi nkunga, shi mutande; ela misaase ya muloo obe mukashi shi na mitanyo ya pa kutanda; muanda bana ba mukashi abaadi basumbushene, be bungi kukila ba mukashi e na mulume.” 28 Biabia bakuetu, anue nui bana ba mulayilo nka bu bibaadi Isaake. 29 Kadi nka bu bibaadi yawa baadi mutandikue nka bu abitandikuaa bana boso, mubangie kukiengiesha yawa baadi mutandikue ku bukuashi bua kikudi, nyi biabidi namu na lelo. 30 Anka, bifundue abiamba kinyi? Abiamba’shi, “Binga mufubi mukashi na muan’aye, muanda muana a mufubi mukashi, t’akapiana pamune na muana a mukashi mulungantu nya.” 31 Biabia bakuetu, atue tatui bana ba mufubi mukashi, anka tui bana ba mukashi mulungantu.

5 Muanda Nkidishitu mmuitupososhe bua buabua bulungantu. Biabia, ikalayi banyingie na tanuitulanga* dingi mu bupika.

2 Talayi! Ami Mpoolo nenulungula’shi su nuasadiibua, Nkidishitu t’ekala na bukuashi kuanudi. 3 Nashinkamiisha dingi muntu oso asadiibua’shi, e mu kitungo kia kulama Miiya yoso. 4 Nui belamuune kui Nkidishitu, anue bakuete kukimba kubadikiibua bu balulame ku bukuashi bua miiya; nui bende kula na kalolo kaye. 5 Kadi buetu’tue, ku bukuashi bua kikudi, tukuete kutengiela n’eshimba kuiyilu kululama ku’atukulupila akutukila ku lukumiino. 6 Muanda bua baaba be mu buumune na Nkidishitu, kusadiibua sunga kukutua kusadiibua takui na muulo, kadi lukumiino alufubu ku bukuashi bua kifulo nyi lui na muulo.

7 Nubaadi anusuuku kalolo. Nnanyi muinukutshishue buanudia kutungunuka na kukookiela ku bia binyibinyi? 8 Yawa ngielelo a binangu t’afiki kui Yawa kuete kuinuitanyina nya. 9 Ndambo ipeela ya kitatusho,* ayitatushaa musabu oso ushima. 10 Nakulupila’shi anue be mu buumune na Muanana, tanukanangushena mu ungi mushindo nya; kadi yawa atuesha kafutakanyi muanudi, sunga ekala nnanyi, akapete kiimu kimulombene. 11 Kadi buande’mi bakuetu, su nkuete kutungunuka na kulongiesha pabitale kusadiibua, buakinyi baki’abankiengiesha? Biabia kikokoshi kia mutshi wa makienga nkipue kukatushibua. 12 Nakumiina’shi baaba abakimbi kuinukumbakasha, betungule* abo banabene.

13 Bakuetu, nubaadi betaminyibue ku bulungantu; biabia tanufubishanga buabua bulungantu bu mushindo wa kulombasha nkalo ya mbidi, anka ku bukuashi bua kifulo, ekuasheneyi ku muntu na muntu bu ba mpika. 14 Muanda Miiya yoso ayilombana penda mu dino eyi dimune adiamba’shi: “Abitungu ofule muntu nobe bu biodi muifule obe nabene.” 15 Kadi su nukuete kutungunuka na kuisumeena, na kuidishena munkatshi muenu, dimukayi tala nuetuuteena.

16 Anka namba’shi, tungunukayi na kutambuka ku bukunkushi bua kikudi na t’anukalombasha nkalo ya ku mbidi nya. 17 Muanda mbidi, pamuanda wa nkalo yayo, tayipushenaa na kikudi, na kikudi namu t’akipushenaa na mbidi, mbikutuene, bua’shi tanumonanga bia kukita mianda yanukumiina. 18 Dingi su nukuete kukunkushibua na kikudi, tanui muushi mua muiya nya.

