MUKANDA KUI BENA KOLOSE

1 Ami Mpoolo, mutumibua a Nkidishitu Yesu ku bukuashi bua kikiebe ki’eshimba di’Efile Mukulu, na mukuetu Timote, 2 kui beselele na bakuetu be na lulamato mu buumune na Nkidishitu Yesu be ku Kolose:

Kalolo na butaale abifiki kui Efile Mukulu Nshetu bikale nenu.

3 Atutumbula Efile Mukulu misango yoso, muikale Nshaye na Nfumuetu Yesu Nkidishitu, p’atusambila pa muanda wenu, 4 kasha tuapusha bua lukumiino luenu mui Nkidishitu Yesu na kifulo kianudi nakio bua beselele boso 5 pa muanda wa lukulupilo luabadi benulamine muiyilu. Nubaadi bapue kupusha pabitale luno lukulupilo ku bukuashi bua bia binyibinyi bia mukandu wibuwa 6 ubaadi ufikie kuanudi. Nka bu bi mukandu wibuwa aupaa bikuba na aupalakana pa nsenga poso, nyi bikuete kukitshika munkatshi muenu kubanga kuifuku dianubaadi bapushe na baukie kalolo k’Efile Mukulu mu binyibinyi. 7 Biabia nyi bianubaadi balongie kui muina mufubo netu Epafrase, muikale muina mufubo* a Nkidishitu sha lulamato kuete kufuba pa mbalo yetu. 8 Baadi dingi muitulungule bi kifulo kianudi baleshe ku bukuashi bua kikudi.

9 Nyi buakinyi kubanga nka efuku dibaatupushishe uno muanda, tatui balekie kuela nteko pa muanda wenu na, atutekie bua’shi nuikale bawule na kiukilo kia binyibinyi kia kikiebe ki’eshimba di’Efile Mukulu mu binangu bioso na mpushisho a mu kikudi, 10 bua’shi numone bia kutambuka mu mushindo aukumina Yehowa na kumusankisha mu mianda yoso, panukuete kupaa bikuba mu mufubo oso wibuwa na kutama ku kiukilo kia binyibinyi ki’Efile Mukulu; 11 na bua’shi nunyingishibue na bukome boso muyile bukome buaye bua ntumbo, buanudia kumona bia kunyingiila mu mianda yoso na luishinko na muloo, 12 panukuete kutumbula Yaya, aye baadi muinuikashe balombane bua kupeta bupianyi pamune na beselele muitaata.

13 Baadi muitupaashe ku matalua a mufito, na aye nkuitutuesha mu bufumu bua Muana aaye a kifulo, 14 kukiila kuadi atupoososhibua ku bukuashi bua nkuulo, kufuidibua lusa bua miluisho yetu. 15 Mmuikale kifuanyi ki’Efile Mukulu shamuekaa, muana mbedi a ku bipangua bioso; 16 muanda ku bukuashi buaye bingi bintu bioso bibaadi bipangibue muiyilu na pa nsenga, bintu abimueneka na bintu bish’abimueneka, biabikala ma nkuasa a bufumu,* sunga mafumu, sunga mbulamatadi, sunga matalua. Bingi bintu bioso bibaadi bipangibue ku bukuashi buaye na pa muanda waye. 17 Dingi, baadi kuanka kumpala kua bingi bintu bioso, na ku bukuashi buaye bingi bintu bioso mbifikie mu kuikala kuanka, 18 Na mmuikale mutue wa kakongie, ako kekale mbidi yaye. Mmuikale mbangilo, muana mbedi a ku baaba bafue bua’shi ekale muntu a kumpala mu mianda yoso; 19 muanda Efile Mukulu baadi mukumiine kuikasha bintu bioso bilombane muadi, 20 ku bukuashi buaye, Efile Mukulu alusha kipuano na bingi bintu bioso, biabikala bintu bi pa nsenga sunga bintu bi muiyilu, p’aye kuikasha butaale ku bukuashi bua mase abaadi muponeshe ku mutshi wa makienga.*

21 Eyendo, anue babaadi kula n’Efile Mukulu na beshikuanyi baye kala, muanda binangu bienu bibaadi bitadiile ku mianda ibubi, 22 mmuinualushe dingi mu kipuano naye ku bukuashi bua mbidi ya Nkidishitu na lufu luaye, bua’shi enulubule kumpala ku’Efile Mukulu, bekale beselele bashi na matope na bashi na muanda su ngumune— 23 bino abikitshika anka su nubatungunuka na kuikala na lukumiino, bashimate pa kitako kinyingie na bash’abasanyishua, kushi kutadiila’shi benuyiishe kula na lukulupilo lua uno mukandu wibuwa wanubaadi bapushe na ubaabadi balungule munkatshi mua bipangua bioso mu nsenga yoso ishima.* Ami Mpoolo nafikile mufubi a uno mukandu wibuwa.

