KIBAFUMBUILUE KUI YOWANO

1 Kibafumbuilue* kia Yesu Nkidishitu, kibaadi Efile Mukulu mumupe bua kuleesha ba mpika baye mianda i na kia kukitshika binobino. Na batumine muikeyilu aaye na aye nkuiyileesha mpika aaye Yowano ku bukuashi bua bitunduilo, 2 aye batuushishe bukamonyi pabitale eyi dibatushishe Efile Mukulu, na bukamonyi bubatuushishe Yesu Nkidishitu, oolo, bua bintu bioso bibamuene. 3 Sha muloo nguno abadika n’eyi dibukopo na baaba abateemesha mayi a mu buno butemuki na abafubila bintu bifundue muanka, muanda kipungo kitshibibue takidi pepi.

4 Ami Yowano nafundila tukongie musambobidi tui mu provense a Azi:

Ikalayi na kalolo na butaale abifiki “kui Yawa baadi kuanka na ekuanka na afiki,” na abifiki kui bikudi musambobidi bi kumpala kua nkuasa* aaye a bufumu, 5 na abifiki kui Yesu Nkidishitu, “Kamonyi ke na lulamato,” “muana mbedi a ku baaba bafue,” na “Nfumu a ba nfumu be pa nsenga.”

Aye muitufule na muitupoososhe ku miluisho yeetu ku bukuashi bua mase aaye— 6 na muituikashe bufumu na ba tshite muakuidi kui Efile Mukulu aaye na Yaya—oolo, ntumbo na bukome bikale kuadi bua loso. Amene.

7 Talayi! Kuete kufika na makumbi, na muntu oso akamumono, mpa nka na baaba babaadi bamutubule milumbu; na bisamba bioso bia pa nsenga abikekupila mu kiadi na kinyongua pa muanda waye. Oolo, Amene.

8 Yehowa Efile Mukulu amba’shi: “Nnami Alfa na Omega,* Yawa e kuanka na baadi kuanka na afiki, Sha bukome boso.”

9 Ami mukuenu Yowano apete nenu makienga pamune, na bufumu na kunyingiila mu kuipushena na Yesu, naadi mu kisangi kiabetanyina bu Patemose, muanda naadi naakula pabitale Efile Mukulu na kutuusha bukamonyi pabitale Yesu. 10 Ku bukuashi bua kikudi kiselele naadi mufikie muifuku dia Muanana, na napushile kunyima kuande eyi dibukopo nka bu dia mpungi, 11 adiamba’shi: “Mianda yomono, weyifunde mu mufungofungo na weyitumine tukongie musambobidi: mu Efeso, mu Smirne, mu Pergame, mu Tiyatire, mu Sarde, mu Filadelfi, na mu Laodise.”

12 Naadi muialuule bua kutala yawa baadi esamba nami, na panaadi muialuule, namuene bituudilo musambobidi bia bimunyi bia ôlo, 13 na munkatshi mua bituudilo bia bimunyi, mubaadi muntu baadi muifuanene na muana a muntu, mufuale bilamba bifikie mpa na ku ngua na mufuale mukaba wa ôlo pa kiadi. 14 Dingi mutue na nyene yaye, bibaadi bitooka nka bu buaa bui soo bu mulemba, na meso aaye abaadi nka bu ludimi lua kaalo, 15 ngua yaye ibaadi ayipenyapenya nka bu kiamo kia munyinga ki buwa p’abekielaa muilungu dia kaalo, na eyi diaye dibaadi bu kituumo* kia mema ebungi. 16 Na baadi na nyenyenyi musambobidi muiyasa diaye dibalume, na mukanua muaye mubatuukanga lupete lua ngoshi lui nsongo lula lua maashi kubidi, na mpala yaye ibaadi nka bu nguba p’akuete kumunyika bibukopo. 17 Panamumuene, naponene ku ngua kuaye nka bu’mi mufue.

Anka bantentekiele eyasa diaye dibalume andungula’shi: “Totshinanga. Ami ne a Kumpala na a Nfudiilo, 18 na yawa e na muwa, na nanfuile, anka tala! Ne na muwa bua loso, na ne na nfungula ya lufu na ya Mashama.* 19 Funda mianda ibomono na ikuete kukitshika, na ayikakitshika kunyima kua ino. 20 Pabitale mianda ifuame ya kishila ya nyenyenyi musambobidi yodi mumone i muiyasa diande dibalume, na bituudilo musambobidi bia bimunyi bia ôlo: Nyenyenyi musambobidi ayilesha mikeyilu ya tukongie musambobidi, na bituudilo bia bimunyi musambobidi, abilesha tukongie musambobidi.

2 “Fundila muikeyilu a kakongie ka mu Efeso’shi: Yawa e na nyenyenyi musambobidi muiyasa diaye dibalume na atambukila munkatshi mua bituudilo bia bimunyi musambobidi bia ôlo amba’shi: 2 ‘Nauku bikitshino biobe na mufubo* oobe wibukopo, na kunyingiila kobe, nauku’nyi’shi tue mulombene kutadiila bantu bebubi na we mutompe baaba abamba’shi mbatumiibua aku namu ta mbatumiibua, na we musangane’shi mbaasha madimi. 3 Okuete dingi kunyingiila na kukankamana bu’eshina diande, na tue mukookie. 4 Anka, ne nobe uno muanda, we mulekie kifulo kibodi nakio ku mbangilo.

5 “‘Biabia, tentekiesha paapa pobodi muponene, welangie na okite mianda ibodi okitshi ku mbangilo, su tuemuilangie, nafiki kodi na nankaasha kituudilo kiobe kia kimunyi pa mbalo yakio. 6 Sunga mbiabia, okuete kukita uno muanda wibuwa: We mushikue bikitshino bia kasaka ka Nikolase, biandi mushikue namu. 7 Yawa e na matui apushe kiabalungula tukongie kui kikudi: Muntu atshimuna nankamupa mushindo wa kudia bikuba bia ku mutshi wa muwa wi mu mpaladisu a Efile Mukulu.’

8 “Fundila muikeyilu a kakongie ka mu Smirne’shi: ‘A kumpala na a Nfudiilo,’ yawa bafuile apetuula dingi muwa amba’shi: 9 ‘Nauku makienga oobe na bulanda bobe—anka we mpeta—na nauku kasaabu ka baaba abeamba bu bena Yunda, aku namu ta mbena Yunda, anka mbekale kitumbuilo kia Satana. 10 Totshinanga pabitale dikienga diokiebe kupeta. Teemesha! Diabulu atungunuka na kuela bangi ba kuanudi mu lukano, bua’shi nutompibue mu mianda yoso, na anukapete makienga munda mua mafuku ekumi. Biabia, shala na lulamato mpa na ku lufu, na nakakupa kifulu kia ntumbo kia muwa. 11 Yawa e na matui apushe kiabalungula tukongie kui kikudi: Muntu atshimuna, lufu lua kabidi t’alukamukitshi kintu.’

12 “Fundila muikeyilu a kakongie ka mu Pergame’shi: Yawa e na lupete lua ngoshi lula lui nsongo lua maashi kubidi, amba’shi: 13 ‘Nauku mbalo yodi mushale, nkuamba’shi paapa pe lupuna nsulu lua Satana; anka we mushale mulamate pepoo kuishina diande, na tue mupele lukumiino lobe muandi sunga mu mafuku a Antipase, kamonyi kande ke na lulamato kabaabadi bayipee ku lupese luenu, paapa pashalele Satana.

14 “‘Anka ne nobe mianda ipeela, kobe kuakua, we na bantu balamate ku dilongiesha dia Balame, yawa baadi mulongieshe Balake bua kutuula kikokoshi kumpala kua bana ba Isalele, bua’shi badie bintu bilambulue ma nkishi na kukita lukiebanokiebano.* 15 Mu mushindo umune, we na dingi bantu balamate ku dilongiesha dia kasaka ka Nikolase. 16 Biabia elangie. Muanda su tue muilangie, nafiki kodi kuakua bukidi na, nalu nabo ngoshi na lupete lua ngoshi lula lua mukanua muande.

17 “‘Yawa e na matui apushe kiabalungula tukongie kui kikudi: Yawa atshimuna, nakamupa ndambo ya mana ifuamishibue, na nakamupa ebue ditooka, pafundibue eshina dipia diabash’abauku kui muntu su ngumune kukaasha nka yawa edipete.’

18 “Fundila muikeyilu a kakongie ke mu Tiyatire’shi: Muana a Efile Mukulu e na meso e bu ndimi ya kaalo, na e na ngua bu kiamo kia munyinga kibuwa amba’shi: 19 ‘Nauku bikitshino biobe na kifulo kiobe na lukumiino lobe na mufubo oobe na kunyingiila kobe, na nauku’shi bikitshino biobe bia ku nfudiilo mbikile bia ku mbangilo.

20 “‘Anka ne nobe uno muanda, we mutadiile yawa muana mukashi Yezabele, eeyitanyina bu mutemuki mukashi na alongiesha na kupambusha ba mpika bande bua kukita lukiebanokiebano* na kudia bintu bilambulue ma nkishi. 21 Ne mumulekiele nsaa bua’shi elangie, anka takumiina kuilanga pabitale lukiebanokiebano* luaye. 22 Ntandi pa kumusumbula ku lusala lua maladi na kusumbula baaba boso abatambuka naye lusandi mu mpombo ikata, su ta mbelangie ku bikitshino biebatakula bua kukita. 23 Na nayipaa bana baye na bipupa bia maladi abiipayishenaa, bua’shi tukongie toso tuukie’shi ami nataluulaa binangu bioso bifuame na mianda i mu mashimba, na nankafutu muntu oso muyile bikitshino biaye.

24 “‘Anka nalungula bangi ba kuanudi babashala mu Tiyatire, boso bash’abalondo dino dilongiesha, baaba bash’abeuku kiakia kiabetanyina bu “mianda ifuame ya Satana’shi”: Ntanenutentekiela bungi bushito nya. 25 Biabia shalayi balamate bibukopo ku kiakia kianudi nakio mpa na pankafiki. 26 Na yawa atshimuna na alondo bikitshino biande mpa na ku nfudiilo, nakamupa matalua kunundu kua miilo, 27 na akakunkusha bantu na mukombo wa kiamo na, abakasooseka nka bu bipulu bi’ema anka bu bi naadi mupete matalua kui Yaya. 28 Na nakamupa luenyenyi lua ku nakashika. 29 Yawa e na matui apushe kiabalungula tukongie kui kikudi.’

3 “Fundila muikeyilu a kakongie ke mu Sarde’shi: Yawa e na bikudi musambobidi bi’Efile Mukulu na nyenyenyi musambobidi amba’shi: ‘Nauku bikitshino biobe, na’shi bantu abauku’shi* we na muwa anka we mufue. 2 Ikala mupasukie, na nyingisha biabia bishale bitaabikalanga pepi na kufua, muanda ntshi musangane mifubo* yobe ikumbane kalolo kumpala ku’Efile Mukulu ande. 3 Biabia tungunuka na kutentekiesha biabia bibodi mupete na bibodi mupushe, tungunuka na kuibilama na welangie. Su tue mupasukie, nakafiki kodi bu ngifi, na tokauku su nkapeela nsaa yankafiki kodi.

