MUKANDA WA KUMPALA WA YOWANO

1 Atuinufundila pabitale kiakia kibaadi kuanka kubanga ku mbangilo, kibaatudi bapushe na kibaatudi bamone na meso etu, kibaatudi babandile na kibaatudi bakume na maasa etu, pabitale eyi dia muwa, 2 (eyendo muwa ubaadi uleshibue patooka, na tubaadi bamone na tukuete kutuusha bukamonyi pa biwutale, na atuinulungula pabitale muwa wa loso ubaadi kui Yaya na ubaadi uleshibue patooka kuatudi), 3 Na atuinulungula namu kiakia kibaatudi bamone na bapushe, bua’shi anue namu nuikale netu mu buumune. Na buno buumune buetu, tui nabo na Yaya na Muana aaye Yesu Nkidishitu. 4 Na atuinufundila ino mianda bua’shi muloo wetu wikale ulombane.

5 Mukandu ubaatudi bapushe kuadi na watuinulungula wi bino: Efile Mukulu nyi etaata, na takui mufito su ngupeela muadi.* 6 Su atuakula’shi: “Tui mu buumune naye,” aku namu atutungunuka na kutambuka mu mufito, tukuete kudimba na tatui mu kuipushena na bia binyibinyi. 7 Anka su atutambuka muitaata bu biadi’ye nabene muitaata, tui mu buumune atue boso na mase a Yesu muana aaye aetutoosha ku miluisho yetu yoso.

8 Kadi su tuamba’shi: “Tatui na miluisho,” atuidimbi atue banabene na bia binyibinyi tabi muatudi. 9 Su tuatonda miluisho yetu, aye e na lulamato na mmululame bua kuitufuila lusa ku miluisho yetu na kuitutoosha ku mianda yoso ishi ilulame. 10 Su tuamba’shi: “Tatui bakite muluisho,” atumuikasha’ye bu sha madimi, na eyi diaye taadi munda muetu.

2 Bana bande bakinga, nenufundila ino mianda bua’shi tanukitanga miluisho. Na su muntu akita muluisho, tui na mukuashi* e pepi na Yaya, Yesu Nkidishitu, aye muntu mululame. 2 Na mmuikale mulambu wa kualushula kipuano* n’Efile Mukulu bua miluisho yetu, kushi penda bua miluisho yetu kadi mpa na bua miluisho ya bantu ba mu nsenga ishima. 3 Na uno nyi mushindo watudia kulesha’shi atumuuku, kuamba’shi su atutungunuka na kukookiela miiya yaye. 4 Su muntu akula’shi: “Namuuku,” anka takookiela miiya yaye, nsha madimi na bia binyibiyi tabi mui yawa muntu. 5 Kadi su muntu akookiela eyi diaye, kifulo ki’Efile Mukulu akikala binyibinyi kipuidikie mui yawa muntu. Paapa atuuku’shi tui mu buumune naye. 6 Yawa akula’shi ashala mu buumune naye, e mu kitungo kia kuikala na nshalelo nka bu baadi naye Yesu.

7 Bakuetu ba kifulo, uno muiya wanenufundila ta ngupia nya, anka ngua kala ubaanudi bapete ku kibangilo. Uno muiya wa kala nyi eyi dibaanudi bapushe. 8 Dingi, uno musango nenufundila muiya upia wa binyibinyi pabitale Nkidishitu na anue banabene, muanda mufito ukuete kuenda na kushimina na etaata dia binyibinyi ndipue kubanga kumunyika.

9 Yawa amba’shi ne muitaata kadi mmushikue mukuabo, kiinka mu mufito. 10 Yawa mufule mukuabo, ashala muitaata, na muadi tamui kintu kilombene kukokosha bangi. 11 Anka yawa mushikue mukuabo, e mu mufito na kuete kutambukila mu mufito, na tauku kuende muanda mufito ngumubuikile meso.