24 Binobino ne na muloo mu makienga ande pa muanda wenu, na nkuete kupeta makienga a Nkidishitu na nantungunuka na kukienga pa muanda wa mbidi yaye, ayo ikale kakongie. 25 ne mufikie muina mufubo a kano kakongie mu kuipushena na mufubo wa kulama bintu w’Efile Mukulu ubaabadi bampe bua muanda wenu, bua kulungula eyi di’Efile Mukulu bikata, 26 mianda ifuame ya kishila ibaadi ifuamishue kubanga mu ndumbuluilo a kala na mu bipungo bia kala. Kadi binobino ngifumbulue kui beselele baye, 27 babaadi Efile Mukulu mukumiine kuukisha munkatshi mua ingi miilo, ntumbo ya bupeta bua ino mianda ifuame ya kishila ayo ikale Nkidishitu mu buumune nenu, kuamba’shi lukulupilo lua ntumbo yaye. 28 Aye nyi atulungula bantu boso, atudimusha na kulongiesha boso mu binangu bioso, bua’shi tumone bia kulubula muntu oso mulombane mu buumune na Nkidishitu. 29 Nyi buakinyi nkuete kufuba bi bukopo bua uno muanda, netatshisha ku bukuashi bua bukome buaye bukuete kufuba muandi.

2 Muanda nakimbi nuukie biankuete kuitatshisha bikata pa muanda wenu, pa muanda wa baaba be ku Laodise na pa muanda wa baaba boso bashabandile kummona.* 2 Bua’shi mashimba aabo anyingishibue na bua’shi bekale bebungie mu buumune mu kifulo, buabadia kuikala boso na miabi* ayifiki mu kushinkamisha kua mpushisho aabo bua’shi bapete kiukilo kia binyibinyi kia mianda ifuame ya kishila y’Efile Mukulu, kuamba’shi Nkidishitu. 3 Mapeta oso e na muulo na kiukilo mbifuamishibue kalolo muadi. 4 Nakula bino bua’shi muntu su ngumune tenulubishanga na ngakuilo a bulamalama. 5 Sunga biekala’shi ntshi nenu ku mbidi, ne nenu mu kikudi, na ne na muloo wa kumona bianudi batuule mianda mu mulongo na bianudi na lukumiino lunyingie mui Nkidishitu.

6 Biabia, nka bu bibaanudi bakumiine Muanana Nkidishitu Yesu, tungunukayi na kutambuka mu buumune naye, 7 bamene mishi na bashimate muadi na banyingie mu lukumiino nka bu bibaabadi benulambukishe na nuikale baule na lutumbu.

8 Ikalayi badimukie bua’shi muntu su ngumune tenukuatanga ku bupika* ku bukuashi bua binangu bia bantu, na mianda ya madimi muyile bipikua bia bantu na mianda ya pa nsenga kushi muyile abikiebe Nkidishitu; 9 muanda ngikashi yoso y’Efile Mukulu ngilombene mui Nkidishitu. 10 Biabia ku bukuashi buaye, tanui bakutue kintu su nkimune, aye muikale kunundu kua mbulamatadi na matalua oso. 11 Ku bukuashi bua kipuano kienu naye, nubaadi basadiibue kushi kusadiibua kukitshibue na maasa kua kukaasha kipindi kia mbidi, kadi nku bukuashi bua kusadiibua akufiki kui Nkidishitu. 12 Muanda nubaadi bashikiibue naye mu lubatshisho luaye, na ku bukuashi bua kipuano kienu naye, babaadi benubuushe naye pamune ku bukuashi bua lukumiino luenu mu mifubo ya kukaanya y’Efile Mukulu, aye baadi mumubuushe ku lufu.

13 Dingi, sunga mbianubaadi bafue mu bilubilo bienu, na bianushii basadiibue ku mbidi, Efile Mukulu baadi muinuikashe na muwa pamune naye. Na baadi muitufuile lusa na kalolo koso ku miluisho yetu yoso 14 na baadi mushime mukanda ubaadi ufundibue ku maasa ubaadi na miiya ibaadi ayikutuena netu. Baadi muiwushimishe pa kuiwukookola ku mutshi wa makienga.* 15 Ku bukuashi bua mutshi wa makienga, baadi mulekie mbulamatadi na ba sha matalua bisumanga, na baadi muibatuushe patooka, aye nkulesha’shi baadi muibatshimune.