4 “‘Anka we na bantu* bapeela mu Sarde, bashi baluishe bilamba biabo, na abakatambuka nami bafuale bilamba bitooka, muanda mbalombene kuibifuala. 5 Yawa akatshimuna, akafuala bilamba bitooka, na mu mushindo su ngumune, ntankashimi eshina diaye mu mukanda wa muwa, anka nakashinkamisha’shi namuuku kumpala kua Nshami na kumpala kua mikeyilu yaye. 6 Yawa e na matui apushe biabalungula tukongie kui kikudi.’

7 “Fundila muikeyilu a kakongie ke mu Filadelfi’shi: Yawa a kishila na a binyibinyi e na lufungula lua Davide, yawa afungulaa bishi bilombene ungi muntu kufunga na afungaa bishi bilombene ungi muntu kufungula amba’shi: 8 ‘Nauku bikitshino biobe—pusha! Natuulu kumpala kobe kiibi kifungule kishi kilombene muntu kushita, nauku’shi we na bukome bupeela anka we mukookiele eyi diande na tue mupele eshina diande. 9 Tala! Baaba be mu kitumbuilo kia Satana bakuete kuamba’shi mbena Yunda aku ta mbena Yunda, bakuete kudimba—pusha! Nakebafuisha buabadia kukunama* kuushi kua ngua yobe na kuibaukisha’shi ne mukufule. 10 Bu biodi mulame eyi pabitale kunyingiila* kuande, nakakulama namu mu nsaa ya kutompibua akukafiki pa nsenga yoso ishima bua kutompa baaba bepashale. 11 Nafiki bukidi, shala mulamate ku kiakia kiodi nakio, bua’shi muntu su ngumune t’atanga kifulu kiobe kia ntumbo.

12 “‘Yawa atshimuna—nakamuikasha bu musungo mu ntempelo a Efile Mukulu ande na t’akemutuuku musango su ngumune, na nakafundu mu mpala muaye eshina di’Efile Mukulu ande, n’eshina dia kibundi ki’Efile Mukulu ande, Yelusalema mupia ayiki muiyilu kui Efile Mukulu ande, n’eshina diande dipia. 13 Yawa e na matui apushe biabalungula tukogie kui kikudi.’

14 “‘Fundila muikeyilu a kakongie ke mu Laodise’shi: Yawa abetanyina bu Amene, kamonyi ka lulamato na ka binyibinyi, mbangilo a kupanga ku’Efile Mukulu amba’shi: 15 ‘Nauku bikitshino biobe na nauku’shi, tue mashika sunga kaalo. Nakuminanga’shi wekale mashika sunga kaalo. 16 Biabia bu biodi kifuufu,* kuamba’shi tue mashika sunga kaalo, nakakulasa mukanua muande. 17 Muanda okuete kuakula’shi: “Ne mpeta na, ne na bintu bibungi ntshi na lukalo lua kintu su nkimune,” kadi touku’shi we muntu sha dikienga, we bi lusa, we mulanda, we mpofu na we musua. 18 Nakutekie bua’shi oule ôlo mulumbuulue mu kaalo kuandi bua’shi ofikie mpeta, na kuula bilamba bitooka bua’shi ofuale kupela bantu bamona musua oobe na okuatshika buufu, na kuula buanga bua kushinga mu meso oobe bua’shi omone.

19 “‘Bantu boso bandi mufule ngofu, nebalangaa na kuibanyoka. Biabia ikala na kisumi na welangie. 20 Tala! Ne muimane ku kiibi na nkuete kukookola. Su muntu apusha eyi diande na ashitula ku kiibi, nakatuele mu nshibo muaye na nakadi naye kidibua kia kiolua, na’ye namu akadi nami. 21 Yawa atshimuna, nakashala naye mu nkuasa ande a bufumu nka bu binaadi’mi namu mutshimune na nashala na Yaya mu nkuasa aaye a bufumu. 22 Yawa e na matui apushe biabalungula tukongie kui kikudi.’”

4 Kunyima kua biabia, namuene na talayi! kiibi kifungule muiyilu, n’eyi dia kumpala dinapushishe adisamba nami dibaadi nka bu dia mpungi adiamba’shi: “Kaamina kuno na nakakulesha mianda i na kia kukitshika.” 2 Musango umune kunyima kua bino, bukome bua kikudi kiselele bubafikile kuandi, na talayi! nkuasa a bufumu baadi mutudibue pa mbalo yaye muiyilu, na ungi muntu baadi mushale mu nkuasa a bufumu. 3 Na Yawa baadi mushale muanka baadi abadima nka bu ebue dia Jaspe na dia Sarduane,* na nkongolo amueneka nka bu ebue dia emerode baadi muifunyishe nkuasa a bufumu.

4 Nkuasa 24 ya bufumu ibaadi ifunyishe nkuasa a bufumu, na namuene bakulu 24 bafuale bilamba bitooka mbashale mu ino nkuasa ya bufumu, na ku mitue kuabo kubaadi bifulu bia ntumbo bia ôlo. 5 Na ku nkuasa a bufumu, kubaadi akutuuku mipenyo na mayi na tupandapanda; na kumpala kua nkuasa a bufumu kubaadi akutembe malampi musambobidi a kaalo, bino abilesha bikudi musambobidi bi’Efile Mukulu. 6 Kumpala kua nkuasa a bufumu kubaadi kintu kibaadi kifuanene na kalunga ka mema ka lumueno, bu ebue dia Kristale.

Munkatshi mua nkuasa a bufumu na ku mpese kua nkuasa a bufumu kubaadi bipangua binanka bi na muwa, bibaadi biwule na meso mbidi yoso, kumpala na kunyima. 7 Kipangua ki na muwa kia kumpala kibaadi bu ntambue, na kipangua ki na muwa kia kabidi kibaadi bu muana a ngombe mulume, na kipangua kia kasatu ki na muwa, kibaadi na mpala bu ya muntu, na kipangua kia kananka ki na muwa kibaadi bu kionyi kia mumba akipapama. 8 Na kioso kipangua kia ku bino bipangua binanka bi na muwa kibaadi na mbaba isamombo; bibaadi biwule na meso mbalo yoso kunundu na muushi. Na abitungunuka na kuakula kushi kukooka bufuku na kanya’shi: “Eselele, eselele, eselele nyi Yehowa Efile Mukulu, Sha Bukome Boso, baadi kuanka na e kuanka na afiki.”

9 Nsaa yoso i bipangua bi na muwa abialusha ntumbo na kinemo na lutumbu kui Yawa mushale mu nkuasa a bufumu, Aye e na muwa bua loso, 10 bakulu 24 abakunama na kukupila mpala paashi kumpala kua Yawa mushale mu nkuasa a bufumu na kulanguila Yawa e na muwa bua loso, na abasumbula bifulu biabo bia ntumbo kumpala kua nkuasa a bufumu abakula’shi: 11 “Yehowa Efile Mukulu etu, we mulombene kupeta ntumbo, kinemo na bukome, muanda bopangile bintu bioso, na pa muanda wa kikiebe ki’eshimba diobe, bibekeele kuanka na bibaadi bipangibue.”

5 Na namuene muiyasa dibalume dia Yawa baadi mushale ku nkuasa a bufumu, mufungofungo ubaabadi bafunde mpese* yoso ibidi, ubaabadi bafungie bibukopo na bitampi musambobidi. 2 Na namuene muikeyilu a bukome eele musaase n’eyi dibukopo’shi: “Nnanyi mulombene kubuula mufungofungo na kulamuna bitampi biao?” 3 Anka takubaadi muntu su ngumune muiyilu sunga pa nsenga sunga muushi mua nsenga, baadi mulombene kubuula mufungofungo na kutala munda muawo. 4 Ami nkudila ngofu muanda takubaadi muntu su ngumune mulombene kubuula mufungofungo na kutala munda muao. 5 Anka umune a ku bakulu bandunguile’shi: “Leka kudila. Tala! Ntambue a kisamba kia Yunda, mushi wa Davide, mmutshimune na mmulombane bua kubuula mufungofungo na bitampi biawo musambobidi.”

6 Na namuene munkatshi mua nkuasa a bufumu na munkatshi mua bipangua binanka bi na muwa na munkatshi mua bakulu mmuimane muana a mukooko baadi amueka’shi baadi muipayibue, baadi na nsengua musambobidi, na meso musambobidi, aa meso aalesha bikudi musambobidi bi’Efile Mukulu bibaabadi batume pa nsenga ishima. 7 Musango umune aye nkuiseesela, na nkuata mufungofungo muiyasa dibalume dia Yawa baadi mushale mu nkuasa a bufumu. 8 Pabaatshile mufungofungo, bipangua binanka bi na muwa na bakulu 24 babaponene paashi, bayinama kumpala kua Muana a mukooko, oso a kuabadi baadi na luseese na bibakudi bia ôlo mubaadi muule kabanda.* (Kabanda akalesha nteko ya beselele.) 9 Na babaadi abayimbi loono lupia abamba’shi: “We mulombane bua kuata mufungofungo na kufungula bitampi biawo, muanda bodi muipayibue na ku mase oobe bodi muudile Efile Mukulu bantu ba kisamba kioso, edimi dioso, muilo oso, n’eumbo dioso, 10 na bodi muibekashe bu ba nfumu na ba tshite muakuidi b’Efile Mukulu etu, na be na kia kukunkusha bu ba nfumu pa nsenga.”

11 Namuene na napushishe eyi dia mikeyilu ibungi ibaadi ifunyishe nkuasa a bufumu, na bipangua bi na muwa na bakulu, na bungi buabo bubaadi midiyala na midiyala* na binunu na binunu, 12 na babaadi abeele misaase n’eyi dibukopo’shi: “Muana a mukooko baadi muipayibue, mmulombane bua kupeta bukome na mapeta na binangu na matalua na kinemo na ntumbo na muabi.”

13 Na napushishe kipangua kioso ki muiyilu na pa nsenga na ki muushi mua nsenga na ki mu kalunga ka mema, na bintu bioso bi muanka abiamba’shi: “Muabi na kinemo na ntumbo na matalua bikale kui Yawa mushale ku nkuasa a bufumu na kui Muana a mukooko bua loso.” 14 Bipangua binanka bi na muwa bibaadi abiamba’shi: “Amene!” na bakulu nkukunama na nkukupila mpala paashi, abo nkulanguila.

6 Pabaadi Muana a mukooko mufungule kimune kia ku bitampi musambobidi, namuene na napushishe kimune kia ku bipangua bi na muwa akiakula n’eyi di bu kapandapanda’shi: “Fika!” 2 Na namuene na talayi! Nfualasa tooka na baadi mushale panka baadi na buta; babamupeele kifulu kia ntumbo, na batuukile bua kutshimuna bua’shi afudiishe kutshimuna kuaye.

3 Pabaadi Muana a mukooko mufungule kitampi kia kabidi, naadi mupushe kipangua ki na muwa kia kabidi akiamba’shi: “Fika!” 4 Ungi nfualasa e na elangi dimonga batuukile, na babapeele yawa baadi mushale panka matalua a kukaasha butaale pa nsenga bua’shi bantu beyipayishene, na babamupeele lupete lua ngoshi lukata.

5 Pabaadi Muana a mukooko mufungule kitampi kia kasatu, napushishe kipangua ki na muwa kia kasatu akiamba’shi: “Fika!” Namuene na talayi! Nfualasa fiita na baadi mushale panka baadi na kipimo muiyasa diaye. 6 Napushishe nka bu eyi adituuku munkatshi mua bipangua binanka bi na muwa adiamba’shi: “Kilo kimune kia bukula bua blé ku muulo wa ndenye umune, na bilo bisatu bia orje ku muulo wa ndenye umune; na toluishanga muimu wa olive na nfinyo.”

