Muana mukashi ku mushima wa mema

Kunyima kua Pasaka, Yesu na balongi baaye abaadi balukiile ku Ngalileya, abo nkukidila dia ku Samadiya. Yesu baafikile peepi na musoko wa Sikare ayimana pa mbalo yabetanyina bu mushima wa Yakobo. Pabaadi Yesu ayikisha, balongi baaye abayile mu kuula bia kudia mu kibundi.

Muana mukashi bafikile ku mushima mu kutapula mema. Yesu bamulunguile’shi: “Mpe namu mema a kutoma.” Yawa nkuamba’shi: ‘Buakinyi w’esamba nami? Ami ne mukashi muina Samadiya. Bena Yunda t’abesambaa na bena Samadiya nya.’ Yesu nkumulungula’shi: ‘Su bodia kuuka’shi ne nnanyi, bodia kunteka mema, kadi nakupa mema a muwa.’ Mukashi bayipuishe Yesu akula’shi: ‘Biabia abipatula kinyi? Tue na sunga kia kutapuila.’ Yesu bambile’shi: ‘Oso atomo mema a mmupa taayikala dingi na nyoota nya.’ Mukashi nkumulungula’shi: “Muanana, mpe namu aa mema.”

Yesu nkumualuula’shi: ‘Nda okafikie na mulume oobe kuno ku mushima.’ Mukashi nkuamba’shi: ‘Ntshi na mulume’mi.’ Yesu namu’shi: ‘Buakula kia binyibinyi.’ We muibakilue misuusa itaano, kadi binobino, we na mulume shi oobe.’ Mukashi nkumulungula’shi: ‘Namono’shi we mutemuki. Muilo wande ukuete kulanguila Efile Mukulu pa uno muengie, kadi bena Yunda abaamba’shi tui nkalanguila nka penda ku Yelusalema. Nakumiina’shi apakafiki Mesiya, aketulongiesha bia kulanguila.’ Akupu Yesu nkumulungula kintu kiashalunguile ungi muntu amba’shi: ‘Nnami winyi Mesiya uno.’

Mukashi nkuenda lubilo paasha mu nkalungula bena Samadiya’shi: ‘Namono’shi na nkapeta Mesiya. Auku mianda yande yoso. Fikayi numone!’ Abo nkuenda naye mpaa na ku mushima, abo nkuteemesha Yesu kualongiesha.

Bena Samadiya nkuitanyina Yesu buadia kushaala nabo mu lupata luabo. Munda mua mafuku abidi, aye nkuibalongiesha, na bantu bebungi nkulesha lukumiino muadi. Akupu abo nkulungula mukashi a mu Samadiya’shi: ‘Atue abaapu kuteemesha uno muntu, tubatundula’shi mmupaashi mbinyibinyi a ba pa nsenga.’