16 Biabia, muntu su ngumune tenutshibilanga kiimu pabitale kiakia kiaanudi na kiakia kianutomo sunga pabitale kukita misangelo sunga pabitale musangelo wa kubaluka kua mueshi sunga wa Sabato. 17 Bino bintu mbikale muesheshi wa mianda ayikafiki, anka bia binyibinyi bi mui Nkidishitu. 18 Tanutadilanga muntu su ngumune asankila mu kuiyisha kua madimi, na akitshi lulanguilo lua mikeyilu enukutshishue efuto. Muanda muntu e biabia “mmulamate* nka” penda ku bintu bibaadi mumone, na etumbisha bua binangu biaye bia bisumanga, 19 na yawa muntu ta mmushale mulamate ku mutue, kuamba’shi kui yawa kuete kupa mbidi yoso ishima biabia biayidi nabio lukalo na kuete kukuasha bipindi bioso buabidia kufuba mu buumune, ku bukuashi buaye, Efile Mukulu kuete kukita bia’shi mbidi yoso yende na kukula.

20 Su nubaadi bafue pamune na Nkidishitu pabitale bintu bia bisumanga bia pa nsenga, buakinyi nukii na nshalelo bu a bantu ba pa nsenga pa kutungunuka na kukookiela ku miiya ayamba’shi: 21 “Tuatanga, totompanga, tokumanga” 22 muanda ino miiya ngitale bintu bioso abiluila p’abebifubisha, muyile miiya na malongiesha a bantu. 23 Ino miiya ayimueneka bu ya binangu, anka ta ngilombene kukuasha bantu bua kukambila nkalo yabo ya mbidi, bino abikitshika muanda bantu abakimbi abo banabene mushindo wabadia kulanguila Efile Mukulu, be na kuiyisha kua madimi na abakiengiesha mbidi yabo.

3 Biabia su nubaadi babuushibue ku lufu pamune na Nkidishitu, tungunukayi na kukimba mianda ya muiyilu, muamua mui Nkidishitu mushale ku mboko ibalume y’Efile Mukulu. 2 Tungunukayi na kutuula binangu bienu ku mianda ya muiyilu kushi ku mianda ya pa nsenga. 3 Muanda nubaadi bafue, na muwa wenu ubaadi ufuamishibue pamune na Nkidishitu mu buumune n’Efile Mukulu. 4 Apakaleshiibua Nkidishitu, aye muikale muwa wetu, anue namu anukaleshiibua pamune naye mu ntumbo.

5 Nyi buakinyi, ipayi bipindi bienu bia mbidi* pabitale lukiebanokiebano,* mianda ibutete, lukalo lukile bukopo lua kuilaalena, luabi luibubi, na malaka ebubi, abio bikale bu lulanguilo lua ma nkishi. 6 Muanda nsungu y’Efile Mukulu ayifiki pa muanda wa ino mianda. 7 Biabia nyi bianubaadi namu anukitshi mianda mu nshalelo enu a kala. 8 Kadi bua binobino, abitungu nulekie ino mianda yoso: nsungu ibukopo, bukielo, mianda ibubi, kukayishena, na kupela kuakula mianda i buufu mukanua muenu. 9 Tanuidimbenanga muntu na mukuabo. Anka, fuulayi bumuntu bua kala na bikitshino biabo, 10 na nufuale bumuntu bupia abuende na kushintuluka buabudia kuikala bupia ku bukuashi bua kiukilo kia binyibinyi muyile kinfuanyi kia Yawa bebupangile, 11 mu bumuntu bupia, tamui muina Greke sunga muina Yunda, tamui muntu musadiibue sunga shii musadiibue, tamui muenyi, muina Skite,* mpika, sunga muntu e bulungantu; anka Nkidishitu mmuikale bintu bioso na mu bioso.

12 Biabia, bu bianudi bantu babadi basangule kui Efile Mukulu, ba kishila na bafudibue, fualayi kifulo kikata, na lusa, kalolo, kuiyisha, kupopeela, na luishinko. 13 Tungunukayi na kuileshena luishinko ku muntu na muntu na kuifuilena lusa n’eshimba dimune. Sunga biekala’shi muntu e na kabingilo ka kufiitshila ungi munda. Nka bu bibaadi Yehowa muinufuile lusa n’eshimba dimune, anue namu abitungu nukite nka biabia. 14 Kadi kukatusha biabia bintu bioso, fualayi kifulo, muanda akinubungu mu buumune bupuidikie.

15 Dingi, butaale bua Nkidishitu bukunkushe* mashimba enu, muanda nubaadi betaminyibue ku buabua butaale bua kukita mbidi imune. Na ikalayi anulesha lutumbu. 16 Eyi dia Nkidishitu dishaale muanudi na binangu bioso. Tungunukayi na kuilongieshena na kuinyingishena na misambo, na kutumbisha Efile Mukulu na ngono ya mu kikudi yanuyimbi na lutumbu, nuyimbile Yehowa mu mashimba enu. 17 Biabia bioso bianukitshi, biabikala mu ngakuilo sunga mu bikitshino, kitayi bioso muishina dia Muanana Yesu, na kutumbulanga Efile Mukulu Yaya ku bukuashi buaye.