7 Pabaadi muana a mukooko mufungule kitampi kia kananka, napushishe eyi dia kipangua ki na muwa kia kananka akiamba’shi: “Fika!” 8 Na namuene, talayi! Nfualasa mutookolokie na baadi mushale panka abaadi abamuitanyina bu Lufu. Na Mashama* abaadi aamulondo mu mongo. Na babaadi bebape matalua pa kia binanka kia nsenga bua kuipaa bantu na lupete lua ngoshi lula na bipupa bia nsala na bipupa bia maladi abipayishenaa, na ku bukuashi bua nyema ya bukielo ya pa nsenga.

9 Pabaadi Muana a mukooko mufungule kitampi kia katano, namuene muushi mua kilambuilo miuwa* ya baaba babaabadi bepee pa muanda wa lulamato luabo ku eyi di’Efile Mukulu, na pa muanda wa bukamonyi bubaabadi batuushe. 10 Babaadi beele misaase n’eyi dibukopo’shi: “Muanana mukile bukata a kishila na a binyibinyi, okapele kutshiba kiimu na koobola pabitale mase etu kui baaba bashale pa nsenga mpa na ku nsaa kinyi?” 11 Na babapeele oso a kuabadi musapi utooka, na bebalungula bua kuikisha dingi kapindi, mpa nka na apakakumbana bungi bua ba mpika naabo na bakuabo bat’abekalanga pepi na kuipayibua nka bu bibaabadi bayipayibue namu.

12 Namuene pabaadi Muana a mukooko mufungule kitampi kia kasamombo, kutshinkatshinka kua nsenga kukata akukitshika; na nguba nkufiita nka bu mpaya* mukitshibue na buaa, na mueshi ushima nkualuluka bu mase, 13 Na nyenyenyi ya muiyilu ibaadi ipone pa nsenga, anka bu apapuku kipapi kibukopo akinyunyisha mutshi wa nfigiye na tukuba tubishi tua nfigiye atupono. 14 Na eyilu dibaadi diifungie nka bu mufungofungo wabafungu, na adio nkushimina, na miengie yoso na bisangi bioso babaadi bebikatushe pa mbalo yabio. 15 Biabia, ba nfumu ba pa nsenga, bakata, bakata ba basalayi, ba mpeta, ba sha bukome na ba mpika boso, na bantu boso be bulungantu babafuamine mu mbuebue na mu mabue akata a ku miengie. 16 Babaadi abatungunuka na kulungula miengie na mbuebue’shi: “Etuponeneyi na nuitufuamishe ku meso kua Yawa mushale mu nkuasa a bufumu na ku nsungu ya Muana a mukooko, 17 muanda efuku dikata dia nsungu yabo dibafiki, nnanyi mulombene kupanda?”

7 Kunyima kua biabia namuene mikeyilu inanka imane mu mapaka ananka a nsenga, ikuate mpapi inanka ya nsenga bibukopo bua’shi lupapi su ndumune talupukanga pa nsenga, pa kalunga ka mema sunga ku mutshi su ngumune. 2 Na namuene ungi muikeyilu akatukila kutunduka nguba, baadi na kitampi ki’Efile Mukulu ena muwa, na belele musaase n’eyi dibukopo kui mikeyilu inanka ibaabadi bape matalua a kuluisha nsenga na kalunga ka mema, 3 amba’shi: “Tanukitshinanga nsenga bibubi na kalunga ka mema na mitshi mpa na p’atukapudisha kuela ba mpika b’Efile Mukulu etu kitampi mu mapala aabo.”

4 Napushishe bungi bua bantu babaabadi beele bitampi, bubaadi bua bantu 144 000, babaabadi beele kitampi ba mu kisamba kioso kia bana ba Isalele:

9 Kunyima kua bino namuene na talayi! kibumbu kikata kia bantu babashibaadi balombene kubadika kui muntu su ngumune, ba mu maumbo oso, miilo yoso, bisamba bioso, na ndimi yoso mbemane kumpala kua nkuasa a bufumu na kumpala kua Muana a mukooko, mbafuale misapi itoka na babaadi bakuate malala a mabo mu maasa muabo. 10 Babaadi abatungunuka na kuela misaase n’eyi dibukopo abamba’shi: “Kipandilo kietu akifiki kui Efile Mukulu eetu mushale mu nkuasa a bufumu na kui Muana a mukooko.”

11 Mikeyilu yoso ibaadi imane ngifunyishe nkuasa a bufumu na bakulu na bipangua binanka bi na muwa, na babakunamine mbeele mapala paashi kumpala kua nkuasa a bufumu na nkulanguila Efile Mukulu, 12 abamba’shi: “Amene! Muabi, ntumbo na binangu na lutumbu na kinemo na bukome na matalua, bikale kui Efile Mukulu etu bua loso. Amene.”

13 Umune a ku bakulu bandunguile’shi: “Bano bantu bafuale nkandio itoka mba nnanyi na abatuukila kuikunyi?” 14 Musango umune namulunguile’shi: “Nfumuami, obe nyi auku.” Na bandunguile’shi: “Bano mbantu abatuukila mu mpombo ikata, na mbasuule misapi yabo beyitoosha soo mu mase a Muana a mukooko. 15 Nyi buakinyi be kumpala kua nkuasa a bufumu a Efile Mukulu, na abamukitshina mufubo* wa kishila bufuku na kanya mu ntempelo aaye; na Yawa mushale mu nkuasa a bufumu akebabuikila epema diaye. 16 T’abakapusha dingi nsala sunga nyota na nguba t’akebashiiki dingi sunga kanya kebukopo, 17 muanda Muana a mukooko e munkatshi mua nkuasa a bufumu, akebalama na kuibakunkusha ku nsulo ya mema a muwa. Na Efile Mukulu akakumuna mpolo yoso ku meso kuabo.”

8 Pabaadi Muana a mukooko mufungule kitampi kia musambobidi, muiyilu mubaadi mumiine nyaa munda mua pepi kipindi kia nsaa. 2 Na namuene mikeyilu musambobidi ngimane kumpala ku’Efile Mukulu na babeyipeele mpungi musambobidi.

3 Ungi muikeyilu baadi mukuate kibakudi kia ôlo kia kabanda* bafikile na emana pa kilambuilo, na babamupeele kabanda kebungi bua’shi ekalambule ku kilambuilo kia ôlo kibaadi kumpala kua nkuasa a bufumu pabaadi nteko ya beselele ayikamina. 4 Miishi ya kabanda kabaadi muikeyilu mushiikie, ibakamiine kumpala ku’Efile Mukulu na nteko ya beselele. 5 Musango umune muikeyilu baatshile kibakudi kia kabanda ekiusha makala abaatshile ku kilambuilo na aye nkuiasumbula pa nsenga. Na kubakupiile tupandapanda na mayi na mipenyo ya mpeshi na kutshinkatshinka kua nsenga. 6 Na mikeyilu musambobidi ibaadi na mpungi musambobidi nkuilumbuula bua kuiyela.

7 Muikeyilu a kumpala belele mpungi yaye. Kuatuuka mabue na kaalo kesangie na mase, na babasumbuile biabia bioso pa nsenga; na kia bisatu kia nsenga kibapiile kaalo, na kia bisatu kia mitshi kibapiile kaalo mpa na lubishi loso lubapiile kaalo.

8 Muikeyilu a kabidi belele mpungi yaye. Na kintu ki bu muengie ukata autembe kaalo, kibaadi kisumbudibue mu kalunga ka mema na kia bisatu kia kalunga ka mema kibafikile bu mase; 9 na kia bisatu kia bipangua* bi na muwa bibaadi mu kalunga, bibafuile, na kia bisatu kia mashuwa kibeyinyine mu mema.

10 Muikeyilu a kasatu belele mpungi yaye. Na luenyenyi lukata lubaadi alutembe bu elampi lubaponene muiyilu, na lubaponene pa kia bisatu kia miela na pa nsulo ya mema. 11 Na eshina dia luno luenyenyi, dibaadi bu Mutshi wa buulo. Na kia bisatu kia mema kibafikile buulo, na bantu bebungi babafuile bua ano mema, muanda abafikile buulo.

12 Muikeyilu a kananka belele mpungi yaye. Na babakupiile kia bisatu kia nguba, mpa na kia bisatu kia mueshi, na kia bisatu kia nyenyenyi, bua’shi kia bisatu kiabio bioso, kikale mufito na bua’shi kia bisatu ki’efuku takiikalanga n’etaata mpa na kia bisatu kia bufuku.

13 Namuene na napushishe kionyi kia mumba akipapama munkatshi mu’eyilu na akiamba n’eyi di bukopo’shi: “Mulua, mulua, mulua kui baaba bashale pa nsenga pa muanda wa kudila kua mpungi ibashala ya mikeyilu isatu itayidi pa kuela mpungi yayo!”

9 Muikeyilu a kataano belele mpungi yaye. Na namuene luenyenyi alukatuka muiyilu alupono pa nsenga, na babamupeele lufungula lua ku buina bula. 2 Bafunguile ku buina* bula, na miishi ibatukile mu buabua buina ibaadi nka bu miishi ya mu nfuulo mukata a kaalo, na nguba mpa na lupapi* bibafiitshile na yaaya miishi. 3 Na mpasu ibatuukile mu yaaya miishi, ayo nkupalakana pa nsenga na abeyipeele matalua e mumune na matalua e nao tuminu tua pa nsenga. 4 Na babeyilunguile bua’shi tayikitshinanga lubishi lua pa nsenga sunga kikunuanga kikampanda, sunga mutshi bibubi, kadi nka penda bantu bashi na kitampi ki’Efile Mukulu mu mapala aabo.

5 Na ta mbape mpasu matalua a kuibayipaa, anka nga kuibakiengiesha munda mua mieshi itaano, na dikienga diabo di mumune na diadia adipushaa muntu p’abamusumu kui kaminu. 6 Mu aa mafuku, bantu abakakimbi lufu anka t’abakelupete na abakakumina kufua, anka lufu alukebasuuku.

7 Mpasu ibaadi nka bu nfualasa yabadi balumbuule bua ngoshi; ku mitue yayo kubaadi bintu bi nka bu bifulu bia ntumbo bia ôlo, na mpala yayo ibaadi ifuanene na mpala ya bantu, 8 yaaya mpasu ibaadi na nyene nka bu ya bana bakashi. Na meno aayo abaadi nka bu meno a ntambue, 9 na ibaadi na ngabo ya pa kiadi, nka bu ngabo ya kiamo. Na maunga a mapushi aayo e nka bu a matempu abakaka kui nfualasa ayende mu ngoshi. 10 Dingi, ibaadi na mikila na minungi nka bu tuminu na mu mikila yayo mui matalua a kukitshina bantu bibubi munda mua mieshi itaano. 11 I na nfumu kunundu kuayo, muikeyilu a buina bula. Eshina diaye mu kina Ebelu mbu Abadone,* kadi mu kina Greke eshina diaye mbu Apolione.*

12 Mulua umune ubakidi. Talanga! Ingi milua ibidi ayifiki kunyima kua ino mianda.

13 Muikeyilu a kasamombo belele mpungi yaye. Na napushishe eyi adituukila ku nsengua ya kilambuilo kia ôlo ki kumpala ku’Efile Mukulu 14 adilungula muikeyilu a kasamombo baadi na mpungi’shi: “Fungula mikeyilu inanka yabadi baanye ku muela ukata wa Efrate.” 15 Na babafunguile mikeyilu inanka ibabadi balumbuule bua nsaa n’efuku, na mueshi na kipua bua kuipaa kia bisatu kia bantu.

