MUKANDA WA KUMPALA KUI TIMOTE

1 Ami Mpoolo mutumibua a Nkidishitu Yesu ku matalua a Efile Mukulu mupaashi etu na a Nkidishitu Yesu muikale lukulupilo luetu, 2 kui Timote* muana ande a binyibinyi mu lukumiino:

Kalolo na lusa na butaale abifiki kui Efile Mukulu Nshetu na Muanana Yesu Nkidishitu bikale nobe.

3 Nka bu binaadi mukunyingishe panaadi nakimbi kuenda ku Maseduane, binobino nakunyingisha bua kushala mu Efeso, bua kupelesha bangi bantu bua’shi tabalongieshanga bingi bipikua, 4 na’shi tabatuulanga binangu ku miisambo ya madimi na ku milongo ya butandua ya ba nkambua. Ino mianda tayi na muulo, ayifuisha penda mu kuakula mianda ishi na bishinkamiisho pamutue pa kutuusha kintu kampanda akifiki kui Efile Mukulu mu kuipushena na lukumiino. 5 Kabingilo ka dino elango nyi nkifulo akituukila kuishimba ditooka na ku kondo k’eshimba kebuwa na ku lukumiino lushi na bu nsesa. 6 P’abo kuenda kula na ino mianda, bangi bantu mbepaane ku miisambo ishi na muulo. 7 Abakumiina kuikala balambukishi ba miiya, anka t’abapusha inyi mianda yabakuete kuakula sunga yaaya yabakuete kushimikila kasele.

8 Aku namu atuuku’shi miiya i buwa su abeyifubila kalolo, 9 baukie’shi miiya i kuanka kushi bua muntu mululame kadi i kuanka bua baaba bash’abakumiina muiya be n’etombo, bash’abalanguila Efile Mukulu, ba nkitshishi ba miluisho, bashi na lulamato* bash’abanemeka bintu bia kishila, abayipaa ba mashabo na ba nyinabo, sunga abayipaa bangi bantu, 10 ba ntambushi a lusandi,* balume abelalena na balume naabo, batumbula, ba sha madimi, bantu abetshipi mianda yabash’abalombasha, na kingi kintu kioso ki mu kuikutuena na bulambukishi bui buwa 11 muyile mukandu wibuwa wa ntumbo w’Efile Mukulu a muloo, ubaabadi bampe.

12 Ne na lutumbu kui Nkidishitu Yesu Nfumuetu, aye baadi mumpe bukome, muanda baadi mummone bu’mi e na lulamato paaye kumpa mufubo,* 13 sunga biekala’shi kala naadi muntu asabuula Efile Mukulu na muntu akiengesha bangi, na shi na bukalanga, anka babaadi banfuile lusa muanda naadi nebikitshi kushi kuuka na ntshinaadi na lukumiino. 14 Kadi kalolo ka Nfumuetu kabaadi kakile bukata pamune na lukumiino na kifulo ki mui Nkidishitu Yesu. 15 Dino eyi adilondo ndia kukulupila na ndipuandikile kukuminyibua: Nkidishitu Yesu bafikile pa nsenga bua kupaasha ba sha miluisho. Na, ami ne a kumpala a ku baaba ba sha miluisho. 16 Anka, babaadi banfuile lusa bua’shi ku bukuashi buande, ami sha miluisho a kumpala, Nkidishitu aleshe luishinko luaye loso, pa kuntuula bu kileshesho kui baaba abalesha lukumiino luabo muadi bua kupeta muwa wa loso.

17 Binobino Nfumu a ikalayika, shii bia kunyanga, na shamuenekaa, Efile Mukulu umune, anemekibue na atumbishibue bua loso. Amene.

18 Nankupa dino elango obe muan’ande Timote, mu kuipushena na matemuki abaabadi batemukie pa muanda oobe, bua’shi ku bukuashi buao otungunukie na kulua ngoshi ibuwa, 19 na kulama lukumiino na kondo k’eshimba kebuwa kabadi basumbushene kui bangi, na bino mbibafuishe mu kushimisha lukumiino luabo, nka bu buato buiyine mu mema. 20 Imenee na Aleksandre be munkatshi mua baaba bantu, na ne muibatuule mu maasa mua Satana bua’shi dinyoka dibalongieshe bua kupela kusabuula Efile Mukulu.