18 Anue bakashi, kookielayi balume benu, nka bu biabidi bipuandikile mu Muanana. 19 Anue balume, tungunukayi na kufula bakashi benu na, tanuikalanga na bukielo kuabadi. 20 Anue bana, kookielayi benutande mu mianda yoso, muanda kukita bino akusankisha Muanana. 21 Anue ba Nshe bana, tanufiitshishanga bana benu munda bua’shi tababofulanga* ku mashimba. 22 Anue ba mpika, kookielayi ba nfumuenu mu mianda yoso, kushi penda nsaa y’abenutala bu’nue abakimbi kusankisha penda bantu, kadi nuibakookiele n’eshimba dimune na kutshina kua Yehowa. 23 Mianda yoso y’anukitshi, eyikiteyi na anyima* enu oso bu’nue abeyikitshina Yehowa, kushi bu’nue abeyikitshina bantu, 24 muanda anuwuku’shi kui Yehowa nyi kuanukapete bupianyi bu efuto. Biabia fubayi bu ba mpika ba Nfumu, Nkidishitu. 25 Mbinyibinyi, yawa akitshi muanda wibubi, abakamupa efuto bua muanda wibubi wadi mukite, na takui ntondo.

4 Anue ba nfumu, kitshinayi ba mpika benu mianda na kululama mu mushindo wibuwa, muanda anuuku’shi anue namu nui na Nfumu e kunundu kuenu muiyilu.

2 Nyingiilayi mu nteko, ku bukuashi buayo, shalayi bapasukie na kutumbula Efile Mukulu. 3 Dingi, etutekieleyi namu, bua’shi Efile Mukulu etupe mushindo watudia kulungula mianda ifuame ya kishila pabitale Nkidishitu, muanda nyi kiabadi bangielele mu lukanu, 4 na bua’shi neyilungule mu mushindo aupushika kalolo nka bu biabitungu.

5 Tungunukayi na kutambuka na binangu kumpala kua bantu be paasha pa kakongie, na fubishayi nsaa yenu kalolo. 6 Bishima bienu bikale bibuwa nguba oso, biele mungua, bua’shi nuwukie bia kualuula muntu oso.

7 Tishike mukuetu a kifulo na muina mufubo e na lulamato na mpika nami mu Muanana, enulungula mianda yande yoso. 8 Namutumu kuanudi bua’shi nuwukie biatudi na bua’shi enunyingishe ku mashimba. 9 Namutumu na Onezime, mukuetu sha lulamato na a kifulo, a munkatshi muenu; abakenulungula bioso bikuete kukitshika kuno.

10 Aristarke muina lukano naami enutumina mioyo, mpa na Maako mukuabo na Barnabe (yawa abaabadi benulungule bua kukuukila kalolo p’afiki kuanudi), 11 na Yesu abetanyina bu Yustuse, e munkatshi mua baaba basadiibue enutumina mioyo. Anka penda’bo nyi banfubu nabo bua Bufumu bu’Efile Mukulu, na mbekale kuandi bu nsulo ya kunyingishibua.* 12 Epafrase a munkatshi muenu, muikale mpika a Nkidishitu Yesu enutumina mioyo. Ekalakashaa mafuku oso bua buwa buenu mu nteko bua’shi nuikale banyingiile na baushibue na kushinkamisha kukata mu kikiebe ki’eshimba di’Efile Mukulu. 13 Nashinkamisha’shi kuete kuitatshisha bikata pa muanda wenu na pa muanda wa baaba be ku Laodise na be ku Hierapolise.

14 Luka, munganga mufudibue, enutumina mioyo, mpa na Demase. 15 Ngieleleyi bakuetu be ku Laodise mioyo, na mukuetu mukashi Nifa mpa na bena kakongie abebungilaa mu nshibo yaye. 16 Na su babaapu kuinubadikila uno mukanda, kitayi bia’shi bakeubadikie dingi mu kakongie ka Laodise na bua’shi anue namu nubadikie wawa wa ku Laodise. 17 Dingi, nulungule Arshipe’shi: “Tungunuka na kuitatshisha bua kulombasha mufubo uboodi mukumiine mu Muanana.”

18 Ino mmioyo yande’mi Mpoolo, yandi mufunde ku maasa ande. Tungunukayi na kutentekiesha nkano yande. Kalolo k’Efile Mukulu kekale nenu.