16 Bungi bua bisaka bia basalayi bakamine pa nfualasa bubaadi bua midiyala* ibidi ya midiyala; naadi mupushe bungi buabo. 17 Bino nyi binamuene nfualasa na baaba bashale panka mu kimonua: Ibaadi na ngabo ya pa kiadi imonga bu kaalo, na ngabo ya pa kiadi ya buleese bu yasente na ngabo ya pa kiadi y’elangi bu muimu wa lumbidi bu nsufule, na mitue ya nfualasa ibaadi nka bu mitue ya ntambue, na mukanua muayo mubaadi amutuuku kaalo na miishi na nsufule. 18 Kia bisatu kia bantu kibaadi kipayibue na bino bipupa bisatu, na kaalo na miishi, na nsufule bibaadi abituuku mukanua muayo. 19 Muanda matalua a nfualasa e mukanua muayo na mu mikila yayo, na mikila yayo i nka bu nyoka na i na mitue na atukitshina bantu bibubi na ino mikila yayo.

20 Anka bantu babaadi bashale bashibaadi bayipayibue na bino bipupa, ta mbelangie ku mifubo* ya maasa aabo; ta mbalekie kulanguila ba demo na ma nkishi a ôlo na a kiamo kia arja na a munyinga na a mabue na a mitshi, enyi ma nkishi ashi alombene kumona sunga kupusha sunga kutambuka. 21 Na ta mbelangie mu kuipayishena kuabo sunga ku mianda yabo ya malenganyi sunga ku lukiebanokiebano* luabo sunga ku bu ngifi buabo.

10 Na namuene ungi muikeyilu e bukome ayiki muiyilu, mmufuale* ekumbi na nkongolo baadi ku mutue kuaye, mpala yaye ibaadi nka bu nguba na mikoolo* yaye ibaadi nka bu misungo ya kaalo, 2 na baadi mukuate ka mufungofungo kapeela muiyasa diaye kabaadi kafungule. Baadi mutuule mukoolo waaye ubalume pa kalunga ka mema, na atuula ubakashi pa nsenga, 3 na baadi muele musaase n’eyi dibukopo nka bu dia ntambue akungula. Pabaadi muele musaase, tuleo tua tupandapanda musambobidi tubapushikile.

4 Kunyima kua tupandapanda musambobidi kukupila, naadi muilumbuule bua kufunda, anka napushishe eyi adifiki muiyilu adiamba’shi: “Lama mianda ibakula tupandapanda musambobidi, tueyifundanga nya.” 5 Muikeyilu anamuene muimane pa kalunga ka mema na pa nsenga belele mboko yaye ibalume muiyilu, 6 baadi muitshipe muishina dia Yawa e na muwa bua loso, bapangile eyilu na bintu bi muanka na nsenga na bintu bi muanka, na kalunga ka mema na bintu bi muanka amba’shi: “Kipungo kia kutengiela kibaapu kupua. 7 Anka apakekala muikeyilu a musambobidi pepi na kuela mpungi aaye, mianda ifuame ya kishila ibaadi Efile Mukulu mulungule bu mukandu wibuwa kui ba mpika baye batemuki, ayikalombana.”

8 Na napushishe eyi adikatukila muiyilu adindungula dingi’shi: “Nda oote mufungofungo ubuule wi muiyasa dia muikeyilu muimane pa kalunga na pa nsenga.” 9 Nayile kui muikeyilu namulungula bua’shi ampe ka mufungofungo kapeela. Bandunguile’shi: “Ekaate wekadie, akekala buulo munda mobe, kadi mukanua mobe akekala nsaasa nka bu buuki.” 10 Naatshile kaaka ka mufungofungo muiyasa dia muikeyilu na nekadiile, mukanua muande kabaadi nsaasa nka bu buuki, anka panaadi muikamine, kabafikile buulo munda muande. 11 Babandunguile’shi: “Abitungu otemukie dingi pabitale miilo, bisamba ndimi na ba nfumu bebungi.”

11 Babampeele elengie di nka bu mukombo* na bandungula’shi: “Ebuee opime mbalo ya kishila ya ntempelo a Efile Mukulu na kilambuilo na baaba abalanguila muanka. 2 Kadi pabitale lupango lui paasha pa mbalo ya kishila ya ntempelo, elulekie tuelupimanga nya, muanda mbelupe bantu ba ingi miilo na, abakaashina kibundi kia kishila muushi mua ngua yabo munda mua mieshi 42. 3 Nakakitshi bia’shi tumonyi tuande tubidi tutemukie munda mua mafuku 1 260 ntufuale mpaya.” 4 Tuno tumonyi atuleesha mitshi ibidi ya olive na bituudilo bibidi bia malampi na ntuimane kumpala kua nfumu a nsenga.

5 Su muntu akiebe kukitshina tuno tumonyi bibubi, kaalo akatuuku mukanua muato, na akayipaa beshikuanyi naabo. Su muntu kampanda akimba kuitukitshina bibubi, abakamuipaa mu uno mushindo. 6 Tui na matalua a kukanga eyilu bua’shi mpeshi tanokanga mu mafuku atukuete kutemuka, na tui na matalua a kualuula mema afika bu mase na kutuma bipupa bia mishindo yoso pa nsenga misango yoso y’atukiebe.

7 Paatukapudisha kutemuka, nyema a bukielo atuukila mu buina bula akalu nato ngoshi aketukambila na aketuipa. 8 Na bitanda biato, abikekala mu museese ukata wa kibundi kikata kiabetanyina mu ngakuilo a mu kikudi bu Sodome na Ejipitu, mubaabadi dingi bayipee nfumuato ku mutshi. 9 Na bantu ba munkatshi mua miilo, bisamba, na ndimi na maumbo abakabandila bitanda biato munda mua mafuku asatu na kipindi, na t’abakakumiina bua’shi batuule bitanda biato mu mashama nya. 10 Na bantu bashale pa nsenga, abakekala na muloo pa muanda wa lufu luato na kukita misangelo, na abaketumishena bia buntu muanda bano batemuki babidi babaadi abakiengesha bantu bashale pa nsenga.

11 Kunyima kua mafuku asatu na kipindi, kikudi kia muwa akifiki kui Efile Mukulu kibatuelele munda muato, na ato nkuimana buimane na moo wibukopo ubakuatshile baaba babetumuene. 12 Na tubapushishe eyi dibukopo adikatukila muiyilu aditulungula’shi: “Kaminayi kuno.” Na tubakamiine muiyilu, muikumbi na beshikuanyi baato babetumuene.* 13 Mu yaaya nsaa kubakitshikile kutshinkatshinka kukata kua nsenga na ki’ekumi kia kibundi kibaponene; na kutshinkatshinka kua nsenga kubayipayile bantu 7 000, bantu babaadi bashale babapushishe moo na abo nkutumbisha Efile Mukulu a muiyilu.

14 Mulua wa kabidi ubakidi. Tala! Mulua wa kasatu ukuete kufika bukidi.

15 Muikeyilu a musambobidi belele mpungi yaye. Na kubapushikile mayi ebukopo muiyilu aamba’shi: “Bufumu bua pa nsenga bubafiki Bufumu bua Nfumuetu na bua Nkidishitu aaye, na akakunkusha bu nfumu bua loso.”

16 Na bakulu 24 babaadi bashale mu ma nkuasa aabo a bufumu kumpala ku’Efile Mukulu, babakunamine bakupila mpala paashi na kulanguila Efile Mukulu 17 abamba’shi: “Atukutumbula obe Yehowa Efile Mukulu, Sha bukome boso, ekuanka, na baadi kuanka, muanda we muate bukome bobe bukata na bobanga kukunkusha bu nfumu. 18 Kadi bisamba bibakuatshile nsungu ibukopo, na nsungu yobe ibafikile, na kipungo kitshibibue kibakumbeene bua kusambisha bafue na kufuta ba mpika bobe batemuki, na beselele na baaba abatshinyi eshina diobe bakata na bapeela, na kuluisha* baaba abaluisha nsenga.”

19 Na babafunguile mbalo ya kishila ya ntempelo a Efile Mukulu muiyilu, na mushete wa kilombeno kiaye ubamuekiele mu mbalo ya kishila ya ntempelo. Na kubaadi kubadima kua mpeshi na mayi na tupandapanda na kutshinkatshinka kua nsenga na mpeshi a mabue.

12 Akupu kitunduilo kikata kibamuenekiele muiyilu: Muana mukashi baadi mufuale nguba na mueshi ubaadi muushi mua ngua yaye, na ku mutue kuaye kubaadi kifulu kia ntumbo kia nyenyenyi 12, 2 baadi n’eyimi. Na baadi adidi muanda wa mitanyo na lukalakashi lua kutanda.

3 Kingi kitunduilo kibamuenekiele muiyilu. Talayi! Dragon e na elangi dimonga na mitue musambobidi na nsengua ekumi na bifulu musambobidi ku mitue yaye; 4 mukila waaye ubaadi ukakie kia bisatu kia nyenyenyi ya muiyilu, weyiponesha pa nsenga. Na dragon baadi nka muimane kumpala kua mukashi baadi pepi na kutanda bua’shi p’atanda, adie muana aaye.

5 Na yawa muana mukashi batandile muana mulume, e na kia kukunkusha miilo yoso na mukombo wa kiamo. Na babayile na muana aaye kui Efile Mukulu na ku nkuasa aaye a bufumu. 6 Na mukashi baadi musuukile mu kabaaka, mubaadi Efile Mukulu mumulumbuluile mbalo na mubaabadi na kia kumudiisha munda mua mafuku 1 260.

7 Kubatuukile ngoshi muiyilu, Mikayele* na mikeyilu yaye babaluile na dragon, na dragon na mikeyilu yaye babaluile nabo 8 anka dragon na mikeyilu yaye tababaadi bakile bukome, na tababadi’nyi na mbalo muiyilu. 9 Babasumbuile dragon, nyoka a ku kibangilo abetanyina bu Diabulu na bu Satana, kuete kupambusha boso ba pa nsenga; babaadi bamusumbule pa nsenga, na mikeyilu yaye ibaadi isumbulue pamune naye. 10 Napushishe eyi dibukopo muiyilu adiamba’shi:

“Binobino kipandilo na bukome na Bufumu bu’Efile Mukulu etu na matalua a Nkidishitu aaye bibafiki, muanda babasumbula yawa afundaa bakuetu pa nsenga, ebafundaa bufuku na kanya kumpala ku’Efile Mukulu etu! 11 Babaadi bamutshimune ku bukuashi bua mase a Muana a mukooko na ku bukuashi bua bukamonyi buabatuusha, na tababaadi bafule miuwa* yabo sunga nkumpala kua lufu. 12 Biabia sankayi, anue eyilu na anue bashale muanka! Malua kui nsenga na kui kalunga ka mema, muanda Diabulu bayiki kuanudi, muikale na nsungu ibukopo, muukie’shi kubamushadila kapindi kapeela.”

13 Pabamuene dragon’shi babaadi bamusumbule pa nsenga, baadi mukiengieshe muana mukashi, yawa baadi mutande muana mulume. 14 Anka babapeele yawa muana mukashi mbaba ibidi ya mumba ukata, bua’shi apapame ende mu kabaaka mbalo ibaabadi bamulumbuluile, muamua muabakamudiisha munda mua kipungo na bipungo na kipindi kia kipungo* kula na nyoka.