19 Biabia, bikitshino bia ku mbidi abimuenenkaa patooka. Na biabia bikitshino mbino: Lukiebanokiebano,* muikelo wi butete, muikelo wi buufu,* 20 lulanguilo lua ma nkishi, mianda ya malenganyi, mushikua, kulee, mukao, nsungu ikilekile, kuitupakashena, kuiabulushena, tusakatusaka, 21 luabi, bunkoluenkolue, misangelo ibubi,* na bingi bintu bi biabia. Nenudimusha pabitale bino bintu, nka biandi mupue kuinudimusha’shi, baaba abebikitshi, t’abakapiana Bufumu bu’Efile Mukulu.

22 Anka mu kuilekena na biabia, kikuba kia kikudi nkifulo, muloo, butaale, luishinko, kalolo, buwa, lukumiino, 23 kupopeela na kuikanda. Takui muiya su ngumune wikutuene na ino mianda. 24 Dingi, baaba bekale ba Nkidishitu Yesu, mbakookole mbidi ya muluisho ku mutshi pamune na nkalo yayo.

25 Su tui na muwa muyile kikudi, tutungunukieyi na kutambuka mu kipaso kilombane ku bukuashi bua kikudi. 26 Tatuileshanga bu bakile bangi, na kuipikena munkatshi muetu, mpa na kuileshena luabi.

6 Bakuetu, sunga biekala’shi muntu bakitshi kilubilo, kumpala kuadia kutundula wawa muanda, anue banyingie mu kikudi kimbayi bia kuludika muntu e biabia na luishinko loso. Anka wekale mudimukie tala otompibua nobe namu. 2 Tungunukayi na kuisemushena bushito, na mu uno mushindo anukalombasha muiya wa Nkidishitu. 3 Muanda su muntu kampanda anangushena’shi e na kinemo, aku namu t’enakio, kuete kuidimba aye nabene. 4 Anka muntu oso ataluule bikitshino biaye’ye nabene, paapa akekala na kia kusanka pabimutale aye nabene, kushi mu kuipuandikisha na ungi muntu. 5 Muanda muntu oso akasemuna bushito buaye’ye nabene.

6 Dingi, muntu oso abalongiesha eyi, eabishene bintu bioso bibuwa na yawa amulongiesha.

7 Tanuidimbanga nya: Efile Mukulu t’asepibuaa. Muanda kiakia akikunu muntu, nyi ki’akaumbula; 8 muanda yawa akunyina mbidi yaye, akaumbula kuluishibua* akutukila ku mbidi yaye, kadi yawa akunyina kikudi akaumbula muwa wa loso autukila ku kikudi. 9 Biabia, t’atukookanga mu kukita kua bibuwa, muanda atukaumbula mu kipungo kilombane su tatui bakookie. 10 Biabia pa tuki na mushindo,* tukitshine bantu boso bibuwa, anka bikishekishe kui bakuetu mu lukumiino.

11 Talayi bianenufundila uno mukanda na maleta akata kuiyasa diande’mi nabene.

12 Baaba boso abakimbi kumueneka bu be buwa muyile mueneno a bantu, nyi abakimbi kuinukitshisha pabukopo bua kusadiibua, bakuete kukita biabia nka penda bua kupela kukiengieshibua bua mutshi wa makienga* wa Nkidishitu. 13 Muanda sunga baaba basadiibue ta bakuete kunemeka Muiya, anka abakumina’shi nuikale basadiibue buabadia kuitumbisha pabitale mbidi yenu. 14 Anka, ami ntana netumbishe kukatusha penda bua mutshi wa makienga wa Nfumuetu Yesu Nkidishitu, ku bukuashi buaye ba pa nsenga babaadi bepayibue* muyile mueneno ande, bu binaandi muyile mueneno a ba pa nsenga. 15 Muanda kusadiibua sunga kukutua kusadiibua ta kui na muulo, kadi kuikala bu kipangua kipia nyi kui na muulo. 16 Butaale na lusa, bikale kui baaba boso be na nshalelo muipushene na dino eyi dia kulonda, oolo, kui Isalele a Efile Mukulu.

17 Kubanga binobino, muntu su ngumune tankalakashanga, muanda ne na bitunduilo bia bu mpika a Yesu pa mbidi yande.

18 Bakuetu, kalolo ka Nfumuetu Yesu Nkidishitu kekale na binangu bianukuete kulesha. Amene.