MUKANDA WA KABIDI KUI BENA TESALONIKE

1 Ami Mpoolo, na Silvanuse,* na Timote kui kakongie ka bena Tesalonike ke mu buumune n’Efile Mukulu Yaya na Muanana Yesu Nkidishitu:

2 Kalolo na butaale abifiki kui Efile Mukulu Yaya na Muanana Yesu Nkidishitu bikale nenu.

3 Bakuetu, tui mu kitungo kia kutungunuka na kutumbula Efile Mukulu pa muanda wenu. Bino mbilombane muanda lukumiino luenu lukuete kunyisha kuenda na kutama, na kifulo kianukuete kuileshena ku muntu na muntu kikuete kuenda na kutama munkatshi muenu. 4 Nyi buakinyi tukuete kuitumbisha pa muanda wenu munkatshi mua tukongie tu’Efile Mukulu, pa muanda wa kunyingiila na lukumiino luenu mu kukiengieshibua kuenu koso, na mu mianda ibukopo* yanukuete kufumankana* nayo. 5 Bino mbikale kishinkamiisho kia kiimu kia kululama ki’Efile Mukulu na abinuikasha balombanyine Bufumu bu’Efile Mukulu buanukuete kukiengiela.

6 Muanda bu bikale’shi Efile Mukulu mmululame, mbipuandikiile alusha mpombo kui baaba abenumuesha mpombo. 7 Kadi anue bakuete kukienga, anukapaashibua pamune netu apakafumbuka Muanana Yesu muiyilu na mikeyilu yaye i bukome 8 mu ndimi ya kaalo* p’akuete kufuisha kiimu kui baaba bash’abawuku Efile Mukulu na baaba bash’abakookiela mukandu wibuwa pabitale Nfumuetu Yesu. 9 Baaba bantu abakapete dinyoka dia kabutu ka loso na, abakashimina kumpala kua Muanana na kumpala kua ntumbo ya bukome buaye, 10 na biabia abikakitshika muifuku di’akafiki bua kutumbishibua pabitale beselele baye, na abakamutala na kukaanya kui boso babaadi baleshe lukumiino muanda nubaadi bakumiine bukamonyi bubaatudi batuushe munkatshi muenu.

11 Nyi buakinyi tukuete kuteka misango yoso buenu, bua’shi Efile Mukulu etu enubadikie bu balombene luitamino luaye, na bua’shi ku bukuashi bua bukome buaye, alombashe mianda yoso ibuwa ayimusankisha na mufubo oso wa lukumiino. 12 Biabia, eshina dia Nfumuetu Yesu aditumbishibua muanudi, n’anue namu anutumbishibua mu buumune naye muyile kalolo k’Efile Mukulu etu na ka Muanana Yesu Nkidishitu.

2 Biabia bakuetu, pabitale kipungo kia kuikala kuanka kua Nfumuetu Yesu Nkidishitu na pabitale kubungibua kuetu kuadi, atuinutekie’shi 2 tabenusanyishanga* bukidibukidi mu binangu bienu, sunga kuinutshinyisha ku bukuashi bu’eyi diyokielue* sunga ku bukuashi bua mukandu, sunga ku bukuashi bua mukanda aumueka bu aukatukila kuatudi, aulesha’shi efuku dia Yehowa tadidi kuanka.

3 Muntu tenulubishanga* mu mushindo su ngumune, muanda diadia efuku t’adikafiki kumpala kua’shi bantu batombokiele* Efile Mukulu na kumpala kua’shi muntu mubi aleshibue patooka, muikale muana a kabutu. 4 Kuete kuluisha na ekamisha kunundu kua kioso ki’abetanyina bu efile sunga kintu ki’abalanguila,* bua’shi ashale mu ntempelo a Efile Mukulu na kuilesha aye nabene patooka bu efile. 5 T’anutentekiesha’shi panaadi nki nenu naadi nenulungula ino mianda su?

6 Binobino anuuku kiakia akimukutshishua bua’shi aleshibue patooka mu kipungo kia’ye kilombane. 7 Eyendo, uno muanda ufuame wa kuipaa kua miiya ngupue kubanga kufuba mu bufiefie, anka aushala mu bufiefie mpa na apakakatushibua yawa kuete kumukutshishua binobino. 8 Akupu, yawa muntu mubi akaleshibua patooka, na Muanana Yesu akamuipaa na bukome* abutuuku mukanua muaye na kumushimisha pa kuilesha kua kuikala kuanka kuaye. 9 Anka kuikala kuanka kua yawa muntu mubi akuleshibua na bukitshishi bua Satana na mifubo* yoso ya bukome na bitunduilo bia madimi na bilengieleshi 10 na mianda ya madimi na ya kukutua kululama ya bipaso bioso bu dinyoka dia baaba abashimina muanda tababaadi bakumiine kufula bia binyibinyi bua’shi bamone bia kupaashibua. 11 Nyi buakinyi Efile Mukulu baadi muibatadiile bua’shi badimbibue na malongiesha a madimi bua’shi bakumiine mianda ya madimi, 12 bua’shi bamone bia kuibatshibila boso kiimu muanda tababaadi bakumiine bia binyibinyi, anka babaadi abasanka na kukutua kua kululama.