15 Na nyoka baadi mulase mema e bu muela mukanua muaye kunyima kua mukashi, bua’shi muela umine yawa muana mukashi. 16 Anka nsenga ibafikile mu kukuasha yawa muana mukashi, yabuula mukanua muayo, ayo nkumina muela ubaadi dragon mulase mukanua muaye. 17 Biabia dragon nkufiitshila muana mukashi munda na aye nkuenda mu kulua ngoshi na baaba bashale ba kekulu* kaye, baaba bakuete kukookiela miiya y’Efile Mukulu na be na mudimo wa kutuusha bukamonyi pabitale Yesu.

13 Na dragon baadi mushale muimane ku lusenga lua kalunga ka mema.

Na namuene nyema a bukielo e na nsengua ekumi na mitue musambobidi, atuuku mu kalunga ka mema na ku nsengua yaye kui bifulu ekumi, na ku mitue yaye kubaadi mashina a kusaabuula Efile Mukulu. 2 Na nyema a bukielo anamuene, baadi muifuanene na ngie, na makasa aaye abaadi efuanene na a nyema a urse na kukanua kuaye kubaadi bu kukanua kua ntambue. Na dragon bapeele nyema a bukielo bukome buaye, nkuasa aaye a bufumu na matalua akata.

3 Na namuene’shi umune wa ku mitue yaye ubaadi utapikie bikata pepi na lufu, anka elonda diaye dia lufu dibaadi dipande, na nsenga yoso ishima ibaadi ilonde nyema a bukielo na kukaanya. 4 Na babaadi abalanguila dragon muanda bapeele nyema a bukielo matalua, na babaadi abalanguila nyema a bukielo pa kuakulanga’shi: “Nnanyi e bu nyema a bukielo na nnanyi mulombene kulua naye?” 5 Na uno nyema a bukielo, bapetele matalua a kuakula na kuitatula, na kusaabuula Efile Mukulu, na babamupeele matalua a kukita mianda munda mua mieshi 42. 6 Na babuluile mukanua muaye bua kukaa Efile Mukulu na kusaabuula eshina diaye na mbalo yaye ya kushala mpa na baaba bashale muiyilu. 7 Babamupeele matalua a kulua na beselele, na kuibatshimuna na babamupeele matalua pa kisamba kioso, muilo, ludimi, na maumbo oso. 8 Na baaba boso bashale pa nsenga abakamulanguila. Na kubanga ku kibangilo* kia bantu, takui eshina su ndimune dia muntu a kuabadi dibaabadi bafunde mu mufungofungo wa muwa wa Muana a mukooko abaabadi bayipee.

9 Su muntu e na matui a kupusha, apushe. 10 Su muntu e na kia kuenda mu bupika, akende mu bupika. Su muntu epayishena ku lupete, abitungu bamuipee namu na lupete. Ino nyi nsaa ayitungu’shi beselele bekale na kunyingiila na lukumiino.

11 Namuene ungi nyema a bukielo atuukila mu nsenga, na baadi na nsengua ibidi i bu ya muana a mukooko, anka babangile kuakula bu dragon. 12 Na baadi afubisha matalua oso a nyema a bukielo a kumpala aye nabene kuete amono. Na batakulanga nsenga na bantu bepashale buabadia kulanguila nyema a bukielo a kumpala baadi n’elonda dia lufu dibaadi dipande. 13 Na akitshi bitunduilo bia kukaanya, na kuyisha mpa na kaalo pa nsenga akakatukila muiyilu, mu meso a bantu.

14 Adimbi baaba bashale pa nsenga muanda wa bitunduilo bibabamupeele matalua a kukita mu meso mua nyema a bukielo, pakuete kulungula bantu bashale pa nsenga buabadia kukita kinfuanyi kia nyema a bukielo, yawa baadi mutapiibue na lupete anka aye nkupanda. 15 Na babamupeele matalua a kupa kinfuanyi kia nyema a bukielo muwa,* bua’shi kinfuanyi kia nyema a bukielo kiakule na kuipayisha baaba bakuete kupela kulanguila kinfuanyi kia nyema a bukielo.

16 Akitshisha bantu boso—bapeela na bakata, ba mpeta na balanda, be bulungantu na ba mpika—bua’shi bekale na kitunduilo kuiyasa diabo dibalume sunga mu mapala aabo, 17 bua’shi muntu su ngumune taulanga sunga kuudisha, kukaasha nka yawa e na kitunduilo, kuamba’shi eshina dia nyema a bukielo sunga bungi bu’eshina diaye. 18 Pano nyi apatungu kuikala na binangu: Yawa e na binangu eele makumi a bungi bua nyema a bukielo, muanda nyi mbungi bua muntu, na bungi buaye nyi 666.

14 Akupu namuene, na talayi! Muana a mukooko muimane pa Muengie wa Siyona na baadi na bantu 144 000, be na eshina diaye n’eshina dia Nshaye difunde mu mapala aabo. 2 Napushishe eyi adifiki muiyilu nka bu kituumo kia mema ebungi na nka bu eyi dia kapandapanda kebukopo na eyi dinapushishe, dibaadi nka bu dia ba ngomba abayimbi na nseese yabo. 3 Abayimbi loono alupushika nka bu loono lupia, kumpala kua nkuasa a bufumu na kumpala kua bipangua binanka bi na muwa na kumpala kua bakulu, muntu su ngumune tabaadi bia kuuka lualua loono, kukaasha nka penda bantu 144 000 babaadi baudibue pa nsenga. 4 Bano mbantu bashi beluishe na bakashi; mu binyibinyi, mbekale tumame. Mbekale baaba abatungunuka na kulonda Muana a mukooko koso kuende. Babaadi baudibue munkatshi mua bana ba bantu bu bikuba bia kumpala bu’Efile Mukulu na bua Muana a mukooko, 5 na ta mbasangane madimi mukanua muabo; tabe na kalema.

6 Na namuene ungi muikeyilu apapama munkatshi mu’eyilu,* baadi na mukandu wibuwa wa kulungula baaba bashale pa nsenga, b’eumbo dioso, kisamba kioso, ludimi loso na muilo oso. 7 Baadi akula n’eyi dibukopo’shi: “Tshinayi Efile Mukulu, na mutumbisheyi, muanda nsaa ya kiimu kiaye ibalombana, biabia languilayi Yawa bakitshine eyilu na nsenga na kalunga na nsulo ya mema.”

8 Ungi muikeyilu a kabidi balondele amba’shi: “Bapono! Babilone Mukata bapono, aye baadi mutomeshe miilo yoso nfinyo ya nsungu ya lukiebanokiebano* luaye!”

9 Ungi muikeyilu a kasatu bebalondele, akula n’eyi dibukopo’shi: “Su muntu alanguila nyema a bukielo na kinfuanyi kiaye na apeta kitunduilo mu mpala yaye, sunga kuiyasa diaye, 10 akatomo namu nfinyo ya nsungu y’Efile Mukulu y’abapongoola muikopo dia nsungu Yaye, na abakamukiengiesha na kaalo na nsufule kumpala kua mikeyilu iselele na kumpala kua Muana a mukooko. 11 Na miishi ya makienga aabo ayikamina nka kukaamina bua loso, na baaba abalanguila nyema a bukielo na kinfuanyi kiaye na yawa oso mupete kitunduilo ki’eshina diaye t’abakayikisha su nkapeela bufuku na kanya. 12 Pano nyi apatungu’shi beselele banyingiile, baaba abakookiela miiya y’Efile Mukulu na balamate ku lukumiino lua Yesu.”

13 Na napushishe eyi adikatukila muiyilu adiamba’shi: “Funda’shi: Ba sha muloo mbaaba abafu mu kuipushena na Muanana kubanga binobino. Eyendo, kikudi akiamba’shi, bayikishe ku mifubo* yabo ibukopo, muanda mianda ibaabakitshine ayibalondo.”

14 Akupu namuene na talayi! ekumbi ditooka na kuakua ku ekumbi ditooka kubaadi kushale muntu e bu muana a muntu, na baadi mufuale kifulu kia ntumbo kia ôlo ku mutue waye na baadi na lupete lui maashi lua kuumbula nalo muiyasa diaye.

15 Ungi muikeyilu batuukile mu mbalo ya kishila ya mu ntempelo, aye nkuela musaase wibukopo kui yawa baadi mushale ku ekumbi ditooka’shi: “Fubisha lupete lobe lua kuumbula, oumbule muanda nsaa ya kuumbula ibalombana na bia kuumbula bia pa nsenga, bibamongo.” 16 Na yawa baadi mushale ku ekumbi, bakishishe lupete luaye lua kuumbula nalo pa nsenga, na nsenga ibaadi yumbudiibue.

17 Na ungi muikeyilu batuukile mu mbalo ya kishila ya mu ntempelo e muiyilu, na baadi namu na lupete lui maashi lua kuumbula nalo.

18 Na ungi muikeyilu batuukile ku kilambuilo, na baadi na matalua pa kaalo. Na belele musaase wibukopo kui muikeyilu baadi na lupete lui maashi lua kuumbula nalo amba’shi: “Fubisha lupete lobe lua kuumbula lui maashi, otshibe bisaasa bia nfinyo i pa nsenga, muanda tumuma tuayo tubaapu kumonga.” 19 Na yawa muikeyilu bakishishe lupete luaye lua kuumbula nalo pa nsenga, aye nkutshiba tumuma tua nfinyo tua pa nsenga na aye nkuituela mu kiengielo kikata kia nsungu y’Efile Mukulu. 20 Babafuntshile nfinyo mu kiengielo paasha pa kibundi, na mase nkutuuka mu kiengielo, na awo nkukaamina mpa na ku mioshi y’abanyaa mbangabanga ya nfualasa, awo nkupalakana mu bula bua stade* 1 600.

15 Na namuene kingi kitunduilo muiyilu, kikata na kia kutshina, mikeyilu musambobidi na bipupa musambobidi. Bino bipupa nyi bia nfudiilo muanda ku bukuashi buabio, nyi akukafudiisha Efile Mukulu nsungu yaye.

2 Na namuene kintu ki bu kalunga ka mema ka lumueno, bibaadi munda bibaadi biisangie na kaalo, na baaba babaadi batshimune nyema a bukielo, na kinfuanyi kiaye na bungi bu’eshina diaye, babaadi bemane mu buipi bua kalunga ka mema ka lumueno mbakuate nseese y’Efile Mukulu. 3 Na babaaadi abayimbi loono lua Moyise mpika a Efile Mukulu na loono lua Muana a mukooko, bambanga’shi:

“Yehowa Efile Mukulu Sha bukome boso, mifubo yobe ngikata na ngia kukaanya. Okitaa mianda na kululama na binyibinyi, Nfumu a ikalayika. 4 Yehowa, nnanyi shi mulombene kukutshina, na kutumbisha eshina diobe, muanda bupenka bobe we na lulamato? Muanda miilo yoso ayikafiki kumpala kobe bua kukulanguila, muanda kutshiba kobe kua biimu na kululama nkuleshibue patooka.”

