MUKANDA KUI BENA FIDIPE

1 Ami Mpoolo na Timote ba mpika ba Yesu Nkidishitu, kui beselele boso be mu buumune na Nkidishitu Yesu be mu Fidipe, pamune na bakunkushi na bafubi ba midimo:

2 Kalolo na butaale abifiki kui Efile Mukulu muikale Nshetu na kui Muanana Yesu Nkidishitu bikale nenu.

3 Natumbulaa Efile Mukulu ande misango yoso yanenutentekiesha 4 mu kuiyaya kuande koso buenu mu nteko. Neyaya misango yoso na muloo, 5 muanda wa bianukuete kukuatshishena mukandu wibuwa kubanga muifuku dia kumpala mpa na binobino. 6 Muanda ne mushinkamishe’shi Efile Mukulu babangile mufubo* wibuwa muanudi, akeufisha ku nfudiilo mpa na kuifuku dia Nkidishitu Yesu. 7 Bibuwa nnangushene nka bino pabinutale anue boso, muanda ne nenu muishimba diande, anue abankuatshishena mu nkano yande na kunkuasha bua kukaluila mukandu wibuwa ku mbulamatadi.*

8 Muanda Efile Mukulu nkamonyi ka biandi na lukalo luibukopo lua kuinumona anue boso, na biandi na kifulo kikata buenu nka bu kinakio Nkidishitu Yesu. 9 Na bino nyi biankuete kutungunuka na kuteka bua’shi kifulo kienu kitungunukie na kunyisha kufuima pamune na kiukilo kia binyibinyi na lushinguluilo loso lua mianda; 10 buanudia kushinkamisha mianda ina muulo ukata, bua’shi nuikale bashi na matope na kupela kukokosha bangi mpa na kuifuku dia Nkidishitu; 11 na bua’shi nuwushibue na kikuba kia kululama akifiki kui Yesu Nkidishitu, bua nkumo na ntumbo y’Efile Mukulu.

12 Binobino bakuetu, nakumiina nuukie’shi, mianda yandi mufumankane nayo ngikuashe bua’shi mukandu wibuwa wende kumpala, 13 mu kipaso kia’shi nkano yande pa muanda wa Nkidishitu ngiukibue patooka kui Balami boso ba muibalasa dia nfumu a bena Loma na kui bangi bantu boso. 14 Binobino, bakuetu bebungi mu Muanana mbanyingie pa muanda wa nkano yande, na bakuete kunyisha kulesha eshimba dinyingie bua kulungula eyi di’Efile Mukulu kushi kutshina.

15 Eyendo, bangi bakuete kulungula pabitale Nkidishitu pa muanda wa luabi na kuipikena, anka bangi namu bakuete kulungula na binangu bibuwa. 16 Baaba abalungula na binangu bibuwa abalungula pabitale Nkidishitu na kifulo muanda abauku’shi, naadi musangudibue bua kukaluila mukandu wibuwa; 17 anka baaba abalungula pabitale Nkidishitu na luabi na kuipikena, abebikitshi na kikudi kia kuikakena kushi na binangu bibuwa, muanda be na binangu bia kunkimbila nkalakashi mu nkano yande. 18 Abitusha bipeta kinyi? Mu mishindo yoso, biabikala mu bu nsesa sunga mu binyibinyi, boso bakuete kulungula pabitale Nkidishitu. Na ne na muloo wa biabia, dingi natungunuka nka na kuikala na muloo, 19 muanda nauku’shi bino abikanfisha ku kipandilo ku bukuashi bua nteko yenu na ku bukuashi bua kikudi kia Nkidishitu. 20 Bino bi mu kuipushena na kutengiela kuande n’eshimba dioso na lukulupilo lua’shi, ntankakuatshika buufu mu mushindo su ngupeela, kadi mu kuakula kua patooka n’eshimba dinyingie, Nkidishitu atumbishibue binobino, nka bu bibaadi atumbishibua misango yoso kumpala, ku bukuashi bua mbidi yande, biabikala kukiila ku lufu sunga ku muwa.