12 Nenufundila anue bana bakinga, muanda mbenufuile lusa ku miluisho yenu pa muanda w’eshina diaye. 13 Anue ba nshe bana nenufundila muanda nui balongie bia kuuka yawa baadi kuanka kubanga ku kibangilo. Anue ba nsongualume nenufundila muanda nui bakambile uno muntu mubi. Anue bana bakinga nenufundila, muanda nui balongie bia kuuka Yaya. 14 Anue ba nshe bana nenufundila muanda nui balongie bia kuuka yawa baadi kuanka kubanga ku kibangilo. Anue ba nsongualume nenufundila muanda nui bukome na eyi di’Efile Mukulu di muanudi na nui bakambile muntu mubi.

15 Tanufulanga nsenga* sunga bintu bia pa nsenga. Muanda su muntu mmufule nsenga, kifulo kia Yaya taki muadi; 16 muanda bintu bioso bi pa nsenga bu luabi lua mbidi, luabi lua meso, na kuitatula bua bintu bia ku mbidi,* t’abifiki kui Yaya nya, anka abifiki pa nsenga. 17 Dingi, nsenga ikuete kukila na luabi luayo, anka yawa akitshi kikiebe ki’eshimba di’Efile Mukulu, ekala kuanka bua loso.

18 Bana bakinga, ino nyi nsaa ya nfudiilo, nubaadi bapushe’shi muishikuanyi a Nkidishitu afiki, aku namu binobino beshikuanyi ba Nkidishitu abafiki bakile bungi, nyi buakinyi atuuku’shi tatudi mu nsaa ya nfudiilo. 19 Mbatuukile munkatshi muetu anka ta mba ku lupese luetu, muanda su babadia kuikala ba ku lupese luetu, babadia kushala netu. Kadi mbakatukie kuatudi bua’shi bileshibue patooka’shi ta mboso bekale ku lupese luetu. 20 Na nui bedibue muimu kui yawa a kishila, na anue boso nui na kiukilo. 21 Nenufundila kushi pa muanda wa’shi tanuuku bia binyibinyi, anka mpa muanda wa’shi anuibiuku, na’shi takui madimi su ngamune aatukila ku bia binyibinyi.

22 Biabia sha madimi nnanyi, ta ngiawa atunu’shi Yesu nyi Nkidishitu su? Uno muntu mmuishikuanyi a Nkidishitu, yawa atunu Yaya na Muana. 23 Muntu oso atunu muana te mu buumune na Yaya. Kadi muntu oso akumiina mui Muana e mu buumune namu na Yaya. 24 Buenu’nue abitungu biabia bibaanudi bapushe kubanga ku kibangilo, bishale muanudi. Su biabia bianubapushishe kubanga ku kibangilo bibashala muanudi, anushala dingi mu buumune na Muana na mu buumune na Yaya. 25 Dingi, kibaadi muitulee aye nabene nkino—muwa wa ikalayika.

26 Nenufundila ino mianda pabitale baaba bakuete kukimba kuinulubisha. 27 Na buenu’nue, kuedibua muimu kubanupetele kuadi, nkushale muanudi na tanui na lukalo lua’shi muntu enulongieshe; kadi kuedibua muimu kubanupetele kuadi akuinulongiesha pabitale mianda yoso, muanda nkua binyibinyi na ta nkua madimi. Biabia nka bu bibaakudi kuinulongieshe, shalayi mu buumune naye. 28 Binobino anue bana bakinga, shalayi mu buumune naye, bua’shi pakaleshibua tuikale n’eshimba dinyingie dia kuakula na bua’shi tatukamusukanga bua buufu mu kipungo kia kuikala kuaye. 29 Su anuuku’shi mmululame, anuuku dingi’shi muntu oso atungunuka na kukita mianda ilulame mmutandikue kuadi.

3 Talayi bukata bua kifulo kiabadi betuleshe kui Yaya, bua’shi tuitaminyibue bu bana b’Efile Mukulu! Na biabia nyi biatudi. Nyi buakinyi ba pa nsenga t’abetuuku, muanda tabeuku Efile Mukulu. 2 Bakuetu ba kifulo, binobino tatudi bana b’Efile Mukulu, kadi kiatukekala ta nkibande kuleshibua patooka nya. Atuuku’shi p’akaleshibua patooka, atukamuifuana muanda atukamumono nka biabia biadi. 3 Na muntu oso e na luno lukulupilo muadi etoosha aye nabene, nka bu bikale’shi yawa namu* eselele.