5 Kunyima kua biabia namuene mbalo ya kishila y’epema dia bukamonyi ibafungukile muiyilu, 6 na mikeyilu musambobidi ibaadi na bipupa musambobidi ibatuukile mu mbalo ya kishila ngifuale bilamba bitooka bia buaa, abupenyapenya na ngifuale mikaba ya ôlo mu kiadi. 7 Kimune kia ku bipangua binanka bi na muwa, kibapeele mikeyilu musambobidi bibakudi musambobidi bia ôlo bibaadi biuule nsungu y’Efile Mukulu, yawa e na muwa bua loso. 8 Na mbalo ya kishila ibaadi iule miishi muanda wa ntumbo y’Efile Mukulu na muanda wa bukome buaye, takui muntu su ngumune baadi mulombene kutuela mu mbalo ya kishila mpa nka na apakapu bipupa musambobidi bia mikeyilu musambobidi.

16 Na napushishe eyi dibukopo adikatukila mu mbalo ya kishila adilungula mikeyilu musambobidi’shi: “Ndayi nupongoole bibakudi musambobidi bia nsungu y’Efile Mukulu pa nsenga.”

2 Muikeyilu a kumpala bayile aye nkupongoola kibakudi kiaye pa nsenga. Na elonda di’eshobo dibakuatshile bantu babaadi na kitunduilo kia nyema a bukielo na babaadi abalanguila kinfuanyi kiaye na kuibakiengiesha.

3 Muikeyilu a kabidi bapongoluele kibakudi kiaye mu kalunga ka mema. Na ako nkualuluka bu mase nka bu a muntu mufue, na bipangua bioso bi na muwa bibafuile, oolo bipangua bia mu kalunga ka mema.

4 Muikeyilu a kasatu bapongoluele kibakudi kiaye mu miela na mu nsulo* ya mema. Na ibalulukile mase. 5 Paapa napushishe muikeyilu e kunundu kua mema akula’shi: “Obe e kuanka na baadi kuanka, E na lulamato, we mululame, muanda bofuisha bino biimu, 6 Muanda mbapongoole mase a beselele na batemuki, nyi buakinyi buebapa mase buabadia kutoma, biabia mbibalombene.” 7 Na napushishe eyi adikatukila ku kilambuilo adiakula’shi: “Oolo, Yehowa, Efile Mukulu Sha bukome boso, biimu biobe mbia binyibinyi na mbia kululama.”

8 Muikeyilu a kananka bapongoluele kibakudi kiaye pa nguba, na babapeele nguba bukome bua kushiika bantu kaalo. 9 Na bantu babaadi bashiikibue na kibobo kibukopo, anka babaadi basaabuule eshina di’Efile Mukulu, aye e na matalua ku bino bipupa, na tababaadi belangie na kumutumbisha nya.

10 Muikeyilu a katano bapongoluele kibakudi kiaye ku lupuna nsulu lua nyema a bukielo. Na bufumu buaye nkualuluka mufito, na bantu ababangile kuisuma meno pa muanda wa busungu, 11 anka babaadi basaabuule Efile Mukulu a muiyilu muanda wa busungu bua malonda aabo a mashoobo, na tababaadi belangie bua bikitshino biabo nya.

12 Muikeyilu a kasamombo bapongoluele kibakudi kiaye mu muela ukata wa Efrate, na mema awo abaadi akame bua kulumbuula eshinda dia ba nfumu abafiki dia kutunduka nguba.

13 Na namuene mayi* ayokielue asatu e butete e bu nsobia* aatuku mukanua mua dragon na mukanua mua nyema a bukielo mpa na mukanua mua mutemuki a madimi. 14 Ngekale binyibinyi mayi ayokielue na ba demo na akuete kukita bitunduilo, na aende kui ba nfumu ba pa nsenga ishima, bua kuibabunga ku ngoshi y’efuku dikata di’Efile Mukulu Sha bukome boso.

15 “Talayi! Nkuete kufika nka bu ngifi. Sha muloo ngiawa ashala mupasukie na kulama bilamba biaye bia panundu bua’shi tala atambuka musua na bantu p’abamumono buufu buamukuata.”

16 Na mayi ayokielue ababungile ba nfumu pamune ku mbalo y’abetanyinaa mu kina Ebelu bu Armagedone.*

17 Muikeyilu a musambobidi bapongoluele kibakudi kiaye mu lupapi. Paapa eyi dibukopo dibatuukile mu mbalo ya kishila adikatukila ku nkuasa a bufumu adiamba’shi: “Bibalombana!” 18 akupu kubaatukile mipenyo na mayi na tupandapanda, na kubaadi kutshinkatshinka kua nsenga kukata kushabandile kukitshika kasha bantu bekala pa nsenga, kuno kutshinkatshinka kua nsenga kubaadi kukile bukata na kuibukopo. 19 Kibundi kikata kibeabuluile mu bipindi bisatu na bibundi bia miilo bibaponene; na Efile Mukulu baadi mutentekieshe Babilone Mukata bua kumupa ekopo dia nsungu yaye ikile bukopo. 20 Dingi bisangi bioso bibasuukile na miengie ibaadi ishimine. 21 Na mabue akata a kasangu aakatukila muiyilu abaadi aponene bantu, ebue dioso dibaadi bushito bua ntalanta umune, na bantu abaadi basaabuule Efile Mukulu muanda wa kipupa kia mabue a kasangu* muanda kino kipupa kibaadi kikile bukata.

17 Umune a ku mikeyilu musambobidi ibaadi na bibakudi musambobidi bafikile andungula’shi: “Fika, nakakulesha kiimu kiabakatshibila ndumba mukata mushale pa mema ebungi, 2 abadi bakite naaye lukiebanokiebano* kui ba nfumu ba pa nsenga na bangi bantu ba pa nsenga babaadi bakolue nfinyo ya lukiebanokiebano* luaye.”

3 Na bayile nami mu kabaaka ku bukome bua kikudi, na namuene muana mukashi mushale pa nyema a bukielo monga baadi muule na mashina a kusaabuula nao Efile Mukulu, na baadi na mitue musambobidi na nsengua ekumi. 4 Yawa muana mukashi baadi mufuale bilamba bimongolokie na bimonga, na baadi muilengieshe na ôlo na mabue a muulo na aneeme, na baadi mukuate kilaudi kia ôlo muiyasa diaye kiule na bintu bi butete, bintu bibutete bia lusandi* luaye. 5 Pa mpala paye pabaadi pafunde eshina, muanda ufuame’shi: “Babilone Mukata, nyinaye na ba ndumba na a bintu bibutete bia pa nsenga.” 6 Na namuene’shi yawa muana mukashi baadi mukolue mase a beselele na mase a tumonyi tua Yesu.

Panamumuene, nakaanyine bikata. 7 Biabia, muikeyilu bandunguile’shi: “Buakinyi boodi mukaanye? Nakakulungula muanda ufuame wa muana mukashi na wa nyema a bukielo e na mitue musambobidi na nsengua ekumi mutuale yawa muana mukashi: 8 Nyema a bukielo obomuene baadi kuanka, kadi te kuanka, na taadi pa kutuuka mu buina bula, anka mbua kuenda mu kubutudibua. Na bantu ba pa nsenga—baaba bashibaadi na mashina afunde mu mufungofungo wa muwa kubanga ku kibangilo kia bantu—abakakaanya ngofu pa kumona’shi, nyema a bukielo baadi kuanka, kadi te kuanka, na ekala kuanka.

9 Pano nyi apatungu kuikala na binangu: Mitue musambobidi, ayilesha miengie musambobidi kuakua kushale muana mukashi ku nsongo. 10 Na kui ba nfumu musambobidi: Batano mbapue kupona, umune e kuanka na ungi t’abandile kufika, kadi p’afiki abitungu ashale bua kapindi kapeela. 11 Na nyema a bukielo baadi kuanka kadi te kuanka, mmuikale dingi nfumu a muanda, anka atuukila ku ba nfumu musambobidi, na ende mpa na mu kubutudibua.

12 “Nsengua ekumi iboodi mumone ayilesha ba nfumu ekumi bash’abandile kupeta bufumu kadi abapete matalua bu ba nfumu bua nsaa umune pamune na nyema a bukielo. 13 Bano ba nfumu be na binangu bimune, biabia abapa nyema a bukielo bukome na matalua aabo. 14 Abakalu na Muana a mukooko, kadi bu biadi Muanana a ba muanana na Nfumu a ba nfumu, Muana a mukooko akebatshimuna. Dingi baaba be naye, betaminyibue na basangudibue na be na lulamato abakatshimuna namu.”

15 Muikeyilu bandunguile’shi: “Mema oboodi mumone, paapa pashale ndumba, aalesha miilo na bisaka bia bantu, na bisamba na ndimi.16 Na nsengua ekumi ibomuene, na nyema a bukielo ayikashikua ndumba na ayikamusaasula na kumuleka musua, ayikadi mbidi yaye, ayikamushimisha bua loso pa kumushiika kaalo. 17 Muanda Efile Mukulu mmutuule uno muanda mu mashimba aabo, bua kulombasha kinangu kiaye, eyendo, bua kulombasha kinangu kiabo kimune pa kupa nyema a bukielo bufumu buabo, mpa nka na apakalombana mayi a Efile Mukulu. 18 Na muana mukashi oboodi mumone alesha kibundi kikata ki na bufumu kunundu kua ba nfumu ba pa nsenga.”

18 Kunyima kua biabia, namuene ungi muikeyilu ayiki muiyilu na matalua akata na ntumbo yaye ibamunyikile pa nsenga. 2 Na belele musaase n’eyi di bukopo’shi: “Bapono! Babilone Mukata bapono, na bafiki kishalelo kia ba demo na mbalo ya kufuamina bikudi bioso bibutete na tonyi toso tuibutete tuabadi bashikue! 3 Muanda pa muanda wa nfinyo na nsungu ya lukiebanokiebano luaye, bisamba bioso mbikuatshikie, na ba nfumu ba pa nsenga babaadi bakite naye lukiebanokiebano,* na ba nsunga ba pa nsenga mbafikie ba mpeta ku bukuashi bua bintu biaye bia muulo wibukopo biadi mupete kushi buufu.”

4 Na napushishe dingi eyi adikatuka muiyilu adiamba’shi: “Bantu bande, tukayi munkatshi muaye, su t’anukumiina kutuelakana naye mu miluisho yaye, na su t’anukumiina kupeta kipindi kia bipupa biaye. 5 Muanda miluisho yaye ngiule mutuuto ukafikie mpa na muiyilu, na Efile Mukulu mmutentekieshe bikitshino biaye bia kukutua kululama.* 6 Mukitshineyi mianda nka bu biadi mukitshine bangi, oolo, mukitshineyi mianda misango ibidi bua biabia biadi mukite; mu kilaudi kiadi musobele maalua aaye, musobeleyi misango ibidi. 7 Mmuitumbishe ngofu, e mu nshalelo a bintu bia muulo wibukopo biadi mupete kushi buufu, mu wawa mushindo, mukiengiesheyi na maalo. Muanda kuete kutungunuka na kuilungula muishimba diaye’shi: ‘Ne mushale bu nfumu mukashi, ntshi mukashi a mu lufuila, na ntshi mulombene kupeta maalo efuku su ndimune.’ 8 Nyi buakinyi bipupa biaye abikafiki mu efuku dimune, lufu na maalo na nsala, na akashimishibua bua loso pa kushikiibua kaalo, muanda Yehowa Efile Mukulu mumutshibile kiimu, e bukome.

