MUKANDA KUI BENA EFESO

1 Ami Mpoolo mutumibua a Nkidishitu Yesu ku bukuashi bua kikiebe ki’eshimba di’Efile Mukulu, nafundila beselele be mu Efeso na be na lulamato mu buumune na Nkidishitu Yesu’shi:

2 Kalolo na butaale abifiki kui Efile Mukulu Nshetu na kui Muanana Yesu Nkidishitu bikale nenu.

3 Efile Mukulu Nshaye na Nfumuetu Yesu Nkidishitu atumbishibue, muanda muituelele miabi yoso ya mu kikudi mu ma mbalo a muiyilu mu buumune na Nkidishitu, 4 bu bibaadi muitusangule bua kuikala mu buumune na Nkidishitu, kumpala kua kibangilo kia bantu, bua’shi tuikale kumpala kuaye ba kishila na bashi na matope mu kifulo. 5 Muanda baadi mubadiile kuitusangula buatudia kuatshibua bu bana baye ku bukuashi bua Yesu Nkidishitu, muyile bibaadi mumone bu bibuwa na muyile kikiebe ki’eshimba diaye, 6 muyile ntumbo na kalolo kaaye kabaadi muituleshe kukiila kui Muan’aye a kifulo. 7 Ku bukuashi bua Muan’aye, tui bapete kupoososhibua kukidila ku nkuulo ya mase aaye, kuamba’shi, kufuidibua lusa kua miluisho yetu muyile bukata bua kalolo kaye.

8 Efile Mukulu mmutamishe kano kalolo kuatudi mu kiukilo kioso na binangu* 9 pa kuituukisha mianda ifuame ya kishila ya kikiebe ki’eshimba diaye. Akitshi bino muyile bibaadi mukumiine na muyile mpango yaye, 10 bua kutuula mianda mu mulongo apakafiki kipungo kitshibibue ku nfudiilo, bua kubunga bintu bioso mui Nkidishitu, bintu bi muiyilu na bintu bi pa nsenga. Oolo, mui Nkidishitu 11 atudi naye mu buumune na abaabadi betusangule naye bu ba mpianyi. Efile Mukulu baadi mubadiile kuitusangula kumpala muyile mpango yaye, muanda alombashaa bintu bioso nka bu biakumiina, muyile kikiebe ki’eshimba diaye, 12 bua’shi atue babaadi ba kumpala mu kuikala na lukulupilo mui Nkidishitu, tufube bua ntumbo yaye. 13 Anka anue namu nubaadi bakulupile muadi kunyima kua kupusha eyi dia bia binyibinyi, kuamba’shi, mukandu wibuwa pabitale kipandilo kienu. Kunyima kuanue kukumiina, nubaadi bedibue kitampi ku bukuashi buaye, na kikudi kiselele kibaabadi balee, 14 kikale bu kitunduilo* kipue kutushibua kumpala kia bupianyi buetu, bua kumona bia kupoososha bantu b’Efile Mukulu ku bukuashi bua nkuulo, bua ntumbo yaye ikile bukata.

15 Nyi buakinyi ami namu, kasha napusha abakula pabitale lukumiino luenu mui Nfumuetu Yesu, na kifulo kianudi baleshe beselele boso, 16 ntshi mulekie kutumbula Efile Mukulu pa muanda wenu. Nkuete kutungunuka na kuinutemuna mu nteko yande, 17 bua’shi Yaya sha ntumbo, Efile Mukulu a Nfumuetu Yesu Nkidishitu, enupe kikudi kia binangu na kia bifumbulue muyile kiukilo kiaye kia binyibinyi. 18 Mutooshe meso a mu mashimba enu, bua’shi nuukie lukulupilo lubaadi muinuitanyine, na bupeta bua ntumbo buadi mulame bu bupianyi bua beselele, 19 Na bi bukata bua bukome buaye bukilekile kuatudi’tue bena kukumiina. Buabua bukata abumuenekiela ku mifubo ayikitshika ku bukome buaye bua kukaanya, 20 bubaadi muleshe kui Nkidishitu pabaadi mumusangule ku lufu na amushadika ku mboko yaye ibalume muiyilu, 21 kunundu kua mafumu oso, matalua, makome, kua bukunkushi na ku’eshina dioso dilombene kutemunyibua, kushi penda mu uno ndumbuluilo* kadi mpa na mu ndumbuluilo akafiki. 22 Dingi, baadi mutuule bintu bioso muushi mua ngua* yaye, na bamutudile kunundu kua mianda yoso itale kakongie, 23 ako kekale mbidi yaye, kaushibue na bintu bioso pabimutale aye alombashaa bintu bioso.