2 Kumpala kua bioso, nenutekie bua’shi nusambile na kuisendeela mpa na kutumbula bua bantu ba mishindo yoso, 2 pabitale ba nfumu na baaba boso be na matalua bua’shi tutungunukie na kushala mu butaale na mu kupopeela, mu kulamata ku’Efile Mukulu koso na mu kinemo. 3 Uno muanda wibuwa na ngukuminyibue kumpala ku’Efile Mukulu Mupaashi etu, 4 aye akumiina’shi bantu ba mishindo yoso bapaashibue na bapete kiukilo kia bia binyibinyi. 5 Muanda kui Efile Mukulu nka umune na, kui nka muntu umune mupuanyishi* a bantu n’Efile Mukulu, yawa muntu nyi Nkidishitu Yesu, 6 baadi muipaane aye nabene bu nkuulo ilombane bua bantu boso*—na uno muanda nyi autungu’shi beuwukishe mu kipungo kiawo. 7 pa muanda wa buno bukamonyi, babaadi bansangule bua kuikala mulungudi na mutumibua⁠—nangakula bia binyibinyi, nta ndimbi—kuamba’shi, mulongieshi a ingi miilo pabitale lukumiino na bia binyibinyi.

8 Biabia nakumina bua’shi bana balume batungunukie na kuteka mu ma mbalo oso, abebuesha maasa kuiyilu na lulamato kui Efile Mukulu, kushi na nsungu na kuikakena. 9 Mu mushindo umune, abitungu’shi bana bakashi belengieshe* na nfuadilo mulombane,* na kuiyisha na binangu bibuwa,* kushi na mishindo ya kuanyisha* nyene na mabue a ôlo sunga na bikano sunga na bilamba bia muulo wi bukopo, 10 anka belengieshe mu mushindo ulombene bakashi balamate kui Efile Mukulu, kuamba’shi ku bukuashi bua muikelo wibuwa.

11 Muana mukashi ekale muumine na kukookiela koso p’abalongiesha. 12 Ntampa muana mukashi matalua a kulongiesha sunga kuikala na matalua kunundu kua muana mulume, anka abitungu ashale muumine. 13 Muanda babapangile Adama kumpala, akupu bapanga Eva. 14 Dingi Adama tabaadi mudimbibue, anka mukashi nyi baadi mudimbibue n’aye nkutupilua miiya. 15 Dingi muana mukashi akapaashibua* ku bukuashi bua kutanda kua bana, anka su batungunuka mu lukumiino, mu kifulo, mu buiselele pamune na binangu bibuwa.

3 Dino eyi ndia kukulupila, su muana mulume akimbi kuikala bu mukulu,* akimbi mufubo* wibuwa. 2 Abitungu mukulu ekale shi na matope, ekale na mukashi umune, ekale na nkatshinkatshi mu bikitshino biaye, ekale na binangu bibuwa, muntu shi na kafutakanyi, muntu akukilaa benyi, na muntu mulombanyine kulongiesha, 3 tekalanga nkodi a maalua, muntu sha bukielo,* muntu e na mianda ibukopo, tekalanga muntu mukumiine kutontoola, na mufule makuta, 4 ekale muntu akunkusha kalolo ba mu nshibo yaye, e na bana abamukookiela na kalolo koso 5 (muanda su muntu tawuku bia kukunkusha kalolo ba mu nshibo muaye, mbikunyi biadi mulombene kulama kakongie k’Efile Mukulu?), 6 t’ekalanga muntu mupia mu lukumiino, tala ekala na kuitatula na apona mu kiimu kilombanyine Diabulu. 7 Dingi abitungu ekale na nkumo ibuwa kui bantu bashi bena kukumiina, bua’shi tala bakula bibubi pabimutale na apona mu muteo wa Diabulu.

8 Abitungu namu bafubi ba midimo bekale bantu ba kinemo, bashi na ndimi ibidi,* bashi bepaane mu kutoma kua malofu, bashi na luabi lua kupeta bintu mu bulamalama, 9 bekale bantu abalama mianda ifuame ya kishila ya lukumiino na kondo k’eshimba katooka.

10 Dingi abitungu kubanda kuibatompa kumpala; bua kumona su mbalombanyine,* akupu su tabe na muanda wa kuibatopeka nao, bafube bu bafubi ba midimo.

11 Abitungu namu bana bakashi bekale bantu ba kinemo, bash’abadimbiila bangi mianda, bekale na nkatshinkatshi mu bikitshino biabo, na be na lulamato mu mianda yoso.

