MUKANDA KUI TITE

1 Ami Mpoolo, mpika a Efile Mukulu na mutumibua a Yesu Nkidishitu, muyile lukumiino lua baaba babadi basangule kui Efile Mukulu, na muyile kiukilo kia bia binyibinyi, kipushene na lulamato lu’Efile Mukulu 2 na kiimene pa lukulupilo lua muwa wa loso, ubaabadi betulee kubanga kala kui Efile Mukulu shii mulombene kudimba; 3 kadi mu kipungo kiaye kitshibibue, baadi muukishe eyi diaye, ku bukuashi bua mukandu ubabampeele muyile eyi dia Mupaashi etu, Efile Mukulu; 4 kui Tite muana ande a binyibinyi mu lukumiino lumune luatudi nalo atue boso:

Kalolo na butaale abifiki kui Efile Mukulu Yaya na Mupaashi etu Yesu Nkidishitu bikale noobe.

5 Naadi mukulekie mu Krete bua’shi olumbuule mianda ish’ayende kalolo na bua’shi otuule bakulu mu bibundi bioso muyile ano mayi: 6 su kui muana mulume shii na matope, e na mukashi umune, e na bana bena kukumiina bashi na nkumo ya mianda ya bukitekite, sunga bu ntomboshi. 7 Muanda bu bikale’shi mukunkushi mmulami a bintu bi’Efile Mukulu, t’abitungu bamutopekie na muanda su ngumune, tekalanga muntu sha mutue wibukopo, tekalanga muntu akuataa nsungu bukidi, tekalanga nkodi a maalua, muntu sha bukielo,* sunga e na luabi lua kupeta bintu mu bulamalama, 8 anka ekale muntu akukilaa benyi, mufule mianda ibuwa, e na binangu bibuwa, mululame, sha lulamato, muntu sha kuikanda, 9 mulamate pepoo ku eyi dia lulamato* muanda wa kuuka kuaye kua kulongiesha, bua’shi amone bia kunyingisha bantu ku bukuashi bua malongiesha ebuwa na kulanga basha mpaka.

10 Muanda kui ba ntomboshi bebungi, bantu abakula buakul’akule, na basha madimi, bikishekishe baaba balamate ku kipikua kia kusadiibua. 11 Abitungu kufunga mukanua mua bano bantu, muanda bano bantu bakuete kutungunuka na kuluisha bifuko bishima, p’abalongiesha mianda yabashii bia kulongiesha anka bua kukimba kupeta makuta mu mushindo wibubi. 12 Umune a kuabadi, mutemuki aabo bakuile’shi: “Bena Krete abekalaa nka basha madimi, nyema ya kisuku ayikitshina bantu bibubi, basha budiengiediengie bashi na mufubo wa kukita.”

13 Buno bukamonyi mbua binyibinyi. Nyi buakinyi, tungunuka na kuibalanga bibukopo bua’shi bekale banyingie mu lukumiino, 14 na bua’shi badimukile miele ya bena Yunda na miiya ya bantu abapele bia binyibinyi. 15 Mianda yoso iselele kui bantu beselele, anka kui baaba bashi selele na bashi na lukumiino, takui muanda su ngumune wiselele, muanda binangu biabo na kondo kabo k’eshimba mbiluile. 16 Abaakula patooka’shi abauku Efile Mukulu, anka abamutunu mu bikitshino biabo, muanda mbantu be butete na bash’abakookiela, na tabe na matalua a kukita mufubo* wibuwa su ngumune.

2 Anka, obe tungunuka na kuakula mianda i mu kuipushena na malongiesha e buwa.* 2 Bana balume bakulu bekale na nkatshinkatshi mu bikitshino biabo, bekale bantu baabanemeka, be na binangu bibuwa, banyingie mu lukumiino, mu kifulo, na abanyingiila. 3 Mu mushindo umune, bana bakashi bakulu bekale na bikitshino abilesha’shi abanemeka Efile Mukulu, tabekalanga abadimbiila bangi mianda, tabekalanga ba mpika ba malofu, anka bekale balongieshi ba mianda ibuwa, 4 bua’shi bamone bia kulanga* ba nsonguakashi buabadia kufula balume babo, na kufula bana babo, 5 bekale na binangu bibuwa, bashi na matope, abakitshi mifubo* ya mu nshibo,* be na kalolo, abakookiela balume babo, bua’shi tala bantu bakula bibubi pabitale eyi di’Efile Mukulu.