2 Kukatusha biabia, Efile Mukulu baadi muinuikashe na muwa, sunga biekala’shi nubaadi bafue mu bilubilo na mu miluisho yenu, 2 ibaanudi anukitshi kala muyile nshalelo a uno ndumbuluilo a ino nsenga, muyile mukata a matalua a lupapi,* kikudi kikuete kufuba binobino mui bana bash’abakookiela. 3 Eyendo, patubaadi munkatshi muabo, atue boso tubaadi atukitshi mianda muyile ngabiabi ya mbidi yetu, atulombasha abikumiina mbidi na binangu bietu, na tubaadi bana ba nsungu kubanga ku butandua nka bu bangi bantu. 4 Kadi, Efile Mukulu mu lusa luaye lukata, na pa muanda wa kifulo kiaye kikata kibaadi muitufule, 5 baadi muituikashe na muwa pamune na Nkidishitu, sunga biekala’shi tubaadi bafue mu bilubilo bietu. Biabia, nubaadi bapaashibue ku bukuashi bua kalolo kaye. 6 Dingi, Efile Mukulu baadi muitusangule pamune na kuitushadika pamune mu ma mbalo a muiyilu mu buumune na Nkidishitu Yesu, 7 bua’shi mu ndumbuluilo afiki* aleshe bukata bua kalolo kaye kakilekile, na kuitulesha buwa buaye mu buumune na Nkidishitu Yesu.

8 Kukiila ku kano kalolo, nubaadi bapaashibue ku bukuashi bua lukumiino, na biabia t’abitukila ku bikitshino bienu; anka nyi nkia buntu ki’Efile Mukulu. 9 Ta mpa muanda wa mifubo yenu, bua’shi muntu su ngumune tekalanga na kia kuitumbisha. 10 Tui mufubo wa ku maasa a Efile Mukulu na tubaadi bapangibue mu buumune na Nkidishitu Yesu bua mifubo ibuwa, ibaadi Efile Mukulu mubadiile kulumbuula bua’shi tutambukile mu yanka.

11 Nyi buakinyi tentekieshayi’shi anue bantu ba ingi miilo kubanga ku butandua, babaadi abenuitanyina kala bu “bantu bashi basadiibue” kui baaba babetanyina’shi “mbasadiibue,” kusadiibua kuabakitaa ku mbidi ku maasa a bantu. 12 Mu aa mafuku tanubaadi anuuku Nkidishitu, nubaadi kula n’eumbo dia Isalele, na nubaadi benyi ku bilombeno bia mulayilo; tanubaadi na lukulupilo na tanubaadi anuuku Efile Mukulu pa nsenga. 13 Kadi binobino mu buumune na Nkidishitu Yesu, anue babaadi kula n’Efile Mukulu tanudi naye pepi ku bukuashi bua mase a Nkidishitu. 14 Muanda Nkidishitu mmuikale butaale buetu, aye baadi muikashe bisaka bibidi bu kisaka kimune, na baadi mubumbule mudimba ubaadi awibaabuula pankatshi pabo. 15 Ku bukuashi bua mbidi yaye, mmukatushe mushikua, Miiya ibaadi na mayi na bitshibilo, buadia kuikasha bisaka bibidi bu muntu umune mupia mu buumune naye, na bua kutuesha butaale, 16 na bua kualusha biabia bisaka bibidi mu kipuano n’Efile Mukulu mu mbidi imune ku bukuashi bua mutshi wa makienga,* muanda baadi mukatushe mushikua ku bukuashi buaye’ye nabene. 17 Bafikile, na aye nkuinulungula mukandu wibuwa wa butaale, anue babaadi kula n’Efile Mukulu, na butaale kui baaba babaadi naye pepi, 18 muanda ku bukuashi buaye, atue boso bisaka bibidi, tui na bulungantu bua kutuela kui Yaya ku bukuashi bua kikudi kimune.