21 Muanda buande’mi, su ne na muwa, ne na muwa bua Nkidishitu na su nafua nyi mbua buwa buande.* 22 Biabia su ne na muwa mu mbidi, nyi nkipeta kia mufubo wande; na kiakia kiandi mulombene kusangula, ntanekiukisha nya. 23 Nkuete kukakiibua pankatshi pa ino mianda ibidi, muanda ne na lukalo lua kupoososhibua na kuikala na Nkidishitu, na bino mbikile buwa. 24 Anka buande’mi mbikile buwa bua’shi nshaale mu mbidi pa muanda wenu. 25 Biabia bu biandi na kuno kushinkamisha, nauku’shi nakashala nenu na, nakatungunuka na kuikala nenu anue boso bua’shi nuende kumpala, na bua muloo wenu mu lukumiino, 26 bua’shi muloo wenu mui Nkidishitu Yesu unyishe kufuima pa muanda wande, pankekala nenu dingi.

27 Anka, ikalayi na nshalelo muipushene na mukandu wibuwa pabitale Nkidishitu, bua’shi sunga nafika mu kuinumona sunga’shi ntshi panka, mpushe nkumo ibuwa pabinutale, na’shi nui banyingie mu buumune,* na nui na kepatshila kamune,* anuitatshisha bua kufuba pamune, bua lukumiino lua mukandu wibuwa, 28 na tanutshinanga beshikuanyi benu mu muanda su ngumune. Muanda kukutua kuenu kua kutshina nyi nkishinkamiisho kia’shi abakabutuka na kia’shi anue anukapanda; na bino abifiki kui Efile Mukulu. 29 Muanda babenupeele kinemo pa muanda wa Nkidishitu, kushi penda buanudia kutuula lukumiino luenu muadi, kadi na bua’shi nukiengie pa muanda waye. 30 Muanda nukuete kufumankana na nkalakashi yanubaadi anumono kuanfumankana nayo, na y’anupusha’shi nkianfumankana nayo mpa na binobino.

2 Kitayi muenu moso bua kunyingisha bangi mu Nkidishitu, kuibasamba mu kifulo, na kuibapa bukuashi bua mu kikudi na kifulo na lusa, 2 Kitayi bia’shi muloo wande wikale ulombane, pa’nue kuikala na binangu bimune na kifulo kimune na pa’nue kuikala mu buumune bua binyibinyi na kinangu kimune. 3 Tanukitanga kintu su nkimune na kinangu kia kuipikena sunga na kinangu kia kuimona bu bakile bangi, anka na kuiyisha koso, ikalayi anumono bangi bu be kunundu kuenu, 4 na tanuikimbilanga nka penda buwa buenu, anka nukimbe namu buwa bua bangi.

5 Ikalayi na binangu bu bibaadi nabio Nkidishitu Yesu, 6 Sunga biekala’shi baadi mu kinfuanyi ki’Efile Mukulu, ta mutompe sunga kupuandikisha bua kuikala mumune n’Efile Mukulu nya. 7 Anka baadi muiyikashe bisumanga pa kukumiina kuikala bu mpika na, aye nkufika bu muntu.* 8 Dingi pabafikile bu muntu,* baadi muiyishe aye nabene na aye nkukookiela mpa na ku lufu, eyendo, lufu ku mutshi wa makienga.* 9 Nyi buakinyi Efile Mukulu baadi mumutuule kunundu kua bintu bioso na aye nkumupa na kalolo koso eshina di kunundu kua angi mashina oso, 10 bua’shi boso be muiyilu na be pa nsenga mpa na be muushi mua nsenga bakuname muishina dia Yesu 11 na bua’shi edimi dioso diukie patooka’shi Yesu Nkidishitu nyi Muanana, mu ntumbo y’Efile Mukulu Yaya.

