MUKANDA WA KABIDI KUI TIMOTE

1 Ami Mpoolo mutumibua a Nkidishitu Yesu ku bukuashi bua kikiebe ki’eshimba di’Efile Mukulu, muyile mulayilo wa muwa aufiki ku bukuashi bua Nkidishitu Yesu, 2 kui Timote muana ande a kifulo:

Kalolo, na lusa, na butaale abifiki kui Efile Mukulu Yaya na Muanana Yesu Nkidishitu, bikale nobe.

3 Ne na lutumbu lukata kui Efile Mukulu ankuete kufubila mufubo wa kishila nka bu bibakitshine ba nkambua bande na kondo k’eshimba katooka, ntakooko kukutentekiesha mu nteko yande bufuku na kanya. 4 Pantentekiesha mpolo yobe, ne na lukalo lukata lua nkumona, bua’shi nekale na muloo wibungi. 5 Muanda natentekiesha lukumiino lobe lushi na bu nsesa, lubaadi lubadiile kuikala mui nyinoobe kulu Loise na mui nyinoobe Enise, na ne mushinkamishe’shi lui modi namu.

6 Nyi buakinyi nakutentekiesha bua kushisakanya nka bu kaalo kia buntu ki’Efile Mukulu kii modi kibopetele panaadi mukutentekie maasa. 7 Muanda, Efile Mukulu ta muitupe kikudi kia moo, anka kia bukome, kia kifulo, na kia binangu bibuwa. 8 Biabia tuekalanga na buufu bua kutuusha bukamonyi pabitale Nfumuetu sunga pabintale, ami muina lukano pa muanda waaye, anka kumina kukienga bua mukandu wibuwa pa kukulupila mu bukome bu’Efile Mukulu. 9 Aye baadi muitupaashe na baadi muituitanyine na luitanyino luiselele kushi pa muanda wa mifubo yetu, kadi mpa muanda wa mpango yaye na kalolo kaye. Baadi muitupe luno luitanyino mu kuipushena na Nkidishitu Yesu, kubanga mu bipungo bia kala, 10 kadi binobino mbileshibue patooka ku bukuashi bua kuilesha kua Mupaashi etu, Nkidishitu Yesu, aye baadi mushimishe lufu na baadi muituleshe ku bukuashi bua mukandu wibuwa bua kuikala na muwa na mbidi ish’ayinyanga, 11 ubaabadi bansangule bua kuikala bu mulungudi, bu mutumibua na bu mulongieshi.

12 Nyi buakinyi ami namu nkuete kukienga na ino mianda, kadi ntshi na buufu. Muanda nauku Yawa andi mukumiine, na ne mushinkamishe’shi mmulombene kulama kiakia kiandi mutuule kuadi mpa na ku diadia efuku. 13 Tungunuka na kulama kileshesho kia mayi eselele oboodi mupushe kuandi, na lukumiino na kifulo abitukila mu kuikala mu buumune na Nkidishitu Yesu. 14 Lama kino kintu kia muulo kitudibue modi, ku bukuashi bua kikudi kiselele ki muatudi.

15 Ouku kalolo’shi bantu boso ba mu provense a Azi, mbansumbushene pamune na Fijele na Elemogene. 16 Muanana aleshe lusa luaye kui ba mu nshibo ya Onesifore, muanda mmunkankamikie misango ibungi, na ta mupushe buufu pa muanda wa nkano yande. 17 Anka pabaadi ku Loma, baadi munkimbe na kishima, na aye nkumpeta. 18 Muanana amukuashe bua’shi Yehowa amufuile lusa mu diadia efuku. Muanda ouku kalolo mianda yoso ibaadi munkitshine ku Efeso.

2 Biabia obe muan’ande, tungunuka na kupeta bukome mu kalolo ka Nkidishitu Yesu; 2 na mianda iboodi mupushe kuandi ibaabadi bashinkamishe kui tumonyi tui bungi, weyilungule balume basha lulamato, abo namu abakekala balombane bua kulongiesha bangi. 3 Nka bu musalayi ebuwa a Nkidishitu Yesu, kumina kukienga. 4 Takui muntu su ngumune afubaa mu busalayi mulombene kuipaana mu mianda ya busunga* ya mu nshalelo su akiebe kukuminyibua na muntu baadi mumutueshe mu mufubo wa busalayi. 5 Mu mushindo umune, sunga mu mianda ya maasha mbalombene kupa muntu aasha kifulu kia ntumbo, anka su baasha muyile miiya ya maasha. 6 Kidime afubu ngofu nyi mulombene kuikala a kumpala bua kudia bikuba biadi mukune. 7 Tungunuka na kunangushena ku mianda ya nkuete kuakula; Muanana akakupa lushinguluilo mu mianda yoso.

