Mwanda wa 78

Eyaasa adifundu ku mudimba

NKINYI kikwete kukitshika pano? Bantu be na feete mukata. Nfumu a mu Babilone mwitanyine bantu kinunu ba kineemo. Bakwete kutoma na kudya mu ma kopo na malonga a oòlò na a kyamo ky’ebakanyi bibabadi baate mu ntempelo a Yehowa ku Yeelusaleme. Kadi, mususa umune, minwe y’eyaasa dya muntu dibatuuku na dibabanga kufunda ku mudimba. Bantu booso bakwete kutshiina.

Belshasare, mwikulu a Nabukodonosore nyi taadi nfumu. Beele musaase bwashi bamutwadile basha binangu baaye. Aye nkwamba shi: ‘Muntu ooso abala kino kifundwe na ampa kipatulwilo kyakyo, apete bwedi bukata na ashala bu muntu a kasatu mu bufumu.’ Kadi ta kwi muntu su ngumune a ku basha binangu mukumbeene kubadika bishima bi ku mudimba, sunga kutuusha kipatulwilo kyabyo.

Nyin’aaye na nfumu bapushishe tuleo na aye nkutwela mu nshibo ikata ya kudiila. Aye nkulungula nfumu shi: ‘Tokumanga kutshina. Kwi muntu mu bufumu boobe auku b’efile beselele. Pabaadi nshoobe kulu Nabukodonosore mu bufumu bamutudile bu mukata a basha binangu. Eshina dyaaye nyi Danyele. Tuma bantu betanyine Danyele, etulondele kipatulwilo kya bino bishima.’

Paapa, babatwesheshe Danyele. Aye baapu kupela bwedi bubabamupele, Danyele babangile kwakula bwakinyi Yehowa baadi mukatushe Nabukodonosore nshaaye kulu na Belshasare ku lupuna nsulu. Aye nkwamba shi: ‘Yehowa bamunyokyele, mwanda baadi mwitatule.’

Danyele balungwile Belshasare shi: ‘Anka obe twe mwishe eshimba dyoobe sunga wekala muukye byooso byabya, kadi we na kwitatula nka bu bibaadi Nabukodonosore. We mutwale makopo na malonga bya mu ntempelo a Yehowa we mudiila na kwimutomena. We mulangwile b’efile ba mitshi na ba mabwe, twe munemekye Mupangi etu Mukata. Nyi bwakinyi Efile Mukulu batumu eyaasa bwashi difunde bino bishima.’

Danyele bambile dingi shi: ‘Tala kibaadi kifundwe: “MENE, MENE, TEKELE na PARSINE.”’

‘MENE nkwamba shi Efile Mukulu mubadikye bipwa bya bufumu boobe na bebufudiisha. TEKELE nkwamba shi babakupimi pa kipimo na babakusangana twe mukumbane. PARSINE nkwaba shi bufumu boobe mbutshibuulwe na mbebupe beena Mediya na beena Perse.’

Pabaadi Danyele kwete kwakula, beena Mediya na beena Perse ababangile kulwisha Babilone ngoshi. Babakwatshile kibundji abo nkwipaa Belshasare. Bishima bibaadi bufunde eyaasa ku mudimba bibakumbeene nka bwabwa bufuku! Kadi nkinyi akyebe kukitshikila beena Isaleele binobino? Atukyebe kwibimona, kadi tubande kutala kibaadi kifwile Danyele.

Danyele 5:1-31.