19 Biabia, tanuki dingi bu benyi na bu bantu bashale muiumbo diabene, anka nui bena eumbo dimune na beselele na nui bantu ba mu nshibo y’Efile Mukulu, 20 na nui bebakiibue pamune ku kitako kia luibako lua batumibua na batemuki, na Nkidishitu Yesu nabene nyi muikale ebue dia kitako dia muipaka. 21 Mu buumune naye, nshibo ishima ikuete kubungibua pamune na kalolo koso, na ikuete kutama buayidia kufika ntempelo eselele bua Yehowa. 22 Na mu buumune naye, anue namu nukuete kuibakiibua pamune, bua kuikala mbalo ilombene Efile Mukulu kushala, ku bukuashi bua kikudi.

3 Nyi buakinyi ami Mpoolo, muina lukano a Nkidishitu Yesu pa muanda wenu, anue bantu ba ingi miilo⁠— 2 su nubaadi binyibinyi bapushe pabitale bulami bubaadi Efile Mukulu mumpe ku kalolo kaye pa muanda wenu, 3 mu mushindo wa’shi ku bukuashi bua kifumbulue, babaadi bangukishe mianda ifuame ya kishila, nka bu binaadi mubadiile kufunda mu mayi apeela. 4 Biabia p’anubadika bino, nui kushingula mpushisho ande a mianda ifuame ya kishila ya Nkidishitu. 5 Mu bingi bipungo, ino mianda ifuame tababaadi abeyiuku kui bana ba bantu, bu biabadi beyifumbuile binobino kui batumibua na batemuki ba kishila ku bukuashi bua kikudi, 6 kuamba’shi, mu buumune na Nkidishitu Yesu na ku bukuashi bua mukandu wibuwa, bantu ba ingi miilo bekale ba mpianyi netu pamune na bena bipindi bia mbidi imune, bua kuikala netu mu mulayilo umune. 7 Nafikile bu mufubi a ino mianda ifuame ya kishila, muyile kia buntu kia kalolo k’Efile Mukulu kibaadi mumpe, ku bukuashi bua bukome buaye.

8 Babaadi bandeeshe kano kalolo ami mukile bupeela a ku yawa peela a beselele boso, bua’shi mmone bia kulungula mukandu wibuwa kui ingi miilo pabitale bupeta bua Nkidishitu bushi bia kupuandikisha 9 na bua kulesha muntu oso kuludika kua mianda ifuame ya kishila, ibaadi ifuamishibue kubanga kala mui Efile Mukulu, aye bapangile bintu bioso. 10 Bino bibakitshikile bua’shi ku bukuashi bua kakongie, baukishe bakata na ba sha matalua, binangu bi’Efile Mukulu bikile bukata muiyilu. 11 Bino bi mu kuipushena na mpango ya loso ibaadi mulumbule mu buumune na Nkidishitu Yesu Nfumuetu, 12 ku bukuashi buaye, atuakula n’eshimba dinyingie na tui na bulungantu bua kuiseesela pepi n’Efile Mukulu na kushinkamisha koso ku bukuashi bua lukumiino luetu mui Nkidishitu. 13 Biabia nenutekie bua’shi tanukookanga pabitale makienga a nkuete kufumankana nao pa muanda wenu, muanda ao aalesha ntumbo yenu.