4 Muntu oso kuete kukita muluisho, kuete kuipaa miiya, muanda muluisho nkuipaa kua miiya. 5 Anuuku’nyi shi Yesu baadi mufikie bua kukaasha miluisho yetu, na muadi tamui miluisho. 6 Muntu oso ashala mu buumune naye t’akitshi miluisho, na takui muntu su ngumune akitshi miluisho mumumone sunga amuuku. 7 Bana bakinga, muntu su ngumune tenudimbanga; su muntu akitshi mianda ilulame, mmululame, nka bu bikale’shi Yesu mmululame. 8 Su muntu akitshi miluisho, afiki kui Diabulu, muanda Diabulu nyi babangile kukita miluisho kubanga ku kibangilo.* Nyi buakinyi Muana a Efile Mukulu bafikile bua kuluisha* mifubo ya Diabulu.

9 Muntu oso mutandikue kui Efile Mukulu t’akitshi miluisho, muanda lubio* lu’Efile Mukulu lui muadi, na ta mulombene kukita miluisho, muanda mmutandikue kui Efile Mukulu. 10 Akilesha kuilekena pankatshi pa bana b’Efile Mukulu na bana ba Diabulu nkino: Muntu oso sh’akitshi mianda ilulame, t’afiki kui Efile Mukulu nya, sunga yawa shi mufule mukuabo. 11 Muanda mukandu ubaanudi bapushe kubanga ku kibangilo, wi’shi abitungu tuifulene ku muntu na muntu; 12 tatuikalanga bu Kayina baadi afiki kui mubi na bayipayile mukuabo. Kadi bamuipayile buakinyi? Muanda bikitshino bia Kayina bibaadi bubi, anka bia mukuabo bibaadi bilulame.

13 Tanukaanyanga bakuetu, su ba pa nsenga abenushikua. 14 Atuuku’shi tui bakatukie ku lufu tuenda ku muwa, muanda tui bafule bakuetu. Yawa shi na kifulo, ashala mu lufu. 15 Yawa oso mushikue mukuabo ayipayishenaa, na anuuku’shi takui muntu ayipayishenaa su ngumune e na muwa wa looso aushaala munda muaye. 16 Ku bukuashi bua bino nyi kuatuiwukila kifulo, muanda Yesu Nkidishitu baadi mutuushe muwa waye* buetu, na atue namu tui mu kitungo kia kutuusha miuwa yetu* bua bakuetu. 17 Kadi su muntu e na bintu bia ku mbidi bia mu uno ndumbuluilo na amono mukuabo e mu lukalo kadi apele kumukuasha, mbikunyi bilombene kuikala kifulo ki’Efile Mukulu muadi? 18 Bana bakinga, abitungu tuleshe kifulo, kushi penda mu ngakuilo na mu miisambo, anka tuikileshe mu bikitshino na mu binyibinyi.

19 Ku bukuashi bua bino nyi kuatuuku’shi tui bafikie mu bia binyibinyi, na atukashinkamiisha* mashimba etu kumpala kuaye 20 pabitale muanda oso awitutopeka nao mashimba etu, muanda Efile Mukulu mmukata kukila mashimba etu, na auku mianda yoso. 21 Bakuetu ba kifulo, su mashimba etu taetutopeka, tui na bulungantu bua kuisamba n’Efile Mukulu kushi kutshina; 22 na kioso kiatutekie, atuikipete kuadi, muanda tukuete kukookiela miiya yaye, na atukitshi mianda ayimusankisha. 23 Biabia muiya waye nguno: Tuikale na lukumiino muishina dia Muana aaye Yesu Nkidishitu, na tuifulene munkatshi muetu nka bu bibaadi muitupe muiya. 24 Dingi, yawa akookiela ku miiya yaye, ashala mu buumune n’Efile Mukulu, n’Efile Mukulu namu mu buumune naye. Na ku bukuashi bua kikudi kiadi muitupe atuuku’shi ashaala mu buumune netu.

4 Bakuetu ba kifulo, tanukuminanga mayi oso ayokielue, anka taluulayi mayi oso ayokielue bua kumona su aafiki kui Efile Mukulu, muanda kubatuuku batemuki ba madimi bebungi mu nsenga.