12 Abitungu bafubi ba midimo bekale na mukashi umune, abakunkusha kalolo bana babo na ba mu nshibo muabo. 13 Muanda bana balume abafubu mu mushindo wibuwa, abapete mbalo ya kinemo n’eshimba dinyingie bua kuakula na lukumiino pabitale Nkidishitu Yesu.

14 Nakufundila ino mianda sunga biandi mukulupile’shi, nafiki kodi mu mafuku apeela’mu, 15 bua’shi sunga nakutua kufika pa nsaa, oukie biodi mulombene kukita mianda mu nshibo y’Efile Mukulu, ayo ikale kakongie k’Efile Mukulu e na muwa, ako akakaluila na kukuatshishena* bia binyibinyi. 16 Eyendo, uno muanda ufuame wa kishila wa lulamato kui Efile Mukulu ngukata: Yesu baadi muileshe patooka ku mbidi, baadi mubadikibue bu mululame mu kikudi, baadi mumuenekiele mikeyilu, babaadi abalungula mukandu wibuwa pabimutale munkatshi mua ingi miilo, babaadi bamukumiine pa nsenga, babaadi bamukuukile muiyilu na ntumbo.’

4 Biabia eyi diyokielue adiamba’shi mu mafuku a ku nfudiilo, bangi abakapono mu lukumiino, muanda abakalubishibua na mayi ayokielue a madimi* na malongiesha a ba demo, 2 ku bukuashi bua bu nsesa bua bantu abakula mianda ya madimi be na kondo k’eshimba kapape, nka bu kashikiibue na kiamo ki na kaalo. 3 Abakandika bantu bua kuiyibakishena na bua kupela bidibua bibaadi Efile Mukulu mupangie bua’shi, bebidie na lutumbu kui baaba be na lukumiino na be na kiukilo kia bia binyibinyi. 4 Muanda kipangua kioso ki’Efile Mukulu kibuwa na, takui kintu kia kusumbushena, su atuikitambula na lutumbu, 5 muanda nkitooshibue ku bukuashi bu’eyi di’Efile Mukulu na luteko lu’abekikitshina.

6 P’otuusha dino elango kui bakuetu, wekala mufubi ebuwa a Nkidishitu Yesu, kuete kudishibua na mayi a lukumiino na malongiesha ebuwa odi mulonde kalolo. 7 Kadi sumbushena mianda ya bisumanga ya madimi, ishayitumbisha Efile Mukulu bu yaaya y’abalondaa kui bakashi banunu. Anka ubikisha mbidi na kepatshila ka kulamata Efile Mukulu. 8 Muanda kalashishi ka mbidi* ke na bukuashi mu mianda ipeela, anka kulamata Efile Mukulu kui na muulo mu mianda yoso, muanda kui na mulayilo wa muwa wa binobino na wa mu mafuku aafiki. 9 Dino eyi ndia kukulupila na ndilombene kuidikumina dioso. 10 Nyi buakinyi tukuete kuitatshisha na kufuba ngofu muanda tui batuule lukulupilo luetu mui Efile Mukulu e na muwa, aye muikale Mupaashi a bantu boso, bikishekishe a baaba be na lulamato.

11 Tungunuka na kutuusha ano malango na kuialongiesha. 12 Muntu su ngumune tabepuulanga bu nsongua bobe. Anka ikala kileshesho kibuwa kui baaba be na lulamato mu ngakuilo, mu bikitshino, mu kifulo, mu lukumiino na mu buiselele. 13 P’okiotengiela kufika kuande , tungunuka na kuipaana mu kubadika kumpala kua bantu, mu kunyingisha na mu kulongiesha. 14 Tolenguulanga kia buntu kii moodi, kibaadi kikupebue ku bukuashi bua butemuki pabaadi kasaka ka bakulu kakutentekie maasa. 15 Nangushena ku ino mianda; wepaane ku yanka bua’shi bantu boso bamone kalolo biokuete kuenda kumpala. 16 Tungunuka na kuitaluula na kutaluula bulambukishi bobe. Nyingiila mu ino mianda, muanda p’okitshi biabia, okepaasha obe nabene, na kupaasha baaba abakuteemesha.

5 Tosashilanga muntu mukulu bibukopo. Anka musendeele bu nshobe, ba nsongualume namu bu bakuenu balume, 2 bakashi bakulu bu ba nyinobe, ba nsonguakashi namu bu bakuenu bakashi, mu buiselele boso.