14 Pa muanda wa biabia, nakunama kumpala kua Yaya, 15 muanda kifuko kioso ki muiyilu na ki pa nsenga, nkipetele eshina diakio kuadi. 16 Natekie bua’shi enupe bukome, na ku bukuashi bua ntumbo yaye ikile bukata, enunyingishe mashimba ku bukuashi bua kikudi kiaye, 17 na ku bukuashi bua lukumiino luenu, Nkidishitu abombeele mu mashimba enu na kifulo. Ikalayi bamene mishi na bashimate pa kitako kinyingie, 18 bua’shi anue na beselele boso nuikale na ngobesha ya kupusha kalolo bula na buipi, bula bua muiyilu na bula bua muushi, 19 na bua kuuka kifulo kia Nkidishitu, akio kikile kiukilo, bua’shi nuikale baushibue na ngikashi yoso y’abenupa kui Efile Mukulu.

20 Binobino Efile Muluku, aye mulombene kukita bi bungi kukila biabia biatutekie sunga bi’atupuandikisha, ku bukuashi bua bukome buaye abufubu muatudi, 21 atumbishibue ku bukuashi bua kakongie na ku bukuashi bua Nkidishitu Yesu, bua bipungo bioso na bua loso. Amene.

4 Biabia, ami muina lukano mu Muanana, nenusendeela buanudia kuikala na muikelo wipushene na luitamino luanubaadi bapete, 2 na kuiyisha koso, na kupopeela, na luishinko, efuileneyi lusa ku muntu na muntu mu kifulo, 3 nuitatshishe binyibinyi bua kulama buumune bua kikudi abuinubungu mu butaale. 4 Kui mbidi imune, na kikudi kimune, nka bu biabidi’shi kui lukulupilo lumune luanubaadi betaminyibue; 5 Muanana umune, lukumiino lumune, lubatshisho lumune; 6 Efile Mukulu umune na Nshaye na bantu boso, kuete kukunkusha kunundu kua bioso, na kufuba mu bioso.

7 Biabia, kalolo k’Efile Mukulu kabaadi kapebue kui oso a kuatudi muyile bibaadi Nkidishitu muabile muntu oso kia buntu. 8 Muanda mbifundibue’shi: “Pabakamiine muiyilu, bayile na bena lukano; batushiishe bia buntu bikale bantu.” 9 Binobino, kuamba’shi “bakamiine muiyilu” akulesha kinyi? Akulesha’shi bayikile dingi mu mbalo i muushi, kuamba’shi, pa nsenga. 10 Yawa baadi muikie, nnaye dingi baadi mukamine enda kunundu kua mayilu oso, bua’shi alombashe bintu bioso.

11 Na batudile bangi bu batumibua, bangi bu batemuki, bangi bu balungudi ba mukandu wibuwa, bangi bu balami na bangi namu bu balambukishi, 12 bua kulongiesha* beselele bua mufubo wa kukuasha bantu, na bua kuibaka mbidi ya Nkidishitu, 13 mpa na patukafiki boso mu buumune mu lukumiino na mu kiukilo kia Muana a Efile Mukulu, bua kufika bu bantu banyingie, mu kipimo kimune na Nkidishitu. 14 Biabia, tatuikalanga dingi bu bana bakinga, baabakumbakasha aku-naku nka bu kui mbundambunda ya mema, na babatuala aku-naku, kui lupunga loso lua malongiesha a madimi, ku madimi a bantu na kukiila ku mayele abo aalubisha bantu. 15 Anka patuakula bia binyibinyi, tukuleyi mu kifulo mu bintu bioso mui Nkidishitu, aye muikale Nfumu. 16 Muadi’ye, mbidi yoso ngilungiibue mu buumune na ayifubu pamune ku bukuashi bua binyingua bioso abiyipa kiakia kiayidi nakio lukalo. Pe kipindi kioso kia mbidi akifubu kalolo, abikuasha bua’shi mbidi ikule na kuiyibaka ayo inabene mu kifulo.