8 Tentekiesha’shi babaadi babuushe Yesu Nkidishitu ku lufu na baadi kekulu* ka Davide, muyile mukandu wibuwa wankuete kulungula, 9 wankuete kukiengiela na wabadi bangielele mu lukano bu ntomboshi. Anka, Eyi di’Efile Mukulu ta ndianyibue. 10 Nyi buakinyi natungunuka na kunyingiila mianda yoso pa muanda wa basangulue, bua’shi abo namu bapete kipandilo akifiki ku bukuashi bua Nkidishitu Yesu, pamune na ntumbo ya loso. 11 Dino eyi ndia kukulupila: Su tubaadi binyibinyi bafue pamune, atukekala’nyi na muwa pamune; 12 su tubatungunuka na kunyingiila, atukakunkusha pamune n’aye bu ba nfumu; su tuamutuna, aye namu aketutunu; 13 su tatui na lulamato aye ashala na lulamato muanda ta mulombene kuituna aye nabene.

14 Tungunuka na kuibatentekiesha ino mianda na kuibapa malango* kumpala ku’Efile Mukulu bua’shi tabekalanga abekakena bua bishima, bino tabi na muulo muanda abiluishisha baaba abatemesha. 15 Kita mobe moso bua kumueneka kumpala ku’Efile Mukulu bu muntu mukuminyibue, mufubi shi na muanda wa kupusha buufu, alongiesha eyi dia bia binyibinyi kalolo. 16 Anka sumbushena miisambo ya bisumanga ishi na muulo, ayiluisha kintu kia kishila muanda ayituala ku mianda ya bipaso bioso yabadi bashikue kui Efile Mukulu, 17 mayi aabo aapalakana nka bu elonda di’eshobo. Imenee na Filetose be munkatshi mua baaba bantu. 18 Bano bantu mbapambukie mu lukumiino, muanda abamba’shi lusangukilo ndupue kukitshika na bino abiluisha lukumiino lua bangi bantu. 19 Sunga mbiabia, kitako kinyingie ki’Efile Mukulu nkishale kimane ki na kitampi kifunde’shi: “Yehowa auku baaba be bu baye,” na’shi: “Muntu oso ayitanyina eshina dia Yehowa alekie kukita mianda ishi ilulame.”

20 Binobino mu nshibo ikata tamuikalaa penda bintu bia ôlo na bia kiamo kia arja, anka amuikalaa bingi bia mitshi na bia mabumba, bingi bua mufubo wa kinemo bingi namu bua mufubo ushi wa kinemo. 21 Biabia su muntu kampanda bekala kula na bintu bishii bia kinemo, akekala bu kintu kia mufubo wi na muulo mutooshibue e na muulo kui nfumuaye na mulumbuulue bua mufubo oso wibuwa. 22 Biabia suuka nkalo ya ku bu nsongua, anka kimba kululama, lukumiino, kifulo, butaale, pamune na bantu abetanyina Muanana n’eshimba ditooka.

23 Dingi pela mpaka ishi na muulo na ipatakane, muiwukie’shi yaaya mpaka ayitandaa kuikakena. 24 Muanda t’abitungu’shi mufubi a Muanana alue ngoshi, anka abitungu ekale na kupopeela kui bantu boso, mulombane bua kulongiesha na mulombene kuikanda p’abamukitshina bibubi, 25 alongiesha ba ntomboshi na kupopeela. Pangi Efile Mukulu e kuibakuasha bua kuilanga* buabadia kupeta kiukilo kia binyibinyi, 26 na be kupetuula binangu biabo na kupanda ku muteo wa Diabulu, muanda mmuibakuate pabakii na muwa bua kukita kikiebe ki’eshimba diaye.

3 Anka uka’shi mu mafuku a ku nfudiilo akukekala bipungo bibukopo. 2 Muanda bantu abakekala befule abo banabeene, bafule nfualanga, basha kuitumbisha, basha kuitatula, abasabuula Efile Mukulu, bash’abakokiela baledi babo, bashi na lutumbu, bakutue lulamato, 3 bashi na kifulo kia butandua, bashi na kikudi kia butaale, abadimbilaa bangi mianda, bashi na kuikanda, ba ntomboshi, bashi bafule mianda ibuwa, 4 basha mapala abidi, basha mutue wi bukopo, baule ndaa na kuitatula, bafule miloo, pamutue pa kuikala bafule Efile Mukulu, 5 abelesha’shi mbalamate Efile Mukulu anka bikitshino biabo t’abilesha bukome bua kulamata Efile Mukulu, anka obe suuka bantu be biabia. 6 Munkatshi mua baaba bantu mui balume abefiinyika ku bukopo mu mashibo bua kukuata bana bakashi babofule ku bupika, baaba be na miluisho ibungi babakunkusha kui nkalo ilekenelekene, 7 bakuete kulonga nsaa yoso anka, t’abapete kiukilo kilombane kia bia binyibinyi.

