Mukanda wa kasaka ka Bakunkushi Bakulu
Mukwetu a kifulo:
Anka bu byouku, Bible etulondela myanda ya bantu ngofu. Bebungi abaadi bantu basha bulamate, abaadi bafumankane na nkalakasho i mumune na yeetu. Abaadi na “malaka [nkalo] anka bu’twe.” (Jaake 5:17, Kilombeno kipya 2014) Bangi abaadi babofule pa mwanda wa nkalakasho na twinyongoshi. Bangi namu abaadi bebatape ku mashimba ngofu kwi bakwabo ba mu kifuko sunga beena kukumiina nabo. Na dingi, bangi abaadi abetopeka pa mwanda wa bilubilo byabo’bo banabeene.
Bano bantu abaadi balekye Yehowa bwa losoo su? Ooo. Bebungi be nka bu mufundji a misambo baadi mutekye shi: “Nee mupambukye bu mukooko ushimine. Kimbuula mufubi oobe, mwanda ntshii mulube mayi oobe.” (Misambo 119:176) Ano mayi ngakutale namu su?
Yehowa t’alubaa balangwidi baye abapambuka munkatshi mwa mwilo waye. Pa mutwe pa byabya, ebakimbuulaa—ku bukwashi bwa beena kukumiina nabo. Bu kileshesho, tala bibaadi Yehowa mukwashe mufubi aaye Yoobo bapetele makyenga—bu bulanda, kushimisha kwa bana baaye, na mukumbo wi bukopo. Yoobo baadi munyingiile dingi bishima abitapa bibaabadi abamwamba kwi bantu abaadi abafiki mu nkamukwasha. Kadi ta mmutape Yehowa mongo nya, sunga mbibaadi mushimishe binangu ingi nsaa. (Yoobo 1:22; 2:10) Mbikunyi bibaadi Yehowa mukwashe Yoobo bwashi apetuule ngyelelo a binangu e buwa?
Mushindo umune ubaadi Yehowa mukwashe Yoobo nyi nkubukwashi bwa mwina kukumiina naye abetamina bu Eliwu. Nsaa ibaadi Yoobo amulondela nkalakasho yaaye, Eliwu baadi amuteemesha na lukalo lwa kumukwasha. Nkinyi kyakyebe kwakula? Akyebe kuteula Yoobo, kumutopeka sunga kumukwatshisha buufu? Eliwu akyebe kwimona bu’ye mukile Yoobo su? Ta mmukite byabya nya! Ku bukwashi bwa kikudi ki selele, Eliwu bambile shi: “Efile Mukulu etumono ami n’obe mu lutshi lumune. Ami nabumbilwe namu’nyi nka kwima.” Ndjo aye nkushinkamiisha Yoobo shi: “T’we na kya kuntshîna mô, ooo. Nki na wa nkutonwena meso, nyâ.” (Yoobo 33:6, 7, EEM) Pamutwe pa kutenteka Yoobo bungi bushito, na kifulo kyooso, Eliwu batuushiishe malango na bishima bya kumunyingisha bibaadi nabyo lukalo.
N’atwe namu, uno broshire tubamulumbuula mu kyakya kipaso kimune. Kya kumpala, twi bateemeshe bantu abekalanga babofule na kutaluula kalolo nshaleelo na ngakwilo aabo. (Myeele 18:13) Akupu, tubalukiila mu Bifundwe, tubataluula ku bukwashi bwa luteko myanda ayileesha mushindo ubaadi Yehowa mukwashe bafubi baaye ba kala, abaadi bafumankane na yaaya nkalakasho imune. Ku nfudiilo, tubasanga yaaya myanda ya mu Bible na myanda ikwate bakwetu ba ano mafuku, ndjo tubatuusha uno broshire. Na kalolo kooso, atukutekye bwashi obadikye ino myanda i mu uno mukanda. Shinkamisha shi twi bakufule ngofu.
Kasaka ka Bakunkushi Bakulu ka Batemwe ba Yehowa