17 Binobino, nakula na kushinkamisha mu Muanana’shi, tanutungunukanga na kutambuka bu bantu ba ingi miilo abatambuka mu binangu biabo bi shi kapu.* 18 Binangu biabo bi mu mufito na be kula na muwa aufiki kui Efile Mukulu, muanda wa kukutua kuabo kua kushinguula, na bua mashimba abo apape. 19 Bu biabadi bashimishe bikitshino bioso bibuwa, mbepane mu muikelo wi buufu* bua kukita mianda i butete ya bipaso bioso na luabi.

20 Kadi anue tanui balongie’shi Nkidishitu ebiabia nya, 21 su mbinyibinyi nubaadi bamupushe, na nubaadi balongieshibue ku bukuashi buaye, nka bu biabidi’shi bia binyibinyi bi mui Yesu. 22 Nubaadi balongieshibue bua kufuula bumuntu bua kala, buipushene na bikitshino bibaanudi nabio kala, na bukuete kuenda na kuluila muyile ndakalaka yabo ya madimi. 23 Na abitungu nutungunukie na kushintuluka bua kuikala bantu bapia mu ngielelo enu a binangu,* 24 na abitungu nufuale bumuntu bupia bubaadi bupangibue muyile kikiebe ki’eshimba di’Efile Mukulu, mu kululama na lulamato lua binyibinyi.

25 Nyi buakinyi binobino, bu bianubaapu kuleka madimi, muntu oso alungule muinaaye bia binyibinyi, muanda atue boso tui bipindi bia mbidi imune bi lukalo na bingi. 26 Ikalayi na nsungu, anka tanukitanga muluisho; nguba taponanga nuki’nka na nsungu; 27 Tanulekielanga Diabulu mbalo. 28 Ngifi alekie kuiba; anka atumikie bibukopo, akite mufubo wibuwa na maasa aye, bua’shi apete kintu kiadia kupa namu baaba be na lukalo na bukuashi. 29 Kishima su nkimune kinyangie takitukanga mukanua muenu, anka kiakia ki buwa bua kunyingisha bangi be na lukalo na kunyingishibua, bua’shi bikuashe baaba abekipusha. 30 Dingi, tanuinyongoshanga* kikudi kiselele ki’Efile Mukulu, kiakia kibaabadi benuele nakio kitampi bu’efuku dia kupoososhibua ku bukuashi bua nkuulo.

31 Katushayi muanudi bubi bua mishindo yoso, nsungu, bukielo, kutomboka, kukayishena, na kintu kioso kilombene kukita muntu bi bubi. 32 Anka ikalayi na kalolo kui muntu na muntu, nuikale baule na lusa, nuilekieshene bilubilo bienu ku muntu na muntu, nka bu binulekieele namu Efile Mukulu bilubilo bienu n’eshimba dimune ku bukuashi bua Nkidishitu.

5 Biabia, ambulayi Efile Mukulu bu bana baye ba kifulo, 2 na tungunukayi na kutambuka mu kifulo nka bu bibaadi Nkidishitu namu muitufule, na aye nkuipaana pa muanda wetu bu kia buntu na bu mulambu autuusha mapembue e buwa kui Efile Mukulu.

3 Lukiebanokiebano* na mianda i butete ya mishindo yoso sunga luabi, tabitemunuanga su nkapeela munkatshi muenu; nka bu biabidi bilombene beselele; 4 sunga muikelo wi buufu, sunga buakul’akule, sunga miseku ya butesha, bintu bishi bipuandikile, anka ikalayi anutumbula Efile Mukulu. 5 Muanda anuuku na kushinkamisha’shi takui muntu su ngumune atambukaa lusandi,* sunga e butete, sunga sha luabi, kuamba’shi kuikala bu mulanguidi a ma nkishi, e na bupianyi mu Bufumu bua Nkidishitu na bu’Efile Mukulu nya.