12 Biabia bakuetu ba kifulo, nka bu bianukookielaa mafuku oso kushi penda pandi panka, kadi bikishekishe binobino na bukidi boso bu bianshii panka, tungunukayi na kuitatshisha bua kipandilo kienu na kutshina na kusuusa. 13 Muanda Efile Mukulu nnaye enunyingisha muyile kukumiina kuaye, enupa lukalo na bukome bua kukita mianda. 14 Tungunukayi na kukita mianda yoso kushi miunuuno na kuikakena, 15 buanudia kuikala bana b’Efile Mukulu bashii matope, bashi na muanda na bashii kato munkatshi mua kino kipungo kiluile, muanukuete kumunyika etaata bu bimunyi pa nsenga, 16 nuikale balamate bi bukopo ku eyi dia muwa. Biabia nekala na kabingilo ka kuikala na muloo muifuku dia Nkidishitu, muukie’shi ntshinaadi musuukie bisumanga na’shi, ntshinaadi mufube mufubo wibukopo bisumanga nya. 17 Biabia sunga nekala na kia kupongoolua bu mulambu wa kitomuanga, nkuete kukuatshishena ku kuitatshisha kuenu, na ku mufubo* wanukuete kukitshina Efile Mukulu na lukumiino, biabia nekala na muloo na kusepeela nenu boso pamune. 18 Mu mushindo umune, anue namu nui na kia kuikala na muloo na kusepeela pamune nami.

19 Biabia nankulupila mui Muanana Yesu bua kutuma Timote kuanudi binobino, bua’shi nekale munyingishibue p’abakandungula bianudi. 20 Muanda ntshi na ungi muntu e na binangu bibuwa bu biaye apasukila nkalo yenu n’eshimba dimune. 21 Muanda bangi boso abakimbi nka penda buwa buabo kushi bua Yesu Nkidishitu. 22 Anka anue banabene anuuku’shi Timote mmuleshe kishima, muanda nka bu muana na nshaaye, mmufube nami ngofu bua kuyiisha mukandu wibuwa kumpala. 23 Biabia aye nyi ankulupila kutuma musango umune pankamono abiende mianda yande. 24 Mbinyibinyi ne mushinkamishe’shi, Muanana akankuasha namu bua kufika kuanudi binobino.

25 Anka bua binobino, namono’shi bi na muulo bua kuinutumina mukuetu Epafrodite muikale muina mufubo nami, na muina ngoshi nami na, anubaadi batume bua kunkuasha ku mufubo wande na kupua nkalo yande, 26 muanda e na lukalo lukata lua kuinumona anue boso na, mmuinyongole muanda nubaadi bapushe’shi baadi na maladi. 27 Mbinyibinyi, mmukumbe ngofu pepi na lufu; anka Efile Mukulu baadi mumufuile lusa, kushi penda aye nabene, mpa n’ami namu bua’shi ntshitentekanga kinyongua pa kingi. 28 Nyi buakinyi, namutumu bukidi bukidi bua’shi panumumono, nuikale dingi na muloo na bua’shi ntshikambanga kuinyongola. 29 Biabia mukukileyi na muloo nka bu bianukukilaa balongi ba Muanana na, tungunukayi na kunemeka bantu be biabia, 30 muanda bakiebele kufua pa muanda wa mufubo* wa Nkidishitu, aye nkutuula muwa waye mu masaku bua kunkuasha muanda tanubaadi panka bua’shi nunkuashe.

3 Nfudiilo a bioso bakuetu, tungunukayi na kuikala na muloo mu Muanana. Buande’mi, tabinkalakasha kuinufundila nka mianda imune imune, na mbua buwa buenu.

2 Ikalayi badimukie pabitale bantu abakitshi mianda bu mbua; na baaba abafuisha mianda ibubi; na ikalayi badimukie pabitale baaba abetapa pa mbidi.* 3 Muanda atue tui na kusadiibua kua binyibinyi, tukuete kukita mufubo wa kishila ku bukuashi bua kikudi ki’Efile Mukulu na, atuitumbisha mu Nkidishitu Yesu na tatui batuule lukulupilo luetu mu mianda ya ku mbidi, 4 mu bantu boso, ami ne na tubingilo tuibungi tua kukulupila mu mianda ya ku mbidi.

