Mukanda awitulondela myanda i mu Bible
UNO mukanda awitulondela myanda y’eyendo. Mbeyate mu Bible, mukanda ukile mikanda yooso mu nsenga ishima. Myanda i mu uno mukanda ayikulesha myanda ibakitshikile mu nsenga kubanga pababangile Efile Mukulu kupanga bintu mpa na ano mafuku. Ayitulesha dingi milayilo y’Efile Mukulu pabitale mafuku aafiki.
Uno mukanda aukukwasha bwashi oukye mu kikoso myanda i mu Bible. Awisambila pabitale bantu be mu Bible na myanda ibabakitshine. Na dingi aulesha lukulupilo lukata lwa muwa wa looso mu mpaladiso pa nsenga lwabadi bape bantu kwi Efile Mukulu.
Uno mukanda aulondo myanda 116. Ino yooso mbeyabuule mu bipindji mwanda. Esaki di ku mbangilo a kipindji kyooso adyakula mu kikoso myanda i mu kyakya kipindji. Mbalongye myanda muyile mu bipungo byaayo. Bino abikukwasha bwashi oukye kipungo kibakitshikile myanda kampanda pa kukidila ku bipungo bya ingi myanda.
Mbalonde myanda mu ngakwilo mubofule. Baana bebungi bakwanudi mbakumbeene kwiyibadika abo banabeene. Anwe ba nambutwile anukyebe kumona shi baana beenu bakinga abekala na muloo pa nwibabadikila uno mukanda misango ibungi. Anukyebe kumona shi mu uno mukanda mwi myanda ayisangasha baana mpa na bantu bakulu.
Ku nfudiilo kwa mwanda ooso, mbeele ma verse. Bibuwa wekale obadika ano ma verse ooso, mwanda mwamwa nyi mwabadi baate myanda yobadika.