6 Muntu su ngumune t’enudimbanga na mayi a bisumanga, muanda nsungu y’Efile Mukulu ayifiki kui bana bash’abakookiela bua yaaya mianda. 7 Nyi buakinyi, tanuikalanga nabo mu kipuano; 8 Muanda kala nubaadi mu mufito, anka binobino nui muitaata mu kuipushena na Muanana. Biabia tungunukayi na kutambuka bu bana b’etaata, 9 muanda kikuba ki’etaata akitushaa buwa bua mishindo yoso na kululama na binyibinyi. 10 Tungunukayi na kutaluula bua kushinkamisha biabia abisankisha Muanana; 11 na lekayi kutuelakana mu mifubo ya mu mufito ish’ayitusha bikuba; anka eyitusheyi patooka. 12 Muanda, mianda y’abakitshi mu bufiefie i buufu sunga bua kuiyakula. 13 Mianda yoso y’abatuusha patooka ayileshibua pabutooka kui etaata, muanda bioso abileshibua patooka nyi etaata. 14 Nyi buakinyi mbifundibue’shi: “Pasuka obe mulaale, na buuka obe mufue, na Nkidishitu akakumunyika etaata.”

15 Biabia ikalayi bapasukie bua’shi tanutambukanga bu ba shi na binangu, anka nutambukie bu ba sha binangu. 16 Fubishayi nsaa y’enu kalolo muanda mafuku atudi e bubi. 17 Nyi buakinyi, lekayi kuikala bu bantu ba shi na binangu, anka tungunukayi na kushingula bi kikiebe ki’eshimba dia Yehowa. 18 Dingi tanukoluanga maalua, muanda aatuala muntu ku mianda yoso ibubi,* anka tungunukayi na kuushibua na kikudi kiselele. 19 Panukuete kuisamba munkatshi muenu* na misambo, anutumbisha Efile Mukulu na ngono ya mu kikudi, imbayi na tumbishayi Yehowa mu mashimba enu, 20 ikalayi nka anualusha lutumbu kui Efile Mukulu muikale Nshetu, bua bintu bioso muishina dia Nfumuetu Yesu Nkidishitu.

21 Muntu oso akookiele muinaye mu kutshina kua Nkidishitu. 22 Bakashi bakookiele balume babo nka bu bi’abakookielaa Muanana, 23 muanda mulume nfumu a mukashi aaye, nka bu bikale Nkidishitu nfumu a kakongie, aye muikale mupaashi a ino mbidi. 24 Biabia nka bu bikale kakongie akakookiela Nkidishitu, abitungu namu bakashi bakookiele balume babo mu bioso. 25 Anue balume, tungunukayi na kufula bakashi benu, nka bu bibaadi Nkidishitu namu mufule kakongie na aye nkuipaana pa muanda wako, 26 bua’shi ekekashe ka kishila, na ekatooshe pa kuikatumpa mema ku bukuashi bu’eyi, 27 bua’shi afikie na kakongie kumpala kuaye mu ntumbo yako, kashi na katoba sunga kalema, sunga kingi kintu ki biabia, anka keekale ka kishila kashi na matope.

28 Mu mushindo umune, balume bafule bakashi babo bu mbidi yabo’bo banabene. Muntu mufule mukashi aye mmuifule aye nabene, 29 muanda takui muntu su ngumune ekalaa mushikue mbidi yaye, anka eyidishaa na kuiyipasukila, nka bu abikitaa Nkidishitu bua kakongie, 30 muanda tui bipindi bia mbidi yaye. 31 “Nyi buakinyi, muana mulume akakatuka kui nshaye na nyinaye na akalamate* kui mukashi aye, bubidi buabo abakekala mbidi imune.” 32 Uno muanda ufuame wa kishila ngukata. Nakula biabia bua Nkidishitu na kakongie. 33 Biabia abitungu oso a kuanudi afule mukashi aaye bu biadi muifule aye nabene; mukashi namu abitungu ekale na kanemo kakata kui mulume aaye.