3 Nemeka bakashi kilele, baaba bekale binyibinyi* bakashi kilele. 4 Kadi su mukashi kilele e na bana sunga bekulu, abo babadiile kulesha biabadi balamate Efile Mukulu mu kifuko kiabo, pa kulombasha kitungo kia baledi babo, na ba nkambua babo muanda bino bibuwa kumpala ku’Efile Mukulu. 5 Binobino muana mukashi muikale binyibinyi mukashi kilele, na shi na bukuashi mmutuule lukulupilo luaye kui Efile Mukulu na, atungunuka na kuiyaya na kuteka bufuku na kanya. 6 Anka mukashi kilele epaana mu kulombasha nkalo yaye ya mbidi, mmufue mu kikudi sunga ekala’shi e na muwa. 7 Biabia tungunuka na kuibapa ano malango bua’shi tabekalanga na muanda w’abebatopeka nao. 8 Mbinyibinyi, su muntu talombasha nkalo ya baaba be bu baye, bikishekishe ba mu nshibo yaye, mmutune lukumiino na ebubi kukila muntu shi na lukumiino.

9 Muana mukashi mufuishe ekala mu mulongo wa bakashi kilele, anka su e na bipua bishii muushi mua 60, na yawa baadi na mulume umune, 10 e na nkumo ya’shi baadi na bikitshino bibuwa, su baadi mukushe bana baye kalolo na, baadi akuukila benyi, su baadi musuule ngua ya beselele, su baadi mukuashe baaba be na dikienga na su baadi muipaane ku mufubo* oso wibuwa.

11 Anka tofundanga mashina a bakashi kilele bakii ba nsongua ku mukanda, muanda apakafiki nkalo yabo ya kuilaalena bu kikokoshi ku mufubo wabo wa Nkidishitu, abatuele ku mabaka. 12 Na abakekakila kiimu muanda babasumbushena lukumiino* luabo lua ku mbangilo. 13 Dingi tabakumina kufuba, abende na kukindakana ku mashibo a bantu, eyendo ta mpenda kufuba kuabapele, kadi mbekale dingi basha tuipu na abatuelakana mu mianda ya bangi bantu, abakula mianda yabashi na matalua a kuakula. 14 Biabia nakumina’shi bakashi kilele bakii ba nsongua, batuele ku bulunda batande bana, balame ba mu nshibo yabo, bua’shi tabapanga muishikuanyi mushido wa kuituakula bibubi. 15 Muanda bangi bakashi kilele mbapue kupambuka bua kulonda Satana. 16 Su muana mukashi muina kukumiina e na bakuabo bekale bakashi kilele, ebakuashe bua’shi tabekalanga bu bushito kui kakongie. Biabia kakongie akakuasha baaba bekale binyibinyi* bakashi kilele.

17 Bakulu abakunkusha kakongie mu mushindo wibuwa, mbalombene kinemo kikile bukata* bikishekishe baaba abakitshi mufubo wibukopo mu kuakula na kulongiesha. 18 Muanda bifundue abiamba’shi: “Tuanyanga mbangabanga ya ngombe p’afuntu ntete,” abiamba dingi’shi: “Muina mufubo mmulombene efuto diaye.” 19 Tokumiinanga muanda w’abafundu nao mukulu, anka su kui bishinkamisho bia tumonyi tubidi sunga tusatu. 20 Olangie bantu abakitshi miluisho ku meso kua bantu boso bua’shi biabia bidimushe baaba babashaala.* 21 Nakukankamika kumpala ku’Efile Mukulu na kua Nkidishitu Yesu na kumpala kua mikeyilu yabadi basangule bua kukookiela ano malango kushi ntondo sunga kuelela bangi binangu bibubi.

22 Totentekanga muntu su ngumune maasa* bukidibukidi; totuelakananga mu miluisho ya bangi bantu, elame kushi kalema.

23 Totomanga dingi mema,* anka toma tu malofu tupeela tua nfinyo muanda wa kifu kiobe, na pa muanda wa nkalakashi yobe ya mbidi ishayikoko.

24 Miluisho ya bangi bantu ayukibuaa patooka na, ayitualaa muntu bukidibukidi ku kiimu, ya bangi bantu namu ayiwukibuaa kunyima kua mafuku. 25 Mu mushindo umune, bikitshino bibuwa abiwukibuaa patooka na biabia bish’abiwukibua, tabiakushaala bifuame.