9 “Ba nfumu ba pa nsenga babaadi bakite naye lukiebanokiebano,* na babaadi naye mu nshalelo a bintu bia muulo, bibaadi mupete kushi buufu abakadidi na, abakekupila mu kiadi na kinyongua muanda wa busungu buabakapusha pa bimutale p’abakamono miishi ya kushikiibua kuaye. 10 Abakemana ku bula, muanda abatshinyi kukiengieshibua kuaye na abakamba’shi: ‘Mmalua kinyi, mmalua kinyi, obe kibundi kikata, obe Babilone kibundi kibukome, muanda kiimu kiobe kibafiki penda munda mua nsaa umune bisumanga!’

11 “Dingi, ba nsunga ba pa nsenga abakadidi na kutuula maalo pa muanda waye, muanda takui muntu su ngumune akaulu dingi bintu biabo bia busunga biabaudisha, 12 bu ôlo, na arja, na mabue a muulo, na mabue aneeme, bilamba bia lin ebuwa, bilamba bimongolokie, bilamba bia sua, bilamba bimonga pididi, na kintu kioso kiabadi bakite na mitshi y’eshiko dibuwa, na kintu kioso kiabadi bakite na mibanga, na kioso kiabadi bakite na mitshi ya muulo, na kuivre, na kiamo, na ebue dia marbre; 13 dingi na mutshi wa kanele, na bitobuanga bia mu Inde, na kabanda,* na muimu wa malaashi, kabanda katooka* na nfinyo, na muimu wa olive, na bukula buibuwa, na bukula bua blé, na ngombe, na mikooko, nfualasa, ngolofuanda, ba mpika, na miuwa ya bantu.* 14 Oolo, bintu bibuwa biboodi nabio lukalo bibende kula nobe, na bia kudia bioso bi mapembue na bintu bioso bilongame abishimina kodi, t’okebipete dingi.

15 “Ba nsunga babaadi abapaana bino bintu, abo babafikile ba mpeta ku bukuashi buaye, abakemana ku bula muanda abatshinyi kukiengieshibua kuaye, na abakadidi na kutuula maalo, 16 abamba’shi: ‘Mmalua kinyi, mmalua kinyi, obe kibundi kikata kibaadi kifuale bilamba bia lin ebuwa, na bilamba bimongolokie, na bimonga pididi, na kibaadi kiilengieshe na bikano bia ôlo, na mabue a muulo wibukopo, na mabue aneeme, 17 muanda mu nguba umune bisumanga, buabua bupeta boso mbuluishibue!’

“Na muntu oso atambushaa mashuwa a mema,* na bantu boso abatambukilaa pa mema, na baaba abafubaa pa mema na baaba boso abapetelaa mushindo ku mema abakemana ku bula 18 p’abakatala miishi ya kuakuete kupia kaalo, abakeele misaase’shi: ‘Nkibundi kinyi kilombene kuikala mumune na kino kibundi kikata?’ 19 Abakeyele lufuinkinyi mu mutue, na kutuela mu maalo badilanga’shi: ‘Mmalua kinyi, mmalua kinyi, kibundi kikata bino mubaadi bantu boso ba sha mashuwa abapetela bupeta ku bukuashi bua bintu biaye bia muulo, muanda mu nguba umune bisumanga, kibaluishibua!’

20 “Ikala na muloo bua kiakia kibamufikila, obe eyilu, mpa na anue beselele na batumibua na batemuki, muanda Efile Mukulu bamutshibila kiimu bua buwa buenu!”

21 Na muiyekilu a bukome baadi muibueshe ebue di bu ebue dikata dia mpelua, aye nkuidiela mu kalunga pa kuakula’shi: “Bino nyi biabakasumbula Babilone kibundi kikata musango umune, t’abakekimono dingi nya. 22 T’abakapusha dingi kobe eyi dia ba ngomba abayimbi na luseese, ba ngomba ba tupudi, na ba mpungi, na dia bangi bantu abayimbaa. T’abakapete dingi kobe nsendue akitshi mufubo kampanda oso, na t’abakapusha dingi tuleo tua ebue dia mpelua kobe nya. 23 Etaata di’elampi t’adikamunyika dingi kodi, t’abakapusha dingi eyi dia mulume bayibakila sunga dia mukashi bayibakilua kodi, muanda ba nsunga bobe babaadi bantu bakata ba pa nsenga na miilo yoso ibaadi ipambukie, ku bikitshino biobe bia malenganyi. 24 Oolo, babapetele munda muaye, mase a batemuki na a beselele, na mase a bantu boso babaabadi bayipee pa nsenga.”

19 Kunyima napushishe nka bu eyi di bukopo dia kibumbu kikata kia bantu muiyilu. Abamba’shi: “Tumbishayi Yah!* Kipandilo, ntumbo na bukome mbi’Efile Mukulu etu, 2 muanda biimu biaye mbia binyibinyi na mbia kululama. Muanda batshibila ndumba mukata kiimu, aye baadi aluisha nsenga na lukiebanokiebano* luaye, na boobuela mase a bafubi baye abaadi ku maasa kua ndumba.” 3 Na kiakia kibumbu kia bantu kibakuile bua musango wa kabidi’shi: “Tumbishayi Yah! Na muishi waye ubaadi nka aukamina muiyilu bua loso.”

4 Na bakulu 24 na bipangua binanka bi na muwa bibaadi bikuname bua kulanguila Efile Mukulu mushale mu nkuasa a bufumu, na abiamba’shi: “Amene! Tumbishayi Yah!”

5 Dingi eyi dibatuukile ku nkuasa a bufumu adiamba’shi: “Tumbishayi Efile Mukulu etu, anue boso ba mpika baye bakata na bapeela bakuete kumutshina.”

6 Na napushishe eyi di nka bu dia kibumbu kikata kia bantu na bu kituumo* kia mema ebungi na bu tuleo tua tupandapanda tui bukopo. Abamba’shi: “Tumbishayi Yah, muanda Yehowa Efile Mukulu etu, Sha bukome boso babanga kumunana bu nfumu! 7 Tusankieyi na tuikale na muloo wibungi na tumutumbisheyi, muanda bulunda bua Muana a mukooko bubafiki na mukashi aaye baapu kuilumbuula. 8 Oolo, babapeele mukashi a Muana a mukooko matalua a kufuala bilamba bitooka abipenyapenya bia lin ebuwa—muanda lin ebuwa alesha bikitshino bilulame bia beselele.”

9 Na muikeyilu bandunguile’shi: “Funda’shi: Ba sha muloo mbaaba betaminyibue ku kidibua kia kiolua kia bulunda bua Muana a mukooko.” Bandunguile dingi’shi: “Ano nyi mmayi a binyibinyi a Efile Mukulu.” 10 Paapa naponene ku ngua yaye bua kumulanguila. Anka bandunguile’shi: “Dimuka! Tokitanga biabia nya! Ne muikale mpika nobe na a bakuenu be na mufubo wa kutuusha bukamonyi pabitale Yesu. Languila Efile Mukulu! Muanda kutuusha bukamonyi pabitale Yesu nyi kabingilo ka matemuki.”

11 Na namuene eyilu dishitukie na talayi! kubaadi nfualasa tooka. Na abetanyina yawa baadi mushale kuanka bu Sha lulamato na A binyibinyi, na atshibi biimu na kulua ngoshi na kululama. 12 Meso aaye e nka bu ndimi ya kaalo na ku mutue kuaye kui bifulu bia bufumu bibungi. E na eshina difundibue, dish’adiuku ungi muntu anka aye nabene, 13 na mmufuale kilamba ki na mabashi* a mase, na abamuitanyina bu Eyi di’Efile Mukulu. 14 Dingi biluilo bia muiyilu bibamulondanga ku ma nfualasa atooka, na babaadi bafuale bilamba bitooka bia lin ebuwa. 15 Na mukanua muaye amutuuku lupete lua ngoshi lula lui maashi luadia kutapa nalo miilo na akebakunkusha na mukombo wa kiamo. Dingi nnaye afuntu kiengielo kia nsungu ibukopo y’Efile Mukulu Sha bukome boso. 16 Pa kilamba kiaye kia panundu, oolo, p’etankanta* diaye p’eshina difunde’shi: Nfumu a ba nfumu na Muanana a ba muanana.

17 Namuene dingi muikeyilu muimane mu nguba, na belele musaase n’eyi di bukopo, aye nkulungula tonyi toso atupapama munkatshi mu’eyilu’shi: “Fikayi pano nuibungie ku kidibua kikata kia kiolua ki’Efile Mukulu, 18 bua’shi nudie muita wa ba nfumu na muita wa bakata ba basalayi na muita wa bantu be na bukome na muita wa nfualasa na wa baaba bashale kuanka, na muita wa bantu boso be bulungantu na wa ba mpika, bapeela na bakata.”

19 Na namuene nyema a bukielo, na ba nfumu ba pa nsenga na biluilo biabo mbebungie pamune bua kulua ngoshi na yawa baadi mushale ku nfualasa na kiluilo kiaye. 20 Na nyema a bukielo baadi mukuatshibue pamune na mutemuki a madimi baadi akitshi bitunduilo kumpala kuaye bibaadi mulubishe nabio baaba babapetele kitunduilo kia nyema a bukielo na baaba abalanguila kinfuanyi kiaye. Na babaadi bebeele abo boso babidi na muwa muishiba aditembe kaalo na nsufule. 21 Kadi baaba babashadile, babaadi bebayipee na lupete lula lubaadi alutuuku mukanua mua yawa baadi mushale ku nfualasa. Na tonyi toso tubaadi tuikute muita wabo.

20 Na namuene muikeyilu afiki muiyilu na lufungula lua ku buina bula na mmukuate lukano* lukata muiyasa diaye. 2 Bakuatshile dragon, nyoka a ku kibangilo, muikale Diabulu na Satana, na nkumuanya bua bipua 1 000. 3 Bamusumbuile mu buina bula na ebufunga, na nkuela kitampi kunundu bua’shi tapambushanga dingi miilo mpa na apafiki bipua 1 000 ku nfudiilo. Kunyima kua biabia abitungu’shi bamuposole bua kapindi kapeela.

4 Na namuene ma nkuasa a bufumu, na Efile Mukulu bapeele baaba babaadi bashale muanka matalua a kutshiba kiimu, oolo, namuene miuwa* ya baaba babaabadi bayipee* muanda babatushishe bukamonyi pabitale Yesu, na muanda babakuile pabitale Efile Mukulu, na baaba bashibaadi balanguile nyema a bukielo na kinfuanyi kiaye na bashi bapete kitunduilo mu mapala aabo na kuiyaasa diabo, babapetele dingi muwa na abo nkukunkusha bu ba nfumu na Nkidishitu munda mua bipua 1 000. 5 (Bafue babashadile tababaadi bapetuule muwa mpa na ku nfudiilo kua bipua 1 000.) Luno nyi ndusangukilo lua kumpala. 6 Basha muloo na ba kishila mbaaba boso abapete lusangukilo lua kumpala; muanda lufu lua kabidi talui na matalua kuabadi, anka abakekala ba tshite muakuidi b’Efile Mukulu na ba Nkidishitu, na abakakunkusha naye bu ba nfumu munda mua bipua 1 000.

7 Kadi apakapu bipua 1 000, abakapoosola Satana mu lukano luaye, 8 na akatuuku bua kupambusha miilo ku mapaka ananka a nsenga, oolo, Goge na Magoge bua kuibabunga ku ngoshi. Bungi bua bano bantu bui nka bu lusenga lua ku kalunga ka mema. 9 Na babapalakene pa nsenga yoso ishima, nkuifunyisha kishalelo kia beselele na kibundi kifudiibue. Anka kaalo kabafikile muiyilu na nkuibapiisha. 10 Na Diabulu baadi ebapambusha, abamusumbuile muishiba dia kaalo na nsufule, mutamuikalanga nyema a bukielo na mutemuki a madimi na abakakiengieshibua* bufuku na kanya bua loso.