Su kui muntu apuandikisha’shi e na tubingilo tua kukulupila mianda ya ku mbidi, ami ne nato tui bungi: 5 babaadi bansale muifuku dia muanda, ne a mu muilo wa Isalele, a mu kisamba kia Benyamine, muina Ebelu mutandikue kui bena Ebelu; pabitale miiya, naadi Mufadiseo; 6 pa muanda wa kisumi kiande, naadi nakiengiesha kakongie, pabitale kululama akutuukila ku miiya, naadi muntu shi na matope. 7 Anka bintu bioso binaadi mupete, nebimono binobino bu bintu bishi na muulo* pa muanda wa Nkidishitu. 8 Dingi, namono bintu bioso nka bu bishi na muulo, pa kuibipuandikisha na kiukilo kikile bukata kia Nfumuetu Yesu Nkidishitu. Pa muanda waye ne mushimishe bintu bioso na nkuete kuibimona nka bu butshiafu,* bua’shi mpete Nkidishitu 9 na bua’shi bansangane mu buumune naye kushi pa muanda wa kululama akutuukila mu kukookiela kua Miiya, anka mpa muanda wa kululama akutuukila ku lukumiino mui Nkidishitu, kululama akufiki kui Efile Mukulu kuimeene pa lukumiino. 10 Kepatshila kande nka kuuka Nkidishitu na bukome bua lusangukilo luaye na kukienga namu nka bu bibakiengiele, na ne mukumiine kufua lufu nka bu lubaadi mufue, 11 bua kumona su mu mishindo yoso ne kupeta lusangukilo lua kumpala.

12 Kushi kuamba’shi ne mupue kupeta diadia efuto, sunga’shi ntandi mupuidikie, anka nkuete kukita muande moso bua kulombasha muanda ubaadi Nkidishitu Yesu munsangule bua kulombasha. 13 Bakuetu, ntanangushena’shi ne mupue kupeta efuto nya; anka ne mushinkamishe’shi: Bu biandi mupue kuluba mianda ibashala kunyima na, nantala mianda i kumpala, 14 nkuete kukita muande moso bua kulombasha kepatshila ka kupeta efuto dia luitamino lua muiyilu lu’Efile Mukulu, ku bukuashi bua Nkidishitu Yesu. 15 Biabia atue boso banyingie mu lukumiino, tunangusheneyi muyile mianda inaandi muinufundile, anka su tanunangushena mu uno mushindo, Efile Mukulu akenukuasha bua kunangushena biabia. 16 Biabia sunga tuekala bapue kuenda kumpala mu mushindo kinyi, tutungunukieyi nka na kutambuka mu mulongo mu diadia eshinda dimune.

17 Bakuetu anue boso ngambuleyi, na nutungunukie na kubekieela bantu abatambuka mu kuipushena na kileshesho kibaatudi benulekiele. 18 Muanda kui bantu bebungi bakuete kukita mianda bu beshinkuanyi na Nkidishitu na beshikuanyi ba mutshi waye wa makienga,* ne mupue kuibatemuna misango ibungi anka binobino nebatemuna na mpolo ku meso. 19 Nfudiilo aabo nyi nkabutu, efile aabo nyi efu diabo, ntumbo yabo ngikale binyibinyi buufu buabo, na mbatuule binangu biabo ku bintu bia pa nsenga. 20 Anka kietu kibundi ki muiyilu na tukuete kutengiela n’eshimba kuiyilu mupaashi akatukila muiyilu, Muanana Yesu Nkidishitu, 21 aye akashintuula mbidi yetu ya kubofula bua’shi ikale bu mbidi yaye ya ntumbo ku bukuashi bua bukome buaye bua kukaanya abumukuasha bua kutuula bintu bioso ku matalua aaye.

4 Anue bakuetu ba kifulo na bandi na lukalo lukata lua kumona, anue bekale muloo wande, na kifulu kiande kia ntumbo, ikalayi banyingie mu uno mushindo mu Muanana.