2 Bino nyi bianudi balombene kuuka’shi eyi diyokielue adifiki kui Efile Mukulu: Eyi dioso diyokielue adilesha’shi Yesu Nkidishitu mmufikie ku mbidi, adifiki kui Efile Mukulu. 3 Anka eyi dioso diyokielue dishadiuku Yesu, t’adifiki kui Efile Mukulu nya. Dingi, dino eyi adifiki kui muishikuanyi a Nkidishitu dibanupushishe’shi dikuete kufika, kadi binobino ndipue mpa na kufika pa nsenga.

4 Bana bakinga, anufiki kui Efile Mukulu na nui bakambile batemuki ba madimi, muanda yawa e mu buumune nenu mmukata kukila yawa e mu buumune na ba pa nsenga. 5 Abo abafiki pa nsenga, nyi buakinyi bakuete kuakula mianda ya pa nsenga, na ba pa nsenga bakuete kuibateemesha. 6 Atue atufiki kui Efile Mukulu. Yawa oso auku Efile Mukulu etuteemesha; anka yawa oso sh’afiki kui Efile Mukulu t’etuteemesha nya. Mu uno mushindo nyi muatukashinguula mayi ayokielue a binyibinyi na mayi ayokielue a madimi.

7 Biabia bakuetu ba kifulo, tutungunukieyi na kuifulena ku muntu na muntu, muanda kifulo akifiki kui Efile Mukulu, na yawa oso e na kifulo, mmutandibue kui Efile Mukulu na auku Efile Mukulu. 8 Yawa oso shi na kifulo tauku Efile Mukulu, muanda Efile Mukulu nkifulo. 9 Mu uno mushindo nyi mubaadi muleshibue kifulo ki’Efile Mukulu pa muanda wetu, Efile Mukulu batumine Muana aaye umune eeleka pa nsenga bua’shi tupete muwa ku bukuashi buaye. 10 Mu uno muanda, ta nnatue babaadi bafule Efile Mukulu, anka aye nyi baadi muitufule na aye nkutuma Muana aaye bu mulambu wa kualushuula nao kipuano* n’Efile Mukulu bua miluisho yetu.

11 Bakuetu ba kifulo, su bino nyi bibaadi Efile Mukulu muitufule, atue namu tui mu kitungo kia kuifulena. 12 Takui muntu mupue kumona Efile Mukulu musango su ngumune. Su atutungunuka na kuifulena, Efile Mukulu ashala muatudi, na kifulo kiaye akikala kipuidikie muatudi. 13 Mu uno mushindo nyi muatuuku’shi atushala mu buumune naye, na aye namu mu buumune netu, muanda baadi muitupe kikudi kiaye. 14 Dingi atue banabene tui bamone, na tukuete kutuusha bukamonyi’shi Yaya batumine Muana aaye bu mupaashi a ba pa nsenga. 15 Yawa oso akumiina’shi Yesu Mmuana a Efile Mukulu, Efile Mukulu ashala mu buumune na yawa muntu, n’aye namu ashala mu buumune n’Efile Mukulu. 16 Na tui bafikie mu kuuka na kukumiina kifulo ki nakio Efile Mukulu buetu.

Efile Mukulu nkifulo, na yawa ashala mu kifulo ashala mu buumune n’Efile Mukulu, n’Efile Mukulu namu ashala mu buumune naye. 17 Mu uno mushindo nyi mubaadi kifulo kiikashibue kipuidikie muatudi, bua’shi tuikale n’eshimba dinyingie dia kuakula muifuku dia kiimu, muanda nka bu bi Yesu nyi biatudi namu mu ino nsenga. 18 Mu kifulo tamui moo, anka kifulo kipuidikie akibingaa moo, muanda moo awitukutshishuaa bua kuenda kumpala. Biabia yawa e na moo tabandile kuikashua mupuidikie mu kifulo. 19 Tui na kifulo muanda aye nyi baadi muitufule kumpala.

20 Su muntu akula’shi, “ne mufule Efile Mukulu,” anka mmushikue mukuabo, nsha madimi. Muanda yawa shafulu mukuabo akuete kumona, ta mmulombene kufula Efile Mukulu ashamono. 21 Na tui bapete uno muiya kuadi’shi, yawa oso mufule Efile Mukulu abitungu namu afule mukuabo.