6 Mu mushindo umune, tungunuka na kukankamika ba nsongualume buabadia kuikala na binangu bibuwa, 7 pokuete kuilesha obe nabene bu kileshesho kia bikitshino bibuwa mu mianda yoso. Longiesha mianda iselele na kinemo kioso, 8 wakule na bishima abinyingisha* biabasha kukanduila, bua’shi beshikuanyi bakuatshikie buufu, na tabekalanga na muanda wi bubi su ngumune wa kuakula pabitutale. 9 Bapika bakookiele ba nfumuabo mu mianda yoso, betatshishe bua kuibasankisha kushii miunuuno, 10 tabebayibanga bintu, anka bekale bantu ba kukulupila mu mianda yoso, bua’shi balongamishe dilongiesha di’Efile Mukulu Mupaashi etu mu mishindo yoso.

11 Muanda kalolo k’Efile Mukulu nkaleshibue, na akatuala kipandilo kui bantu ba mishindo yoso. 12 Kaaka kalolo aketulongiesha bua kupela kuikala na muikelo ush’ausankisha Efile Mukulu na nkalo ya pa nsenga, na bua kuikala na binangu bibuwa na kululama, na kulamata Efile Mukulu mu uno ndumbuluilo,* 13 patukuete kutengiela lukulupilo lua muloo na kumueneka kua ntumbo ku’Efile Mukulu mukata na kua Mupaashi etu, Yesu Nkidishitu, 14 baadi muipaane aye nabene bua kuitupoososha* mu kukita kua mianda yoso ibubi, na bua kutoosha bantu buabadia kuikala muilo waye wi pabuao, wi na kisumi bua mifubo ibuwa.

15 Tungunuka na kuakula ino mianda na kunyingisha, na kulanga na matalua oso abadi bakupe. Muntu su ngumune takubepuulanga.

3 Tungunuka na kuibatentekiesha buabadia kukookiela bakunkushi na bakata, na bua kuikala belumbuule bua kukita mufubo oso wibuwa, 2 tabaakulanga muntu su ngumune bibubi, tabekalanga basha kutontoola, na tabekalanga na mianda ibukopo, anka bekale abalesha kupopeela kui bantu boso. 3 Muanda kumpala, n’atue namu tatubaadi na binangu, tatubaadi atukookiela, babaadi abetupambusha, tubaadi ba mpika ba nkalo na miloo ilekenelekene, atukitshi mianda ibubi. Tubaadi na luabi, na bu bantu bebubi ngofu na atuishikuena munkatshi muetu.

4 Anka, pabaadi pamuenekie kalolo k’Efile Mukulu Mupaashi etu, na kifulo kiaye kui bantu 5 (tabibaadi bua bikitshino bilulame bibaatudi nabio, anka mbua lusa luaye), baadi muitupaashe ku bukuashi bua kutumpibua kua mema akutuala muwa na kuituikasha bu bantu bapia, ku bukuashi bua kikudi kiselele. 6 Baadi muitupongoluele kiakia kikudi na kalolo koso kukiila kui Yesu Nkidishitu Mupaashi etu, 7 bua’shi kunyima kua’ye kuitubadika bu balulame ku bukuashi bua kalolo kaye, tufikie ba mpianyi muyile lukulupilo lua muwa wa loso.

8 Ano mayi nga kukulupila, na nakumiina’shi otungunukie na kushimika kasele pa ino mianda, bua’shi baaba bakumiine mui Efile Mukulu bepaane mu mifubo ibuwa. Ino mianda ibuwa na ayikuasha bantu.

9 Anka totuelakananga mu mpaka ya bisumanga, na mu milongo ya butandua ya ba nkambua, mu kutontoola na mu kuikakena pabitale Muiya, muanda mbintu bia bisumanga bish’abikuasha. 10 Kadi pa muanda wa muntu atuusha tusakatusaka, tshiba naye kipuano obe baapu kumudimusha* bua musango wa kumpala na wa kabidi, 11 ouku’shi muntu ebiabia mmupue kuluba eshinda dibuwa, kuete kukita miluisho na epiisha aye nabene.

12 Pantumu Artemase sunga Tishike kodi, kita mobe moso bua’shi ofikie kuno kuandi ku Nikopolise, muanda kuno nyi kuandi muate mpango ya kukisha kipungo kia mashika. 13 Ope Zenase muntu auku Miiya kalolo na Apolose bintu bioso biabadi nabio lukalo, bua’shi tabakutuanga kintu su nkimune bua luendo luabo. 14 Anka bakuetu namu balongie bia kukita mifubo ibuwa bua’shi bamone bia kukuasha pakudi lukalo, tala bakutua kukita mufubo kalolo.*

15 Boso be nami, abakutumina mioyo. Ngielele baaba betufule na be mu lukumiino mioyo.

Kalolo k’Efile Mukulu kekale nenu boso.