8 Biabia nka bu bibaadi Yanese na Yambrese batombokiele Moyise, baaba bantu namu bakuete kutombokiela bia binyibinyi. Binangu bia bantu be biabia mbiluile bioso, ta mbakuminyibue bua kuikala na lukumiino. 9 Sunga mbiabia, tabe bia kuenda dingi kumpala muanda butesha buabo abutuuku patoka kui bantu boso, nka bu bibaadi bikitshikie bua Yanese na Yambrese. 10 Anka obe we mulonde kalolo malongiesha ande, nshalelo ande, kepatshila, lukumiino, luishinko, kifulo, na kunyingiila kuande, 11 kubinguabingua na kukiengieshibua binaadi mupete ku Antiyoshe, ku Ikonyume na ku Listre. Naadi muibinyingiile na Muanana baadi mumpaashe ku aa makienga oso. 12 Mu binyibinyi, bantu boso abakumiina kulamata Efile Mukulu mu buumune na Nkidishitu Yesu, abakakiengieshibua namu. 13 Anka bantu bebubi na ba sha madimi abakanyiisha kuluila, abakadimbishena, n’abo namu abakadimbibua.

14 Anka obe, shala mulamate ku mianda iboodi mulongie, ibaabadi bakukuashe bua kukumiina, muukie babaadi bakulongieshe yanka 15 muukie’shi kubanga ku bukinga bobe, ouku bifundue biselele bilombene kukupa binangu bua kupeta kipandilo ku bukuashi bua lukumiino mui Nkidishitu Yesu. 16 Bifundue bioso mbiyokielue n’Efile Mukulu na abikuasha bua kulongiesha, bua kulanga, bua kuludika mianda na bua kunyoka mu kululama, 17 bua’shi muntu a Efile Mukulu ekale mukumbane, e na bioso abitungu bua kukita mufubo oso wibuwa.

4 Nakutumina eyi kumpala ku’Efile Mukulu na Nkidishitu Yesu, aye akatshibila be na muwa na bafue kiimu, pa kuilesha kuaye na Bufumu buaye’shi: 2 Lungula eyi; wedilungule mu bipungo bibuwa na mu bipungo bibukopo, kushi kunyengakana; olangie, osaashile, na kudimusha, webikite na luishinko loso bu mulongieshi ebuwa. 3 Muanda akukekala kipungo ki’abakapele kuteemesha malongiesha e buwa, anka muyile nkalo yabo abakekimbila balongieshi bua kuteemesha mianda ayibasankisha* ku matui. 4 Abakapele kuteemesha bia binyibinyi bua kuteemesha miele ya madimi. 5 Anka obe lama binangu biobe mu mianda yoso, nyingiila makienga, tungunuka na kulungula mukandu wibuwa,* kumbasha mufubo oobe kalolo.

6 Muanda tabadi pa kumpongoola bu mulambu wa kitomuanga, na nsaa ya kupososhibua kuande tayidi pepi. 7 Ne mulue ngoshi ibuwa, ne musuukie lubilo, nafika mpa na ku nfudiilo, na ne mulame lukumiino. 8 Kubanga nka binobino, mbandamine kifulu kia ntumbo kia kululama kiabakampa kui Muanana nsushi mululame, bu efuto mu diadia efuku, t’akekimpa nka penda ami bupenka, anka akekipa baaba boso babaadi bafule kumueneka kuaye.

9 Kita mobe moso bua kufika kuno kuandi bukidi. 10 Demase mmunsumbushene muanda mmufule uno ndumbuluilo a mianda,* na mmuende ku Tesalonike, Kreskese mmuende ku Ngalateya, Tite ku Dalamasi. 11 Nka penda Luka nyi andi naye. Fika na Maako muanda ankuashaa mu mufubo.* 12 Kadi ne mutume Tishike ku Efeso. 13 Nsaa yofiki, ontumine ekotshi dinaadi mulekie ku Trowase kua Karpose, na mifungofungo bikishekishe yaaya ya misokia.

14 Aleksandre nsendue a biamo baadi munkitshine mianda ibubi ibungi. Yehowa akamufutu muyile bikitshino biaye. 15 Obe namu omudimukile muanda baadi mulue na mukandu wetu ngofu.

16 Mu kuikaluila kuande kua kumpala, takui muntu su ngumune baadi ku lupese luande, boso babaadi bansumbushene, Efile Mukulu ebafuile lusa. 17 Anka Muanana bemeene ku lupese luande, aye nkumpa bukome bua’shi, ku bukuashi buande mufubo wa bulungudi ulombashibue kalolo na, bua’shi miilo yoso iwupushe na, naadi mupaashibue mukanua mua ntambue. 18 Muanana akampaasha ku muanda oso wibubi na, akampaasha bua Bufumu buaye bua muiyilu. Ntumbo ikale kuadi bua loso. Amene.

19 Ngimuine Priska na Akila na ba mu nshibo mua Onesifore.

20 Eraste baadi mushale ku Kodinda kadi naadi mulekie Trofime na maladi ku Milee. 21 Kita mobe moso bua kufika kumpala kua kipungo kia mashika.

Ebule, Pudese, Lino na Klodia mpa na bakuetu boso abakutumina mioyo.

22 Muanana ekale na binangu biolesha. Kalolo kaye kekale nenu.