5 Muntu oso akumiina’shi Yesu nyi Nkidishitu, mmutandikue kui Efile Mukulu, na muntu oso mufule Efile Mukulu, mmufule bana b’Efile Mukulu. 2 Ku bukuashi bua bino nyi kuatuuku’shi tui bafule bana b’Efile Mukulu, p’atufulu Efile Mukulu na kukookiela miiya yaye. 3 Muanda kifulo ki’Efile Mukulu akilesha’shi, tutumikile miiya yaye na inyi miiya yaye, tayi bushito,* 4 muanda muntu oso mutandikue kui Efile Mukulu, atshimuna ba pa nsenga. Na kitukuashe bua kutshimuna ba pa nsenga, ndukumiino luetu.

5 Nnanyi mulombene kukambila ba pa nsenga? Ta nguno e na lukumiino’shi Yesu nyi Muana a Efile Mukulu su? 6 Uno nyi bafikile ku bukuashi bua mema na mase, Yesu Nkidishitu, kushi penda na mema bisumanga, kadi na mema mpa na mase. Na kikudi akishinkamisha uno muanda, muanda kikudi mbinyibinyi. 7 Muanda kui bintu bisatu abituusha bukamonyi: 8 kikudi na mema na mase; na bino bintu bisatu bi mu kuipushena.

9 Su atukumiina bukamonyi bua bantu, bukamonyi bu’Efile Mukulu mbukile bukata. Muanda buno mbukamonyi bubaadi Efile Mukulu mutuushe, bukamonyi bubaadi mutuushe pabitale Muana aaye. 10 Muntu atuulu lukumiino luaye mui Muana a Efile Mukulu e na bukamonyi munda muaye’ye nabene. Muntu shatuulu lukumiino mui Efile Mukulu amuikasha bu sha madimi, muanda ta mmutuule lukumiino mu bukamonyi bubaadi Efile Mukulu mutuushe pabitale Muana aaye. 11 Na buno bukamonyi bui’shi Efile Mukulu baadi muitupe muwa wa loso, na uno muwa wi mui Muana aaye. 12 Yawa e mu buumune na Muana, e na uno muwa na yawa shi mu buumune na Muana a Efile Mukulu, te na uno muwa.

13 Nenufundila ino mianda bua’shi nuukie’shi, nui na muwa wa loso anue batuule lukumiino luenu muishina dia Muana a Efile Mukulu. 14 Na kushinkamisha kuatudi nako kui Efile Mukulu kui’shi, kintu kioso kiatumutekie muyile kikiebe ki’eshimba diaye, etuteemesha. 15 Na su atuuku’shi etuteemesha pabitale kioso kiatutekie, atuuku dingi’shi atukapete bintu biatudi batekie, muanda tui bamutekie bianka.

16 Su muntu kampanda amono mukuabo akitshi muluisho ushaufuisha ku lufu, atekie, na Efile Mukulu akamupa muwa, oolo, akeupa baaba bashabakitshi muluisho aufisha ku lufu. Muanda kui muluisho aufuisha ku lufu. Ta mpabitale muluisho aufisha ku lufu wammulungula bua kuteka. 17 Muanda oso wibubi* mmuluisho, anka kui muluisho ushaufikisha muntu ku lufu.

18 Atuuku’shi muntu oso mutandikue kui Efile Mukulu t’akitaa muluisho, anka yawa mutandikue kui Efile Mukulu,* Efile Mukulu amulama, na muntu mubi ta mmulombene kumukitshina bibubi. 19 Atuuku’shi atue atufiki kui Efile Mukulu, anka nsenga ishima i ku matalua a muntu mubi. 20 Kadi atuuku’shi Muana a Efile Mukulu bafikile, na betupeele binangu* bua’shi tupete kiukilo kia yawa muikale a binyibinyi. Na tui mu buumune na yawa muikale a binyibinyi, ku bukuashi bua Muana aaye Yesu Nkidishitu. Uno nyi Efile Mukulu a binyibinyi na muwa wa loso. 21 Bana bakinga, elameyi ku ma nkishi.