6 Baaba be mu kikumbo kia bupika, batungunukie na kuata ba nfumuabo na kinemo kikata, bua’shi tabakulanga bibubi pabitale eshina di’Efile Mukulu na pabitale malongiesha aaye. 2 Dingi baaba be na ba nfumuabo bena kukumiina, tabakutuanga kuibaneemeka muanda wa’shi mbakuabo. Kadi, abitungu bebakitshine mufubo na kalolo koso, muanda baaba abapete bukuashi bua mufubo wabo wibuwa, mbena kukumiina na mbafudibue.

Tungunuka na kulongiesha ino mianda na kutuusha ano malango. 3 Su muntu alongiesha bingi bipikua, bishii bipushene na ano mayi a kulonda a kishila* aafiki kui Nfumuetu Yesu Nkidishitu, sunga na malongiesha e mu kuipushena na lulamato mui Efile Mukulu, 4 mmuwule na kuitatula, na tapusha kintu su nkimune. E ku bupika bua kuela mpaka na kuikakena pabitale bishima. Ino mianda ayifuishaa luabi, kuikakena, kudimbiila bangi mianda,* na kuelela bantu binangu bibubi, 5 kuikakena nsaa yoso pabitale tu mianda tupeela, kui bantu baluile binangu na bashi na bia binyibinyi abapuandikisha’shi kulamata kui Efile Mukulu mmushindo wa kupeta bintu. 6 Bua kuakula kalolo, kulamata Efile Mukulu kui na bukuashi bukata nka su atusanka na biatudi nabio. 7 Muanda tatui bafikie na kintu su nkimune pa nsenga na tatui balombene kuipakatuka na kintu su nkimune. 8 Biabia, su tui na bia kudia na bia kufuala, na mbalo ya kulala, tusankie na biabia bintu.

9 Anka baaba bepaane bua kuikala ba mpeta, abapono mu kutompibua na mu muteo na mu ngabiabi ibungi ibubi ayituesha bantu mu kabutu na mu kuluishibua. 10 Muanda kifulo kia makuta nyi mmushi wa mianda ibubi ya mishindo yoso na, pa muanda wa kino kifulo kia makuta, bangi mbapambukie benda kula na lukumiino na mbekakile abo banabene nkalakashi ibungi.

11 Anka obe muntu a Efile Mukulu, suuka ino mianda. Kadi kimba kululama, kulamata kui Efile Mukulu, lukumiino, kifulo, kunyingiila, na kupopeela. 12 Lua ngoshi ibuwa ya lukumiino, lamata bibukopo ku muwa wa ikalayika ubaabadi bakuitanyine na uboodi muakule patooka kumpala kua tumonyi tuibungi.

13 Nakupa ano mayi a kulonda, kumpala ku’Efile Mukulu, aye alama bintu bioso na muwa na kumpala kua Nkidishitu Yesu, aye baadi mutuushe bukamonyi buibuwa, kumpala kua Ponse Pilato 14 bua kufubila ino miiya mu mushindo utokane na ushi na matope mpa na pa kumueneka kua Nfumuetu Yesu Nkidishitu, 15 kuabakalesha kui Nfumu sha bukome na sha muloo mu kipungo kilombane. Muanda nyi Nfumu a ba nfumu na Muanana a ba muanana, 16 Aye bupenka buaye shi mulombene kufua mushale muitaata dishi dilombene muntu kuifubuila pepi, mushamumuene muntu su ngumune sunga mushii mulombene muntu kumumona. Ntumbo na bukome bia ikalayika bikale kuadi. Amene.

17 Lungula baaba bekale ba mpeta mu uno ndumbuluilo,* bua’shi tabekalanga na kuitatula, na kupela kutuula lukulupilo luabo mu bupeta bulombene kushimina, anka bakulupile Efile Mukulu aye etupaa na kalolo bintu bioso abitusankisha. 18 Ebalungule bakite bibuwa, bekale ba mpeta mu mifubo ibuwa, bekale na kalolo, na bukidi bua kuiabishena bintu na bangi. 19 P’abakitshi biabia, abakelamina mbalo ibuwa i na kitako kinyingie bua mafuku e kumpala, bua kulamata bibukopo ku muwa wa binyibinyi.

20 Obe Timote, lama kalolo kiakia kiabadi bakupe, futaala miisambo ishi kapu ayiluisha bintu bia kishila, na mpaka y’abetanyina mu kukutua kua kuuka bu “kiukilo.” 21 Pa muanda wa kuilesha bua kiakia kiukilo, bangi mbende kula na lukumiino.

Kalolo k’Efile Mukulu kekale nenu.