13 Biabia bakuetu, tui mu kitungo kia kutungunuka na kutumbula Efile Mukulu pa muanda wenu anue bafudibue na Yehowa, muanda Efile Mukulu baadi muinusangule kubanga ku mbangilo bua kipandilo p’aye kuinuikasha ba kishila, na kikudi kiaye na ku bukuashi bua lukumiino luenu mu bia binyibinyi. 14 Baadi muinuitanyine ku kino kipandilo, ku bukuashi bua mukandu wibuwa watukuete kulungula bua’shi numone bia kupeta ntumbo ya Nfumuetu Yesu Nkidishitu. 15 Biabia bakuetu, ikalayi banyingie na nushale balamate ku bipikua bibaanudi balongieshibue, biabikala ku bukuashi bua mukandu sunga bua mukanda aukatukila kuatudi. 16 Dingi Nfumuetu Yesu Nkidishitu aye nabene n’Efile Mukulu Nshetu aye baadi muitufule na mutuushe kusambibua kua loso na lukulupilo luibuwa ku bukuashi bua kalolo, 17 asambe mashimba enu na enunyingishe mu mianda yoso ibuwa, mu bikitshino na mu ngakuilo.

3 Nfudiilo a bioso bakuetu, tungunukayi na kuteka pa muanda wetu bua’shi eyi dia Yehowa ditungunukie na kupalakana bukidibukidi na, ditumbishibue nka bu biadikuete kutumbishibua kuakua kuenu, 2 bua’shi tupaashibue ku maasa a bantu bebubi na bantomboshi, muanda ta mbantu boso be na lukumiino nya. 3 Anka Muanana e na lulamato, na akenunyingisha na kuinukaluila kui yawa mubi. 4 Dingi tui bakulupile mui Muanana pa muanda wenu’shi nukuete kutumikila malango abaatudi benupe na, anukatungunuka na kuiatumikila. 5 Muanana atungunukie na kuludika mashimba enu kalolo ku kifulo ki’Efile Mukulu na mu kunyingiila pa muanda wa Nkidishitu.

6 Binobino bakuetu, atuinulungula bianudia kukita* muishina dia Nfumuetu Yesu Nkidishitu shi, nuilamuune kui mukuetu oso e na kafutakanyi na sh’alondo bipikua bibaanudi bapete kuatudi. 7 Muanda anue banabene anuuku akitungu’shi nukite buanudia kuituambula muanda tatubaadi bakite mianda na kafutakanyi munkatshi muenu, 8 na tatui badie bintu bia muntu bisumanga.* Anka mu mufubo* wibukopo na mu makienga tubaadi atufubu bufuku na kanya bua kupela kuikala bu bushito kui muntu su ngumune a kuanudi. 9 Ta nkuamba kua’shi tui bakutue matalua anka tubaadi bakumiine buatudia kuinulekiela kileshesho kianudia kulonda. 10 Muanda patubaadi nenu tubaadi atuinulungula’shi: “Su muntu takiebe kufuba, su nkudia tadianga.” 11 Muanda tui bapushe’shi bangi be na kafutakanyi munkatshi muenu, t’abakitshi mufubo su ngumune kadi abatuelakana mu mianda ishi ibatale. 12 Bantu be biabia atuibatumina dino eyi na kuibalungula mu Muanana Yesu Nkidishitu’shi, batumikie mufubo mu butaale buabadia kudia biakudia biabadi bapete’bo banabene.

13 Anka buenu’nue bakuetu, tanukookanga kukita mianda ibuwa. 14 Anka su kui muntu shatumikila eyi dietu di mu uno mukanda, mudimukileyi* na nulekie kuikala naye mu kipuano, bua’shi buufu bumukuate. 15 Na tanumumonanga bu muishikuanyi anka tungunukayi na kumulanga bu mukuenu.

16 Binobino Nfumu a butaale aye nabene enupe butaale misango yoso mu mishindo yoso. Muanana ekale nenu anue boso.

17 Luno nduimuno luande’mi Mpoolo, lua kuiyasa diande’mi nabene, nduikale bu kitunduilo mu mikanda yande yoso; uno nyi mushindo wanfundaa.

18 Kalolo ka Nfumuetu Yesu Nkidishitu, kekale nenu anue boso.