2 Natekie Evodi na Sentishe buabadia kuikala kintu kimune* mu Muanana. 3 Nakutekie namu obe mukuetu muina mufubo sha lulamato, bua kutungunuka na kukuasha bano bana bakashi balue ngoshi* pamune nami bua mukandu wibuwa, pamune na Klema na bangi bena mufubo nami bafundibue mashina mu mukanda wa muwa.

4 Ikalayi na muloo nsaa yoso mu Muanana. Nakula dingi’shi, ikalayi na muloo! 5 Kitayi bia’shi bantu boso bamone’shi ta nui na mianda ibukopo. Muanana taadi pepi. 6 Tanuikalakashanga* bua muanda su ngumune, anka mu mianda yoso, ku bukuashi bua nteko, kuiyaya pamune na lutumbu ukishayi Efile Mukulu nkalo yenu; 7 na butaale bu’Efile Mukulu bukile binangu bioso abulama mashimba enu na binangu bienu ku bukuashi bua Nkidishitu Yesu.

8 Nfudiilo a bioso bakuetu, mianda yoso ya binyibinyi, mianda yoso ipuandikile kuata na muulo, mianda yoso ilulame, mianda yoso iselele, mianda yoso ilombeene kufudibua, mianda yoso ilombene kukaanyibua, mianda yoso i na nkumo ibuwa, na mianda yoso ilombene kutumbishibua, tungunukayi na kunangushena ku ino mianda. 9 Mianda ibaanudi balongie na ibaanudi bakumiine, na ibaanudi bapushe mpa na kumona kuandi, eyitumikileyi na Efile Mukulu a butaale akekala nenu.

10 Binobino ne na muloo ukata mu Muanana muanda nubabanga dingi kungielela binangu. Sunga biekala’shi nubaadi anungielela binangu, nubaadi bakutue mushindo wa kuibindeesha. 11 Ntangakula bino muanda’shi ne na lukalo na bintu, muanda ne mulongie bia kusanka na biandi nabio, sunga nekala mu nshalelo e naminyi. 12 Nauku bia kushala pandi na bintu bipeela, na pandi na bintu bibungi, mu mianda yoso sunga mu nshalelo oso, ne mulongie kiandia kukita pandi na nsala sunga pandi muikute, na biandia kukita pandi na bintu bibungi sunga pandi bisumanga. 13 Mu mianda yoso napetaa bukome, ku bukuashi bua yawa ebumpeyaa.

14 Sunga mbiabia, nubaadi bakite kalolo pa’nue kunkuasha mu mpombo yande. 15 Mu binyibinyi, anue bena Fidipe anuuku’shi kunyima kua’nue kupusha mukandu wibuwa bua musango wa kumpala panaadi nakatukila ku Maseduane, takui kangi kakongie kabaadi kankuashe sunga kukumiina bukuashi buande kukatusha nka penda anue; 16 Muanda panaadi mu Tesalonike, nubaadi batume bintu bua kulombasha nkalo yande kushi penda musango umune kadi misango ibidi. 17 Ta mmuanda wa’shi nkuete kukimba bia buntu, muanda nakimbi penda’shi nupete efuto adifiki mu kutuusha kuenu kua bintu. 18 Biabia ne na bintu bioso biandi nabio lukalo, bikile mpa na bungi. Binobino panapete bintu bianuntumiine na Epafrodite, ntandi na bintu bibungi, bintu bia mapembue ebuwa, mulambu ukuminyibue, ausankisha Efile Mukulu. 19 Efile Mukulu ande namu akenulombeesha nkalo yenu yoso muyile bupeta bua ntumbo yaye ku bukuashi bua Nkidishitu Yesu. 20 Binobino Efile Mukulu etu na Nshetu atumbishibue bua loso. Amene.

21 Nungielele beselele boso be mu buumune na Nkidishitu Yesu mioyo. Bakuetu bandi nabo abenutumina mioyo. 22 Beselele boso, kadi bikishekishe baaba ba mu nshibo ya Kezare, abenuele mioyo.

23 Kalolo ka Muanana Yesu Nkidishitu kekale na binangu bianukuete kulesha.