Mwanda wa 24

Yoosefe atompo bakwabo

YOOSEFE akyebe kuuka su batuutu baaye 10 bakii na myanda ibukopo na mashimba ebubi. Byabya bamba shi: ‘Nwi ba kasuku munfindo. Nwi bafikye bwa bekyeela eumbo bwa kumona padidi dibofule.’

Abo nkwamba shi: ‘Nya, tatwi bakasuku munfindo nya. Twi bantu balulame. Booso bwetu twi baana ba muntu umune. Tubaadi 12. Kadi umune a kwatudi takii padi nya, na dingi mukinga a ku booso e lelo uno kwi nsheetu.’

Yoosefe akitshi bu apeele kyabamba. Balama tutu aaye abetanyinaa bu Simeone mu lukano, na balekye bangi bwashi balukye kwabo na bya kudya. Kadi bebalungula shi: ‘Panwaluka, nuntwadile mukwenu mukinga.’

Pababaluka kwabo ku Kanaana, abalungula nshabo Yaakobo byooso bibaadi bikitshikye. Yaakobo benyongola bikata. Babanga kudila shi: ‘Yoosefe takii padi, Simeone takii padi. Tanungata dingi mwana ande mukinga Benyamine nya.’ Kadi pababanga kupwa bya kudya, Yaakobo bebalekye bwashi bende na Benyamine mu Ejiipitu bwashi bakapete bya kudya.

Binobino Yoosefe bamono bakwabo abafiki. E na muloo wa kumona mwina aaye Benyamine. Binyibinyi takwi muntu su ngumune auku shi yawa muntu mukata nyi Yoosefe. Binobino Yoosefe akitshi mwanda umune bwa kutompa bakwabo ba mwa nshaaye 10.

Batumu bafubi baaye bwashi baushe ma mpaya aabo na bya kudya. Kadi kushi kulungula bakwabo, beelesha ekopo dyaaye dya kyamo kya muulo mu mpaya a Benyamine. Akupu abakatuka na abatambuka kipindji mwishinda, ndjo Yoosefe batumu bafubi baaye bwashi bebalonde. Pababebabanga, bafubi abebalungula shi: ‘Bwakinyi nubayibi ekopo dya kyamo kya muulo dya nfumw’etu?’

Bakwabo abamba shi: ‘Tatwi bayibe ekopo dyaaye nya. Uno abasangana na dino ekopo afwe.’

Byabya bafubi ababanga kukimba mu ma mpaya, na abasangana ekopo mu mpaya a Benyamine, nka byomono pano. Bafubi abamba shi : ‘Anwe alukayi booso kwi nsheenu, kadi Benyamine ashaala neetu.’ Binobino bakwabo na Yoosefe ba mwa nshaye 10 abakyebe kukita kinyi?

Booso abaluka na Benyamine ku nshibo ya Yoosefe. Yoosefe alungula bakwabo shi: ‘Nwi bakumbeene kwaluka kwenu, kadi Benyamine ashaala pano bu mpika ande.’

Paapa Yuuda bakula na bamba shi: ‘Su nealusha kwi nshaami kushi uno nsongwalume, nshaami akyebe kufwa mwanda mumufule ngofu. Binobino, ndekye nshaale mpika oobe, nsongwalume alukye ku nshibo.’

Yoosefe mukumbeene binobino kumona shi bakwabo abapu kwaluluka. Tabakii na myanda ibukopo na mashimba ebubi nya. Tubande kutala akikyebe kukita Yoosefe binobino.

Kibangilo 42:9-38; 43:1-34; 44:1-34.