6 Anue bana, kookielayi benutande mu buumune na Muanana, muanda bino mbilulame ku meso ku’Efile Mukulu. 2 “Nemeka nshobe na nyinobe,” muanda uno nyi muiya wa kumpala wi na mulayilo: 3 “Bua’shi mianda yobe yende kalolo* na olaale mafuku e bungi pa nsenga.” 4 Anue ba nshe-bana, tanufitshishanga bana benu munda, anka ebakusheyi muyile malango na buludiki* bua Yehowa.

5 Anue ba mpika kookielayi ba nfumuenu, na kutshina na kanemo* ka binyibinyi akakatukila mu mashimba enu, nka bu abakookiela Nkidishitu, 6 kushi penda nsaa y’abenutala bu’nue abakimbi kusankisha penda bantu, anka bu ba mpika ba Nkidishitu abakitshi kikiebe ki’eshimba di’Efile Mukulu na anyima* enu oso. 7 Fubayi na binangu bi buwa nka bu abafubila Yehowa, kushi bu abafubila bantu, 8 muanda anuuku’shi muanda oso wibuwa aukitshi muntu, akeupetela efuto kui Yehowa, biekala mpika sunga mulungantu. 9 Anue namu bakata ba ba mpika, tungunukayi na kuibakitshina mianda mu wawa mushindo umune, kushi kuikala na bukielo kuabadi, muanda anuuku’shi anue boso nui na Nfumu umune e muiyilu, na te na ntondo.

10 Nfudiilo a bioso, tungunukayi na kupeta bukome mu Muanana, na mu bukome buaye bukata. 11 Fualayi bina ngoshi bioso bilombane bi’Efile Mukulu, bua’shi numone bia kukambila mayele e bubi a Diabulu; 12 muanda ta tukuete kulua na bantu, anka tukuete kulua na mbulamatadi, mafumu na bakunkushi ba uno ndumbuluilo a ino mifuto, na bisaka bia bikudi bibi bi mu ma mbalo a muiyilu. 13 Nyi buakinyi, atayi bina ngoshi bioso bilombane abifiki kui Efile Mukulu, bua’shi numone bia kuikala banyingie muifuku di bubi, na bua’shi kunyima kua kulombasha mianda yoso, nushale banyingie.

14 Biabia ikalayi banyingie, bafuale bia binyibinyi mu kifuka bu mukaba, na bafuale ngabo a pa kiadi a kululama, 15 na bafuale bilato ku ngua* yenu bua kuikala na kisumi kia kulungula mukandu wibuwa wa butaale. 16 Kukatusha bino bioso, atayi ngabo mukata a lukumiino aanukashimi naye mikietue yoso ya mubi ayitembe kalo. 17 Dingi, nukumiine kifulu kia kipandilo, na lupete lua ngoshi lua kikudi, kuamba’shi eyi di’Efile Mukulu, 18 pa nukuete kuela nteko ya mishindo yoso, na kuiyaya misango yoso mu nteko ku bukuashi bua bukome bua kikudi. Bua wawa muanda ikalayi bapasukie na nutungunukie na kuisendeela bua beselele boso kushi kukooka. 19 Tekayi namu buande, bua’shi mpete mayi a kuakula panfungula mukanua muande, bua’shi mmone bia kuakula n’eshimba dinyingie pangukisha mianda ifuame ya kishila ya mukandu wibuwa, 20 wankuete kulesha mpala yao mu nkano,* na bua’shi ngakule n’eshimba dinyingie pabitale wawa mukandu wibuwa, nka bu abitungu’shi ngakule.

21 Biabia, bua’shi anue namu nuukie biandi na kia nkuete kukita, mukuetu a kifulo Tishike muikale mufubi sha lulamato mu Muanana, akenulungula mianda yoso. 22 Namutumu kuanudi bua uno muanda, bua’shi nuukie biatudi na bua’shi anyingishe mashimba enu.

23 Butaale na kifulo na lukumiino abifiki kui Efile Mukulu Nshetu na kui Muanana Yesu Nkidishitu, bikale na bakuetu. 24 Kalolo kekale kui baaba boso bafule Nfumuetu Yesu Nkidishitu na kifulo kia loso.