11 Na namuene nkuasa a bufumu mukata tooka na Yawa baadi mushale muanka. Na nsenga n’eyilu bibasuukile kumpala kuaye, na takubaadi dingi mbalo su ngimune buabio. 12 Na namuene bafue, bakata na bapeela bemane kumpala kua nkuasa a bufumu, na Efile Mukulu bafunguile mifungofungo. Anka ungi mufungofungo ubaadi ufunguulue; nyi mmufungofungo wa muwa. Bafue babaadi basambishibue muyile mianda ibaadi ifunde mu mifungofungo muyile bikitshino biabo. 13 Kalunga ka mema kabatuushile bafue babaadi muanka, na lufu na Mashama* bibatuushile bafue babaadi muanka, na babaadi basambishe muntu oso muyile bikitshino biaye. 14 Na babelele lufu na Mashama muishiba dia kaalo. Eshiba dia kaalo adilesha lufu lua kabidi. 15 Dingi muntu oso shibaadi n’eshina diaye difundibue mu mukanda wa muwa abamuelele muishiba dia kaalo.

21 Na namuene eyilu dipia na nsenga ipia, muanda eyilu dia kala, na nsena ya kala bibashimiine, na kalunga ka mema takakii kuanka. 2 Namuene dingi kibundi kiselele, Yelusalema Mupia, akifiki muiyilu kui Efile Mukulu, kibaadi kilumbuulue nka bu muana mukashi akiebe kutuela ku bulunda, elumbuula bua mulume aaye. 3 Paapa napushishe eyi dibukopo adikatukila ku nkuasa a bufumu adiamba’shi: “Talayi! Kishalelo ki’Efile Mukulu ki na bantu, na Efile Mukulu akashaala nabo. Na abakekala muilo waye na Efile Mukulu nabene akekala nabo. 4 Na akakumuna mpolo yoso ku meso kuabo na lufu t’alukekala kuanka dingi, t’akukekala dingi sunga mmaalo sunga nkudila sunga mmitanyo. Mianda ya kala ibashimina.”

5 Na yawa baadi mushale ku nkuasa a bufumu bambile’shi: “Talayi, nkuete kukita bintu bioso bipia.” Na aye nkuamba dingi’shi: “Funda, muanda ano mayi nga lulamato* na nga binyibinyi.” 6 Na bandunguile’shi: “Bibakumbana! Nnami Alfa na Omega,* mbangilo na nfudiilo. Yawa oso e na nyota nakamupa mema a ku nsulo ya mema a muwa buntu. 7 Na oso akatshimuna akapiana bino bintu, nakekala Efile Mukulu aaye n’aye akekala muana ande. 8 Kadi bua ba sha moo, na bantu bashi na lukumiino na be butete mu butshiafu buabo, na bantu abayipayishenaa na ba ntambushi a masandi* na baaba abakitshi mianda ya malenganyi, na balanguidi ba ma nkishi na ba sha madimi boso, nfudiilo aabo akekala muishiba dia kaalo na nsufule. Dino eshiba adilesha lufu lua kabidi.”

9 Umune a ku mikeyilu musambobidi ibaadi na bibakudi musambobidi, biule na bipupa musambobidi bia nfudiilo bafikile andungula’shi: “Fika, nakakulesha mukashi abebakila, mukashi a Muana a mukooko.” 10 Ku bukuashi bua kikudi kiselele bantuadile ku muengie ukata na ula, aye nkundesha kibundi kiselele, Yelusalema baadi ayiki muiyilu kui Efile Mukulu 11 na kibaadi na ntumbo y’Efile Mukulu. Kibaadi akibadima nka bu ebue dia muulo wibukopo, nka bu ebue dia jaspe adipenyapenya bu ebue dia kristale ditooka soo. 12 Kibaadi na bimano bikata bila na kibaadi na biibi 12 na mikeyilu 12 ku biibi, na ku biibi kubaadi kufunde mashina a bisamba 12 bia bana ba Isalele. 13 Kutunduka nguba, kubaadi biibi bisatu, kunundu biibi bisatu, kuushi biibi bisatu, na kupona nguba biibi bisatu. 14 Bimano bia kibundi bibaadi dingi na mabue a kitako 12 na kubaadi mashina 12 a batumibua 12 ba Muana a mukooko.

15 Na yawa baadi esamba nami baadi mukuate elengie dia ôlo bu kipimo buadia kupima kibundi na biibi biakio na bimano biakio. 16 Na kibundi kibaadi na mpese inanka imumune, bula buakio bubaadi mumune na buipi buakio. Na bapimine kibundi n’elengie, kibaadi na stade* 12 000; bula na buipi na bula buakio bua muiyilu, bubaadi mumune. 17 Baadi mupime dingi kimano kiatuuka maboko* 144, muyile kupima kua muntu bikale dingi kupima kua muikeyilu. 18 Mudimba ubaadi wibakibue n’ebue dia jaspe, na kibundi kibaadi kia ôlo tooka e bu lumueno. 19 Bitako bia kimano kia kibundi bibaadi bilengieshibue na mabue a muulo a mishindo yoso: kitako kia kumpala kibaadi ki’ebue dia jaspe, kia kabidi kibaadi ki’ebue dia safire, kia kasatu kibaadi kia shalsedone, na kia kananka kibaadi kia emerode, 20 kia katano kibaadi kia sardonixe, kia kasamombo kibaadi kia sarduane, kia musambobidi kibaadi kia krizolite, kia muanda kia berile, kia kitema kibaadi kia topaze, ki’ekumi kibaadi kia krizoprase, ki’ekumi na umune kia yasente, na ki’ekumi na ibidi kibaadi kia ametiste. 21 Dingi biibi 12 bibaadi mabue a muulo 12; kiibi kioso babaadi bekikite n’ebue dimune dia muulo. Na museese ukata wa mu kibundi ubaadi wa ôlo mukile buwa, nka bu lumueno alumueka lupese na lupese.

22 Ntshinaadi mumone ntempelo mu kibundi nya, muanda Yehowa Efile Mukulu Sha bukome boso nyi ntempelo aakio, mpa na Muana a mukooko. 23 Na takii na lukalo lua mueshi sunga nguba bua kuikimunyika muanda ntumbo y’Efile Mukulu ayikimunyika, na elampi diakio Mmuana a mukooko. 24 Na miilo ayikatambuka ku bukunkushi bu’etaata diakio, na ba nfumu ba pa nsenga abakemufuisha yabo ntumbo. 25 Biibi biakio tabikekala bifungie munda mu’efuku dishima, muanda bufuku t’abukekala muanka. 26 N’abakemufuisha ntumbo na kinemo kia miilo. 27 Anka bintu bioso bi butete na abakitshi mianda mu mushindo upatakane, na ba sha madimi t’abakemutuele; anka baaba bafundibue mu mufungofungo wa muwa wa Muana a mukooko nyi abakemutuele.

22 Akupu muikeyilu bandesheshe muela wa mema a muwa atooka nka bu kristale, ubaadi autukila ku lupuna nsulu lu’Efile Mukulu na lua Muana a mukooko 2 ubaadi awalala munkatshi mua museese ukata wa kibundi. Ku mpese yoso ibidi ya muela kubaadi mitshi ya muwa ibaadi ayipa bikuba misusa 12, ibaadi ayituusha bikuba biayo ku mueshi oso. Mapupua a yaaya mitshi abaadi aabuku miilo ku maladi.

3 Na takuikala dingi mulua. Na lupuna nsulu lu’Efile Mukulu na lua Muana a mukooko aluikala mu kibundi, na ba mpika baye abakamufubila mufubo wa kishila; 4 na abakamono mpala yaye na eshina diaye, adikala mu mapala aabo. 5 Na bufuku t’abukekala kuanka dingi, na t’abakekala na lukalo lu’etaata di’elampi sunga dia nguba Muanda Yehowa Efile Mukulu akebamunyika etaata diaye na abakamunana bu ba nfumu bua loso.

6 Muikeyilu bandunguile’shi: “Ano mayi nga kukulupila* na nga binyibinyi; oolo, Yehowa Efile Mukulu akulaa ku bukuashi bua batemuki, mmutume muikeyilu aaye bua kulesha ba mpika baye mianda i na kia kukitshika binobino. 7 Tala! Nkuete kufika bukidi. Sha muloo ngiawa atumikila mayi a butemuki e mu uno mufungofungo.”

8 Oolo, ami Yowano nyi baadi apusha na kumona ino mianda. Paneyipushishe na kuiyimona, nakunamine ami nkupona ku ngua ya muikeyilu baadi andesha ino mianda bua kumulanguila. 9 Kadi bandunguile’shi: “Dimuka! Tokitanga biabia nya! Ne muikale mpika nobe na a bakuenu batemuki na a baaba bakuete kutumikila mayi e mu uno mufungofungo. Languila Efile Mukulu.”

10 Bandunguile dingi’shi: “Tuelanga kitampi ku mayi a butemuki bua uno mufungofungo, muanda kipungo kitshibibue takidi pepi. 11 Yawa shi mululame atungunukie mu kukutua kuaye kua kululama, na yawa e na butshafu atungunukie mu butshafu buaye; kadi yawa mululame atungunukie na kuikala mu kululama kuaye, na yawa eselele, atungunukie na kuikala mu buiselele.

12 “‘Tala! Nkuete kufika bukidi, na efuto diantuusha ne nadio bua kufuta muntu oso muyile bikitshino biaye. 13 Nnami Alfa na Omega,* a kumpala na a nfudiilo, mbangilo na nfudiilo. 14 Baasha muloo mbaaba abatumpu misapi yabo bua’shi bekale na matalua a kuenda ku mitshi ya muwa na buabadia kutuelela mu kibundi ku biibi biakio. 15 Paasha pe mbua,* na baaba abakitshi mianda ya malenganyi na bantu abakitshi lukiebanokiebano* na bantu abayipayishena na balanguidi ba ma nkishi na muntu oso mufule madimi na muipaane ku madimi.’

16 “‘Ami Yesu, nyi mutume muikeyilu ande bua kutuusha bukamonyi pabitale ino mianda bua tukongie. Ne mushi na lutandua lua Davide na luenyenyi lua namashika alubadima.’”

17 Kikudi na mukashi muibakilue abatungunuka na kuamba’shi, “Fika!” na yawa oso apusha ambe’shi: “Fika!” na yawa oso e na nyota afikie; na yawa oso akumiina aate mema a muwa buntu.

18 “Nashinkamiisha muntu oso apusha mayi a butemuki e mu uno mufungofungo’shi: Su muntu akumbasha kintu ku ino mianda, Efile Mukulu akamukumbeesha bipupa bifundibue mu uno mufungofungo; 19 su muntu akatusha kintu ku mayi a mu mufungofungo wa buno butemuki, Efile Mukulu t’akamutadiila bua kudia ku mitshi ya muwa na kutuela mu kibundi kiselele, mianda ifundibue mu uno mufungofungo.

20 “Yawa atuusha bukamonyi pabitale ino mianda akula’shi: ‘Oolo, nkuete kufika bukidi.’”

“Amene! Fika, Muanana Yesu.”

21 Kalolo ka Nfumuetu Yesu kekale na beselele.